Pikumbuso Pya Yahova Ndi Pyakunyindirika

1. Ndi misolo ipi inadingwa kazinji kene na atumiki a Mulungu, na tisaphindula tani tingaibwerezera?

MUNAKHUNGANYIKA imwe nsolo unafuna kudza wa Pfundziro ya Ncenjezi, mwatoma kunyerezera, ‘Kodi nee tadinga kale nsolo unoyu?’ Khala m’midzidzi inango musagumanyikana na mpingo Wacikristu, panango mwaona kuti misolo inango isabwerezerwa. Kupfundza pya Umambo wa Mulungu, ciomboli, basa yakucita anyakupfundza, makhaliro ninga ufuni na cikhulupiro ndi nkhundu ya cakudya cathu cauzimu ntsiku zonsene. Kubwerezera misolo ineyi, tisaphedzwa toera kukhala na cikhulupiro cakuwanga, pontho toera ‘tikhale anthu akucita mafala a Mulungu, si akuabva basi tayu.’​—Tgo. 1:22.

2. (a) Kazinji kene pikumbuso pya Mulungu pisabvekanji? (b) Kodi pikumbuso pya Mulungu pyasiyana tani na pya anthu?

² Fala ya Cihebere yakuthumburuzwa “pikumbuso” kazinji kene isalonga pya miyambo, mitemo, matongero anapereka Mulungu kwa atumiki ace. Mwakusiyana na miyambo ya anthu yakuti kazinji kene isafunika kucinjwa peno kusasanyirwa, mbwenye miyambo ya Yahova na matongero ace ndi akunyindirika ndzidzi onsene. Ngakhale kuti miyambo na matongero anango asaperekwa mu ndzidzi peno makhaliro akupambulika, iwo cipo asakhala akukhonda kwana peno akukhonda thema. Nyamasalmo alonga: “Pikumbuso pyanu ndi pya kwenda na kwenda.”​—Sal. 119:144, NM.

3, 4. (a) Kodi pikumbuso pya Yahova pisaphatanizanji? (b) Kodi Aisraele mbadaphindula tani khala iwo mbadabvera pikumbuso pyenepi?

³ Panango, imwe mwaona kuti midzidzi inango pikumbuso pya Yahova pisaphataniza mphangwa zakucenjeza. Mbumba ya Israele ikhacenjezwa ndzidzi onsene na aprofeta a Mulungu. Mwacitsandzo, Aisraele mbadzati kupita mu Dziko Yakupikirwa, Mose aacenjeza: ‘Khurudzani mitima yanu toera mukhonde manyengerero akufuna kuphatira alungu anango mbamualambira. Gopa Yahova anaipirwa na imwe.’ (Deut. 11:16, 17) Bhibhlya isapangiza kuti Mulungu apasa anthu ace pikumbuso pizinji pyakuphedza kakamwe.

⁴ M’midzidzi inango, Yahova apanga Aisraele toera kun’gopa, kubvesera fala yace, na kucenesa dzina yace. (Deut. 4:29-31; 5:28, 29) Iwo mbadabvera pikumbuso pyenepi, mbadakhala na cinyindiro cakutambira nkhombo zizinji.​—Lev. 26:3-6; Deut. 28:1-4.

AISRAELE ABVERA TANI PIKUMBUSO PYA YAHOVA

5. Thangwi yanji Mulungu aphedza Mambo Ezekiya?

⁵ M’mbiri yonsene na nyatwa zizinji za Aisraele, Mulungu akwanirisa pikiro yace. Mwacitsandzo, mu ndzidzi wakuti Mambo wa ku Asirya Senakeribu apomokera dziko ya Yuda toera kufudza na kugopesa Mambo Ezekiya, Yahova ancimwanisa mu kuphatisira anju. Ntsiku ibodzi basi namasiku, anju wa Mulungu apha “anyankhondo na akadamu ene a mambo wa ku Asirya,” natenepa Senakeribu akakamizika kubwerera kunyumba mwamanyadzo. (2 Pya dziko. 32:21; 2 Am. 19:35) Thangwi yanji Mulungu aphedza Mambo Ezekiya? Thangwi ‘yakukhulupira kwache Yahova, na kuntowera mbakoya matongero onsene adapaswa iye na Mulungu.’​—2 Am. 18:1, 5, 6.

6. Kodi Mambo Yosiya anyindira tani Yahova?

⁶ Citsandzo cinango ca munthu adabvera matongero a Yahova ndi ca Mambo Yosiya. Kutomera pa uwana wace, na pyaka pisere, iye “achita pyadidi pa maso pa [Yahova].” (2 Pya dziko. 34:1, 2) Yosiya apangiza kukhulupira kwace Yahova mu kubulusa ulambiri wa madzimunthu mu dziko mbakhazikisa ulambiri wandimomwene. Mu kucita pyenepi, Yosiya atambira nkhombo tayu iye basi mbwenye kuphatanizambo mbumba yonsene.​—Lerini 2 Pya dziko ya Israele 34:31-33.

7. Mukhapwaza Aisraele pikumbuso pya Yahova, ninji pidaacitikira?

⁷ Mwakutsukwalisa, ndzidzi onsene mbumba ya Mulungu nee ikhanyindira mwakukwana pikumbuso pya Yahova. Mu kupita kwa pyaka madzana, iwo acimwana kusankhula kubvera na kukhonda bvera. Mudathowa cikhulupiro cawo, pikhacita iwo pikhabverana na mafala a mpostolo Paulu, ‘akhakwekwetwa na mphepo ya mapfundzisiro onsene.’ (Aef. 4:13, 14) Pontho, ninga pyalongwa, mukakhonda iwo kunyindira pikumbuso pya Mulungu, iwo akhatabuka kakamwe.​—Lev. 26:23-25; Yer. 5:23-25.

8. Kodi tinapfundzanji kubulukira ku citsandzo ca Aisraele?

⁸ Ndi mu njira ipi tinakwanisa kuphindula na citsandzo ca Aisraele? Ninga pikhacita iwo, atumiki a Mulungu lero asatambira uphungu na kusandikwa. (2 Ped. 1:12) Mafala akupumirwa a Mulungu anakwanisa kukhala cikumbuso kwa ife mu ndzidzi onsene unaaleri ife. Ninga anthu a ufulu wakusankhula, tinakwanisa kusankhula kubvera pitsogolero pya Mulungu peno kutowerera pinthu pinaona ife kukhala pyadidi. (Mis. 14:12) Tendeni tidinge pinthu pingasi pinapangiza thangwi yanji tinakwanisa kunyindira pikumbuso pya Yahova na tinaphindula tani mu kupibvera.

BVERANI MULUNGU TOERA MUKHALE NA UMASO

9. Pikakhala Aisraele n’thando, kodi Yahova aapasa tani cinyindiro cakuti iye akhaaphedza?

⁹ Mudatoma Aisraele kucita ulendo wa pyaka 40 mu ‘thando ya kugopswa,’ Yahova nee akhadaapasa mphangwa zonsene zakuti mbadaatsogolera tani, mbadaatsidzikiza tani na mbadaatsalakana tani. Mwakubwereza-bwereza Yahova apitiriza kuapangiza kuti iwo akhafunika kunyindira iye na pitsogolero pyace. Yahova aatsogolera namasikati mu kuphatisira khole ya ceza, namasiku aphatisira khole ya moto. Yahova akumbusa Aisraele kuti iye akhaaphedza toera kuwambuka thando ineyi. (Deut. 1:19; Eks. 40:36-38) Pontho Yahova aapasambo pinthu pyakumanungo. “Pyakubvala pyawo hapidasakala tayu, na miyendombo yawo hidabzwimba tayu.” Mwandimomwene, ‘iwo nee asowa cinthu.’​—Nem. 9:19-21.

10. Kodi Yahova asatsogolera tani atumiki ace lero?

¹⁰ Lero, atumiki a Mulungu ali cifupi kupita mu dziko ipswa yakulungama. Kodi tisanyindira Yahova toera kutipasa pinafuna ife kuti tipulumuke pa ‘nyatwa ikulu’ inafuna kudza? (Mat. 24:21, 22; Sal. 119:40, 41) Mwandimomwene, Yahova nkhabe kupereka khole ya ceza nee khole ya moto toera kutitsogolera mu dziko ipswa. Mbwenye, iye asaphatisira gulu yace toera kutiphedza kukhala akucenjera. Mwacitsandzo, kusagomezerwa kakamwe kuwangisa uzimu wathu kubulukira mu kuleri Bhibhlya tekhene, Kulambira Kwa Banja namaulo, kugumanika mwakukhonda phonya pa misonkhano na mu utumiki. Kodi tisacita masasanyiro toera kuphatisira pitsogolero pyenepi? Kucita pyenepi kunadzatiphedza toera kukhala na cikhulupiro cakuti cinatiphedza kupita mu dziko ipswa.

11. Ndi mu njira zipi Mulungu asapangiza citsalakano kwa ife?

¹¹ Mwakuthimizira, toera kutiphedza kukhonda gona mwauzimu, pitsogolero pinatambira ife pisatiphedza m’makhaliro athu a ntsiku na ntsiku. Pitsandzo pisaphataniza kukhala na maonero akulinganira a pinthu pyakumanungo na kukhala na diso yakuyang’ana kubodzi toera kupungula kupswipa ntima. Tisaphindulambo na pitsogolero pinalonga pya mabvaliro na makhunganyikiro athu, kusankhula ubalangazi wadidi, na kukhala na pisankhulo pyadidi pa mapfundziro a dziko. Pontho tisafunika kunyerezera pikumbuso pyakutsidzikiza pinatambira ife pinalonga thangwi ya nyumba zathu, kutekenya miotokala, Nyumba za Umambo na kukhunganyika pangaoneka pidengwa. Uphungu unoyu usapangiza kuti Mulungu asatsalakana umaso wathu.

PIKUMBUSO PYAPHEDZA AKRISTU AKUTOMA KUKHALA AKUKHULUPIRIKA

12. (a) Kodi ndi nkhani ipi yakuti Yezu aibwereza-bwereza pakulonga na apostolo ace? (b) Kodi ndi ncitiro upi wakucepeseka udakhuya Pedhro, na usafunika kutikhuyambo tani?

¹² Mu pyaka dzana yakutoma, atumiki a Mulungu akhatambira pikumbuso ndzidzi onsene. Mwakubwereza-bwereza, Yezu alonga kwa anyakupfundzace thangwi yakufunika kukhala wakucepeseka. Natenepa, iye acita pizinji kusiyapo kupanga basi anyakupfundzace kuti pisabvekanji kukhala wakucepeseka mbwenye iye aapangiza. Pa ntsiku yace yakumalisa pa dziko yapantsi ninga munthu, Yezu agumanya apostolo toera kucita Paskwa. Mu ndzidzi ukhadya iwo, Yezu alamuka mbatsuka manyalo a apostolo, basa yakuti kazinji kene ikhacitwa na ndzakazi. (Jwau 13:1-17) N’khaliro wace wakucepeseka waakhuya kakamwe. Pakupita pyaka 30, mpostolo Pedhro wakuti akhalipombo pa Paskwa, apereka uphungu unalonga thangwi ya kucepeseka kwa Akristu andzace. (1 Ped. 5:5) Citsandzo ca Yezu cisafunika kukulumiza tonsene toera kukhala akucepeseka pakucita pinthu na anango.​—Afil. 2:5-8.

13. Kodi Yezu akumbusa anyakupfundzace toera kukulisa n’khaliro upi wakufunika kakamwe?

¹³ Kufunika kwa kukhala na cikhulupiro cakuwanga, ikhali nkhani inango yakuti Yezu kazinji kene akhalonga na anyakupfundzace. Mukucimwana kwawo kubulusa demonyo ikhali na mphale, anyakupfundza abvundza Yezu: “Ife tachimwaniranji kuithamangisa?” Yezu atawira: “Thangwi kukhulupira kwanu kwachepa. Andedi, ndinakupangani mphapo: kukhulupira kwanu kungakhala basi kung’onong’ono ninga mbeu ya mostarda, . . . nkhabepo chinthu chibodzi chinadzachimwanika.” (Mat. 17:14-20) Mu utumiki onsene wa Yezu, iye apfundzisa anyakupfundzace kuti cikhulupiro ndi n’khaliro wakufunika kakamwe. (Lerini Mateo 21:18-22.) Kodi tisabandza miyai iri na ife toera kuwangisa cikhulupiro cathu kubulukira mu pitsogolero pinaperekwa pa misonkhano ya gawo, ya cisa, yakupambulika, na misonkhano ya Mpingo? Misonkhano ineyi ndi yakutsandzayisa kakamwe, mbwenye iyo isatipasa midzidzi toera kunyindira Yahova.

14. Thangwi yanji lero mphyakufunika kukulisa ufuni ninga wa Kristu?

¹⁴ Malemba Acigrego Acikristu adzala na pikumbuso toera tipangize ufuni kwa unango na ndzace. Yezu alonga kuti mwambo ukulu waciwiri ndi “funa ndzako ninga iwe ene.” (Mat. 22:39) Mu njira ibodzi ene, Tyago, m’bale wa Yezu, alonga kuti ufuni ndi “mwambo wa mambo.” (Tgo. 2:8) Mpostolo Jwau alemba: “Anga a pa ntima, si matongero mapswa tayu pinakulemberani ine, mbwenye ndi matongero a kale, adatambira imwe kutomera pa nkhomo [peno pakutoma.]” (1 Jwau 2:7, 8) Kodi Jwau akhalonganji na mafala “matongero a kale”? Iye akhalonga pya matongero a ufuni. Matongero anewa akhali “a kale” mu njira yakuti Yezu aapereka mu pyaka pya nduli, ‘kutomera pakutoma.’ Mbwenye akhalimbo “mapswa” mu njira yakuti usacemerwa ufuni wakudzimana, wakuti anyakupfundza akhafunika kukhala nawo pakuthimbana na nyatwa zipswa. Ninga anyakupfundza a Kristu, kodi tisapereka takhuta ku macenjezo akuti asatiphedza toera kukhonda kukulisa nzimu wakucenama wa dziko ino, wakuti unakwanisa kunyenyena ufuni wathu kwa anyakuendekana athu?

15. Kodi ikhali ipi basa yakutoma ya Yezu pa dziko yapantsi?

¹⁵ Yezu apangiza citsalakano kwa anthu. Tisaona ufuni wace mukhawangisa iye atenda na mukhalamusa iye anthu akufa. Natenepa, basa yakutoma ya Yezu nee ikhali yakuwangisa mautenda a anthu. Kumwaza kwace mphangwa na kupfundzisa kwace kukhakhuya kakamwe umaso wa anthu. Mu njira ipi? Mwacitsandzo, tisadziwa kuti ale adawangiswa na Yezu na ale adalamuswa mwa akufa mu pyaka dzana yakutoma, mu kupita kwa ndzidzi akalamba mbafa, mbwenye ale adatawira mphangwa zikhamwaza iye ali na cidikhiro cakukhala na umaso wa kwenda na kwenda.​—Jwau 11:25, 26.

16. Kodi basa yakumwaza mphangwa na kucita anyakupfundza ikuthambaruka tani lero?

¹⁶ Basa yakumwaza mphangwa idatoma Yezu mu pyaka dzana yakutoma ikucitwa m’mbuto zizinji lero. Yezu apanga anyakupfundzace: ‘Ndokoni kapfundzisa anthu a mitundu yonsene.’ (Mat. 28:18) Mwandimomwene iwo akucita basa ineyi, ife tinakwanisambo kulonga, mwandimomwene tikucita basa ineyi! Mboni za Yahova zakupiringana na mamiliyau manomwendi zaphinga mu kumwaza mphangwa za Umambo wa Mulungu m’madziko akupiringana 230, pontho m’midzidzi yonsene iwo asapfundza Bhibhlya na mamiliyau a anthu. Kuthambaruka kwa basa ineyi kusapangiza kuti tikukhala mu ntsiku zakumalisa.

NYINDIRANI YAHOVA LERO

17. Ndi uphungu upi udapereka Paulu na Pedhro?

¹⁷ Mwandimomwene, pikumbuso pyaphedza Akristu akale toera kukhala na cikhulupiro cakuwanga. Nyerezerani ciwangiso cidapereka mpostolo Paulu kuna Timoti mu ndzidzi ukakhala iye nkaidi ku Roma. Paulu ampanga: ‘Onesesa mapfundzisiro adidi adabva iwe kuli ine pano, mbuatawira, mbufunambo pyonsene pya mwa Kristu Yezu.’ (2 Tim. 1:13) Pakumala kuwangisa Akristu andzace toera kukulisa makhaliro ninga kupirira, kufuna abale, na kudzitonga, mpostolo Pedhro alonga: ‘Ndinakukumbusani ntsiku zonsene pinthu pyenepi. Ngakhale musapidziwa kale, wangani na kutawira pinthu pya undimomwene.’​—2 Ped. 1:5-8, 12.

18. Kodi Akristu a pyaka dzana yakutoma aona tani pikumbuso?

¹⁸ Inde, matsamba adalemba Paulu na Pedhro asapangiza “mafala adalongiwa kale na alongeri [aprofeta] akuchena.” (2 Ped. 3:2) Kodi abale athu a pyaka dzana yakutoma anyinyirika toera kutambira citsogolero ceneci? Nkhabe, citsogolero ceneci cikhali cipangizo ca ufuni wa Mulungu cakuti caaphedza toera “kupitiriza kutambira udidi wakukhonda kutithema na udziwisi wa Mbuya wathu na Mpulumusi wathu Yezu Kristu.”​—2 Ped. 3:18, NM.

19, 20. Thangwi yanji tisafunika kunyindira pikumbuso pya Yahova, na tinaphindula tani tingacita pyenepi?

¹⁹ Lero, tiri na mathangwi mazinji toera kunyindira pikumbuso pya Yahova, pinagumanika m’Mafalace, Bhibhlya. (Lerini Yoswa 23:14.) M’Bhibhlya tisagumana pidacita Mulungu kwa anthu akusowa ungwiro mu pyaka pikwi. Mbiri ineyi yalembwa toera tiphindule. (Arom. 15:4; 1 Akor. 10:11) Tisaona kukwaniriswa kwa profesiya ya Bhibhlya. Profesiya inakwaniswa kulandaniswa na pikumbuso pinalongwa mwanyapantsi. Mwacitsandzo, anthu azinji asagumanyikana pa ulambiri wakucena wa Yahova, ninga pyalongweratu kuti pinadzacitika mu ‘ntsiku zakumalisa.’ (Iza. 2:2, 3) Kuipa kwa makhaliro a dziko kusakwanirisambo profesiya ya m’Bhibhlya. Ninga pyalongwa, kuthimizirika kwa basa yakumwaza mphangwa pa dziko yonsene kusapangiza pakweca kukwanirisika kwa Mafala a Yezu.​—Mat. 24:14.

²⁰ Nciti wathu akhazikisa mafalace kuti tianyindire. Kodi tisaphindula nawo? Tisafunika kukhulupira pikumbuso pyace. Pyenepi ndi pidacita Rosellen. Iye alonga: “Mudatoma ine kunyindira kakamwe Yahova, ndatoma kuona mwadidi ufuni wace mbakanditsidzikiza na kundiwangisa.” Mu njira ibodzi ene, tinaphindulambo tingakoya pikumbuso pya Yahova.