Kodi Tagumanika Tani pa Dziko Pano?

M’mafala akucepa, Genesi, bukhu yakutoma ya Bhibhlya isafokotoza matomero a kudzulu na pantsi: “Pakutoma Mulungu achita kudzulu na pantsi.” (Genesi 1:1) Pidamala Mulungu kucita miti na pinyama, iye acita anthu akutoma, Adhamu na Eva. Iwo akhali akusiyana na pinyama thangwi anthu acitwa na luso yakupangiza ufuni, ulungami, kutsandzaya na makhaliro anango a Mulungu, kuphataniza ufulu wakusankhula. Natenepa, iwo akhatawirira macitiro awo. Khala iwo mbadabvera pitsogolero pya Mulungu, mbadacita khundu mu cifuniro ca Mulungu ninga anyakubala akutoma a mabanja onsene pa dziko yapantsi akuti mbadakhala a ntendere na umaso waungwiro pa dziko kwenda na kwenda.

Natenepa, anju m’bodzi abandza mwai wakuphatisira anthu toera kucita cifuno cace cakucenama. Anju unoyu adzakhala Sathani, kubveka “Mpingizi.” Sathani anyengerera Eva mu kuphatisira nyoka, ampanga kuti Eva mbadakhala mwadidi mbadasowa citsogolero ca Mulungu. Adhamu na Eva abvera Sathani, mbamalisa uxamwali wawo na Nciti wawo. Thangwi ya cisankhulo cawo cakuipa, anyakubala akutoma aluza umaso wakukhonda mala mbabweresa kwa ife tonsene madawo, kusowa ungwiro na kufa kwakukhonda calirika.

Mwakukhonda dembuka, Mulungu alonga cifuno cace toera kucinja makhaliro akutsukwalisa na kupasa pontho mbeu za Adhamu njira toera kukhala na umaso wakukhonda mala. Mulungu akhadalongeratu kuti “mbeu,” munthu wakupambulika, mbadafudza Sathani na kumalisa nyatwa zonsene zidatomeswa na Sathani, Adhamu na Eva. (Genesi 3:15) Mbani mbadakhala “mbeu” ineyi? Mbidadziwika mu kupita kwa ndzidzi.

Lero, ndzidzi onsene Sathani asayesera kucimwanisa cifuniro cadidi ca Mulungu. Madawo na uipi pikuthimizirika mwakucimbiza kakamwe. Mulungu atonga kufudza anthu akuipa pa cigumula. Iye apasa citsogolero Nowa, munthu wakulungama toera kumanga mwadiya ukulu, bokosi ikulu kakamwe toera kupulumusa iye, banjace pabodzi na pinyama pidapangwa iye toera kupikwata.

Mu kupita caka cibodzi pakumala Cigumula, Nowa na banjace abuluka m’mwadiya ukulu mbakhala mu dziko yakuceneswa. Mbwenye “mbeu” nee ikhadadzati kuoneka.

​—Yabuluswa pa Genesi kapitulu 1-11; Yuda 6, 14, 15; Apokalipse 12:9.