PFUNDZIRO 1

Kutoma Munjira Yadidi

Mabasa 17:22

MUSAFUNIKA KUCITANJI: Pakutoma longani mafala akuti anacitisa anthu kukhala na cifuno toera kukubveserani, longani mphangwa ziri na imwe, pontho pangizani kuti thangwi yanji iwo asafunika kubvesera mphangwa zenezi.

MUNACITA TANI PYENEPI:

Citisani kuti anthu akhale na cifuno toera kukubveserani. Citani mbvundzo, longani pinthu pinacitika ntsiku na ntsiku, longani mphangwa zidalongwa mu radyo, televizau, mu tsamba ya mphangwa; peno longani pya makhaliro akudambo.

Mbamudzati kulonga, pakutoma nyerezerani pinthu pinakomerwa na anthu na pinthu pinadzudzumika na iwo; buluka penepo, longani thangwi ya pinthu pyenepi.
Longani mphangwa ziri na imwe. Mafala anu akutoma asafunika kuphedza anyakubvesera toera kubvesesa mphangwa ziri na imwe, pontho cifuniro ca mphangwa zenezi.
Pangizani kuti thangwi yanji mphangwa zenezi ndi zakufunika kwa iwo. Sasanyirani mphangwa zanu toera zibverane na nyatwa zinatamba anyakubvesera anu. Iwo asafunika kubvesesa kuti mphangwa zenezi zinaaphedza tani mu umaso wawo.

Mu ndzidzi unakhunganyika imwe nkhani yanu, bvundzikani: ‘Kodi abale na alongo a mu mpingo wathu asathimbana na pinentso pipi?’ Buluka penepo, cinjani matomero a nkhani yanu mwakubverana na makhaliro awo.