Upainiya Usawangisa Uxamwali Wathu Na Mulungu

1, 2. (a) Kodi ndi maphindu api anagumanika mu kunyerezera na kulonga pya nyakufunika wathu? (Onani cithundzithundzi.) (b) Kodi tinadzadinga mibvundzo ipi?

KUNYEREZERA na kulonga pya nyakufunika wathu pinawangisa cibverano cathu na iye. Mwandimomwene, pyenepi ndi sawasawa thangwi ya uxamwali wathu na Yahova Mulungu. Ninga nkumbizi, Dhavidhi amala ndzidzi uzinji mbayang’ana kudzulu na masiku mbanyerezera mwacidikhodikho Nciti wakukhonda landanisika. Iye alemba: “Ndingayang’ana kudzulu, basa ya manja anu, mbandiona mwezi na nyenyezi zidaikhapo imwe, . . . munthu ninji towera munkumbukire, ife pano ninji, towera mutitsalakane?” (Sal. 8:3, 4) Pakumala kudinga kukwaniriswa kwa cifuniro ca Yahova kwa Israele wauzimu mu njira yakudzumisa, mpostolo Paulu alonga: ‘Ndi ukulu kakamwe upfumi, ndzeru na udziwisi wa Mulungu!’​—Arom. 11:17-26, 33.

² Munacita ife khundu mu utumiki, tisanyerezera na kulonga pya Yahova. Pyenepi pina maphindu adidi. Azinji akuti ali mu utumiki wa ndzidzi onsene asaona kuti nkhombo ibodzi ya basa yawo yakuthimizirika ya Umambo ndi kukula kwa ufuni wawo kwa Mulungu. Khala muli m’basa ya ndzidzi onsene peno muna cifuno ceneci, dingani mibvundzo iyi: Kodi utumiki wa ndzidzi onsene unawangisa tani uxamwali wanga na Yahova? Khala ndimwe mpainiya, bvundzikani mwekhene, ‘Ninji pinafuna kudzandiphedza toera kupitiriza m’basa ineyi yakuphindulisa?’ Khala nee ndimwe mpainiya, bvundzikani, ‘Kodi ndinacita masasanyiro api toera kutoma basa ineyi?’ Natenepa, tendeni tidinge njira zakuti basa ya ndzidzi onsene inakwanisa kuwangisa uxamwali wathu na Mulungu.

BASA YA NDZIDZI ONSENE NA UXAMWALI WATHU NA MULUNGU

3. Mu utumiki, tisakhuyiwa tani mu kulonga pya nkhombo zantsogolo za Umambo?

³ Kulonga na anango pya nkhombo zantsogolo za Umambo kusatiphedza toera kufendedzera Yahova. Kodi ndi lemba ipi inakomerwa na imwe kuphatisira mu utumiki wa nyumba na nyumba? Kodi musakomerwa kuphatisira Masalmo 37:10, 11; Danyele 2:44; Jwau 5:28, 29; peno Apokalipse 21:3, 4? Ndzidzi onsene unalonga ife na anango pya mapikiro anewa, tisakumbuswa kuti Mulungu ndi nyakupasa mwakudzala manja “muoni onsene wadidi na mitukwa yonsene yadidi.” Pyenepi pisaticitisa kunfendedzera.​—Tgo. 1:17, Tradução do Novo Mundo.

4. Thangwi yanji kufuna kwathu udidi wa Yahova kusakula tingaona makhaliro akunentsa auzimu a anango?

⁴ Kuona makhaliro akunentsa auzimu a ale anamwazira ife mphangwa kusakulisa kufuna kwathu undimomwene. Anthu mu dziko nee anapitsogolero pyakunyindirika toera kuaphedza kukwanirisa pifuno pyawo na kutsandzaya. Azinji asadzudzumika na pya ntsogolo, pontho nee ali na cidikhiro. Iwo asasaka thangwi ya cifuniro ca umaso. Ngakhale azinji akuti ndi auphemberi ali na udziwisi wakucepa wa Malemba. Iwo alandana kakamwe na anthu a ku Ninive wakale. (Lerini Yona 4:11.) Tingathimizira kucita kwathu khundu mu utumiki, tinaona mwadidi kusiyana kwa makhaliro auzimu a ale anamwazira ife mphangwa na a mbumba ya Yahova. (Iza. 65:13) Tisakumbuswa pya udidi wa Yahova wakuti iye asacita pizinji kupiringana kutipasa pyakufunika pyathu pyauzimu; iye asacemera onsene toera kutambira cithondozo cauzimu na cidikhiro candimomwene.​—Apok. 22:17.

5. Kodi kuphedza anango mwauzimu kusaticitisa tani kunyerezera nyatwa zathu?

⁵ Kuphedza anango mwauzimu kusaticitisa kucalira kutsukwala kakamwe na nyatwa zathu. Trisha, mpainiya wa ndzidzi onsene aona pyenepi kukhala pyandimomwene mudamwalana anyakubalace. Iye alonga: “Pyenepi pikhali pyakutsukwalisa kakamwe mu umaso wanga.” Ntsiku ibodzi iye akhali wakuipirwa kakamwe, anyerezera kukhala panyumba, mbwenye aenda kacitisa pfundziro ya Bhibhlya na anapiana awiri acitsikana na m’bodzi wamamuna akuti makhaliro a panyumba pawo akhali pa nyatwa kakamwe. Anyakubala awo aasiya, pontho m’bale wawo wankulu aatsalakana mwakuipa. Trisha alonga: “Nyatwa yonsene peno kutsukwala kukhathimbana na iye kukhali kung’ono kakamwe kupiringana nyatwa zawo. Mu ndzidzi ukhapfundza ife, maso awo akhafunguka mbatsandzaya kakamwe. Anapiana anewa akhali sagwati wa Yahova, makamaka pa ntsiku ineyi.”

6, 7. (a) Kodi cikhulupiro cathu cisawangiswa tani munapfundzisa ife undimomwene wa Bhibhlya? (b) Munaona ife anyakupfundza Bhibhlya mbakacinja umaso wawo mu kuphatisira midida ya Bhibhlya, ninji pinacitika mu kupereka kwathu takhuta ku udziwisi wa Mulungu?

⁶ Kupfundzisa undimomwene wa Bhibhlya kusawangisa cikhulupiro cathu. Mpostolo Paulu alemba thangwi ya Ayuda anango mu ntsiku zace akuti nee akhaphatisira pikhapfundzisa iwo: ‘Iwe, usapfundzisa, iwe wekha hunapfundzisika tayu.’ (Arom. 2:21) Ndi pyakusiyana tani na apainiya lero! Kazinji kene iwo ali na miyai mizinji toera kupfundzisa anango undimomwene na kucitisa mapfundziro a Bhibhlya. Toera kucita pyenepi mwadidi, iwo asafunika kukhunganyika toera kucitisa pfundziro ibodzi na ibodzi, panango kusaka mwacidikhodikho matawiro a mibvundzo. Mpainiya wakucemerwa Janeen alonga: “Ndzidzi onsene unakhala ine na mwai toera kupfundzisa anango undimomwene, ndisapibva kuti undimomwene unoyu usakhuya kakamwe manyerezero anga na ntima wanga. Ninga maphindu, cikhulupiro canga nee cafewa mbwenye cikupitiriza kukula.”

⁷ Kuona anyakupfundza Bhibhlya mbakacinja umaso wawo mu kuphatisira midida ya Bhibhlya kusakulisa kupereka kwathu takhuta ku udziwisi wa Mulungu. (Iza. 48:17, 18) Pyenepi pisatiphedza toera kupitiriza kuphatisira kakamwe midida ineyi mu umaso wathu. Mpainiya unango anacemerwa Adrianna alonga: “Umaso wa anthu usakhala wakunentseka, iwo anganyindira udziwisi wawo. Mbwenye iwo angatoma kunyindira udziwisi wa Yahova, maphindu asaoneka mwakucimbiza.” Mu njira ibodzi ene, Phil alonga: “Musakwanisa kuona kuti Yahova asacinja tani anthu akuti nee akhapembera mu ndzidzi ukhayesera iwo kucinja okhene.”

8. Kodi kuphata basa na axamwali adidi mu utumiki kusatikhuya tani?

⁸ Kuphata basa na axamwali adidi mu utumiki kutisawangisa mwauzimu. (Mis. 13:20) Apainiya azinji asaphatisira ndzidzi uzinji mu utumiki na amwazi mphangwa andzawo. Pyenepi pisapasa miyai toera ‘kuwangisana.’ (Arom. 1:12; Mphangwa Zadidi; lerini Misangani 27:17.) Mpainiya anacemerwa Lisa alonga: “Kazinji kene, mbuto za basa musaoneka nzimu wamapika na ntcanje. Ntsiku zonsene imwe musakakamizika toera kulonga psweda na mafala acipwazo. Pyonsene ndi thangwi yakufuna kukhala wakudziwika. Midzidzi inango, musasingirirwa thangwi ya makhaliro anu Acikristu. Mbwenye, kuphata basa mu utumiki na Akristu andzathu ndi kwakuwangisa kakamwe. Pakumala kwa ntsiku, ndisabwerera kunyumba mwakutsandzaya, mwakukhonda kutsalakana kuneta.”

9. Kukhala mpainiya na ndzathu wakumanga naye banja, kunacitanji pa nkhambala zitatu za banja?

⁹ Kukhala mpainiya na ndzathu wakumanga naye banja kusawangisa nkhambala zitatu za banja. (Koel. 4:12) Madeline, wakuti ndi mpainiya pabodzi na mamunace, alonga: “Ine na mamunanga tisacedza thangwi ya pyakucitika mu utumiki wathu peno pidaleri ife pakuleri kwathu Bhibhlya pyakuti tinakwanisa kupiphatisira mu utumiki. Pyaka pyonsene pinatumikira ife ninga apainiya, uxamwali wathu usakhala wakuwanga kakamwe.” Mu njira ibodzi ene, Trisha alongambo: “Uwiri wathu tisacedza pya kukhonda kukhala na mangawa, natenepa nee tisadzudzumika na kobiri. Tiri na ndandanda ibodzi ene yakubuluka m’basa ya m’munda, natenepa tisakwanisa kucita maulendo akubwereza na mapfundziro a Bhibhlya akuti asatiphedza toera kupitiriza na manyerezero mabodzi ene auzimu.”

10. Tingaikha pifuno pya Umambo pa mbuto yakutoma, mbitiona ciphedzo ca Mulungu, kunyindira kwathu Yahova kusakhuyiwa tani?

¹⁰ Kunyindira kwathu Yahova kusathimizirika tingaikha pifuno pya Umambo pa mbuto yakutoma, tingaona ciphedzo ca Yahova, pontho tingaona mbakatawira maphembero athu. Makamaka, pyenepi ndi pyandimomwene kuna Akristu onsene akukhulupirika. Mbwenye ale ali m’basa ya ndzidzi onsene asaona kuti kunyindira Yahova kusaaphedza toera kupitiriza ninga apainiya. (Lerini Mateo 6:30-34.) Curt, wakuti ndi mpainiya, pontho asaphedzera ninga muyang’aniri wa cisa, atawira kucedzera mpingo wakuti akhafunika kucita ulendo wa midzidzi miwiri na hafu kubulukira panyumba yace. Iye na nkazace wakuti ndi mpainiya, nee akhali na mafuta a kukwana a motokala wawo toera kucita ulendo wa kuenda na kubwerera. Mbwenye mbidzati kufika sumana yakucita ulendo, Curt alonga, “Ndatoma kubvundzika khala ndacita cisankhulo cadidi.” Pakumala kucita phembero, iwo atonga kucita ulendo, mbanyindira kuti Yahova anatsalakana pifuno pyawo. Mbadzati kubuluka, mulongo m’bodzi aamenyera ntokodzi mbalonga kuti akhali na muoni toera kuapasa. Muoni unoyu ukhali kobiri yakukwana toera kucita ulendo wawo. Curt alonga, “Mungakhala na cakugumana naco ninga ici kabodzi peno kazinji kene, mphyakukhonda nentsa kuona ciphedzo ca Yahova.”

11. Kodi ndi nkhombo zipi zinakhala na apainiya?

¹¹ Kazinji kene apainiya asaona kuti munapitiriza iwo kucita basa ya Yahova na kukhala na uxamwali na iye, iwo ‘asapaswa’ nkhombo zakukhonda mala. (Deut. 28:2) Kupitiriza na upainiya uli na mipingizo. Nee ntumiki m’bodzi wa Mulungu wakuti nkhabe kukhuyiwa na nyatwa zakusandukira kwa Adhamu. Maseze apainiya anango asaona kuti asafunika kulimira pang’ono m’basa ineyi, kazinji kene mipingizo inakwaniswa kupemberwa peno kucalirwa. Ninji cinafuna kuphedza apainiya toera kupitiriza kutsandzaya m’basa yawo?

PITIRIZANI M’BASA YA NDZIDZI ONSENE

12, 13. (a) Kodi mpainiya asafunika kucitanji khala asanentseka kukwanirisa midzidzi inaphembwa? (b) Thangwi yanji ndi kwakufunika kakamwe kukhala na ndandanda ya kuleri Bhibhlya ntsiku zonsene, pfundziro ya munthu paekha na kunyerezera mwacidikhodikho?

¹² Apainiya azinji ali na ndandanda yakudzala na mabasa. Pasafunika kuwangisira toera kucita pinthu pyonsene, natenepa, makhunganyikiro adidi ndi akufunika. (1 Akor. 14:33, 40, Cibverano Chachinchino) Khala mpainiya akunentseka kukwanirisa midzidzi inaphembwa, panango asafunika kudinga kuti asaphatisira tani ndzidzi wace. (Aef. 5:15, 16) Pontho asafunika kubvundzika: ‘Ndi ndzidzi ungasi unaphatisira ine mu ubalangazi peno masendzekero? Ndisafunika kukulisa n’khaliro wakukhondeseka? Ndisafunika kusasanyira ndandanda yanga ya basa ya dziko?’ Nkristu onsene anadzatawira kuti mphyakukhonda nentsa kuthimizira pinthu pa ndandanda yace, natenepa, ale ali m’basa ya ndzidzi onsene asafunika kudinga pinthu ndzidzi onsene na kucita macinjo khala mphyakufunika.

¹³ Kuleri Bhibhlya ndzidzi onsene, pfundziro ya munthu paekha, na kunyerezera mwacidikhodikho, pyenepi pisafunika kucita khundu ya ndandanda ya mpainiya. Mpainiya asafunika kukhondeseka toera mabasa akukhonda funika akhonde kupundza ndzidzi udakhazikisa iye toera kucita pinthu pyakufunika. (Afil. 1:10) Mwacitsandzo, nyerezerani mpainiya wakuti akubwerera kunyumba pakumala kuphata basa mu utumiki ntsiku yonsene. Iye asafuna kuphatisira ndzidzi wakumaulo toera kukhunganyika misonkhano. Maseze, pakutoma, aleri mphangwa zace mu Interneti. Buluka penepo, afungula ntcini wandzeru mbaleri mphangwa na kutumiza matawiro. Mbadzati funga, iye aenda mu Web site toera kuona khala pinthu pinafuna iye pyatcitiswa ntengo. Mbadzati kudzindikira pyenepi, papita midzidzi miwiri, pontho adzati kutoma kupfundza pikhanyerezera iye kucita namaulo. Thangwi yanji pyenepi pisafunika kutsalakanwa? Anyakuthamanga a mbiri asafunika kutsalakana manungo awo khala asafuna kuthamanga mu ndzidzi uzinji. Sawasawa, apainiya asafunika kukhala na ndandanda yadidi ya pfundziro ya munthu paekha toera kukula mwauzimu, khala iwo asapitiriza m’basa ya ndzidzi onsene.​—1 Tim. 4:16.

14, 15. (a) Thangwi yanji apainiya asafunika kukhala na umaso wakukhonda kukhala na pizinji? (b) Khala mpainiya akuthimbana na pinentso, asafunika kucitanji?

¹⁴ Apainiya akupembera asawangisira kukhala na umaso wakukhonda kufuna pizinji. Yezu awangisa anyakupfundzace toera kukhala na diso yakuyang’ana kubodzi. (Mat. 6:22) Iye apitiriza kukhala na umaso wakukhonda kufuna pizinji toera kukwanirisa utumiki wace mwakukhonda kudzudzumiswa. Iye alonga: “Minyenga ina madzimba awo mbalamembo zakumburuka zina ntsandza zawo, mbwenye mwana wa munthu nkhabe chinthu chakutsamira nsolo wache.” (Mat. 8:20) Kukhala na cifuno cakupfundza citsandzo ca Yezu, mpainiya anakwanisa kukoya m’manyerezero kuti pinthu pizinji pyakumanungo piri na iye, pinankwatira ndzidzi uzinji toera kupikoya, kupitsalakana, peno kupicinja.

¹⁵ Apainiya asadziwa kuti basa yawo nee isakwanisika thangwi yakuwangisira kwawo basi. Mbuto mwace, muoni peno mwai onsene wa basa wakuti tinakwanisa kukhala nawo ndi thangwi ya udidi wakukhonda kutithema wa Mulungu. Natenepa, toera kupitiriza ninga mpainiya, m’bodzi na m’bodzi asafunika kunyindira Yahova. (Afil. 4:13) Mipingizo na pinentso pinadzaoneka. (Sal. 34:19) Munacita iwo basa yawo, apainiya asafunika kunyindira citsogolero ca Yahova na ciphedzo cace, mbuto mwakucimbiza kusiya basa yawo. (Lerini Masalmo 37:5.) Munatambira iwo ciphedzo ca ufuni wa Mulungu, iwo anadzanfendedzera ninga Baba wawo wakudzulu wacitsalakano.​—Iza. 41:10.

MUNAKWANISAKUPITAM’BASAYAUPAINIYA?

16. Khala musafuna upainiya, kodi musafunika kucitanji?

¹⁶ Khala musafuna kukhala na nkhombo zinatsandzaya na ale anacita basa ya ndzidzi onsene, longani cifuno canu kuna Yahova. (1 Jwau 5:14, 15) Longani na ale anatumikira ninga apainiya. Khazikisani pifuno pyakuthambaruka toera kukhala mpainiya. Pyenepi ndi pidacita Keith na Erika. Iwo akhaphata basa ya dziko ndzidzi onsene ninga anyakumanga banja azinji athunga yawo, agula nyumba na motokala upswa pidamala iwo kwene kumanga banja. Iwo alonga: “Tikhanyerezera kuti pinthu pyenepi mbipidatibweresera kutsandzaya, mbwenye nee pyakwanisika.” Mudabuluswa Keith pa basa, atumikira ninga mpainiya wakuphedza. Iye asakumbuka: “Upainiya wandikumbusa kuti ndikutsandzaya kwanji kusagumanika mu kucita utumiki.” Iwo acita uxamwali na banja ibodzi ya apainiya akuti aaphedza toera kuona kutsandzaya kunagumanika mu kukhala na umaso wakukhonda kufuna pinthu pizinji na kukhala mpainiya. Kodi Keith na Erika acitanji? “Tacita ndandanda ya pifuno pyathu pya uzimu, tatoma kuiphatisira, na kudinga cifuno cibodzi na cibodzi khala cakwanirisika.” Mu kupita kwa ndzidzi, iwo adzakhala apainiya.

17. Thangwi yanji mphyandzeru kwa imwe kudinga pya kusasanyira ndandanda yanu peno makhaliro a umaso wanu toera kukhala mpainiya?

¹⁷ Munakwanisa kupita m’basa ya upainiya? Khala imwe nkhabe kwanisa, onani kuti pyenepi mphyakukwanisika, citani pyonsene pinakwanisa imwe toera kuthimizira kufendedzera kwanu Yahova mu kucita khundu mwakukwana mu utumiki. Pakumala kucita phembero, panango munaona kuti kusasanyira ndandanda yanu peno makhaliro a umaso wanu kunadzakucitisani kukhala mpainiya. Khala munakwanisa kukhala mpainiya, kutsandzaya kunafuna kudzakhala na imwe kunapiringana kuwangisira kunafuna kudzacita imwe. Munadzakhala na kutsandzaya kwakuthimizirika kunabwera thangwi yakuikha pifuno pya Umambo patsogolo pa pifuno pyanu. (Mat. 6:33) Munadzaona kukomerwa kwakuthimizirika kunabwera thangwi yakupasa anango. Kusiyapo pyenepi, munadzakhala na miyai mizinji toera kunyerezera na kulonga pya Yahova, kuthimizira ufuni wanu kwa iye na kunkomeresa.