Citani Pikumbuso Pya Yahova Pikhale Kusekera Kwa Ntima Wanu

1. (a) Ndi mu njira zipi anthu asatawira pikumbuso, pontho thangwi yanji? (b) Kodi kudzikuza kunakhuya tani maonero a munthu pakupaswa uphungu?

ANTHU asatawira citsogolero mu njira zakusiyana. Pikumbuso pya munthu wakuti ali na utongi panango pisatawirwa na manja mawiri, mbwenye uphungu wa xamwali peno wa munthu wakuti nee ndi ntongi panango usakhondwa. Macitiro a ntima wa munthu pakusandikwa na kucenjezwa ndi akusiyana kakamwe. Macitiro anakwanisa kukhala akutsukwalisa, akupasa ntsisi, peno akupasisa manyadzo, kunentseka na kucita khundu. Thangwi yanji pana kusiyana kweneku? Cinthu cibodzi ndi thangwi ya kudzikuza. Mwandimomwene, nzimu wakudzikuza unakwanisa kuumisa ntima wa munthu mbakhonda bvera uphungu na kuluza citsogolero cakufunika.​—Mis. 16:18.

2. Thangwi yanji Akristu andimomwene asakomerwa na uphungu wakubuluswa m’Mafala a Mulungu?

² Mu njira inango, Akristu andimomwene asakomerwa na uphungu wakuphedza, makamaka ungabulukira m’Mafala a Mulungu. Pikumbuso pya Yahova pisapasa udziwisi wadidi, pisatipfundzisa na kutiphedza toera kucalira misampha yakufuna kakamwe mpfuma, makhaliro aulukwali, mitombwe yakuledzeresa peno kuledzera. (Mis. 20:1; 2 Akor. 7:1; 1 Ates. 4:3-5; 1 Tim. 6:6-11) Kusiyapo pyenepi, ‘tisakomerwa pikulu’ thangwi ya nkhombo zakubvera pikumbuso pya Mulungu.​—Iza. 65:14.

3. Kodi ndi n’khaliro upi wa nyamasalmo wakuti ndi wadidi kwa ife kutowezera?

³ Toera kukoya uxamwali wathu wakufunika na Babathu wakudzulu, tisafunika kupitiriza kuphatisira mu umaso wathu pitsogolero pya ndzeru pya Yahova. Mphyadidi tani khala macitiro athu asalandana na a nyamasalmo ule adalemba: “Ndakwata pikumbuso pyanu ninga mpfuma ya kwenda na kwenda, nakuti ndi kusekera kwa ntima wanga”! (Sal. 119:111, NM.) Kodi tisakomerwambo na matongero a Yahova, peno m’midzidzi inango tisaaona ninga ndi akunentsa? Ngakhale kuti m’midzidzi inango tisaipirwa na uphungu unango unatambira ife, nee tisafunika kuluza cidikhiro. Tinakwanisa kukulisa cinyindiro cakuwanga ku udziwisi ukulu wa Mulungu! Tendeni tidinge njira zitatu.

KHALANI NA CINYINDIRO KUBULUKIRA MU PHEMBERO

4. Ndi cinthu cipi cikhali na Dhavidhi mu umaso wace?

⁴ Mambo Dhavidhi akhali na midzidzi yadidi na yakuipa mu umaso wace, mbwenye iye apitiriza kunyindira Nciti wace. Iye alonga: “Kuna Imwe, Yahova, ndinapereka umaso wanga; ndimwe, Mulungu wanga, anakhulupira ine.” (Sal. 25:1, 2, NM.) Ninji pidaphedza Dhavidhi kukulisa cinyindiro ceneci kwa Babace wakudzulu?

5, 6. Kodi Mafala a Mulungu asatipanganji thangwi ya uxamwali ukhali na Dhavidhi na Yahova?

⁵ Anthu azinji asaphembera kuna Mulungu basi ene angakhala pa nyatwa. Ndiye tani khala basi ene mwabvesera xamwali peno wacibale mu ndzidzi ukhafuna iye kobiri peno ciphedzo? Panango munakwanisa kubvundzisa cifuno cace ca kukuphembani. Natenepa, Dhavidhi nee akhali na maonero anewa. Uxamwali wace na Yahova ukhapangiza kukhulupira na ufuni wace kuna Mulungu wace mu umaso wace onsene, m’midzidzi yadidi na yakuipa.​—Sal. 40:8.

⁶ Onani mafala a Dhavidhi akusimba na kupereka takhuta kuna Yahova: “Dzina yanu, Mbuya Mulungu wathu, nja mphambvu pantsi pano ponsene! Ukulu wanu unapiringana kudzulu.” (Sal. 8:1) Kodi imwe nee musanyerezera uxamwali wa Dhavidhi na Babace wakudzulu? Kupereka takhuta kwa Dhavidhi thangwi ya mbiri na ukulu wa Mulungu kwancitisa kukuza Yahova “ntsiku na ntsiku.”​—Sal. 35:28.

7. Kodi tisaphindula tani mu kufendedzera Mulungu mu phembero?

⁷ Ninga Dhavidhi, tisafunika kulonga na Yahova ndzidzi onsene toera kun’nyindira. Bhibhlya isalonga: “Fendezerani Mulungu, tenepa Mulungu anadzakufendezeranimbo.” (Tgo. 4:8) Kufendedzera Mulungu mu phembero ndi njira ibodzi yakufunikambo toera kukhala na nzimu wakucena.​—Lerini 1 Jwau 3:22.

8. Thangwi yanji tisafunika kucalira kulonga mafala mabodzi ene pakucita maphembero?

⁸ Mungaphembera, kodi musabwereza mafala mabodzi ene peno malongero akubwereza-bwereza? Khala ndi tenepo, mbamudzati kucita phembero, khalani na ndzidzi ungasi toera kunyerezera pinthu pinafuna imwe kulonga. Ndzidzi onsene tingalonga mafala mabodzi ene kuna xamwali wathu peno wacibale, kodi mbadakomerwa? Iye mbadakhonda kutibvesera. Mwandimomwene, Yahova nee mbadakhonda phembero yakubuluka mu ntima mwa m’bodzi wa atumiki ace akukhulupirika. Mbwenye mphyadidi kucalira kukhala na nsambo wakubwerezera mafala tingalonga na Yahova.

9, 10. (a) Kodi tisafunika kuphatanizanji m’maphembero athu? (b) Ninji pinafuna kutiphedza toera kucita maphembero akubuluka mu ntima?

⁹ Mwandimomwene, maphembero athu nee anakhala mabodzi ene khala tisafuna kufendedzera Mulungu. Tingafungula ntima wathu kuna Yahova, tinadzanfendedzera, pontho tinadzan’nyindira kakamwe. Mphapo, ninji pinafunika ife kuphataniza m’maphembero athu? Mafala a Mulungu asatawira: “Pa kulonga maphembero, pa kudembetera, pa kuchitambo takhuta mudziwise Mulungu pinthu pyanu pyonsene.” (Afil. 4:6) Undimomwene ndi wakuti, pinthu pyonsene pinakhuya uxamwali wathu na Yahova peno umaso wathu ninga atumiki ace ndi pinthu pyakuthema toera kucita phembero.

¹⁰ Mphyadidi kudinga mafala a amuna na akazi akukhulupirika akuti maphembero awo asagumanika m’Bhibhlya. (1 Sam. 1:10, 11; Mach. 4:24-31) M’bukhu ya Masalmo musagumanika maphembero mazinji akubuluka mu ntima na nyimbo zakusimba Yahova. Mabvero onsene a anthu kubulukira mu nyatwa na kutsandzaya asapangizwa m’maphembero na nyimbo zenezi. Kudinga mafala anewa adalembwa na anthu akukhulupirika kunatiphedza toera kucita maphembero akuthema kwa Yahova.

KUNYEREZERA MWACIDIKHODIKHO PIKUMBUSO PYA MULUNGU

11. Thangwi yanji tisafunika kunyerezera mwacidikhodikho cenjezo yakubuluka kwa Mulungu?

¹¹ Dhavidhi adziwisa kuti: “Pikumbuso pya Yahova ndi pyakunyindirika, pisapasa ndzeru munthu wakukhonda kudziwa pinthu.” (Sal. 19:7, NM.) Inde, khala nee tisadziwa pinthu pizinji, tinakwanisa kukhala andzeru mu kubvera matongero a Mulungu. Malemba anango asacenjeza kuti tisafunika kunyerezera mwacidikhodikho tingafuna kuphindula kakamwe. Pyenepi pisabveka kukoya umumphu wathu pakuthimbana na nkakamizo kuxikola peno pa mbuto ya basa, kubvera n’dida wa Mulungu thangwi ya ciropa, kukhala na unakatinakati, na kuphatisira midida ya Bhibhlya inalonga pya mabvaliro na makhunganyiro athu. Kukhala na maonero a Mulungu mu pinthu pyenepi kunadzatiphedza toera kudzindikira nyatwa. Natenepa, tinakwanisa kudziwa kuti tisafunika kucitanji pangaoneka nyatwa. Kunyerezera mwanyapantsi kweneku na kukhunganyika kunatiphedza toera kukhonda kutsukwala kakamwe.​—Mis. 15:28.

12. Ndi pinthu pipi pyakuti pinatiphedza kukoya pikumbuso pya Mulungu?

¹² Munadikhira ife kuti Mulungu akwanirise pikiro yace, kodi umaso wathu usapangiza kuti nee tiri kugona mwauzimu? Mwacitsandzo, tisanyindiradi kuti Babilonya Wankulu anadzafudzwa cincino? Kodi nkhombo za ntsogolo ninga umaso wakukhonda mala mu paradizu pa dziko yapantsi, ndi zandimomwene kwa ife lero ninga mudapfundzira ife? Kodi tisapitiriza kukhala aphinga mu utumiki mbuto mwakusiya pifuno pyathu kukhala pa mbuto yakutoma mu umaso wathu? Kodi ndiye tani cidikhiro cakulamuswa mwa akufa, kuceneswa kwa dzina ya Yahova, na kubwerezerwa kwa utongi wace? Pyenepi pisapitiriza kukhala pyakufunika kwa ife? Kunyerezera mwacidikhodikho mibvundzo ineyi kunatiphedza kucita ninga nyamasalmo adalonga, kukoya “pikumbuso pya Mulungu ninga mpfuma ya kwenda na kwenda.”​—Sal. 119:111, NM.

13. Thangwi yanji Akristu a pyaka dzana yakutoma nee akhabvesesa pinthu pinango? Perekani citsandzo.

¹³ Pinthu pinango pidalongwa m’Bhibhlya panango nkhabe kupibvesesa mwadidi mu ndzidzi uno thangwi nee ndi ndzidzi wakuti Yahova apibvekese mwadidi. Yezu apanga apostolo ace mwakubwereza-bwereza kuti pikhafunika kuti iye aone nyatwa na kufa. (Lerini Mateo 12:40; 16:21.) Mbwenye apostolo nee akhabvesesa kuti ninji pikhalonga iye. Iwo apibvesesa mwadidi pidamala Yezu kufa na kulamuswa mwa akufa mbaonekera kuna anyakupfundza azinji, pontho “aapasa [ndzeru] za kubvesa pya m’Mabukhu a Mulungu.” (Luka 24:44-46; Mach. 1:3) Mu njira ibodzi ene, Atowereri Akristu nee abvesesa kuti Umambo wa Mulungu ukhadakhazikiswa kale kudzulu, mpaka pa ndzidzi udatsanulwa nzimu wakucena pa Pentekoste wa 33 N.W.​—Mach. 1:6-8.

14. Kutoma kwa pyaka 1900, kodi ndi citsandzo cipi cadidi cidakhazikisa abale azinji maseze nee akhabvesesa pya ntsiku zakumalisa?

¹⁴ Mu njira ibodzi ene, mu ntsiku zathu, Akristu azinji andimomwene akhali na pidikhiro pyakudodomeka thangwi ya “ntsiku zakumalisa.” (2 Tim. 3:1) Mwacitsandzo, mu caka 1914, anango akhanyerezera kuti cidikhiro cawo cakuenda kudzulu cikhali cifupi. Pidikhiro pyawo mbipidzati kukwaniriswa mwakucimbiza, kudingwa mwacidikhodikho kwa Malemba kwapangiza pakweca kuti basa ikulu yakumwaza mphangwa ikhali patsogolo. (Mko. 13:10) Natenepa, mu caka 1922, J. F. Rutherford, akhatsogolera basa yakumwaza mphangwa alonga kwa anthu adagumanika pa nsonkhano wa dziko yonsene ku Cedar Point, Ohio, Estado Unidos kuti: “Onani, Mambo akutonga! Imwe ndimwe anyakumwaza mphangwa zace, natenepa, dziwisani, dziwisani, dziwisani, Mambo na Umambo wace.” Kutomera pa ndzidzi unoyu, kumwaza ‘mphangwa zadidi za umambo’ kwadzakhala cidzindikiro ca atumiki a Yahova a ndzidzi uno.​—Mat. 4:23; 24:14.

15. Kodi tisaphindula tani mu kunyerezera mwacidikhodikho njira zidatsalakanira Mulungu atumiki ace?

¹⁵ Kunyerezera kwathu mwacidikhodikho njira zakudzumisa zakuti Yahova akhapita ncibverano na atumiki ace mu ntsiku za nduli peno ntsiku zino, tisakhala na cinyindiro cikulu m’macitiro ace na pifuno pyace pya ntsogolo. Mu ndzidzi ubodzi ene, pikumbuso pya Mulungu pisatiphedza toera kukhala na manyerezero adidi na mitima yadidi mu kudikhira kukwanirisika kwa maprofesiya ace. Mwandimomwene, kucita pyenepi kunadzatiphedza toera kukhala na cinyindiro m’mapikiro ace.

KULISANI CINYINDIRO KUBULUKIRA M’MABASA AULAMBIRI

16. Ndi nkhombo zipi zinaoneka mu kupitiriza kukhala aphinga mu utumiki?

¹⁶ Mulungu wathu, Yahova, ndi Mulungu wamphambvu, Mulungu wa mabasa. Nyamasalmo alonga: “Nkhabe nyamphambvu ninga Imwe! . . . mbamutonga pyonsene na dzanja yanu yakuthulwa.” (Sal. 89:8, 13) Mwakubverana na pyenepi, Yahova asakomerwa na asapasa nkhombo kuwangisira kwathu toera kudziwisa pifuno pya Umambo. Iye asaona kuti atumiki ace, mamuna peno nkazi, mphale, ntsikana peno nkhalamba kuti akhonde polola ‘mbadya cakudya capezi.’ (Mis. 31:27) Mu kusangizira Nciti wathu, tisapitiriza kuphata mabasa auzimu. Kutumikira Mulungu na ntima onsene ndi sagwati kwa ife, pontho pisakomeresa Yahova toera kupasa nkhombo utumiki wathu.​—Lerini Masalmo 62:12.

17, 18. Thangwi yanji tinakwanisa kulonga kuti mabasa akukhulupirika asatiphedza kunyindira uphungu wa Yahova? Perekani citsandzo.

¹⁷ Ndi mu njira ipi kucita mabasa akukhulupirika kusatiphedza toera kunyindira Yahova? Dingani cakucitika ca Aisraele mukhapita iwo mu Dziko Yakupikirwa. Yahova apereka citsogolero kwa anyantsembe toera kukwata bokosi ya cibverano toera kufamba mu Nkulo wa Yoridani. Natenepa, mbumba yacita masasanyiro awo, iwo akwanisa kuona madzi a ndzidzi wa khoni akhacitisa nkulo kudzala. Kodi Aisraele mbadacitanji? Kodi iwo mbadamanga misasa nkhundu mwa nkulo mbadikhira masumana mazinji toera madzi apwerere? Nkhabe, iwo anyindira mwakukwana Yahova mbatoweza pitsogolero pyace. Kodi ninji pidacitika? Bhibhlya isalonga: “Mu ndzidzi wakuti manyalo a anyantsembe aponda madzi, madzi a nkulo alimira, . . . anyantsembe alimira pakati pa nkulo pakuti nee pakhali na madzi, cifupi na Yeriko mu ndzidzi wakuti onsene akhawambuka.” (Yos. 3:12-17, Contemporary English Version) Nyerezerani kuti ndi pyakudzumisa tani kuona madzi akuthamanga mbalimira! Mwandimomwene, cikhulupiro ca Aisraele kwa Yahova cawangiswa thangwi iwo anyindira pitsogolero pyace.

¹⁸ Mwandimomwene, Yahova nkhabe kucita pirengo pyenepi lero toera kuphedza mbumba yace, mbwenye asapasa nkhombo mabasa awo akukhulupirika. Nzimu wakucena wa Mulungu usaawangisa toera kucita basa idapaswa iwo yakumwaza mphangwa za Umambo pa dziko yonsene yapantsi. Pontho Mboni wankulu wa Yahova, wakulamuswa mwa akufa, Kristu Yezu, apasa cinyindiro anyakupfundzace kuti anaaphedza m’basa ineyi yakufunika kakamwe: “Ndokoni [kapfundzisa] anthu a mitundu yonsene, . . . Ndiri na imwe ntsiku zonsene mpaka kumala kwa pantsi.” (Mat. 28:18, 19) Atumiki a Yahova azinji akuti ali na manyadzo peno kugopa anakwanisa kunyindira kuti nzimu wakucena wa Mulungu usaapasa cipapo toera kulonga na anthu akukhonda kuadziwa mu utumiki wa m’munda.​—Lerini Masalmo 119:46; 2 Akorinto 4:7.

19. Mwakukhonda kutsalakana kucimwana kwathu, kodi ndi cinyindiro cipi ciri na ife?

¹⁹ Abale na alongo anango ali na ungumi wakunentseka thangwi ya utenda peno kukalamba. Mbwenye, iwo anakwanisa kunyindira kuti “Baba anabvera ntsisi anthu, ndiye [Mulungu] anabalangaza anthu onsene,” iye asadziwa makhaliro a Akristu andimomwene m’bodzi na m’bodzi. (2 Akor. 1:3) Iye asapasa ntengo pyonsene pinacita ife toera kudziwisa pifuno pya Umambo. Tonsene tisafunika kudziwa kuti kukhulupira kwathu ciomboli ca Kristu ndi masasanyiro akutoma akuti asakoya umaso wathu mu ndzidzi unacita ife pyonsene mwakubverana na makhaliro athu.​—Aheb. 10:39.

20, 21. Ndi njira zipi zinango zinapangiza kuti tisanyindira Yahova?

²⁰ Ulambiri wathu usaphataniza kuphatisira mwakukwana ndzidzi wathu, mphambvu, na mpfuma zathu pingakwanisika. Inde, tisafuna na ntima onsene ‘kuphata mabasa a mpfundzisi.’ (2 Tim. 4:5) Natenepa, tisatsandzaya kucita pyenepi, nakuti pisaphedza anango toera ‘adziwembo mapfundzisiro andimomwene.’ (1 Tim. 2:4) Mwapakweca, kulemedza na kusimba Yahova, kusaticitisa kupfuma mwauzimu. (Mis. 10:22) Pontho kusatiphedza kukhala na cinyindiro cakuwanga kuna Nciti wathu.​—Arom. 8:35-39.

²¹ Ninga pidadinga ife, kunyindira pitsogolero pyandzeru pya Yahova nee kusacitika kokhene; tisafunika kuwangisira toera kukhala na cinyindiro ceneci. Mwapyonsene, nyindirani Yahova kubulukira mu phembero. Nyerezerani mwacidikhodikho kuti Yahova akwanirisa tani cifuno cace mu ndzidzi wakale, pontho anadzapicitambo tani ntsogolo. Pitirizani kunyindira Yahova kubulukira m’mabasa aulambiri. Mwandimomwene, pikumbuso pya Yahova pinadzakhala kwenda na kwenda. Pontho na imwembo!