Bveserani Fala Ya Yahova Konsene Kunagumanika Imwe

“Iye anadzakupangisani njira yadidi na kulonga: ‘Njira ndi iyi, ndokoni nayo.’”​—IZA. 30:21.

MBAMUDATAWIRA TANI?

Kodi Sathani asayesera tani kutipingiza toera tikhonde kubvesera fala ya Yahova?

Ndi pipendamiro pipi pya muntima mwathu pyakuti pinakwanisa kutipingiza kubvesera fala ya Yahova?

Tisafunika kucitanji toera kutambira citsogolero ca Mulungu?

1, 2. Kodi Yahova asalonga tani na atumiki ace?

M’MBIRI ya anthu, anthu asatambira citsogolero ca Yahova munjira zakusiyana-siyana. Kwa anango, Mulungu alonga nawo mu kuphatisira aanju, masomphenya, peno ndoto, mbapangiza kwa iwo pinthu pikhafuna kucitika ntsogolo. Yahova aapasambo basa yakufunika toera kucita. (Num. 7:89; Ezek. 1:3; Dan. 2:19) Anango atambira citsogolero ca Yahova kubulukira kwa aimiriri ace akhatumikira mu khundu yapantsi ya gulu yace. Mwakukhonda tsalakana njira idatambira atumiki a Yahova mafalace, ale adatowezera pitsogolero pyace atambira nkhombo.

² Lero, Yahova asatsogolera atumiki ace kubulukira m’Bhibhlya, nzimu wace wakucena, na mpingo Wacikristu. (Mach. 9:31; 15:28; 2 Tim. 3:16, 17) Pitsogolero pinatambira ife ndi pyakubveka kakamwe pyakuti ndi ninga ‘tiri kubva fala mbilonga nduli mwathu kuti, ‘Njira ndi iyi, ndokoni nayo.’’ (Iza. 30:21) Mwandimomwene, Yezu asaperekambo fala ya Yahova kwa ife munatsogolera iye mpingo kubulukira mwa ‘m’bandazi wakukhulupirika na wandzeru.’ (Mat. 24:45, Mphangwa Zadidi) Tisafunika kubvera mwadidi pitsogolero pyenepi, thangwi toera kukhala na umaso wakukhonda mala pisanyindira kubvera kwathu.​—Aheb. 5:9.

3. Ninji pinafuna kupingiza kubvera kwathu pitsogolero pya Yahova? (Onani cithundzithundzi cakutoma.)

³ Sathani Dyabo asafuna kakamwe kupingiza pitsogolero pyakupasa umaso pinatambira ife kubulukira kwa Yahova. Kusiyapo pyenepi, ‘ntima wathu ene wakunyengeza’ unakwanisa kutikhuya toera kukhonda kubvera mwadidi pitsogolero pya Yahova. (Yer. 17:9) Natenepa, tendeni tidinge kuti tinakwanisa tani kukunda mipingizo yakuti inaticimwanisa kubvesera fala ya Mulungu. Tinadzadingambo kuti kucedza na Yahova mwakukhonda phonya kunatsidzikiza tani uxamwali wathu na Yahova mwakukhonda tsalakana makhaliro athu.

CALIRANI MISAMPHA YA SATHANI

4. Kodi Sathani asayesera tani kukhuya manyerezero a anthu?

⁴ Sathani asayesera kupeusa manyerezero a anthu mu kuphatisira mphangwa zauthambi na manyengerero apezi. (Lerini 1 Jwau 5:19.) Kusiyapo mabukhu akudhindwa—mphangwa zisamwazwa pa dziko yonsene mu kuphatisira radyo, Televizau, na Interneti. Maseze njira zenezi zisapereka mphangwa zakufunika, kazinji kene zisamwaza mphangwa na makhaliro akuti ndi akuphonyana na midida ya Yahova. (Yer. 2:13) Mwacitsandzo, anyakumwaza mphangwa na ubalangazi asalonga mitundu inango yakupita mabonde ninga nee si yakuipa. Pyenepi pisacitisa anthu azinji kunyerezera kuti pinalonga Bhibhlya thangwi ya anyakupita mabonde mamuna na mamuna peno nkazi na nkazi pyatekera kakamwe.​—1 Akor. 6:9, 10.

5. Tinakwanisa tani kucalira kukhuyiwa na uthambi wa Sathani?

⁵ Kodi ale anafuna midida ya Yahova anakwanisa tani kucalira kukhuyiwa na manyengerero a uthambi wa Sathani? Anakwanisa tani kusiyanisa cadidi na cakuipa? Bhibhlya isatawira: “Angatsalakana mafala [a Mulungu] basi.” (Sal. 119:9) Mafala akulembwa a Mulungu ali na citsogolero cakufunika cakuti cinakwanisa kutiphedza toera kudzindikira mphangwa za undimomwene na manyengerero apezi. (Mis. 23:23) Yezu alonga kuti ife tisafuna “mafala onsene anabuluka n’kanwa mwa [Yahova].” Tisafunika kupfundza kuti tinaphatisira tani midida ya Bhibhlya mu umaso wathu. Mwacitsandzo, kale kakamwe Mose mbadzati kulemba ntemo wa Yahova unakhondesa upombo, mphale Zuze abvesesa kuti ulukwali ndi madawo kuna Mulungu. Iye nee anyerezera kuti mbadakwanisa kukhonda bvera Yahova mudayeserwa iye na nkazi Putifare toera kucita pinthu pyakuipa. (Lerini Genesi 39:7-9.) Maseze nkazi Putifare ayesera Zuze mu ndzidzi uzinji, mbuto mwa kubvesera fala yace, Zuze asankhula kubvesera fala ya Yahova. Toera kudzindikira cadidi na cakuipa, tisafunika kubvesera fala ya Yahova mbatifunga makutu athu toera kukhonda kubva dzumbi ya uthambi wa Sathani.

6, 7. Tisafunika kucitanji toera kucalira uphungu wakuipa wa Sathani?

⁶ Dziko yadzala na pipfundziso pyakukhonda bveka pya mauphemberi, munjira ineyi anthu azinji asanyerezera kuti nkhabe kwanisika kugumana ulambiri wandimomwene. Mbwenye Yahova asapereka citsogolero cakubveka mwadidi kwa ale akuti asafuna kutsogolerwa naco. Tisafunika kusankhula kuti tinabvesera ani. Nakuti nkhabe kwanisika kubvesera mafala a anthu awiri mu ndzidzi ubodzi ene, tisafunika ‘kudzindikira fala’ ya Yezu mbatimbvesera. Iye ndiye adakhazikiswa na Yahova toera kukumbiza mabira ace.​—Lerini Jwau 10:3-5.

⁷ Yezu alonga: “Chitani mphole na pinabva imwe.” (Mko. 4:24) Uphungu wa Yahova ngwadidi, pontho usabveka mwadidi, mbwenye ife tisafunika kubvesera na kukhunganya ntima wathu toera kuutambira. Tingakhonda kuonesesa, tinabvesera uphungu wakuipa wa Sathani, mbuto mwakubvesera uphungu waufuni wa Mulungu. Lekani kutawirisa kuti umaso wanu utsogolerwe na nyimbo za dziko, mavidyu, maprogramu a Televizau, mabukhu a dziko, axamwali, apfundzisi, peno ale analongwa kuti ndi anyakudziwisa.​—Akol. 2:8.

8. (a) Kodi ntima wathu unakwanisa tani kutiikha pa ngozwi ya misampha ya Sathani? (b) Ninji cinafuna citika tingapwaza pipangizo pya ngozwi?

⁸ Sathani asadziwa kuti tiri na pipendamiro pyakufuna kucita madawo, pontho iye asatiyesera munjira ineyi. Munatiyesera iye, pisakhala pyakunentsa kakamwe kupitiriza kukoya umumphu wathu. (Jwau 8:44-47) Tinakwanisa tani kupembera pakuthimbana na mayesero anewa? Nyerezerani munthu wakuti asakundwa na cifuno cace mbacita cinthu cakuipa cakuti iye cipo anyerezera kuti mbadacicita. (Arom. 7:15) Ninji cidantsogolera ku makhaliro anewa akutsukwalisa? Panango, mwapang’ono pang’ono iye asiya kubvesera fala ya Yahova. Panango iye nee adzindikira macenjezo a pinthu pikhacitika muntima mwace, peno apwaza pipangizo pyenepi. Mwacitsandzo, panango iye akhadasiya kucita phembero, apungula phinga yace mu utumiki, peno akhadjomba misonkhano. Pakumalisira, iye akundwa na pifuno pyace mpaka kucita pinthu pyakuipa. Ife tinakwanisa kucalira ngozwi zenezi tingapitiriza kudzindikira pipangizo pya ngozwi mbatipisasanyira mwakucimbiza. Tingabvesera fala ya Yahova, ife cipo tinadzanyengezwa na maonero a anyakupanduka.​—Mis. 11:9.

9. Thangwi yanji mphyadidi kakamwe kudzindikira nakweru pipendamiro pya madawo?

⁹ Kudzindikira nakweru utenda kunakwanisa kupulumusa umaso wa munthu. Munjira ibodzi ene, tinakwanisa kucalira ngozwi tingadzindikira nakweru pipendamiro pyakuti pinakwanisa kutitsogolera ku mayesero. Tingadzindikira pipendamiro pyenepi, mphyandzeru kwa ife kupisasanyira mwakucimbiza pa ndzidzi wakuti tidzati kugwa ‘m’misampha ya Sathani toera kucita pinafuna iye.’ (2 Tim. 2:26) Tisafunika kucitanji tingaona kuti tatawirisa manyerezero athu na pifuno pyathu kusiyana na pinafuna Yahova kwa ife? Mwakukhonda dembuka, mwakucepeseka tisafunika kubwerera kuna iye, mbatifungula makutu athu toera kubvesera uphungu wace na ntima onsene. (Iza. 44:22) Tisafunika kudzindikira kuti kucita cisankhulo cakuipa kunakwanisa kutibweresera nyatwa zikulu mu ndzidzi uno, ngakhale pakumala kubwerera kuna Yahova. Natenepa, mphyadidi kakamwe kukhonda thaukira Yahova, mu kucita pinthu mwakucimbiza toera kucalira ngozwi zenezi!

KUKUNDA KUDZIKUZA NA UMBIRIMI

10, 11. (a) Kodi kudzikuza kusapangizika tani? (b) Tisapfundzanji kubulukira ku citsandzo cakuipa ca Kore, Datani, na Abironi?

¹⁰ Tisafunika kudzindikira kuti ntima wathu unakwanisa kutipeusa. Pipendamiro pyathu piri na mphambvu kakamwe! Mwacitsandzo, nyerezerani mphambvu ya kudzikuza na umbirimi. Onani kuti pipendamiro pyenepi pinakhuya tani kubvesera kwathu fala ya Yahova na kutitsogolera ku macitiro akuipa. Munthu wakudzikuza ali na maonero apadzulu kakamwe thangwi ya iye ene. Iye anakwanisa kunyerezera kuti ali na ufulu wakucita pyonsene pinafuna iye, pontho kuti nkhabe adathema toera kumpanga pinafunika iye kucita. Natenepa, iye anakwanisa kunyerezera kuti nkhabe funa uphungu wa Akristu andzace, akulu a mpingo peno gulu ya Mulungu. Kwa munthu ninga unoyu, fala ya uphungu wa Yahova ndi yakuthowa kakamwe.

¹¹ Mu ndzidzi wa ulendo wa Aisraele nthando, Kore, Datani, na Abironi apandukira utongi wa Mose na Aroni. Na thangwi ya kudzikuza, anyakupanduka acita masasanyiro awo ene toera kulambira Yahova. Kodi Yahova aona tani pyenepi? Iye aafudza. (Num. 26:8-10) Mbiri ineyi isatipfundzisa ntsonga yakufunika kakamwe! Kupandukira Yahova kusabweresa nyatwa. Mphyadidi kukumbuka kuti “kugaya [peno kudzikuza] kunadzesa ucherengi.”​—Mis. 16:18; Iza. 13:11.

12, 13. (a) Perekani citsandzo cinapangiza kuti umbirimi unakwanisa tani kubweresa nyatwa. (b) Fokotozani kuti umbirimi unathimizirika tani ungakhonda kucimbizirwa.

¹² Umbirimi ndi wakugopswambo kakamwe. Munthu waumbirimi kazinji kene asacita pinafuna iye mbanyerezera kuti citsogolero ca Yahova nkhabe basa kwa iye. Naamani akhali nkadamu wa anyankhondo a Sirya, pidawangiswa iye matanya ace, iye apereka miyoni kuna mprofeta Elizeu, mbwenye iye aikhonda. Mbwenye ntumiki wa Elizeu, Giezi asirira miyoni ineyi. Iye alonga ekhene: “Ine ndinadumbira na [Yahova] basi: Ndinaenda mbandithamangira nduli mwache [Naamani], ndione ngakhala anandipasambo chinthu.” Mwakukhonda pangana Elizeu, iye athamangira Naamani mbalonga pyauthambi toera kuphemba “kobiri pikwi pitatu ya prata na nguwo ziwiri.” Ninji pidacitika kuna Giezi thangwi yakucita pyenepi na kulonga uthambi kuna mprofeta wa Yahova? Giezi aphatwa na matanya a Naamani!​—2 Am. 5:20-27.

¹³ Umbirimi usatoma mwapang’ono pang’ono, mbwenye ungakhonda kucimbizirwa, unakwanisa kukula mwakucimbiza mpaka kufudza umaso wa munthu. Mbiri ya Bhibhlya inalonga pya Akani isapangiza mphambvu ya umbirimi. Onani kuti umbirimi wa Akani wakula tani mwakucimbiza. Iye alonga: “Ndaona pakati pa pyakutapatwa nkumi wakugadza wa Keneare, mitengo mitatu ya prata na ntsama ya ndalama; na kupisirira, ndapikwata.” Mbuto mwakukhonda pifuno pyakuipa, mwaumbirimi, Akani aba pinthu mbapibisa n’nyumba mwace. Pidaphatika iye, Yoswa ampanga kuti Yahova mbadamuonesa nyatwa. Pa ntsiku ineyi, Akani na banja yace aponyerwa miyala mpaka kufa. (Yos. 7:11, 21, 24, 25) M’bodzi na m’bodzi wa ife anakwanisa kuphatwa na umbirimi ninga Akani. Natenepa, tendeni ticalire ntundu onsene wa “kusirira upfumi [peno umbirimi.]” (Luka 12:15) Maseze midzidzi inango tinakwanisa kunyerezera pinthu pyakuipa peno kunyerezera pinthu pyaulukwali, mphyadidi kakamwe kutonga manyerezero athu mbatikhonda kutawirisa kuti pifuno pyathu pikule mpaka kucita madawo.​—Lerini Tyago 1:14, 15.

14. Tisafunika kucitanji tingaona tekhene kuti tiri na pipendamiro pya kudzikuza na umbirimi?

¹⁴ Kudzikuza na umbirimi pinakwanisa kubweresa nyatwa. Kunyerezera pya ngozwi inafuna kuoneka thangwi yakutowezera makhaliro akuipa kunadzatiphedza toera kupitiriza kubvesera fala ya Yahova. (Deut. 32:29) M’Bhibhlya, Mulungu wandimomwene asatipangiza maphindu akufamba munjira zadidi, na ngozwi za kufamba munjira zakuipa. Ntima wathu ungatikulumiza toera kunyerezera kucita cinthu mu kutsogolerwa na kudzikuza peno umbirimi, mphyandzeru kakamwe kunyerezera ngozwi ya macitiro anewa! Tisafunika kunyerezera kuti macitiro akuipa anatikhuya tani, anakhuya tani anyakufunika athu, kupiringana pyonsene, anakhuya tani uxamwali wathu na Yahova.

PITIRIZANI KULONGA NA YAHOVA

15. Tisapfundzanji kubulukira ku citsandzo ca Yezu?

¹⁵ Yahova asafuna kuti tikhale na umaso wadidi kakamwe. (Sal. 1:1-3) Iye asatipasa pitsogolero pizinji pa ndzidzi unapifuna ife. (Lerini Ahebere 4:16.) Maseze akhali munthu waungwiro, Yezu akhanyindira kulunga na Yahova ndzidzi onsene. Yezu akhacita phembero mwakukhonda phonya. Yahova aphedza Yezu mbantsogolera munjira yakupambulika. Iye atuma aanju toera kuntsalakana, apereka nzimu Wace wakucena toera kumphedza, na kuntsogolera toera kusankhula apostolo 12. Fala ya Yahova yabveka kudzulu, pyenepi pyapangiza ciphedzo ca Yahova, pontho kuti Yezu akhali wakutawirika kuna iye. (Mat. 3:17; 17:5; Mko. 1:12, 13; Luka 6:12, 13; Jwau 12:28) Ninga Yezu, ife tisafunika kucita phembero mbatifungula ntima wathu kuna Mulungu. (Sal. 62:7, 8; Aheb. 5:7) Phembero isatiphedzambo toera kukhala cifupi na Yahova, mbatipitiriza kukhala maso munjira yakuti inapereka mbiri kuna iye.

16. Tinakwanisa tani kutambira ciphedzo ca Yahova toera kukhala na luso yakubvesera fala yace?

¹⁶ Maseze Yahova asapereka uphungu wace mwakudzala manja, iye nkhabe kutikakamiza toera kuutowezera. Tisafunika kuphemba nzimu wace wakucena, iye anadzatipasa na ntima onsene. (Lerini Luka 11:10-13.) Natenepa, tisafunika kucita ‘mpholemphole na njira inabvesera ife.’ (Luka 8:18) Mwacitsandzo, mphyaumpfakafaka kuphemba Yahova toera kutiphedza kukunda pipendamiro pyaulukwali, mu ndzidzi ubodzi ene mbitipitiriza kuona pinthu pinapangiza ucipezipezi, kubvesera nyimbo peno kuona mafilimu anapangiza pyaulukwali. Tisafunika kukhala pa mbuto peno m’makhaliro anagumanika nzimu wakucena wa Yahova, ninga pa misonkhano yathu ya mpingo. Atumiki azinji a Yahova acalira ngozwi kubulukira mu kubvesera mwadidi Yahova pa misonkhano yathu. Ninga maphindu, iwo akwanisa kudzindikira pifuno pyakuipa pikhatoma kukula muntima mwawo, mbasasanyira njira za umaso wawo.​—Sal. 73:12-17; 143:10.

PITIRIZANI KUBVESERA MWADIDI FALA YA YAHOVA

17. Thangwi yanji mphyakugopswa kunyindira ntima wathu?

¹⁷ Tisapfundza ntsonga yakufunika kakamwe kubulukira kuna Mambo Dhavidhi wa Israele. Pikhakhala iye mphale, akwanisa kukunda Goliati mamuna wakulapha kakamwe na wamphambvu. Dhavidhi adzakhala nyankhondo, mambo, ntsidzikizi, na nyakucita pisankhulo pyadidi kuna mbumba. Mbwenye mudasiya iye kunyindira Yahova, Dhavidhi anyengezwa na ntima wace mbacita madawo makulu na Bateseba, ngakhale kucita masasanyiro toera kuphesa Uriya mamunace Bateseba. Pidasandikwa iye, Dhavidhi acepeseka, atawira kudawa kwace, mbakhala pontho na uxamwali na Yahova.​—Sal. 51:4, 6, 10, 11.

18. Ninji cinafuna kutiphedza toera kupitiriza kubvesera fala ya Yahova?

¹⁸ Tendeni tipitirize kubvera uphungu unagumanika pa 1 Akorinto 10:12, mbatikhonda kunyindira mphambvu yathu ene. Nakuti ife nkhabe kwanisa kutsogolera tekhene mathanyo athu, tingakhonda kutsogolerwa na fala ya Yahova, tinatsogolerwa na fala ya Nyamalwa wace. (Yer. 10:23) Tendeni ticite phembero mwakukhonda phonya, kutowezera citsogolero ca nzimu wakucena, mbatibvesera fala ya Yahova ndzidzi onsene.