Kodi Yahova Asafendedzera Tani Kuna Ife?

‘Fendedzerani Mulungu, tenepa Mulungu anadzakufendedzeranimbo’​—TGO. 4:8.

MUSAONA TANI THANGWI YA . . .

Ncemerero wa Yahova toera kunfendedzera cifupi?

Masasanyiro a Mulungu a ntsembe ya ciomboli?

Kulembwa kwa Bhibhlya munjira yakuti tinakwanisa kuibvesesa?

1. Ndi cifuno cipi ciri na anthu, mphapo mbani anafuna kukwanirisa cifuno ceneci?

ANTHU asafuna kakamwe kukhala cifupi na anthu anango. Anthu asalongwa kuti ndi “akufendedzerana khala iwo asafunana kakamwe unango na ndzace mbadziwana mwadidi unango na ndzace.” Tisakhuyiwa kakamwe na uxamwali uli na ife na acibale na axamwali akuti asatifuna, asatilemedza, na asabvesesa mabvero athu. Mbwenye munthu anafunika ife kucita naye uxamwali wapaduzi kakamwe kupiringana munthu onsene ndi Nciti wathu Wankulu.​—Koel. 12:1.

2. Kodi Yahova asapikiranji kwa ife, mphapo thangwi yanji anthu azinji nkhabe kukhulupira pikiro ineyi?

² Yahova asatidembetera m’Mafalace toera ‘kufendedzera kuna’ iye, pontho asapikira kuti tingacita pyenepi, iye ‘anadzafendedzerambo’ kuna ife. (Tgo. 4:8) Anewa ndi manyerezero akutundusa kakamwe! Mbwenye anthu azinji asanyerezera kuti si pyakuthema tayu kuti Mulungu afendedzere cifupi kuna iwo; iwo asanyerezera kuti nee athema kukhala na uxamwali na Mulungu, peno kuti iye ali kutali kakamwe. Mphapo tinakwanisadi kufendedzera cifupi Yahova?

3. Tisafunika kunyindiranji thangwi ya Yahova?

³ Undimomwene ndi wakuti Yahova ‘hali kutali tayu na onsene’ akuti asafuna kungumana; ife tinakwanisa kundziwa. (Lerini Machitiro 17:26, 27; Masalmo 145:18.) Cifuniro ca Mulungu wathu ndi cakuti ngakhale anthu akusowa ungwiro afendedzere cifupi kuna iye, pontho iye ali dzololo toera kuatambira ninga axamwali ace apantima. (Iza. 41:8; 55:6) Kubulukira mu pyakugumana napyo pyace, nyamasalmo alemba thangwi ya Yahova: “Ndimwe wakubvera maphembero, anthu onsene anakudzerani. Anyakutsandzaya mbale anasankhulwa, mbachemerwa na Imwe kudzakhala kwanu.” (Sal. 65:2, 4) Mbiri ya Bhibhlya inalonga pya Mambo Asa wa ku Yuda isapangiza citsandzo ca munthu adafendedzera cifupi Mulungu, na isapangizambo kuti Yahova atawira tani.a

KUPFUNDZA KUBULUKIRA MU CITSANDZO CAKALE

4. Ndi citsandzo cipi cidapereka Mambo Asa kwa anthu a ku Yuda?

⁴ Mambo Asa apangiza phinga yadidi kakamwe ku ulambiri wandimomwene, iye amalisa ulukwali na ulambiri wa madzimunthu mu templo wakuti ukhali wakuwanga kakamwe mu dziko. (1 Am. 15:9-13) Nakuti Asa akhali cifupi na Yahova mbabvera mitemo Yace, iye akwanisa kupanga anthu ace toera ‘atoweze pikhafuna Yahova Mulungu wa makolo awo mbatoweza mapfundzisiro ace, na mitemo yace.’ Yahova apasa nkhombo pyaka khumi pyakutoma pya utongi wa Asa na ntendere wakuti bwerani mudzaone. Kodi Asa apasa ani mbiri ya ntendere unoyu? Iye alonga kuna mbumba kuti “ife ndife anyadziko adatoweza pinafuna [Yahova] Mulungu wathu, iye mbatipasa ntendere n’dziko mwonsene.” (2 Pya dziko. 14:1-7) Mbwenye dingani pidacitika ntsogolo.

5. Ndi makhaliro api adayesera cinyindiro ca Asa kwa Yahova, mphapo ninji pidacitika?

⁵ Nyerezerani kuti ndimwe Mambo Asa. Zera wa ku Etiopya abwera na anyankhondo akukwana 1.000.000, na ngolo 300 toera kumenya nkhondo na Asa. (2 Pya dziko. 14:8-10) Mbamudacitanji munaona imwe mwinji wa anyankhondo mbukabwera mu dziko yanu? Anyankhondo anu ndi 580.000 basi! Mbamudabvundza kuti thangwi yanji Mulungu akutawirisa pyenepi? Kodi mbamudayesera kunyindira ndzeru zanu basi? Pidacita Asa pyapangiza kuti akhanyindira Yahova pontho akhali na uxamwali wakuwanga na iye. Iye aphembera na ntima onsene mbalonga: “[Yahova] Mulungu wathu, thangwi ife tisakhulupira Imwe basi towera kumenyana na anyankhondo awa azinji na mphambvu za dzina yanu.” Yahova atawira tani phembero ya Asa? ‘Yahova apha anyankhondo a ku Etiopya.’ Nee m’bodzi wa anyamalwa apulumuka pa nkhombo ineyi!​—2 Pya dziko. 14:11-13.

6. Tinatowezera tani citsandzo ca Asa?

⁶ Kodi ninji pidacitisa Asa kunyindira mwakukwana citsogolero na citsidzikizo ca Mulungu? Bhibhlya isalonga: ‘Asa acita pyadidi ninga mukhafunira Yahova’ pontho ‘akhali munthu wakukhulupirika kakamwe kuna Yahova.’ (1 Am. 15:11, 14) Ifembo tisafunika kutumikira Yahova na ntima onsene. Tisafunika kucita pyenepi toera kukhala na uxamwali wapantima na iye lero na ntsogolo. Tisapereka takhuta kuna Yahova thangwi iye ndiye adatoma kucita masasanyiro toera kutifendedzeresa kuna iye, mbatiphedza toera kucita na kupitiriza kukhala na uxamwali wakuwanga na iye. Dingani njira ziwiri zinapangiza kuti Mulungu asatifendedzeresa kuna iye.

YAHOVA AFENDEDZERA KWA IFE KUBULUKIRA MU CIOMBOLI

7. (a) Ninji pidacita Yahova pyakuti pisatifendedzeresa kwa iye? (b) Ndi ipi njira ikulu kakamwe inatifendedzeresa kuna Mulungu?

⁷ Yahova apangiza ufuni wace kwa anthu mu kucita dziko yapantsi yakuti ndi mudzi wathu wakubalika. Iye asapitiriza kupangiza ufuni wace kwa ife mbatsalakana umaso wathu mu kutipasa pinthu pyakufunika kakamwe mu umaso wathu. (Mach. 17:28; Apok. 4:11) Mbwenye cipangizo cikulu ca ufuni wa Yahova ndi cakuti iye asatsalakana pifuno pyathu pyauzimu. (Luka 12:42) Iye asatipasambo cinyindiro cakuti iye ene asabvesera maphembero athu. (1 Jwau 5:14) Mbwenye njira ikulu kakamwe inatifendedzeresa kuna Mulungu ndi ufuni wace unapangiza iye kubulukira mu ciomboli. (Lerini 1 Jwau 4:9, 10, 19.) Yahova atuma ‘Mwanace m’bodzi ekha’ pa dziko yapantsi toera kutiombola m’madawo na kufa.​—Jwau 3:16

8, 9. Ndi basa ipi iri na Yezu mu cifuniro ca Yahova?

⁸ Yahova acitisa kuti anthu adakhala maso kale, ngakhale mu ndzidzi wakuti Kristu mbadzati kubwera aphindulembo na ciomboli. Kubulukira pa ndzidzi udapikira Yahova Mpulumusi wa anthu ntsogolo, m’maonero ace ciomboli cikhadalipwa kale, thangwi iye akhadziwa kuti cifuniro cace mbicidakwanirisika. (Gen. 3:15) Mudapita pyaka madzana, mpostolo Paulu apangiza kupereka kwace takhuta kuna Mulungu thangwi ‘apulumuswa kubulukira mu ciomboli ca Kristu.’ Paulu athimiza: “Mulungu aonesa kale ene udidi wache mbapirira [kulekerera] madawo a kale.” (Arom. 3:21-26) Yezu ali na khundu ikulu kakamwe kwa ife toera kukhala na uxamwali na Mulungu!

⁹ Basi ene kubulukira mwa Yezu anthu akucepeseka anakwanisa kudziwa Yahova mbakhala na uxamwali wapantima na iye. Bhibhlya isapangiza tani undimomwene unoyu? Paulu alemba: “Mulungu ationesa kutifuna kwache, thangwi pa ndzidzi ukhali ife anyakudawa Kristu atifera ife pano.” (Arom. 5:6-8) Ciomboli ca ntsembe ya Yezu nee caperekwa thangwi yakuthema kwathu, mbwenye ndi thangwi yakuti Yahova na Yezu asatifuna kakamwe. Yezu alonga: “Nkhabe munthu anakwanisa kudza kuna ine angakhonda kunkwewa Babanga adandituma.” Pa ndzidzi unango iye alonga: ‘Nkhabepo munthu m’bodzi anafika kuna Baba mbakhonda kupita pana ine.’ (Jwau 6:44; 14:6) Kubulukira ku nzimu wakucena Yahova asakwewera anthu kuna iye mukuphatisira Yezu, na kuapfundzisa toera kupitiriza kukhala mu ufuni Wace mbadikhira kutambira umaso wakukhonda mala. (Lerini Yuda 20, 21.) Onani njira inango yakuti Yahova asatifendedzeresa kuna iye.

YAHOVA ASATIFENDEDZERESA KUNA IYE KUBULUKIRA M’BHIBHLYA

10. Kodi Bhibhlya isatiphedza tani toera kufendedzera Mulungu?

¹⁰ Mpaka pano, ife taphatisira malemba a Bhibhlya akukwana 14. Mbitidasowa Bhibhlya mbitidadziwa tani kuti tinakwanisa kufendedzera Nciti wathu? Mbitidakwanisa tani kupfundza pya ciomboli, pontho kuti Yahova atifendedzeresa kuna iye kubulukira mwa Yezu? Mu kuphatisira nzimu wace, Yahova alembesa Bhibhlya, inatipangiza umunthu wace wadidi na cifuniro cace kwa anthu. Mwacitsandzo, pa Eksodo 34:6, 7, Yahova apangizika kuna Mose ninga ‘Mulungu wantsisi zikulu na wakupfulika, wakudembuka kuipirwa, mbakhala na ufuni na ulungami, mbalekerera madawo.’ Mbani wakuti nee mbadafendedzera duzi munthu ninga unoyu? Yahova asadziwa kuti tingapfundza pizinji thangwi ya iye kubulukira m’Bhibhlya, iye asakhala wandimomwene kakamwe kwa ife mbatibva kuti tiri cifupi na iye.

11. Thangwi yanji tisafunika kuwangisira toera kupfundza pya makhaliro na njira za Yahova? (Onani cithundzithundzi cakutoma.)

¹¹ Mafala akutoma a bukhu Achegue-se a Jeová, asalonga kuti toera tikhale na uxamwali wakuwanga na munthu unango, tisafunika kudziwa mwadidi munthu unoyu, kudziwa na kupasa ntengo makhaliro ace. Munjira ibodzi ene, toera tikhale na uxamwali wakuwanga na Mulungu tisafunika kupfundza kuti mwandimomwene iye mbani, kubulukira mukupfundza makhaliro ace anapangizwa m’Bhibhlya. Natenepa, tisapereka takhuta kakamwe thangwi yakuti Yahova alembesa Mafalace munjira yakuti ife anthu tinakwanisa kuabvesesa!

12. Thangwi yanji Yahova aphatisira anthu toera kulemba Bhibhlya?

¹² Yahova mbadakwanisa kuphatisira aanju toera kulemba Bhibhlya. Kusiyapo pyenepi aanju ali na cifuno cikulu kakamwe kwa ife na mabasa athu. (1 Ped. 1:12) Mwakukhonda penula, aanju mbadakwanisa kulemba mafala a Mulungu kwa anthu. Kodi iwo mbadaona pinthu munjira ibodzi ene inaonera anthu? Kodi iwo mbadakwanisa kulonga pifuno pyathu, kufewa kwathu na pidikhiro pyathu? Nkhabe, Yahova akhadziwa kuti aanju asiyana kakamwe na ife, na thangwi ineyi mwandzeru iye asankhula anthu toera kulemba Bhibhlya. Mukuphatisira anthu toera kulemba Bhibhlya, Yahova aicita toera ikhuye mabvero athu. Ife tinakwanisa kubvesesa manyerezero na mabvero a anyakulemba Bhibhlya na a anthu anango analongwa mwenemo. Tingaleri pya nyatwa zawo, kupenula, kugopa na kusowa kwawo ungwiro tisakhuyiwa, pontho tisakhuyiwambo tingaleri pya kutsandzaya na kupembera kwawo. Ninga mprofeta Eliya, anyakulemba Bhibhlya onsene akhali na ‘mabvero ninga athu.’​—Tgo. 5:17.

13. Kodi phembero ya Yona isakhuya tani ntima wanu?

¹³ Mwacitsandzo, nyerezerani khala anju mbadakwanisa kufokotoza mwadidi mabvero a mprofeta Yona pa ndzidzi udathawa iye basa yace idapaswa iye na Mulungu. Pyakhala pyadidi kakamwe kuti Yahova asankhula Yona toera kulemba mbiri yace kuphatanizambo phembero yace yakubulukira muntima idacita iye kuna Mulungu pikakhala iye pantsi pa bara! Yona alonga: ‘Pikhafewa umaso wanga, ine ndikhakukumbukirani, imwe Yahova.’​—Yona 1:3, 10; 2:1-9.

14. Thangwi yanji munakwanisa kubvesesa pidalemba Izaiya thangwi ya iye ene?

¹⁴ Dinganimbo pidacitisa Yahova toera Izaiya alembe thangwi ya iye ene. Pidamala iye kuona masomphenya a mbiri ya Mulungu, iye alonga pya kusowa kwace ungwiro: “Mama ine! Ndafa pyanga, thangwi ndine munthu wakulonga mafala akuipa. Chinchino, na maso anga ene, ndaona Mambo, Mbuya [Yahova] wakukwanisa pyonsene.” (Iza. 6:5) Kodi anju mbadakwanisa kulonga mafala ninga anewa? Mbwenye Izaiya akwanisa, pontho ninga anthu akusowa ungwiro tinakwanisa kubvesesa kuti iye akhapibva tani.

15, 16. (a) Thangwi yanji ife tinakwanisa kubvesesa mabvero a anthu andzathu? Perekani citsandzo. (b) Ninji cinafuna kutiphedza toera kufendedzera cifupi Yahova?

¹⁵ Kodi aanju mbadakwanisa kulonga kuti iwo ndi ‘akukhonda thema’ ninga pidalonga Yakobe, peno kuti ndi ‘anyakudawa’ ninga pidalonga Pedhro? (Gen. 32:10; Luka 5:8) Kodi aanju mbadagopa ninga anyakupfundza a Yezu, peno aanju akulungama mbadafuna cipapo toera kuthimbana na mipingizo toera kumwaza mphangwa ninga pidacita Paulu na anango? (Jwau 6:19; 1 Ates. 2:2) Nkhabe, aanju ndi aungwiro munjira yonsene na ali na mphambvu zakupiringana anthu. Mbwenye anthu akusowa ungwiro angapangiza mabvero awo, mwakucimbiza ife tisabvesesa mabvero awo thangwi ife ndifembo anthu ninga iwo. Munaleri ife Bhibhlya tinakwanisa ‘kusekera na ale anasekera mbatilira na ale analira.’​—Arom. 12:15.

¹⁶ Tinganyerezera mwacidikhodikho pinalonga Bhibhlya kuti Yahova atsalakana tani atumiki ace akukhulupirika a akale tinapfundza pinthu pizinji thangwi ya Mulungu wathu, wakuti mwaufuni na mwakupirira afendedzera cifupi anthu anewa akusowa ungwiro. Natenepa, ife tinadzadziwa mwadidi Yahova na kunfuna na ntima onsene. Ninga maphindu, ife tinakhala akuthema toera kunfendedzera cifupi.​—Lerini Masalmo 25:14.

KULISANI UXAMWALI WAKUKHONDA KUFUDZIKA NA MULUNGU

17. (a) Ndi uphungu upi wadidi udapereka Azariya kuna Asa? (b) Kodi Asa apwaza tani uphungu wa Azariya, mphapo pyenepi pyambwereseranji?

¹⁷ Mambo Asa pidamala iye kukunda anyankhondo a ku Etiopya, mprofeta wa Mulungu, Azariya apereka uphungu wadidi kuna iye na anthu ace. Azariya alonga: Yahova “anadzakhala na imwe, imwe mungakhala na iye. Imwe mungansaka munadzamuona, mbwenye mungansiya iye anadzakusiyanimbo.” (2 Pya dziko. 15:1, 2) Mukupita kwa ndzidzi, Asa asiya kubvera uphungu unoyu wadidi. Mudathuswa iye na anyamalwa a umambo wa Israele wa kunkwiriro, Asa asaka ciphedzo kuna Asirya. Mbuto mwakusaka pontho ciphedzo ca Yahova, Asa acita cibverano na anthu akukhonda kukhulupira. Natenepa, Asa apangwa: “Chinchino iwe wachita ninga nyansala, thangwi ya ipyo kutomera chinchino mpaka kutsogolo unadzakhala na nkhondo.” Pyaka pidatowerera pya utongi wa Asa pikhali pya nkhondo. (2 Pya dziko. 16:1-9) Kodi pyenepi pisatipfundzisanji?

18, 19. (a) Tisafunika kucitanji khala tatawirisa kuthaukirana pang’ono na Mulungu? (b) Tinakwanisa tani kupitiriza kufendedzera cifupi Yahova?

¹⁸ Ife cipo tisafunika kuthaukirana Yahova. Khala tatawirisa kuthaukirana pang’ono na iye, mwakucimbiza tisafunika kucita pinalonga Ozeya 12:6, Tradução do Novo Mundo: “Bwerera kuna Mulungu wako, mbupitiriza kupangiza ufuni na cilungamo, mbudikhira Mulungu wako ndzidzi onsene.” Tendeni tifendedzere cifupi Yahova kubulukira mu kupasa ntengo ciomboli, na kupfundza mwaphinga Mafalace, Bhibhlya.​—Lerini Deuteronomyo 13:4.

¹⁹ Nyamasalmo alemba: “Kwa ine, kufendedzera Mulungu nkhwadidi kuna ine.” (Sal. 73:28, NM) Tendeni tonsene tipitirize kupfundza pinthu pipswa thangwi ya Yahova, na kupasa ntengo mathangwi mazinji a ufuni wace. Munacita ife pyenepi, Yahova anadzapitiriza kufendedzera cifupi kakamwe kwa ife lero mpaka kwenda na kwenda!

[Cidzindikiro capantsi]