‘Bwerera Toera Upase Mphambvu Abale Ako’

PEDHRO alira kakamwe pidamala iye kukhonda kuti nee akhadziwa Yezu. Ngakhale kuti Pedhro akhafunika kuwangisira kakamwe toera kuwina pontho mphambvu yace yauzimu, Yezu akhafuna kumphatisira toera kuphedza anango. Yezu akhadampanga: ‘Imwembo ungamala kubwerera, pasa mphambvu abale ako.’ (Luka 22:32, 54-62) Pedhro adzakhala m’bodzi wa mizati ya mpingo Wacikristu wa pyaka dzana yakutoma. (Agal. 2:9) Munjira ibodzi ene, mamuna adatumikira ninga nkulu wa mpingo, anakwanisa kubwerera toera kutumikira pontho ninga nkulu wa mpingo mbagumana kutsandzaya mu kuwangisa anyakukhulupira andzace mwauzimu.

Anango adatumikira ninga akulu a mpingo aluza mwai unoyu, pyenepi pinakwanisa kubweresa mabvero akucimwana kucita pinthu. Julio,a adatumikira ninga nkulu wa mpingo mu pyaka 20 ku Afrika Wakubangwe alonga: “Kukhunganya nkhani, kuenda kaona abale na alongo, na kucedzera piwalo pya mpingo pikhacita khundu ikulu ya umaso wanga! Mwakukhonda dikhira, pyonsene pyamala, mbandisala na pinthu pyakucepa toera kucita. Mwa pyonsene, unoyu ukhali ndzidzi wakutsukwalisa kakamwe.” Lero, Julio akutumikira pontho ninga nkulu wa mpingo.

‘TSALAKANANI PYONSENE MWAKUKOMERWA’

Nyakupfundza Tyago alemba: ‘Abale anga, mungayeserwa na mayesero akusiyana-siyana, mudziwe kuti ndimwe anthu akutsandzaya.’ (Tgo. 1:2) Tyago akhalonga pya mayesero anaoneka thangwi ya kutcingwa na kusowa kwathu ungwiro. Iye alonga pya kusirira kwa umbirimi, kupangiza tsankhu, na pinango. (Tgo. 1:14; 2:1; 4:1, 2, 11) Yahova angatisandika, panango pinapha kakamwe. (Aheb. 12:11) Mbwenye nyatwa ineyi nee isafunika kumalisa kukomerwa kwathu.

Ngakhale kuti tabuluswa pa mwai wakutumikira m’mpingo, ife ticiri na mwai wakudinga ntengo wa cikhulupiro cathu na kupangiza ufuni wathu kuna Yahova. Tinakwanisambo kunyerezera kuti thangwi yanji tikhatumikira. Tikhatumikira toera kusaka maphindu athu ene, peno tathambaruka mpaka kukwanirisa mwai unoyu thangwi ya ufuni wathu kuna Mulungu, tikhali na cinyindiro cakuti mpingo ndi wace, pontho kuti usafunika kutsalakanwa mwaufuni? (Mach. 20:28-30) Ale adatumikira ninga akulu a mpingo akuti mwakutsandzaya asapitiriza kutumikira Mulungu, asapangiza kwa anthu onsene, kuphatanizambo Sathani, kuti ufuni wawo kwa Yahova ndi wandimomwene.

Mudasandikwa Mambo Dhavidhi thangwi ya madawo makulu adacita iye, iye atawira kusandikwa kweneku na manja mawiri, mbalekererwa. Dhavidhi aimba: “Nyakutsandzaya ndi ule adalekererwa madawo ace, mbafudziwa madawo ace onsene. Nyakutsandzaya ndi munthu wakuti Yahova nee asanyerezera pontho pyakuipa pyace, ntimambo wace mbusowa pyapezi.” (Sal. 32:1, 2, Tradução do Novo Mundo) Uphungu waphedza Dhavidhi, mwakukhonda penula, wancitisa kukhala nkumbizi wadidi kakamwe wa mbumba ya Mulungu.

Kazinji kene, abale anabwerera mbatumikira pontho ninga akulu a mpingo, asakhala akumbizi adidi kupiringana pakutoma. M’bodzi wawo alonga: “Cincino ndisabvesesa mwadidi kuti ndinatsalakana tani ale anacita madawo.” Unango alonga: “Cincino ndisapasa ntengo kakamwe mwai wanga wakutumikira abale.”

MUNAKWANISA KUBWERERA?

Nyamasalmo alemba: ‘Yahova hanasandika ndzidzi onsene tayu.’ (Sal. 103:9) Natenepa, nee tisafunika kunyerezera kuti Mulungu nee ananyindirabve munthu adacita madawo makulu. Ricardo adaluza mwai wace wakutumikira ninga nkulu wa mpingo pakumala kutumikira mu pyaka pizinji alonga: “Ndikhatsukwala kakamwe thangwi ya madodo anga ene. Mu pyaka pizinji, mabvero anga akuti nee ndathema, akhandipingiza kubwerera toera kutumikira abale ninga nkulu wa mpingo. Nee ndikhali na cinyindiro cakuti mbidakwanisa kupangiza pontho kuti ndine munthu wakunyindirika. Mbwenye, nakuti ndikhakomerwa kuphedza anango, ndikhakwanisa kucitisa mapfundziro a Bhibhlya, kuwangisa abale pa Nyumba ya Umambo, na kubuluka nawo pabodzi mu utumiki. Pyenepi pyandiphedza toera kuwina pontho cinyindiro canga, lero ndisatumikira pontho ninga nkulu wa mpingo.”

Kukoya mathangwi muntima kunakwanisa kupingiza m’bale toera kutumikira ninga nkulu wa mpingo. Mphyadidi kakamwe kukhala ninga Dhavidhi, ntumiki wa Yahova adathawa Mambo wantcanje, Sauli! Dhavidhi akhonda kucita pyakuipa Sauli, ngakhale kuti akhali na miyai toera kucita pyenepi. (1 Sam. 24:4-7; 26:8-12) Mudafa Sauli kunkhondo, Dhavidhi atsukwala kakamwe, mbalonga kuti iye na mwanace Yonatasi akhali anthu “akufuniwa na a mbiri.” (2 Sam. 1:21-23) Dhavidhi nee akoya mathangwi muntima.

Khala musaona kuti mwatsalakanwa mwakuipa, lekani kukoya mathangwi muntima mu kunyerezera pyenepi ndzidzi onsene. Mwacitsandzo, William akhadatumikira ninga nkulu wa mpingo mu pyaka 30, mudasiyiswa iye kutumikira, iye nee akhaona mwadidi akulu a mpingo anango. Ninji cidaphedza William toera kukhala na maonero akulinganira? Iye alonga: “Kuleri bukhu ya Yobe kwandiwangisa kakamwe. Khala Yahova aphedza Yobe toera kukhala na ntendere na axamwali ace atatu, ndiye tanimbo kwa ine, Iye mbadandiphedzambo toera kukhala na ntendere na akulu a mpingo Acikristu!”​—Yobe 42:7-9.

YAHOVA ASAPASA NKHOMBO ALE ANATUMIKIRA PONTHO NINGA AKUMBIZI

Khala mwasiya mwekhene kutumikira ninga nkumbizi wa mabira a Mulungu, mphyadidi kudinga kuti thangwi yanji mwacita pyenepi. Mukhathimbana na nyatwa zizinji? Ciripo cidadzakhala cakufunika kakamwe mu umaso wanu? Kodi mwafewa manungo thangwi ya madodo a anango? Mwakukhonda tsalakana thangwi yanu, kumbukani kuti mukhatumikira imwe ninga nkulu wa mpingo, mukhali na basa yakuphedza anango munjira zizinji. Nkhani zanu zikhaapasa cipapo, citsandzo canu cikhaawangisa, maulendo anu akucedzera abale akhaaphedza toera kupirira mayesero awo. Basa yanu ninga nkulu wa mpingo wakukhulupirika ikhakomeresa ntima wa Yahova na wanu ene.​—Mis. 27:11.

Yahova asaphedza amuna toera kuwina pontho kutsandzaya kwawo, mbakhalambo na cifuno cakutsogolera mpingo. Khala mwasiya mwekhene, peno mwasiyiswa kutumikira ninga nkulu wa mpingo, imwe munakwanisa ‘kuthambaruka mpaka kukhala pontho nkulu wa mpingo.’ (1 Tim. 3:1) Paulu ‘cipo asiya kuphembera’ toera Akristu a ku Kolose akhale akudzala na cidziwiso candimomwene ca cifuno ca Mulungu toera ‘kufamba ninga anthu akuthema kuna Yahova na kunkomeresa mwakukwana.’ (Akol. 1:9, 10) Khala muli na mwai wakutumikira pontho ninga nkulu wa mpingo, phembani Yahova toera akupaseni mphambvu, kupirira, na kutsandzaya. Mu ntsiku zino zakumalisa, atumiki a Mulungu asafuna ciphedzo cauzimu ca akumbizi aufuni. Kodi muli dzololo toera kuwangisa abale anu na ntima onsene?

[Cidzindikiro capantsi]