Mphangwa zakufunika kakamwe zinagumanika m’Bhibhlya zisalonga pya Umambo wa Mulungu. Yahova anaphatisira Umambo unoyu toera kucita pikhafuna iye pakutoma, kucinja dziko yapantsi toera ikhale Paraizu. Mphapo Umambo wa Mulungu ninji? Tisadziwa tani kuti Umambo unoyu uli kutonga cincino? Kodi Umambo unoyu wacitanji, pontho unadzacitanji ntsogolo? Nsolo uno na misolo miwiri inatowera inadzatawira mibvundzo ineyi.

1. Umambo wa Mulungu ninji, pontho mbani Mambo wace?

Umambo wa Mulungu ndi utongi udakhazikiswa na Yahova Mulungu. Mambo wace ndi Yezu Kristu, pontho iye ali kutonga kubulukira kudzulu. (Mateu 4:17; Juwau 18:36) Bhibhlya isalonga kuti Yezu “anadzatonga ninga Mambo . . . kwenda na kwenda.” (Luka 1:32, 33) Nakuti Yezu ndi Mambo wa Umambo wa Mulungu, iye anadzatonga anthu onsene pa dziko yapantsi.

2. Mbani anafuna kudzatonga pabodzi na Yezu?

Yezu nee anadzatonga ekhene. Anthu adabuluka “m’madzindza onsene, pilongero pyonsene, mbumba zonsene na madziko onsene . . . anadzatonga dziko yapantsi.” (Apokalipse 5:9, 10) Kodi ndi anthu angasi anafuna kudzatonga na Kristu? Kutomera pa ndzidzi udabwera Yezu pa dziko yapantsi, pikwi na pikwi pya anthu adzakhala atowereri ace. Mphapo, onsene anadzatonga na iye? Nkhabe. Basi ene anthu akukwana 144.000 anaenda kudzulu toera katonga pabodzi na Yezu. (Lerini Apokalipse 14:1-4.) Akristu anango onsene anadzakhala pa dziko yapantsi, mbatongwa na Umambo wa Mulungu.—Masalmo 37:29.

3. Thangwi yanji Umambo wa Mulungu ndi wakusiyana kakamwe na mautongi a anthu?

Maseze mautongi a anthu asayesera kucita pinthu pyadidi, mbwenye iwo nkhabe kwanisa kucita pinthu pyonsene pinafuna iwo. Kusiyapo pyenepi, mukupita kwa ndzidzi, iwo asacinjwa mbaikhwa atongi anango akuti panango nee asafuna kuphedza anthu. Mbwenye Ntongi wa Umambo wa Mulungu, wakuti ndi Yezu, nee anadzacinjwa mbapita munthu unango. Mulungu ‘akhazikisa umambo wakuti nkhabe kudzafudzwa.’ (Dhanyeli 2:44) Yezu anadzatonga dziko yonsene yapantsi, pontho anadzatsalakana mwadidi anthu onsene munjira ibodzi ene. Iye ndi waufuni, wakukoma ntima na wakulungama, pontho anadzapfundzisa anthu toera atsalakanane mwadidi unango na ndzace: Mwaufuni, mwakukoma ntima na mwakulungama.—Lerini Izaiya 11:9.

4. Umambo wa Mulungu unadzatonga dziko yonsene yapantsi

Yezu Kristu ali na mphambvu kakamwe yakutonga kupiringana anthu onsene adatonga dziko. Lerini Mateu 28:18, buluka penepo cedzani thangwi ya mbvundzo uyu:

• Ndi munjira ipi utongi wa Yezu ndi wakusiyana kakamwe na mautongi a anthu?

Mautongi a anthu ndzidzi onsene asacinjwa, pontho ntongi m’bodzi na m’bodzi asatonga khundu ibodzi basi ya dziko. Ndiye tani Umambo wa Mulungu? Lerini Dhanyeli 7:14, buluka penepo cedzani thangwi ya mibvundzo iyi:

• Thangwi yanji ndi pyadidi kudziwa kuti Umambo wa Mulungu “nkhabe kudzafudzwa”?

• Thangwi yanji ndi pyadidi kudziwa kuti Umambo unoyu unadzatonga dziko yonsene yapantsi?

5. Mautongi a anthu asafunika kucinjwa

Thangwi yanji Umambo wa Mulungu usafunika kupitira mbuto mautongi a anthu? Onani VIDHYU, buluka penepo cedzani thangwi ya mbvundzo unatowera.

VIDHYU: Umambo wa Mulungu Ninji?—Vidhyu Yakugwandwa (1:41)

• Ndi nyatwa zipi zinaoneka thangwi ya mautongi a anthu?

Lerini Ekleziaste 8:9, buluka penepo cedzani thangwi ya mibvundzo iyi:

• Kodi imwe musanyerezera kuti Umambo wa Mulungu usafunika kupitira mbuto mautongi a anthu? Thangwi yanji?

6. Umambo wa Mulungu uli na atongi akuti asatibvesesa

Nakuti Mambo wathu Yezu Kristu akhala pa dziko yapantsi, iye “anakwanisa kutibvera ntsisi thangwi yakufewa kwathu.” (Ahebheri 4:15) Kusiyapo pyenepi, Yahova asankhula amuna na akazi akukhulupirika akukwana 144.000 adabuluka “m’madzindza onsene, pilongero pyonsene, mbumba zonsene na madziko onsene” toera kutonga pabodzi na Yezu.—Apokalipse 5:9.

• Kodi mphyakutsandzayisa kuna imwe kudziwa kuti Yezu pabodzi na ale anafuna kudzatonga na iye asabvesesa nyatwa zinatamba ife? Thangwi yanji?

7. Umambo wa Mulungu uli na mitemo yadidi kakamwe

Mautongi asakhazikisa mitemo toera kuphedza na kutsidzikiza anthu awo. Umambo wa Mulungu uli nayombo mitemo yakuti isafunika kutowezerwa. Lerini 1 Akorinto 6:9-11, buluka penepo cedzani thangwi ya mibvundzo iyi:

• Musanyerezera kuti dziko mbidakhala tani anthu onsene mbadabvera mitemo ya Mulungu?a

• Kodi imwe musanyerezera kuti mphyakuthema Yahova kuphemba anthu kuti abvere mitemo ya Umambo wace? Thangwi yanji?

• Ninji pinapangiza kuti anthu akuti nee asabvera mitemo ineyi anakwanisa kucinja?—Onani vesi 11.

TAPFUNDZANJI

Umambo wa Mulungu ndi utongi wakudzulu wakuti unadzatonga dziko yonsene yapantsi.

Mibvundzo yakubwereza

• Mbani anafuna kudzatonga mu Umambo wa Mulungu?

• Thangwi yanji Umambo wa Mulungu ndi wakusiyana kakamwe na mautongi a anthu?

• Kodi Yahova asafuna kuti ale anafuna kudzapita mu Umambo wace acitenji?

TOERA KUDZIWA PINANGO

Onani pidapfundzisa Yezu thangwi ya kunagumanika Umambo wa Mulungu.

“Kodi Umambo wa Mulungu Ndi Cinthu Ciri Muntima Mwathu?” (Nsolo wa mu jw.org)

Thangwi yanji Mboni za Yahova zisaona kuti kukhulupira Umambo wa Mulungu ndi kwakufunika kakamwe kupiringana kukhulupira mautongi a anthu?

Anthu Adaperekeka ku Umambo wa Mulungu (1:43)

Onani kuti Bhibhlya isalonganji thangwi ya anthu akukwana 144.000 adasankhulwa na Yahova toera kudzatonga pabodzi na Yezu.

“Mbani Anaenda Kudzulu?” (Nsolo wa mu jw.org)

Ninji pidacitisa nkazi m’bodzi wakuti akhali nkaidi kukhulupira kuti basi ene ndi Mulungu anafuna kubwerese ntendere pa dziko yapantsi?

“Ndadziwa Tani Ule Anafuna Kumalisa Kusoweka Kwa Ulungami” (Lamukani!, Novembro 2011)

Umambo wa Mulungu watoma kutonga kudzulu mu caka 1914. Pontho ndi caka ceneci cidatoma ntsiku zakumalisa za utongi wa anthu. Tisadziwa tani pyenepi? Tendeni tione pinalonga profesiya inango ya m’Bhibhlya thangwi ya pyenepi, tinaonambo pinthu pinacitika pa dziko yapantsi kutomera mu caka 1914.

1. Bhibhlya ikhadalonganji?

Bukhu ya Dhanyeli isalonga kuti Umambo wa Mulungu mbudatoma kutonga kunkhomo kwa “midzidzi minomwe.” (Dhanyeli 4:16, 17) Pidapita pyaka pizinji, Yezu alonga kuti midzidzi ineyi ndi “kumala kwa ndzidzi udakhazikiswa kwa anthu a madzindza anango,” pontho apfundzisa kuti ndzidzi ukhadzati kumala. (Luka 21:24) Ninga pinafuna ife kupfundza, midzidzi ineyi minomwe yamala mu caka 1914.

2. Ninji pinacitika pa dziko kutomera mu caka 1914, pontho anthu asapangiza makhaliro api?

Anyakupfundza a Yezu abvundza: “Ndi cipi cidzindikiro ca kuonekera kwanu na cakumala kwa makhaliro a dziko?” (Mateu 24:3) Pakuatawira, Yezu alonga pinthu pizinji pikhafuna kucitika mu ndzidzi ukhafuna iye kutoma kutonga ninga Mambo wa Umambo wa Mulungu kudzulu. Pinango mwa pinthu pyenepi pisaphataniza nkhondo, njala na piteketeke. (Lerini Mateu 24:7.) Bhibhlya yalongambo kuti “mu ntsiku zakumalisa” anthu mbadacita pinthu pizinji pyakuipa, pyakuti mbapidacitisa umaso ‘kukhala wakunentsa.’ (2 Timoti 3:1-5) Kutomera mu caka 1914 pinthu pyenepi pyakuipa pikuthimizirika kakamwe.

3. Thangwi yanji pinthu pyakuipa pikutekera kakamwe pa dziko kutomera mu ndzidzi udatoma kutonga Umambo wa Mulungu?

Pidatoma Yezu kutonga ninga Mambo wa Umambo wa Mulungu, iye amenya nkhondo na Sathani pabodzi na madimonyo ace. Sathani akundwa pa nkhondo ineyi. Bhibhlya isalonga kuti “iye aponywa pa dziko yapantsi, pontho aanju ace aponywa pantsi pano pabodzi na iye.” (Apokalipse 12:9, 10, 12) Sathani ali wakuipirwa kakamwe, thangwi iye asadziwa kuti anadzafudzwa. Ndi thangwi yace, iye asabweresa nyatwa zizinji pa dziko yapantsi. Pyenepi pisatiphedza kubvesesa kuti thangwi yanji pa dziko yapantsi pasaoneka nyatwa zizinji kakamwe! Mbwenye pyakutsandzayisa ndi pyakuti Umambo wa Mulungu unadzamalisa nyatwa zenezi zonsene.

DZIWANI PIZINJI

4. Maprofesiya a Bhibhlya asapangiza kuti Umambo wa Mulungu watoma kutonga mu caka 1914

VIDHYU: Umambo wa Mulungu Watoma Kutonga mu Caka 1914 (5:02)

Mulungu acitisa kuti Mambo Nabhukodhonozore alote ndoto. Mu ndoto ineyi, Yahova apangiza pinthu pyakuti mbapidacitika ntsogolo. Dhanyeli afokotoza mabvekero a ndoto ineyi, pontho apangiza kuti ndoto ineyi isalonga pya utongi wa Nabhukodhonozore na Umambo wa Mulungu.—Lerini Dhanyeli 4:17.a

Lerini Dhanyeli 4:20-26, buluka penepo phatisirani bokosi toera kutawira mibvundzo inatowera:

• (A) Kodi Nabhukodhonozore aonanji mu ndoto yace?—Onani vesi 20 na 21.

• (B) Ninji pikhafuna kucitikira muti udalota iye?—Onani vesi 23.

• (C) Ninji pikhafuna kucitika pakumala kwa “midzidzi minomwe”?—Onani vesi 26.

Ndoto ya Muti Unoyu Isabverana Tani na Umambo wa Mulungu?

PROFESIYA (Dhanyeli 4:20-36)

Utongi

(A) Muti ukulu

Utongi mbudasiya kutonga

(B) ‘Gwandani muti, mpaka papite midzidzi minomwe’

Utongi mbudatoma pontho kutonga

(C) “Imwe munadzapaswa pontho umambo wanu”

Pidakwanirisika profesiya ineyi pakutoma . . .

• (D) Muti ukhaimirira ani? —Onani vesi 22.

• (E) Iye asiya lini kutonga? —Lerini Dhanyeli 4:29-33.

• (F) Ninji pidacitikira Nabhukodhonozore pakumala kwa “midzidzi minomwe”? —Lerini Dhanyeli 4:34-36.

KUKWANIRISIKA KWAKUTOMA

Utongi

(D) Nabhukodhonozore, Mambo wa ku Bhabhilonya

Utongi mbudasiya kutonga

(E) Pakumala kwa caka 606 K.M.K., Nabhukodhonozore atoma kucita pinthu ninga nyansala, pontho nee akwanisa kutonga mu pyaka pinomwe

Utongi mbudatoma pontho kutonga

(F) Nabhukodhonozore awanga, mbatoma pontho kutonga

Kukwanirisika kwaciwiri kwa profesiya ineyi . . .

• (G) Muti ukhaimirira ani? —Lerini 1 Kronika 29:23.

• (H) Iwo asiya lini kutonga? Tisadziwa tani kuti iwo nee akhapitiriza kutonga mu ndzidzi ukhali Yezu pa dziko yapantsi? —Lerini Luka 21:24.

• (I) Utongi unoyu watoma lini kutonga kaciwiri, pontho ukutonga kupi?

KUKWANIRISIKA KWACIWIRI

Utongi

(G) Amambo a Izraeli akuti akhaimirira Umambo wa Mulungu

Utongi mbudasiya kutonga

(H) Yerusalemu afudzwa, pyenepi pyacitisa kuti amambo a Izraeli asiye kutonga mu pyaka 2.520

Utongi mbudatoma pontho kutonga

(I) Yezu atoma kutonga kudzulu ninga Mambo wa Umambo wa Mulungu

5. Pinthu pyacinja kakamwe pa dziko yapantsi kutomera mu caka 1914

Onani VIDHYU.

VIDHYU: Dziko Yacinja Kakamwe Kutomera 1914 (1:10)

Yezu alonga pinthu pikhafuna kucitika pa dziko yapantsi angamala kukhazikiswa ninga mambo. Lerini Luka 21:9-11, buluka penepo cedzani thangwi ya mbvundzo uyu:

• Mwakubverana na mavesi adaleri ife, ndi pinthu pipi pinaona imwe mbapikacitika peno pidabva imwe kuti piri kucitika?

Mpostolo Paulu alonga pinthu pikhafuna kucitika mu ntsiku zakumalisa za mautongi a anthu. Lerini 2 Timoti 3:1-5, buluka penepo cedzani thangwi ya mbvundzo uyu:

• Mwakubverana na mavesi adaleri ife, ndi pinthu pipi pinaona imwe mbapikacitika mu ntsiku zino?

6. Pangizani kuti musaphedzera Umambo wa Mulungu

Lerini Mateu 24:3, 14, buluka penepo cedzani thangwi ya mibvundzo iyi:

• Ndi basa ipi yakufunika kakamwe inapangiza kuti Umambo wa Mulungu ukutonga cincino?

• Munacitanji toera kuphedzerambo basa ineyi?

Umambo wa Mulungu ukutonga cincino, pontho mwakukhonda kudembuka, iwo unadzatonga pa dziko yonsene yapantsi. Lerini Ahebheri 10:24, 25, buluka penepo cedzani thangwi ya mbvundzo uyu:

• Kodi m’bodzi na m’bodzi wa ife asafunika kucitanji ‘mu ndzidzi unaona ife kuti ntsiku ya Mulungu iri kufika’?

TAPFUNDZANJI

Maprofesiya a m’Bhibhlya na pinthu pinacitika pa dziko yapantsi, pisapangiza kuti Umambo wa Mulungu ukutonga. Ife tinapangiza kuti tisakhulupira pyenepi, tingamwaza mphangwa za Umambo unoyu na kugumanika pa misonkhano ya mpingo.

Mibvundzo yakubwereza

• Ninji pidacitika pakumala kwa midzidzi minomwe inalongwa m’bukhu ya Dhanyeli?

• Ninji pinakupasani cinyindiro cakuti Umambo wa Mulungu watoma kutonga mu caka 1914?

• Munapangiza tani kuti musakhulupira kuti Umambo wa Mulungu ukutonga cincino?

TOERA KUDZIWA PINANGO

Onani pidalonga anthu analemba pinthu pidacitika kale na pidalonga anthu anango thangwi ya macinjo adacitika kutomera mu caka 1914.

“Ndzidzi Wakuti Makhaliro a Anthu Acinja Kakamwe” (Lamukani!, Abril 2007)

Onani kuti profesiya inagumanika pa Mateu 24:14 yacinja tani umaso wa mamuna unango.

“Eu amava o basebol mais do que tudo!” (A Sentinela, n.º 3 de 2017)

Tisadziwa tani kuti profesiya inagumanika m’bukhu ya Dhanyeli kapitulu 4 isalonga pya Umambo wa Mulungu?

“Umambo wa Mulungu Watoma Lini Kutonga? (Khundu 1)” (Ncenjezi, 1 ya Outubro 2014)

Tisadziwa tani kuti “midzidzi minomwe” inalongwa pa Dhanyeli kapitulu 4 yamala mu caka 1914?

“Umambo wa Mulungu Watoma Lini Kutonga? (Khundu 2)” (Ncenjezi, 1 ya Novembro 2014)

Umambo wa Mulungu watoma kale kutonga. Mwakukhonda dembuka, iwo unadzabweresa nkhombo zizinji pa dziko yapantsi. Tendeni tione nkhombo zingasi zinafuna kukhala na ife Umambo wa Mulungu ungatoma kutonga pa dziko yapantsi.

1. Umambo wa Mulungu unacitanji toera ubwerese ntendere na ulungami pa dziko yapantsi?

Yezu wakuti ndi Mambo wa Umambo wa Mulungu, anadzafudza anthu anacita pyakuipa na mautongi a anthu pa dziko yapantsi pa nkhondo ya Armajedhoni. (Apokalipse 16:14, 16) Pyenepi pingacitika, profesiya iyi inagumanika m’Bhibhlya inadzakwanirisika: “Thimize pano, anyakuipa nkhabe kudzaonekabve.” (Masalmo 37:10) Yezu anadzaphatisira Umambo wa Mulungu toera kubweresa ntendere na ulungami pa dziko yonsene yapantsi.—Lerini Izaiya 11:4.

2. Kodi umaso unadzakhala tani Mulungu angadzacita pinafuna iye pa dziko yapantsi?

Umambo wa Mulungu ungatoma kutonga dziko, “anthu akulungama anadzapaswa dziko yapantsi, pontho iwo anadzakhala mwenemu kwenda na kwenda.” (Masalmo 37:29) Pinadzakhala pyakutsandzayisa kakamwe kukhala mu dziko yakuti anthu onsene ndi akulungama, asafuna Yahova, pontho asafunana unango na ndzace! Nkhabebve munthu anafuna kudzabva kupha, pontho anthu onsene anadzakhala na umaso wakwenda na kwenda.

3. Umambo wa Mulungu unadzacitanji anthu akuipa angamala kufudzwa?

Anthu akuipa angamala kufudzwa, Yezu anadzatonga ninga Mambo mu pyaka 1.000. Mu ndzidzi unoyu, iye pabodzi na anthu akukwana 144.000 anafuna kutonga pabodzi na iye, anadzaphedza anthu pa dziko yapantsi toera akhale akusowa madawo. Pakumala kwa pyaka 1.000, dziko yonsene yapantsi inadzakhala paraizu, pontho anthu onsene anadzakhala akutsandzaya thangwi yakubvera mitemo ya Yahova. Buluka penepo, Yezu anadzapereka Umambo kuna Pai wace, Yahova. Natenepa, ‘dzina ya Yahova inadzaceneswa.’ (Mateu 6:9, 10) Anthu onsene anadzadziwa kuti Yahova ndi Ntongi wadidi kakamwe wakuti asatsalakana atumiki ace. Buluka penepo, Yahova anadzafudza Sathani, madimonyo na anthu onsene anafuna kusankhula kukhonda bvera Utongi wace. (Apokalipse 20:7-10) Nkhombo zinafuna kudzabweresa Umambo wa Mulungu zinadzakhala zakwenda na kwenda.

DZIWANI PIZINJI

4. Umambo wa Mulungu unadzamalisa mautongi onsene a anthu pa dziko yapantsi

Bhibhlya isalonga: “Munthu asaponderera munthu ndzace toera kun’thabusa.” (Ekleziaste 8:9) Yahova anadzaphatisira Umambo wace toera kumalisa pinthu pyakukhonda kulungama.

Lerini Dhanyeli 2:44 na 2 Atesalonika 1:6-8, buluka penepo cedzani thangwi ya mibvundzo iyi:

• Kodi Yahova na Yezu anadzacitanji na mautongi a anthu pabodzi na ale anaaphedzera?

• Munganyerezera pyonsene pidapfundza imwe thangwi ya Yahova na Yezu, thangwi yanji munakwanisa kukhala na cinyindiro cakuti iwo anadzatonga mwakulungama?

5. Yezu ndi Mambo wadidi kakamwe

Ninga mambo wa Umambo wa Mulungu, Yezu anadzacita pinthu pizinji pyadidi toera kuphedza anthu pa dziko yapantsi. Onani VIDHYU toera muone kuti Yezu asafuna kakamwe kuphedza anthu, pontho Mulungu ampasa mphambvu toera kucita pyenepi.

VIDHYU: Yezu Apangiza Pinafuna Kudzacita Umambo wa Mulungu (1:13)

Pinthu pidacita Yezu pikhali iye pa dziko yapantsi, pyapangiza pinafuna iye kucita ninga Mambo wa Umambo wa Mulungu. Pakati pa nkhombo ziri pantsi apa, ndi zipi zakuti musazidikhira kakamwe? Lerini malemba akuti anakuphedzani toera kudziwa pizinji thangwi ya nkhombo zenezi.

6. Umambo wa Mulungu unadzabweresa nkhombo zadidi kakamwe

VIDHYU: Nkhombo Zinafuna Kudzakhala na Ife Ntsogolo (4:38)

Lerini Masalmo 145:16, buluka penepo cedzani thangwi ya mbvundzo uyu:

• Kodi mphyakutsandzayisa kudziwa kuti Yahova anadzakwanirisa “cifuno ca pinthu pyonsene piri na umaso”?

TAPFUNDZANJI

Umambo wa Mulungu unadzacita pikhafuna Mulungu pakutoma. Iwo unadzacitisa kuti dziko yapantsi ikhale paraizu, pontho mwenemu anthu adidi anadzalambira Yahova kwenda na kwenda.

Mibvundzo yakubwereza

• Kodi Umambo wa Mulungu unadzacenesa tani dzina ya Yahova?

• Thangwi yanji tiri na cinyindiro cakuti Umambo wa Mulungu unadzakwanirisa maprofesiya anagumanika m’Bhibhlya?

• Mwa nkhombo zonsene zinafuna kubweresa Umambo wa Mulungu, ndi zipi zinadikhira imwe kakamwe?

TOERA KUDZIWA PINANGO

Dziwani kuti Armajedhoni ninji.

“Armajedhoni Ninji?” (Nsolo wa mu jw.org)

Onani pinthu pinafuna kudzacitika mu ndzidzi wakuti Yezu asaucemera nyatwa ikulu.

“O que a grande tribulação?” (Nsolo wa mu jw.org)

Onani kuti mabanja anacitanji toera kunyerezera pabodzi thangwi ya nkhombo zinafuna kubweresa Umambo wa Mulungu.

Nyerezerani Kuti Muli m’Paraizu (1:50)

Lerini nsolo wakuti “Ndikhali na Mibvundzo Mizinji Yakuti Ikhandidzudzumisa,” toera kuona kuti mamuna unango wakuti akhali nyakusandukira mautongi agumana tani pinthu pikhasaka iye.

“Bhibhlya Isacinja Umaso wa Anthu” (Ncenjezi, 1 ya Janeiro 2012)