DZIKO YADZALA NA NYATWA

4 | Lekani Kuluza Cidikhiro

THANGWI YANJI MPHYAKUFUNIKA

Kudzudzumika thangwi ya nyatwa za n’dziko kunakwanisa kukhuya anthu munjira zakusiyana-siyana. Thangwi ya kutamba nyatwa zakusiyana-siyana, anthu azinji asaluza cidikhiro, pontho nee asakhulupira kuti pinthu pinadzakhala mwadidi. Munjira ipi?

Anango nee asafuna kunyerezera pya ntsogolo.
Anthu anango asamwa pyakumwa pyakuledzeresa, peno kuphatisira mitombwe yakuledzeresa toera kuduwala nyatwa zawo.
Anango asaona kuti mphyadidi kufa kwene. Iwo asabvundzika: “Thangwi yanji ndisafunika kupitiriza kukhala m’maso?”

Pinthu Pinafunika Imwe Kudziwa

Panango nyatwa zinathimbana na imwe ndi za ndzidzi wakucepa. Mwakukhonda dikhira, panango pinthu pinacinja mbapikhala pontho mwadidi.
Ngakhale nyatwa zanu zikhonde kucinja, pali na pinthu pyakuti musafunika kupicita toera mukwanise kupirira nyatwa zenezi.
Bhibhlya isapikira kuti nyatwa zinatamba ife zinadzamala. Cidikhiro ceneci ndi cakunyindirika.

Pinafunika Imwe Kucita Cincino

Bhibhlya isalonga: “Lekani kudzudzumika na pya ntsiku ya mangwana, thangwi ntsiku ya mangwana inadzakhala na pyakudzudzumisa pyayo. Ntsiku ibodzi na ibodzi iri na nyatwa zayo.”—Mateu 6:34.

Khalani m’maso ntsiku ibodzi na ibodzi. Lekani kutawirisa kuti kudzudzumika thangwi ya pinthu pinafuna kucitika ntsogolo, pikucimwaniseni kucita pinthu pinafunika imwe kucita cincino.

Kudzudzumika na pinthu pyakuipa pyakuti panango nee pinacitika, basi ene pinathimizira kutsukwala kwanu, pontho pinakucitisani kupenula kuti ntsogolo nyatwa zinadzamala.

MUSAFUNIKA KUCITANJI?—Pinthu Pyakuti Pinakuphedzani

NYEREZERANI PINTHU PYAKUTI PINAWANGISA

Bhibhlya isalonga: “Kuna munthu anathabuka, ntsiku zonsene ndi zakuipa. Mbwenye munthu wakutsandzaya muntima, asakhala wakukomerwa ntsiku zonsene.” (Misangani 15:15) Munganyerezera kakamwe pya nyatwa zinathimbana na imwe, nee munakwanisa kuona njira toera kumalisa nyatwa zanu. Munganyerezera pinthu pyadidi pinakuphedzani toera kugumana njira yadidi toera kumalisa nyatwa zanu.

Pungulani ndzidzi unaphatisira imwe toera kubvesera peno kuona mphangwa.
Pakumala kwa ntsiku ibodzi na ibodzi, nyerezerani pinthu piwiri pyadidi peno pitatu pyakuti munakwanisa kupiperekera takhuta.
Citani ndandanda ya pinthu pinafuna kucita imwe pa ntsiku. Gawani mabasa makulu m’makhundu mang’ono-mang’ono toera pikhale pyakukhonda nentsa kuona pinthu pidakwanisa imwe kucita pa ntsiku.

PHEMBANI CIPHEDZO

Bhibhlya isalonga: “Munthu anapambulika . . . asakhonda udziwisi onsene wakuti usaphedza.” (Misangani 18:1) Mungagwera n’djenje yakuzika, imwe nee munakwanisa kubuluka mwekhene, mbwenye munafunika ciphedzo ca munthu unango.

Phembani ciphedzo kuna abale anu peno axamwali anu.
Kusiyapo pyenepi, onani kuti munacitanji toera kuaphedza, kucitira pinthu pyadidi anango kunakuphedzani toera mukhonde dzudzumika na nyatwa zanu.
Khala imwe mwaluza cidikhiro mbamuona kuti umaso nee uli na basa, panango pinakhala mwadidi kusaka ciphedzo ca madotoro. Midzidzi inango kudzudzumika kakamwe kunakwanisa kukhala cidzindikiro ca matenda ninga utenda wa depressau. Cinthu cidaphedza anthu azinji kakamwe ndi kusaka ciphedzo ca madotoro.a

a Revista ya Lamukani! Nee isasankhulira anthu ntundu wa ukondzi.

Bhibhlya Isatipasa Cidikhiro Cakunyindirika

Nyamasalmo unango acita phembero mbalonga: “Mafala anu ndi nyale inamwanikira manyalo anga, pontho ndi ceza cinamwanikira njira yanga.” (Masalmo 119:105) Onani kuti Mafala a Mulungu akhala tani ninga ceza.

Namasiku, ceza cinakwanisa kutiphedza toera kuona panaponda ife. Munjira ibodzi ene, Bhibhlya iri na uphungu wadidi wakuti unakwanisa kutiphedza tingafuna kucita pisankhulo pyakunentsa.

Kusiyapo pyenepi, ceza cinatiphedza toera kuona pinthu piri kutsogolo. Munjira ibodzi ene, Bhibhlya inakwanisa kutiphedzambo toera kudziwa pinthu pinafuna kucitika ntsogolo.

Bhibhlya ndi bukhu yakupambulika yakuti isafokotoza kuti umaso wa anthu watoma tani. Iyo isafokotoza pya cidikhiro cakunyindirika ca pinthu pinafuna kucitika ntsogolo. Pontho isatawira mibvundzo iyi:

Tani?

Nyatwa zatoma tani? Bhibhlya isalonga: “Ninga mudapita madawo pantsi pano thangwi ya munthu mʼbodzi basi, mbakupitambo kufa thangwi ya madawo, natenepa kufa kwamwazika kwa anthu onsene thangwi anthu onsene adawa.”—Aroma 5:12.

Thangwi yanji?

Thangwi yanji anthu nkhabe kwanisa kumalisa nyatwa zathu? Bhibhlya isalonga: “Munthu nkhabe ufulu wakutsogolera ekhene mathanyo ace.” (Yeremiya 10:23) Pinthu pinacitika n’dziko pisapangiza kuti lemba ineyi iri kulonga undimomwene.

Ninji?

Ninji pinafuna kudzacita Mulungu toera kumalisa nyatwa zathu? Bhibhlya isapangiza kuti “[Mulungu] anadzapukuta misozi yonsene mʼmaso mwawo, pontho nkhabe kudzaonekabve kufa, nee kutsukwala, nee kulira, nee kubva kupha. Thangwi pyakale pyamala.”—Apokalipse 21:4.