DZIKO YADZALA NA NYATWA

2 | Phatisirani Mwadidi Kobiri Yanu

THANGWI YANJI MPHYAKUFUNIKA

Ntsiku zonsene, anthu azinji asaphata basa mwakuwanga toera kugumana pinthu pyakufunika mu umaso. Mwakutsukwalisa, nyatwa za dziko ino zisacitisa pyenepi kukhala pyakunentsa. Thangwi yanji?

Mu pisa pyakuti muli na nyatwa yakusowa kobiri, pinthu ninga cakudya na nyumba toera kukhala pisadhula kakamwe.
Nyatwa yakusowa kobiri inakwanisa kucitisa anthu azinji kuluza mabasa awo peno kuphata basa toera kutambira kobiri yakucepa.
Cidengwa cacibaliro cingacitika mbuto zamalonda, nyumba na pinthu pinango pisafudzika, pontho pyenepi pisacitisa kuti anthu azinji akhale akutcerenga.

Pinthu Pinafunika Imwe Kudziwa

Mungadziwa kuphatisira mwadidi kobiri yanu, nee munathabuka pangaoneka nyatwa.
Kukhala na kobiri izinji, kutambira kobiri, peno kukoya kobiri nee ndi pyakunyindirika thangwi kobiri isamala.
Pali na pinthu pyakuti kobiri nkhabe kugula ninga kutsandzaya na kukhala na banja yakuphatana.

Pinafunika Imwe Kucita Cincino

Bhibhlya isalonga: “Natenepa, khala tiri na cakudya na cakubvala, tikomerwe na pinthu pyenepi.”—1 Timoti 6:8.

Ife tingakomerwa na pinthu piri na ife, tisatsandzaya tingakhala na pinthu pyakufunika mu umaso. Pyenepi ndi pyakufunika makamaka tingakhala na kobiri yakucepa.

Toera mukomerwe na piri na imwe, musafunika kuphatisira mwandzeru kobiri. Mungafuna kakamwe kukhala na umaso wadidi kupiringana kobiri inatambira imwe, nyatwa yanu yakusowa kobiri nee inamala.

MUSAFUNIKA KUCITANJI? — Pinthu Pyakuti Pinakuphedzani

Mu ndzidzi unathimbana imwe na nyatwa yakusowa kobiri, pinthu ipi pinakuphedzani toera kuphatisira mwadidi kobiri yanu

CEPESANI PINTHU PINAFUNA IMWE KUGULA

Cepesani pinthu pinafuna imwe kugula

Lekani kubvunga kobiri na cinthu cakuti nee ndi cakufunika maka, kusiyapo khala mwandimomwene musacifunadi. Bvundzikani tenepa: ‘Ine ndisafunikadi kukhala na karu? Mbuto mwa kugula masamba, ine nee ndinakwanisa kutceka masamba?’
Mbamudzati kugula cinthu, bvundzikani: ‘Ine ndisafunadi cinthu ceneci? Ndinakwanisa kucilipa?’
Lembesani madzina anu khala pacisa canu mautongi ali kutambirisa pinthu.

“Ninga banja, ife tacedza kuti tinaphatisira tani kobiri. Ife tasiya kubvunga kobiri izinji na ubalangazi, pontho tasiya kucita pinthu pinango pyakuti pisaphataniza ubalangazi. Ife tatoma kukhunganya cakudya cakukhonda dhula.”—John.

CITANI NDANDANDA YA KOBIRI INAFUNA IMWE KUPHATISIRA

Citani ndandanda ya kobiri inafuna imwe kuphatisira

Bhibhlya isalonga: “Munthu waphinga pinanyerezera iye kucita pisafamba mwadidi, mbwenye onsene anacita pinthu mbadzati kunyerezera mwadidi anatcerenga.” (Misangani 21:5) Kucita ndandanda ya pinthu pinafuna imwe kugula, pisaphedza toera mukhonde kubvunga kobiri izinji kupiringana inatambira imwe.

Pakutoma, lembani kobiri inadikhira imwe kutambira pa mwezi.
Caciwiri, citani ndandanda ya pinthu pinakubvungirani kobiri pa mwezi, buluka penepo onesesani kuti ndi pinthu pipi pinakubvungirani kobiri.
Mungamala landanisani kobiri inatambira imwe na inabvunga imwe. Pingakwanisika, siyani kugula pinthu pinango toera musale na kobiri.

“Miyezi yonsene, ife tisacita ndandanda ya kobiri inatambira ife na inabvunga ife. Tisayesera kukoya kobiri toera kuiphatisira pangaoneka pinthu mwa ndzidzidzi peno toera kuiphatisira ntsogolo. Pyenepi pisatiphedza toera tikhonde kudzudzumika thangwi tisadziwa kale kuti tinaphatisira tani kobiri yathu.”—Carlos.

CALIRANI MANGAWA PENO KOYANI KOBIRI

Calirani mangawa peno koyani kobiri

Citani ndandanda yadidi toera kupungula mangawa ali na imwe, pontho pingakwanisika calirani kusosa mangawa anango. M’mbuto mwace, yeserani kukoya kobiri toera mukwanise kugula pinthu pinafuna imwe.
Koyani kobiri miyezi yonsene toera kuiphatisira ntsogolo, peno pangaoneka pinthu pyakukhonda dikhira.

PHATANI BASA MWAPHINGA

Bhibhlya isalonga: “Mitundu yonsene ya basa yakuwanga isaphedza.”—Misangani 14:23.

Phatani basa mwaphinga

Khalani na maonero akulinganira thangwi ya basa yanu. Maseze ikhonde kukhala basa ikhafuna imwe, iyo isapitiriza kukupasani kobiri.
Khalani nyabasa waphinga na wakunyindirika. Pyenepi pinakuphedzani toera kupitiriza pa basa, pontho pinakuphedzani kuti mungaluza basa, mugumane inango mwakukhonda nentsa ntsogolo.

“Ine ndisaphata basa yonsene inagumana ine maseze ndikhonde kukomerwa na basa ineyi, peno nditambire kobiri yakucepa. Ndisayesera kukhala nyabasa wadidi, pontho ndisacita basa yadidi ninga ndi yanga.”—Dmitriy.

Khala imwe muli kusaka basa . . .

Citani pinthu. Pitani ncibverano na ma empreza akuti mbamudafuna kuphata basa, ngakhale kuti nee ali kucemera anthu toera kuphata basa. Pangani axamwali na acibale anu kuti muli kusaka basa.
Khalani na maonero adidi. Midzidzi inango pinanentsa kugumana basa ninga inafuna imwe.