DZIKO YADZALA NA NYATWA

3 | Wangisani Uxamwali Wanu na Andzanu

THANGWI YANJI MPHYAKUFUNIKA

Nyatwa za dziko ino zisacitisa anthu azinji kukhala akudzudzumika. Na thangwi ineyi, mwakukhonda dziwa anthu anango asacita pinthu pinapangiza kuti nee asafuna andzawo.

Anthu asakomerwa kukhala okhene mbakhonda kucedza na axamwali awo.
Anyakumanga banja asalongezana kazinji kene.
Anyakubala nee asatsalakana peno kubvesesa nyatwa zinatamba anawo.

Pinthu Pinafunika Imwe Kudziwa

Mphyadidi kukhala na axamwali, thangwi iwo asatiphedza toera tikhale akutsandzaya, pontho asatiwangisa makamaka m’midzidzi ya nyatwa.
Nyatwa za dziko ino zinakwanisa kucitisa banja yanu kukhala yakukhonda kubverana munjira zakuti nee mukhazidikhira.
Ananu angabvesera peno angaona mphangwa zakuipa anakwanisa kukhala akudzudzumika kakamwe.

Pinafunika Imwe Kucita Cincino

Bhibhlya isalonga: “Xamwali wandimomwene asakufuna ndzidzi onsene, pontho iye ndi m’bale m’midzidzi ya nyatwa.”—Misangani 17:17.

Nyerezerani munthu wakuti asakuphedzani, pontho asadziwa kupereka uphungu wadidi. Kudziwa kuti alipo anakufunani kunakuphedzani toera mukwanise kupirira nyatwa zinatamba imwe.

MUNACITANJI? — Maonero Akuti Anakuphedzani

Mu ndzidzi wa nyatwa, citani pinthu ipi toera kuwangisa uxamwali wanu na andzanu

WANGISANI BANJA YANU

Wangisani banja yanu

Bhibhlya isalonga: “Mphyadidi kakamwe kukhala awiri kupiringana m’bodzi . . . Thangwi m’bodzi angagwa, unango anaphedza ndzace toera alamuke.” (Ekleziaste 4:9, 10) Anyakumanga banja asafunika kukhala ninga anyakutekenya ndeka akuti ali na cifuniro cibodzi cene, tayu ninga anyakutekenya ndeka akuti ali mu ndeka zakusiyana zakuti zisafuna kudhimana.

Wangisirani toera mukhonde kutsalakana mwakuipa ndzanu wa m’banja. Khalani wakupirira na wakulekerera.
Masumana onsene cedzani na ndzanu wa m’banja thangwi ya pinthu pyakuti pisafunika kutsalakanwa. Cifuno canu cisafunika kukhala cakumalisa nkandzo, tayu kulongezana.
Sakani ndzidzi wakucita pinthu pyakuti monsene musakomerwa napyo.
Kumbukani midzidzi yakutsandzayisa idacita imwe pinthu pabodzi, panango munakwanisa kuona mafoto adabulusa imwe pa ntsiku yanu yakumanga banja peno mafoto anango akutsandzayisa.

“Panango anyakumanga banja nee anabverana mu pinthu pyonsene, mbwenye pyenepi nee pisabveka kuti iwo nee anakwanisa kucita pinthu pabodzi. Iwo anakwanisa kucita pisankhulo pabodzi, buluka penepo mbaphedzana toera akwanirise pisankhulo pidacita iwo.”—David.

WANGISANI UXAMWALI WANU NA ANDZANU

Wangisani uxamwali wanu na andzanu

M’mbuto mwakudikhira basi ene kuphedzwa na axamwali anu, sakanimbo njira zakuaphedza. Imwe mungawangisa anango, musakhalambo wakuwanga.
Ntsiku zonsene pitani ncibverano na axamwali anu toera kudziwa kuti ali tani.
Bvundzani axamwali anu kuti asakwanisa tani kupirira nyatwa zakulandana na zinatamba imwe.

“Mu ndzidzi unatamba ife nyatwa, axamwali athu anakwanisa kutiphedza. Iwo anakwanisa kutipanga pinafunika ife kucita, ngakhale kutikumbusa basi ene pinthu pyakuti ife tisapidziwa kale. Axamwali athu asatifuna, pontho iwo asadziwa kuti ife tisaafunambo.”—Nicole.

PHEDZANI ANANU

Phedzani ananu

Bhibhlya isalonga: “Munthu asafunika kukhala wakucimbiza kubva, wakudembuka kulonga.” (Tiyago 1:19) Pakutoma panango ananu nee anakhala akusudzuka toera kukupangani nyatwa zawo peno pinthu pinaadzudzumisa, mbwenye mungakhala akupirira, iwo anakhala akusudzuka toera kukupangani piri muntima mwawo.

Phedzani ananu kuti akhale akusudzuka toera kulonga pinanyerezera iwo. Ana anango asakhala akusudzuka toera kucedza na anyakubalawo angakhala nkaru, angafamba pabodzi peno mu ndzidzi wakudya, m’mbuto mwakukhala pantsi mbakayang’anisana nkhope na nkhope.
Wangisirani toera ananu akhonde kuona kazinji kene mphangwa zakutsukwalisa.
Pangani ananu pinacita imwe toera banja yanu ikhale yakutsidzikizika.
Pfundzisani ananu toera adziwe pinafunika iwo kucita pangaoneka cidengwa, pontho yeserani kucita pyenepi pabodzi na iwo.

“Cedzani na ananu, pontho acitiseni kuti akhale akusudzuka toera kulonga mabvero awo. Panango iwo anagopa peno kukhala akudzudzumika mbakhonda kukupangani piri muntima mwawo. Lekani kukhala na manyadzo akupanga ananu kuti m’midzidzi inango imwe musakhalambo na mabvero ninga anewa, pontho apangeni pinacita imwe toera kukunda mabvero anewa.”—Bethany.