Mulungu Anakwanisa Kukubalangazani — BHIBHLIYOTEKA MU INTERNETI ya Torre de Vigia

NSOLO WA REVISTA | KODI MULUNGU ASAKUTSALAKANANI?

Mulungu Anakwanisa Kukubalangazani

“Mulungu anabalangaza anthu [akutsoperwa], ndiyembo adatibalangaza ife pano.”—2 AKORINTO 7:6.

THANGWI YANJI ANANGO ASAPENULA: Ngakhale m’midzidzi inafuna iwo ciphedzo kakamwe, anthu anango asaona kuti si pyakuthema tayu kuphemba ciphedzo ca Mulungu toera kuthimbana na nyatwa zawo. Nkazi unango anacemerwa Raquel alonga: “Ndingaona anthu azinji pa dziko yapantsi akuti asathimbana na nyatwa zizinji, ndisaona kuti nyatwa zanga ndi zing’ono kakamwe toera kuphemba ciphedzo ca Mulungu.”

MAFALA A MULUNGU ASAPFUNDZISANJI: Mulungu aphedza kale anthu munjira zizinji toera kuabalangaza. Lero, anthu onsene pa dziko yapantsi ali na unthaka wa madawo akubalwa nawo—cirema cakuti cisaticimwanisa kutowezera midida ya Mulungu mwakukhonda phonya. Ngakhale tenepo, Mulungu ‘atifuna mbatuma Mwanace [Yezu Kristu] adaperekeka thangwi ya ife toera atibuluse m’madawo athu.’ (1 Jwau 4:10) Kubulukira mu ntsembe ya kufa kwa Yezu, Mulungu asacitisa kuti tilekererwe madawo athu, tikhale na cikumbuntima cakucena, na cidikhiro cakukhala na umaso wakukhonda mala mu dziko ipswa yantendere.a Kodi ntsembe ineyi yaperekwa basi ene kwa anthu onsene ninga nsoka, peno isapangiza citsalakano ca Mulungu kwa imwe?

Onani citsandzo ca mpostolo Paulu. Iye akhuyiwa kakamwe na ntsembe ya Yezu mbalemba kuti: ‘Moyo unakhala cincino na ine m’manungo mwanga, ndinawo thangwi ndiri kukhulupira Mwana wa Mulungu, adandifuna mbaperekeka thangwi ya ine.’ (Agalata 2:20) Mwandimomwene, Yezu afa Paulu mbadzati kukhala Nkristu. Ngakhale tenepo, Paulu aona ntsembe ineyi ninga muoni wace udapaswa iye na Mulungu.

Ntsembe ya kufa kwa Yezu ndi muoni udaperekambo Mulungu kuna imwe. Muoni unoyu usapangiza kuti imwe ndimwe wakufunika kakamwe kuna Mulungu. Muoni unoyu unakwanisa kukupasani ‘cibalangazo cakukhonda mala na cidikhiro cadidi,’ natenepa munakwanisa kukhala wakuwanga ‘m’macitiro na m’mafala adidi onsene.’—2 Atesalonika 2:16, 17.

Yezu apereka umaso wace ninga ntsembe mu pyaka cifupi na 2000 nduli. Mphapo ninji pinapangiza kuti Mulungu asafuna kukhala na uxamwali na imwe lero?

[Cidzindikiro capantsi]

a Toera kupfundza pizinji thangwi ya ntsembe ya Yezu, onani nsolo 5 wa bukhu Kodi Mwandimomwene Biblya Isapfunzisanji?, yakubuluswa na Mboni za Yahova.