NSOLO WA REVISTA | KODI MULUNGU ASAKUTSALAKANANI?

Kodi Mulungu Asakutsalakanani?

‘Ndiri wakutsukwala kakamwe na wakutcerenga, mbwenye ndisadziwa kuti Yahova anandiduwala tayu.’a​—DHAVIDHI WA ISRAELE, PYAKA MADZANA 11 M.N.W.

Kodi pikhali pyakulinganira kuti Dhavidhi adikhire kuti Mulungu mbadantsalakana? Kodi Mulungu asakutsalakanani? Anthu azinji nee asatawira kuti Mulungu wamphambvu zonsene asaatsalakana. Thangwi yanji?

Thangwi ibodzi ndi yakuti Mulungu ali na umaso wapadzulu kakamwe kupiringana anthu. Kubulukira pa mbuto yace kudzulu, anthu onsene ‘ali ninga thotho ya madzi m’baketi, ntsuwambo za kutali zalulupa ninga pfumbi.’ (Izaiya 40:15) Nyakulemba unango wakuti nkhabe khulupira kuti Mulungu alipo, afika pakulonga kuti si pyakuthema tayu “kukhulupira kuti alipo Mulungu wakuti asatsalakana pinacita anthu.”

Munjira inango, anthu anango asanyerezera kuti macitiro awo ene asaacitisa kukhala akukhonda thema toera kutsalakanwa na Mulungu. Mwacitsandzo, mamuna unango anacemerwa Jim alonga: “Ndikhacita phembero ndzidzi onsene toera ndikhale na ntendere na nzimu wakudzitonga, mbwenye mukupita kwa ndzidzi, kuipirwa kwanga kukhabwera pontho. Pakumalisira, ndaona kuti ndikhali munthu wakuipa, pontho kuti Mulungu nee mbadakwanisa kundiphedza.”

Kodi Mulungu ali kutali kakamwe na anthu kwakuti iye nkhabe kwanisa kutiona? Kodi iye asaona tani anthu ace akusowa ungwiro? Mwakusowa ciphedzo ca Mulungu, nkhabe munthu anafuna kwanisa kulonga mu dzina ya Mulungu na kutawira mibvundzo ineyi. Mbwenye mphangwa zakupumirwa za Mulungu kwa anthu zinagumanika m’Bhibhlya, zisatipasa cinyindiro cakuti iye si Mulungu wakuti nkhabe kutsalakana anthu. Mwandimomwene, Bhibhlya isalonga kuti “iye hali kutali na ife tonsene tayu.” (Machitiro 17:27) M’misolo minai inatowerera, tinadzadinga kuti Mulungu asatipanganji thangwi ya citsalakano cace kuna anthu, pontho kuti iye asapangiza tani citsalakano ceneci kuna anthu ninga imwe.

[Cidzindikiro capantsi]