Kupfundza kwanu Bhibhlya na Mboni za Yahova kwakuphedzani toera kudziwa undimomwene. Mwakukhonda penula, pidapfundza imwe pyakuphedzani toera kukhala na uxamwali wakuwanga na Mulungu, pontho pyakupasani cidikhiro cakukhala kwenda na kwenda m’paraizu pa dziko yapantsi, kutongwa na Umambo wa Mulungu mbamutambira nkhombo zace. Imwe mwawangiswa toera kukhulupira Mafala a Mulungu, pontho thangwi yakucita uxamwali na abale na alongo mu mpingo, imwe mwatambira nkhombo zizinji. Imwe mwabvesesa kuti Yahova asatsalakana tani mbumba yace lero.—Zak. 8:23.

Nakuti cincino mukukhunganyika toera kubatizwa, pinakhala mwadidi kudinga pabodzi na akulu a mpingo pinakhulupira Akristu. (Aheb. 6:1-3) Yahova mbapitirize kukupasani nkhombo thangwi yakuwangisira kunacita imwe toera kundziwa, pontho mbakupaseni muoni udapikira iye.—Juw. 17:3.

1. Thangwi yanji imwe musafuna kubatizwa?

2. Yahova mbani?

• “Yahova ndi Mulungu wandimomwene kudzulu na pa dziko yapantsi. Nkhabepo unango.”—Dheu. 4:39.

• “Imwe dzina yanu ndi Yahova, ndimwe basi Wankulu Kakamwe pa dziko yonsene yapantsi.”—Mas. 83:18.

3. Thangwi yanji imwe musafunika kuphatisira dzina ya Mulungu?

• “Musafunika kuphembera tenepa: ‘Babathu muli kudzulu, dzina yanu mbiceneswe.’”—Mat. 6:9.

• “Onsene anacemera dzina ya Yahova anadzapulumuswa.”—Aroma 10:13.

4. Ndi pidzo pipi pinango pinaphatisirwa m’Bhibhlya toera kutiphedza kudziwa mwadidi Yahova?

• “Yahova, Ule Adacita pinthu pyonsene pa dziko yapantsi ndi Mulungu wakwenda na kwenda.”—Iza. 40:28.

• “Babathu muli kudzulu.”—Mat. 6:9.

• “Mulungu ndi ufuni.”—1 Juw. 4:8.

5. Ninji pyakuti imwe munakwanisa kupasa Yahova Mulungu?

• “Funa Yahova Mulungu wako na ntima wako onsene, na umaso wako onsene, na ndzeru zako zonsene na mphambvu zako zonsene.”—Marko 12:30.

• “Ndi Yahova Mulungu wako anafunika iwe kulambira, pontho ndiye basi anafunika iwe kutumikira.”—Luka 4:8.

6. Thangwi yanji musafuna kukhala wakukhulupirika kuna Yahova?

• “Mwananga, khala wandzeru, pontho komeresa ntima wanga, toera ndikwanise kutawira ule anandixola.”—Mis. 27:11.

7. Kodi imwe musacita phembero kuna ani, pontho mu dzina ya ani?

• “Ine ndinakupangani na cinyindiro consene kuti, pyonsene pinafuna imwe kuphemba kuna Baba mu dzina yanga, iye anadzakupasani.”—Juw. 16:23.

8. Ndi pinthu pipi pinango pyakuti munakwanisa kupilonga mu phembero?

• “Musafunika kuphembera tenepa: ‘Babathu muli kudzulu, dzina yanu mbiceneswe. Umambo wanu mbudze. Cifuno canu cicitwe pantsi pano ninga kudzulu. Tipaseni cakudya cathu ca ntsiku ya lero. Tilekerereni mangawa athu ninga munalekerera ife ale anatifiyari. Lekani kutisiya mbatigwa m’mayesero, mbwenye tipulumuseni m’manja mwa Nyakuipa.’”—Mat. 6:9-13.

• “Ici ndi cinyindiro ciri na ife kuna iye: Tingaphemba cinthu mwakubverana na pinafuna iye, iye asatibvesera.”—1 Juw. 5:14.

9. Thangwi yanji Yahova panango nee anabvesera phembero ya munthu?

• “Iwo anadzacemera Yahova toera kuphemba ciphedzo, mbwenye iye nee anadzaatawira . . . thangwi ya madawo [awo].”—Mik. 3:4.

• “Maso a Yahova asayang’ana kuna anthu akulungama, makutu ace asabvesera maphembero awo akudembetera, mbwenye Yahova asapasira nkhodolo ale anacita pinthu pyakuipa.”—1 Ped. 3:12.

10. Yezu Kristu Mbani?

• “Simau Pedhru atawira: ‘Imwe ndimwe Kristu, Mwana wa Mulungu wa m’maso.’”—Mat. 16:16.

11. Thangwi yanji Yezu abwera pa dziko yapantsi?

• “Mwana wa munthu nee abwera toera kutumikirwa, mbwenye toera kutumikira na kupereka umaso wace ninga ciomboli toera kuombola anthu azinji.”—Mat. 20:28.

• “[Ine Yezu] ndisafunikambo kumwaza mphangwa zadidi za Umambo wa Mulungu m’mizinda inango, thangwi ine ndatumwa toera kucita pyenepi.”—Luka 4:43.

12. Munapangiza tani kuti musapereka takhuta thangwi ya ntsembe ya Yezu?

• “Iye afera anthu onsene toera anthu akuti ali m’maso akhonde kukhala m’maso toera kucita pinafuna iwo basi, mbwenye acite pinafuna ule adaafera mbalamuswa muli akufa.”—2 Akor. 5:15.

13. Kodi mphambvu yakutonga idapaswa Yezu iri na madire?

• “Ndapaswa mphambvu zonsene kudzulu na pa dziko yapantsi.”—Mat. 28:18.

• “Mulungu ankuza mbamuikha pa mbuto yapadzulu kakamwe; pontho, mwakukoma ntima, iye ampasa dzina yakuti iri padzulu pa madzina anango onsene.”—Afil. 2:9.

14. Kodi imwe musakhulupira kuti Mathubo Akutonga a Mboni za Yahova ndi “m’bandazi wakukhulupirika na wandzeru” adakhazikiswa na Yezu?

• “Mwandimomwene, mbani m’bandazi wakukhulupirika na wandzeru adakhazikiswa na mbuyace toera kuonera anyabasa ace a panyumba, toera kuapasa cakudya cawo pa ndzidzi wakuthema?”—Mat. 24:45.

15. Kodi nzimu wakucena ndi munthu?

• “Anju antawira: ‘Nzimu wakucena unabwera kuna iwe, pontho mphambvu ya Mulungu Wakudzulu Kakamwe inadzakugudumira. Na thangwi ineyi, ule anafuna kudzabalwa anadzacemerwa wakucena, Mwana wa Mulungu.’”—Luka 1:35.

• “Khala imwe, maseze ndimwe anyakudawa, musadziwa kupasa ananu pinthu pyadidi, ndiye tani Babanu wakudzulu, iye anadzapasa nzimu wakucena ale anam’phemba!”—Luka 11:13.

16. Yahova asaphatisira tani nzimu wace wakucena?

• “Mafala a Yahova acitisa kuti kudzulu kucitwe, pontho pinthu pyonsene pyakudzulu pyacitwa na muya udabuluka pamulomo pace.”—Mas. 33:6.

• “Nzimu wakucena ungabwera kuna imwe, munadzatambira mphambvu, penepo munadzakhala amboni anga . . . mpaka kunkhomo kwa dziko yapantsi.”—Mabasa 1:8.

• “Nee profesiya ibodzi ya m’Malemba isabuluka m’manyerezero a anthu. Thangwi profesiya cipo yalongwa mwakubverana na pinafuna munthu, mbwenye anthu alonga mphangwa za Mulungu mukutsogolerwa na nzimu wakucena.”—2 Ped. 1:20, 21.

17. Umambo wa Mulungu ninji?

• “Mulungu wakudzulu anadzakhazikisa umambo wakuti nkhabe kudzafudzwa. Pontho umambo unoyu nee unadzaperekwa kuna mbumba inango. Iwo unadzanyedza, mbufudza maumambo anewa onsene, pontho iwo basi unadzakhala kwenda na kwenda.”—Dhan. 2:44.

18. Ndi nkhombo zipi zinafuna kubweresa Umambo wa Mulungu kuna imwe?

• “Iye anadzapukuta misozi yonsene m’maso mwawo, pontho nkhabe kudzaonekabve kufa, nee kutsukwala, nee kulira, nee kubva kupha. Thangwi pyakale pyamala.”—Apok. 21:4.

19. Kodi imwe musadziwa tani kuti nkhombo za Umambo zinafika cincino?

• “Anyakupfundzace anfendedzera paekha mbambvundza: ‘Tipangeni, pinthu pyenepi pinacitika lini, pontho ndi cipi cidzindikiro ca kuonekera kwanu na cakumala kwa makhaliro a dziko?’ Yezu aatawira mbalonga: ‘. . . Mbumba inadzamenyana na mbumba indzace, umambo unadzamenyana na umambo undzace, pontho kunadzaoneka njala na piteketeke m’mbuto zakusiyana-siyana. Mphangwa zadidi za Umambo zinadzamwazwa pa dziko yonsene yapantsi toera zikhale umboni kuna anthu a madzindza onsene, buluka penepo kumala kunadzafika.’”—Mat. 24:3, 4, 7, 14.

• “Mu ntsiku zakumalisa, inadzaoneka midzidzi yakugopswa na yakunentsa kupirira. Thangwi anthu anadzafunika okhene basi, anadzafuna kakamwe kobiri, anadzakhala anthu akugaya, akudzikuza, akuxola, akukhonda kubvera anyakubala, akukhonda kupereka takhuta, akukhonda kukhulupirika, akusowa ufuni, akukhonda funa kucita cibverano na anango, anadzakhala anyamapsweda, akukhonda kuphata ntima, ausumankha, akukhonda kufuna pinthu pyadidi, anyakusandukira andzawo, akukhonda kubva pinalonga andzawo, akudzala na kudzikuza, anadzafuna pinakomerwa na iwo basi, mbakhonda kufuna Mulungu, anadzaoneka ninga anthu adaperekeka kuna Mulungu, mbwenye umaso wawo nee unadzapangiza pyenepi.”—2 Tim. 3:1-5.

20. Munapangiza tani kuti Umambo ndi wakufunika kuna imwe?

• “Natenepa, pitirizani kuikha pa mbuto yakutoma Umambo wa Mulungu na ulungami wace.”—Mat. 6:33.

• “Yezu alonga kuna anyakupfundzace kuti: ‘Munthu anafuna kunditowera, asafunika akhondeke ekhene, akwate muti wace wakusikimizira mbapitiriza kunditowera.’”—Mat. 16:24.

21. Kodi Sathani na madimonyo mbani?

• “Imwe ndimwe ana a babanu Dyabo . . . Iye ndi nyakupha anthu kubulukira padatoma iye.”—Juw. 8:44.

• “Nyoka ikulu yaponywa pa dziko yapantsi, nyoka ire yakale, inacemerwa Dyabo na Sathani, wakuti asanyengeza dziko yonsene yapantsi. Iye aponywa pa dziko yapantsi, pontho aanju ace aponywa pantsi pano pabodzi na iye.”—Apok. 12:9.

22. Ndi uthambi upi unalonga Sathani toera kupambizira Yahova na ale anamulambira?

• “Nkazi atawira nyoka: ‘Tinakwanisa kudya misapo ya miti ya m’munda. Mbwenye nsapo wa muti uli pakati pa munda, Mulungu alonga: “Lekani kuudya, pontho lekani kuukhuya; gopa munadzafa.”’ Penepo nyoka yapanga nkazi: ‘Mwandimomwene nee munadzafa. Thangwi Mulungu asadziwa kuti pa ntsiku inafuna kuudya imwe, maso anu anafunguka, pontho munadzakhala ninga Mulungu, mbamudziwa cadidi na cakuipa.’”—Gen. 3:2-5.

• “Sathani atawira Yahova: ‘Khanda na khanda. Munthu anapereka pyonsene piri na iye toera kupulumusa umaso wace.’”—Yobe 2:4.

23. Munacitanji toera kupangiza kuti pidalonga Sathani ndi pyauthambi?

• ‘Tumikira Mulungu na ntima wako onsene.’—1 Kro. 28:9.

• “Mpaka kufa kwanga, ine nee ndinasiya kukhala munthu wakukhulupirika!”—Yobe 27:5.

24. Thangwi yanji anthu asafa?

• “Ninga mudapita madawo pantsi pano thangwi ya munthu m’bodzi basi, mbakupitambo kufa thangwi ya madawo, natenepa kufa kwamwazika kwa anthu onsene thangwi anthu onsene adawa.”—Aroma 5:12.

25. Ninji pinacitika munthu angafa?

• “Anthu akuti aciri na umaso asadziwa kuti anafa, mbwenye anyakufa nkhabe cinthu cinadziwa iwo.”—Ekle. 9:5.

26. Ninji pinafuna kudzacitikira anthu adafa?

• “Kunadzaoneka kulamuswa muli akufa kwa anthu akulungama na akukhonda kulungama.”—Mabasa 24:15.

27. Ndi anthu angasi anafuna kuenda katonga pabodzi na Yezu kudzulu?

• “Ine ndaona Mwanabira akhali dzololo Paphiri ya Sioni, iye akhali pabodzi na anthu 144.000, akuti pa nkhope pawo palembwa dzina yace na dzina ya Babace.”—Apok. 14:1.

Pa pfundziro yanu ya Bhibhlya, imwe mwapfundza pinafuna Yahova kuna imwe, pontho kuti munakhala tani m’maso mwakubverana na mitemo yace yakulungama. Toera kuphatisira pidapfundza imwe, panango mwacita macinjo mazinji mu umaso wanu, pontho mwacinja njira inaona imwe umaso. Nakuti cincino mwasankhula kukhala m’maso mwakubverana na mitemo yakulungama ya Yahova, ndi thangwi yace imwe musamwaza mphangwa zadidi.

Mibvundzo inatowera inakuphedzani toera kubvesesa mwadidi mitemo yakulungama ya Yahova, pontho inakuphedzani toera kukumbuka pinthu pingasi pinafunika imwe kucita toera mukhale ntumiki wa Yahova wakuperekeka na wakubatizwa. Inakuphedzanimbo toera kuona kuti ndi pyakufunika kakamwe kucita pinthu na cikumbuntima cakucena toera kupasa mbiri Yahova.—2 Akor. 1:12; 1 Tim. 1:19; 1 Ped. 3:16, 21.

Pidapfundza imwe mpaka pano, mwakukhonda penula pisakucitisani kupitiriza kubvera utongi wa Yahova na kucita khundu ya gulu yace. Mibvundzo na malemba anatowera anakuphedzani toera kuona khala musabvera masasanyiro adakhazikisa Yahova mu mpingo, pa banja peno kuna atongi a dziko. Imwe munapereka takhuta kakamwe thangwi ya pinacita Yahova toera kupfundzisa na kuwangisa cikhulupiro ca mbumba yace. Pyenepi pisaphataniza misonkhano ya mpingo yakuti imwe musakomerwa kugumanika pa misonkhano ineyi mbamucita khundu makhaliro anu angakutawirisani.

Kusiyapo pyenepi, khundu ino inagomezera kufunika kwa kumwaza mphangwa za Umambo mwaphinga, mbamuphedza anango toera adziwe Yahova na pinthu pinacitira iye anthu. (Mat. 24:14; 28:19, 20) Pakumalisa, inakuphedzanimbo toera kuona kufunika kwa kuperekeka kuna Yahova Mulungu mbamubatizwa. Khalani na cinyindiro cakuti Yahova asakomerwa na pyonsene pinacita imwe toera kupangiza kuti musapereka takhuta thangwi yakupangiza kwace kukoma ntima kuna imwe.

1. Ndi api maonero a Yahova thangwi ya banja? Ndi ipi thangwi ibodzi inatawiriswa m’Bhibhlya toera anyakumanga banja akhondane?

• “Kodi imwe nee mwaleri kuti ule adacita anthu, pakutoma aacita mamuna na nkazi? Iye alonga: ‘Na thangwi ineyi, mamuna anadzasiya babace na mai wace mbaphatana na nkazace, pontho uwiri wawo anadzakhala manungo mabodzi basi.’ Munjira ineyi, iwo si awiribve tayu, mbwenye ndi manungo mabodzi basi. Natenepa, pidagumanya Mulungu, munthu mbaleke kupimwaza. . . . Munthu anakhonda nkazace mbasemba unango, akucita upombo, kusiyapo khala an’khonda thangwi acita ulukwali.”—Mat. 19:4-6, 9.

2. Thangwi yanji mamuna na nkazi anakhala pabodzi ninga banja asafunika kulembesa banja yawo mwakubverana na mwambo? Khala ndimwe wakumanga banja, muli na cinyindiro cakuti mwalembesa banja yanu, pontho isadziwika na utongi?

• “Pitiriza kuakumbusa kuti asafunika kubvera mautongi na anyakutonga.”—Tito 3:1.

• “Banja isafunika kukhala yakulemedzeka pamaso pa anthu onsene, pontho bonde ya anyakumanga banja isafunika kukhala yakucena, thangwi Mulungu anadzatonga anthu anacita ulukwali na upombo.”—Aheb. 13:4.

3. Ndi basa ipi iri na imwe pa banja?

• “Mwananga, bvesera kulanga kwa pai wako, pontho leka kupwaza cipfundziso ca mai wako.”—Mis. 1:8.

• “Mamuna ndi nsolo wa nkazace, ninga Kristu ndi nsolo wa mpingo . . . Amuna, pitirizani kufuna akazanu, ninga Kristu afunambo mpingo.”—Aef. 5:23, 25.

• “Imwembo ababa, lekani kutsukwalisa ananu, mbwenye pitirizani kuakuza kubulukira mu kualanga na kuapfundzisa mwakubverana na pinalonga Yahova.”—Aef. 6:4.

• “Imwe ana, bverani anyakubala anu mu pinthu pyonsene, thangwi pyenepi mphyadidi kakamwe pamaso pa Mbuya.”—Akol. 3:20.

• “Imwe akazi, bverani amunanu.”—1 Ped. 3:1.

4. Thangwi yanji tisafunika kulemedza umaso?

• “[Mulungu] asapasa anthu onsene umaso, muya na pinthu pyonsene. Thangwi ya iye, ife tiri na umaso, tisafamba, pontho tiripo.”—Mabasa 17:25, 28.

5. Thangwi yanji nee tisafunika kupha munthu, kuphatanizambo mwana wakuti adzati kubaliwa?

• “Amuna awiri angamenyana mbaphekesa nkazi wakuti ali na mimba . . . [mbapafa] munthu, ule adamupha asafunika aphiwembo.”—Eks. 21:22, 23.

• “Maso anu andiona m’mimba mwa mai wanga mbandidzati kubalwa; makhundu anga onsene alembwa m’bukhu mwanu thangwi ya ntsiku zidacitwa iwo, iwo alembwa ngakhale mbadzati kucitwa.”—Mas. 139:16.

• ‘Yahova asaida manja anapha anthu akusowa mulando.’—Mis. 6:16, 17.

6. Ndi api matongero a Mulungu thangwi ya ciropa?

• “Mupitirize kucalira . . . ciropa [na] nyama idabumbunyulwa khosi.”—Mabasa 15:29.

7. Thangwi yanji tisafunika kufuna abale na alongo athu?

• “Ine ndinakupasani matongero mapswa kuti: Funanani unango na ndzace; ninga mudakufunani ine, imwembo mufunane unango na ndzace. Imwe mungafunana unango na ndzace, anthu onsene anadzindikira kuti ndimwe anyakupfundza anga.”—Juw. 13:34, 35.

8. Toera kucalira kuthapulisa anango utenda wakugopswa: (a) Thangwi yanji munthu ali na utenda wakuthapulisana nee asafunika kukhumbatira anango na kuampswompswona? (b) Thangwi yanji nee asafunika kutsukwala anango angakhonda kuncemera toera kuenda kunyumba kwawo? (c) Thangwi yanji munthu anapenula khala ali na utenda wakuthapulisana asafunika kudingwa ungumi wace mbadzati kubanyirana? (d) Thangwi yanji munthu ali na utenda wakuthapulisana asafunika kudziwisa mbveranisi wa nsoka wa akulu a mpingo mbadzati kubatizwa?

• “Lekani kukhala na mangawa nee na munthu m’bodzi, mbwenye mufunane unango na ndzace. . . . ‘Funa ndzako ninga iwe ene.’ Munthu waufuni nkhabe kucitira ndzace pinthu pyakuipa.”—Aroma 13:8-10.

• “Lekani kunyerezera pinafuna imwe basi, mbwenye nyerezeranimbo pinafuna anango.”—Afil. 2:4.

9. Thangwi yanji Yahova asafuna kuti tilekerere anango?

• “Pitirizani kupirirana unango na ndzace mbamulekererana na ntima onsene, mwakukhonda tsalakana khala munthu ali na thangwi toera kutsukwala na pidacitirwa iye na ndzace. Ninga mudakulekererani Yahova na ntima onsene, imwe musafunikambo kucita pibodzi pyene.”—Akol. 3:13.

10. Munacitanji m’bale peno mulongo angakulongani mwakuipa peno angakunyengezani?

• “Khala m’bale wako akudawira, ndoko kampangize cidadawa iye panu mwekha, iwe na iye basi. Iye angakubvesera, wawina m’bale wako. Mbwenye angakhonda kukubvesera, kwata munthu m’bodzi peno awiri, toera pyonsene pikhale pyakutawirika khala pana umboni wa anthu awiri peno atatu. Angakhonda kuabvesera, ndoko kalonge ku mpingo. Angakhondambo kubvesera mpingo, muone pyako ninga munthu wa dziko peno ninga nyakulipisa misonkho.”—Mat. 18:15-17.

11. Ndi api maonero a Yahova thangwi ya madawo awa?

▪ Ulukwali

▪ Kulambira madzimunthu

▪ Kupita m’mabonde mamuna na mamuna peno nkazi na nkazi

▪ Kuba

▪ Kugwa cabutha

▪ Kuledzera

• “Lekani kunyengezwa. Ale anacita ulukwali, analambira madzimunthu, anyaupombo, amuna anatawira kugonwa na amuna andzawo, amuna anagona amuna andzawo, mambava, anthu anafuna pyonsene, anyakuledzera, anyakutikana, na ale anapokosera andzawo pinthu, onsene nkhabe kudzapita mu Umambo wa Mulungu.”—1 Akor. 6:9, 10.

12. Kodi imwe musafunika kucitanji thangwi yaulukwali, wakuti usaphataniza njira zakusiyana-siyana zakupita m’mabonde na munthu wakuti nee mwamanga naye banja?

• “Thawani ulukwali!”—1 Akor. 6:18.

13. Thangwi yanji tisafunika kucalira kuphatisira mitombwe yakuledzeresa khala nee tapangwa kucita pyenepi na dotoro?

• “Mupereke manungo anu ninga ntsembe za m’maso, zakucena na zakutawirika kuna Mulungu, mbamuphata basa yakucena na luso yanu yakunyerezera. Lekani kupitiriza kutowezera anthu a dziko, mbwenye cinjani manyerezero anu toera mukwanise kudziwa mwadidi pinafuna Mulungu, pyakuti ndi pyadidi, pyakuthema na pyakutawirika kwa iye.”—Aroma 12:1, 2.

14. Ndi pinthu pipi pingasi pinacita anthu na mphambvu za madimonyo pyakuti Mulungu asapikhondesa?

• “Pakati panu mbapaleke kuoneka munthu . . . anacita pyakulotera, pyaung’anga, munthu anasaka pidzindikiro, mpfiti, munthu analodza ndzace, munthu anaenda kwa ng’anga toera kudziwa pinthu, nyakulotera, peno munthu anasaka kulonga na anyakufa.”—Dheu. 18:10, 11

15. Munthu angacita madawo makulu, mbafuna kukhala pontho na uxamwali wakuwanga na Yahova, asafunika kucitanji mwakucimbiza?

• “Ndabweka madawo anga kuna imwe; nee ndabisa madodo anga. Ine ndalonga: ‘Ndinabweka madawo anga kuna Yahova.’”—Mas. 32:5.

• “Kodi alipo munthu wakuti akuduwala pakati panu? Mbacemere akulu a mpingo, iwo ancitire phembero, an’khwaze mafuta mu dzina ya Yahova. Phembero inacitwa mwacikhulupiro inadzawangisa nyakuduwala, pontho Yahova anadzamulamusa. Kusiyapo pyenepi, khala iye acita madawo, anadzalekererwa.”—Tiya. 5:14, 15.

16. Musafunika kucitanji mungadziwa kuti Nkristu ndzanu acita madawo makulu?

• “Munthu angaona munthu ndzace mbakacita madawo, peno abva kuti ndzace acita madawo, iye ali na umboni. Angabva cidziwiso toera aende kalonge pinadziwa iye, angakhonda kuenda kalonga, iye acita madawo. Natenepa, iye anadzatawirira mulando wa madawo ace.”—Lev. 5:1.

17. Cingacitwa cidziwiso cakuti munthu asiya kukhala m’bodzi wa Mboni za Yahova, musafunika kutsalakana tani munthu unoyu?

• “Musiye kucita uxamwali na munthu anacemerwa m’bale, khala iye asacita ulukwali, peno asafuna pyonsene, peno asalambira madzimunthu, peno asaxola, peno asaledzera peno asaba. Pontho, lekani kudya na munthu unoyu.”—1 Akor. 5:11.

• “Munthu angabwera kuna imwe na pipfundziso pyakusiyana na pyenepi, lekani kuntambira panyumba panu, nee kum’mwanyika.”—2 Juw. 10.

18. Thangwi yanji axamwali anu a ponda ndi pondembo asafunika kukhala ale anafuna Yahova?

• “Ule anafamba na anthu audziwisi, anadzakhalambo waudziwisi, mbwenye ule anafamba na madzemwa, anadzaona nyatwa.”—Mis. 13:20.

• “Lekani kunyengezwa. Kucita uxamwali na anthu akuipa kusafudza makhaliro adidi.”—1 Akor. 15:33.

19. Thangwi yanji Mboni za Yahova nkhabe kucita khundu ya ndale?

• “Iwo nkhabe kucita khundu ya dziko, ninga ine [Yezu] nkhabe kucita khundu ya dziko.”—Juw. 17:16.

20. Thangwi yanji musafunika kubvera utongi?

• “Anthu onsene asafunika kubvera mautongi, thangwi nkhabepo utongi udakhonda kutawiriswa na Mulungu; mautongi anaoneka awa ali mu mbuto zawo zakusiyana-siyana thangwi asatawiriswa na Mulungu.”—Aroma 13:1.

21. Musafunika kucitanji mitemo ya mautongi ingakhonda kubverana na mitemo ya Mulungu?

• “Pakutoma tisafunika kubvera Mulungu ninga ntongi, tayu anthu.”—Mabasa 5:29.

22. Ndi malemba api anafuna kukuphedzani toera mukhonde kucita khundu ya dziko pakusankhula basa?

• “Nkhabepo mbumba inadzafuna kukwata supada toera kumenyana na inango, pontho iwo nkhabe kudzapfundzabve nkhondo.”—Mik. 4:3.

• “Bulukani muna iye mbumba yanga, khala imwe nkhabe funa kukhala na mulando wa madawo ace, pontho khala nee musafuna kuona nyatwa za miliri yace.”—Apok. 18:4.

23. Ndi ubalangazi upi unafuna imwe kusankhula, pontho ndi upi unafuna imwe kucalira?

• ‘Yahova asaida anthu anakomerwa na pyauphanga.’—Mas. 11:5.

• “Idani pinthu pyakuipa, pontho wangisirani toera kufuna pinthu pyadidi.”—Aroma 12:9.

• “Pinthu pyonsene pyakuti ndi pyandimomwene, pyonsene pyakuti ndi pyakufunika, pyonsene pyakuti ndi pyakulungama, pyonsene pyakuti ndi pyakucena, pyonsene pyakuti pyathema kufuniwa, pyonsene pyakuti pisalongwa mwadidi, pyonsene pyakuti ndi pyadidi na pyonsene pyakuti pyathema kusimbwa, pitirizani kunyerezera pinthu pyenepi.”—Afil. 4:8.

24. Thangwi yanji mboni za Yahova nkhabe kulambira pabodzi na mauphemberi anango?

• “Imwe nkhabe funika kudya ‘pameza ya Yahova’ na pameza ya madimonyo.”—1 Akor. 10:21.

• “‘Pambulikani,’ alonga Yahova, ‘lekani kuphata pontho pinthu pyakupswipa’; ‘ine ndinadzakutambirani.’”—2 Akor. 6:17.

25. Ndi malemba api anafuna kukuphedzani toera kudziwa khala musafunika kugumanika pa misambo inango peno nkhabe?

• “Iwo akhalambira madzimunthu a madzindza anewa, pontho madzimunthu anewa adzakhala nsampha kuna iwo.”—Mas. 106:35, 36.

• “Anyakufa nkhabe cinthu cinadziwa iwo.”—Ekle. 9:5.

• “Iwo nkhabe kucita khundu ya dziko, ninga ine nkhabe kucita khundu ya dziko.”—Juw. 17:16.

• “Kale imwe mukhacita pinthu pikhacita anthu a dziko. Pontho mu ndzidzi unoyu imwe mukhali na makhaliro akupasa manyadzo, mukhafuna kakamwe pyaulukwali, kuledzera, maphwando akukhonda thema, kumwa kakamwe pyakuledzeresa na kulambira madzimunthu.”—1 Ped. 4:3.

26. Pitsandzo pya m’Bhibhlya pinakuphedzani tani kuona khala mphyadidi peno nkhabe kukumbuka ntsiku yakubalwa?

• “Ntsiku yacitatu, ikhali ntsiku ya kukumbuka kubalwa kwa Farau, iye acitira phwando atumiki ace onsene. Iye abulusa kunja nkulu wa anyakupereka pyakumwa na nkulu wa anyakuphika mikate, mbaikhwa pamaso pa atumiki ace. Nkulu wa anyakupereka pyakumwa amuikha pontho pa basa yace . . . Mbwenye nkulu wa anyakuphika mikate iye am’manika pamuti.”—Gen. 40:20-22.

• “Pa phwando yakukumbukira ntsiku yakubalwa kwa Herodhi, mwana wankazi wa Herodhiya abvina pamaso pa anthu adacemerwa pa phwando ineyi, Herodhi mbakomerwa kakamwe. Natenepa iye adumbira kuti anampasa pyonsene pikhafuna iye kuphemba. Penepo, mwakubverana na pidampanga mai wace, ntsikana alonga: ‘Ndipaseni nsolo wa Juwau M’batizi mu mbale.’ Natenepa, atuma munthu toera kuenda kagwanda nsolo wa Juwau nkaidi.”—Mat. 14:6-8, 10.

27. Thangwi yanji musafunika kubvera pitsogolero pya akulu a mpingo?

• “Bverani ale anatsogolera pakati panu, mbamutawira na ntima onsene citsogolero cawo, thangwi iwo asakuonerani ninga kuti anadzatawirira mulando. Mungacita pyenepi, iwo anaphata basa yawo mwakukomerwa, tayu mwakudungunya, thangwi pyenepi mbapidabweresa nyatwa kuna imwe.”—Aheb. 13:17.

28. Thangwi yanji imwe na banja yanu musafunika kusaka ndzidzi toera kuleri Bhibhlya ntsiku zonsene na kuipfundza?

• “Iye asakomerwa na mwambo wa Yahova, pontho iye asaleri mwambo Wace mwakukhonda galuza masiku na masikati. Iye anadzakhala ninga muti wakutcekwa n’khundu-n’khundu mwa madzi, muti wakuti usabala misapo ndzidzi wace ungafika, masamba ace nkhabe bunyala. Pontho pinthu pyonsene pinacita iye pinadzanfambira mwadidi.”—Mas. 1:2, 3.

29. Thangwi yanji imwe musafuna kakamwe kugumanika pa misonkhano na kucita khundu?

• “Ine ndinadzadziwisa dzina yanu kuna abale anga; pakati pa mpingo ine ndinadzakusimbani.”—Mas. 22:22.

• “Tendeni tinyerezerane unango na ndzace, mbatiwangisana toera kupangiza ufuni na kuphata mabasa adidi, tikhonde kudjomba misonkhano, ninga pinacita anango akuti ali na nsambo unoyu, mbwenye tiwangisane unango na ndzace, makamaka mu ndzidzi unaona imwe kuti ntsiku ya Mulungu iri kufika.”—Aheb. 10:24, 25.

30. Ndi ipi basa yakufunika kakamwe idatipasa Yezu?

• “Natenepa, ndokoni mukacite anyakupfundza kuna anthu a madzindza onsene, mbamuabatiza . . . , apfundziseni toera abvere pinthu pyonsene pidakupangani ine.”—Mat. 28:19, 20.

31. Ndi n’khaliro upi unakomerwa na Yahova mu ndzidzi unacita ife pyakupereka toera kuphedzera basa ya Umambo peno toera kuphedza abale na alongo?

• “Lemedza Yahova na pinthu pyako pyakufunika.”—Mis. 3:9.

• “M’bodzi na m’bodzi mbapereke ninga mudanyerezera iye muntima mwace, tayu mwakukhonda funa peno mwakukakamizwa, thangwi Mulungu asafuna munthu anapasa mwakukomerwa.”—2 Akor. 9:7.

32. Kodi Akristu asadikhira kutamba nyatwa zipi?

• “Anyakutsandzaya ndi ale anatcingwa thangwi yakucita pinthu pyadidi, thangwi Umambo wakudzulu ndi wawo. Anyakutsandzaya ndimwe anthu angakutikanani, kukutcingani na kukupambizirani ntundu onsene wa pinthu pyakuipa thangwi ya ine. Komerwani, pontho sekerani kakamwe thangwi muoni wanu ndi ukulu kudzulu, thangwi munjira ibodzi ene iwo atcinga aprofeta imwe mbamudzati kubalwa.”—Mat. 5:10-12.

33. Thangwi yanji ndi mwai wakupambulika kubatizwa ninga m’bodzi wa Mboni za Yahova?

• “Mafala anu ndakomerwa nawo, mbatsandzayisa ntima wanga, thangwi ine ndisadziwika na dzina yanu, imwe Yahova Mulungu wa anyankhondo.”—Yer. 15:16.

Kazinji kene ubatizo usacitwa pa misonkhano ya cisa na ya gawo ya Mboni za Yahova. Kunkhomo kwa nkhani ya ubatizo, nyakucita nkhani asaphemba ale anafuna kubatizwa toera alimire mbatawira mibvundzo iyi miwiri mwakugaluza:

1. Kodi mwatcunyuka madawo anu, mwaperekeka kuna Yahova, pontho mwatawira kuti iye asaphatisira Yezu Kristu toera kutipulumusa?

2. Kodi musadziwa kuti mungabatizwa munadziwika ninga m’bodzi wa Mboni za Yahova, pontho munatoma kucita khundu ya gulu yace?

Kutawira mwakubveka mwadidi mibvundzo ineyi kusapangiza pakweca kuti ale anafuna kubatizwa asakhulupira ntsembe ya ciomboli, pontho aperekeka kuna Yahova na ntima onsene. (Aroma 10:9, 10) Ale anafuna kubatizwa asafunika kucita phembero mbanyerezera mwadidi mibvundzo ineyi mbidzati kufika ntsiku inafuna iwo kubatizwa toera akwanise kutawira mwakubverana na pinakhulupira iwo.

Imwe mwacita phembero toera kuperekeka kuna Yahova, mbamupikira kuti munalambira iye basi, pontho kuti kucita cifuno cace kunakhala cinthu cakufunika kakamwe mu umaso wanu?

Kodi imwe musafunadi kubatizwa pa nsonkhano unafuna kudza?

Ndi zipi nguwo zakuthema toera kubatizwa nazo? (1 Tim. 2:9, 10; Juw. 15:19; Afil. 1:10)

Ife tisafunika “kubvala nguwo zakuthema” toera kupangiza kuti ‘tisalemedza Mulungu.’ Ale anafuna kubatizwa nkhabe funika kubvala nguwo zakupangiza makhundu anango a manungo akuti nee athema kuoniwa, nkhabe funika kubvala nguwo zakulembwa maletra peno madhezenyo. Iwo asafunika kubvala nguwo zakuthema, zakufulwa mwadidi na za maonekero adidi mwakubverana na ndzidzi unoyu.

Kodi munthu asafunika kupangiza makhaliro api pakubatizwa? (Luka 3:21, 22)

Ubatizo wa Yezu ndi citsandzo kuna ubatizo Wacikristu lero. Iye akhadziwa kuti ubatizo ndi wakufunika kakamwe, pontho manyerezero ace na macitiro ace apangiza pyenepi. Natenepa, pa mbuto ya ubatizo nee tisafunika kulonga pyakusekesa, kusendzeka, kuthubudza peno kucita pinthu pinango pyakuti nee pinapangiza cilemedzo mu ndzidzi wa ubatizo. Nkristu angamala kubatizwa nee asafunika kutsandzaya kakamwe ninga awina pa mapika. Maseze ndzidzi wa ubatizo ndi wakutsandzayisa kakamwe, mbwenye kutsandzaya kweneku kusafunika kupangizwa munjira yadidi na yacilemedzo.

Kodi kugumanika pa misonkhano mwakukhonda phonya na kucita pinthu pabodzi na mpingo kunakuphedzani tani toera kucita pinthu mwakubverana na kuperekeka kwanu kuna Yahova?

Thangwi yanji mungamala kubatizwa musafunika kupitiriza kucita pfundziro ya munthu paekha na kumwaza mphangwa mwaphinga?