Khunganyikani Lero Toera Kukhala Maso Mu Dziko Ipswa

“Apange kuti acite pinthu pyadidi, . . . toera aphatisise umaso wandimomwene.”​—1 TIM. 6:18, 19, Traduçaõ do Novo Mundo.

NYIMBO: 43, 40

MUNATAWIRA TANI?

Ndi makhaliro api auzimu anadikhira ife kukhala nawo mu dziko ipswa?

Ndi njira zipi zingasi zakukhunganyika lero toera kukhala maso mu dziko ipswa?

Kodi pifuno pyauzimu pinatiphedza tani toera kukhunganyika kuti tikhale maso mu dziko ipswa?

1, 2. (a) Ndi nkhombo zipi zakumanungo zinadikhira imwe kakamwe mu dziko ipswa? (Onani cithundzithundzi cakutoma.) (b) Ndi nkhombo zipi zauzimu zinafuna kutambira ife mu dziko ipswa?

“UMASO WANDIMOMWENE.” Kwa azinji a ife fala ineyi isatikumbusa cidikhiro ca umaso wakukhonda mala mu Paradizu pa dziko yapantsi. Inde, mpostolo Paulu alandanisa ‘umaso wakukhonda mala’ na ‘umaso wandimomwene.’ (Lerini 1 Timoti 6:12, 19.) Ife tisadikhira kukhala na umaso wa kwenda na kwenda wakuti unadzabweresa kutsandzaya kwakukhonda mala. Mphyakutsandzayisa kakamwe kunyerezera kuti pinadzakhala tani kulamuka ntsiku zonsene na manungo akuwanga, manyerezero na ungumi wadidi. (Iza. 35:5, 6) Nyerezerani kukomerwa kunafuna kukhala na ife pa kukhala pabodzi na anyakufunika anthu, axamwali, kuphatanizambo ale anafuna kulamuswa muli akufa. (Jwau 5:28, 29; Mach. 24:15) Tinadzakhalambo na mwai wakuthimizira maluso athu mu pinthu pya siyensiya, kuimba nyimbo, kumanga nyumba, peno makhundu anango a cidziwiso.

² Maseze tisadikhira kakamwe pinthu pyenepi pyadidi, mbwenye nkhombo zikulu kakamwe zinafuna kutambira ife mu dziko ipswa ndi zauzimu. Pinadzakhala pyakutsandzayisa kakamwe kuona kuceneswa kwa dzina ya Yahova na kukuzwa kwa utongi wace ukulu. (Mat. 6:9, 10) Tinadzakomerwa kakamwe kuona kukwanirisika kwa cifuniro cakutoma ca Yahova kwa anthu na dziko yapantsi. Nyerezerani kuti pinadzakhala pyakukhonda nentsa kakamwe kukhala axamwali a Yahova mpaka kukhala na umaso waungwiro.​—Sal. 73:28; Tgo. 4:8.

3. Ninji pinafunika ife kukhunganyika lero?

³ Nkhombo zenezi zinadzakwanirisika, thangwi Yezu atipasa cinyindiro mudalonga iye kuti, “kuli Mulungu pyonsene pinakwanisika.” (Mat. 19:25, 26) Mbwenye khala tisadikhira kukhala mu dziko ipswa​—na kupitiriza kukhala maso pakumala kwa Pyaka Cikwi pya Utongi wa Kristu, tisafunika kucita pinthu pyadidi lero toera ‘tiphatisise’ umaso wakukhonda mala. Tisadikhira kumala kwa dziko ino yakuipa, natenepa tisafunika kukhala na makhaliro adidi lero toera kukhunganyika kuti tikhale maso mu dziko ipswa. Tinacita tani pyenepi mu dziko ino yakuipa?

TINAKHUNGANYIKA TANI?

4. Fokotozani kuti tinakhunganyika tani lero toera kukhala mu dziko ipswa.

⁴ Tinakhunganyika tani lero toera kukhala maso mu dziko ipswa ya Mulungu? Nyerezerani kuti musafuna kufuluka toera kuenda ku dziko inango. Munakhunganyika tani toera kufuluka? Panango munatoma kupfundza cilongero ca anthu a dziko ineyi, misambo yawo na kuyesera kudya cakudya cawo pyenepi mbapidakuphedzani kakamwe. Panango mbamudatoma kukhala maso ninga muli mu dziko ineyi. Mwandimomwene, ndi munjira ineyi inadikhira imwe kukhala mu dziko ineyi. Munjira ibodzi ene, tinakwanisa kukhunganyika lero toera kukhala maso mu dziko ipswa mukucita pyonsene pinakwanisa ife mu ndzidzi unadikhira ife dziko ipswa. Natenepa, dingani pitsandzo pinatowerera.

5, 6. Kodi kubvera pitsogolero pya Mulungu kunatikhunganya tani toera kukhala maso mu dziko ipswa?

⁵ Mu dziko ipswa, anthu onsene anadzaphedzera utongi ukulu wa Mulungu. Umaso unadzakhala wakutsandzayisa kakamwe, mwakusiyana na wa dziko ino yakutongwa na Sathani idadzala na nzimu wakutongereka. Anthu azinji asafuna kakamwe kutongereka na kukakamira maonero awo ninga pyakufunika kakamwe. Mphapo pyenepi pisabweresanji? Kukhonda bvera pitsogolero pya Mulungu kusabweresa nyatwa, kutsukwala, ngakhale pidengwa. (Yer. 10:23) Mbwenye tisadikhira kakamwe ndzidzi wakuti anthu onsene anadzabvera utongi ukulu waufuni wa Yahova.

⁶ Pinadzakhala pyakutsandzayisa kakamwe kubvera pitsogolero pya Yahova mu dziko ipswa mu ndzidzi unaphata ife basa toera kubalikisa dziko, kupfundzisa anthu akulamuswa muli akufa na kucita pyonsene pinafuna Yahova. Mbwenye ndiye tani mungaphembwa toera kucita basa yakuti nee musakomerwa nayo? Kodi munadzabvera, mbamutawira kucita pizinji m’basa ineyi mwakutsandzaya? Azinji a ife mbadatawira kuti inde! Mphapo tisabvera pitsogolero pya Mulungu lero? Khala tisabvera, tikukhunganyika toera kukhala maso kwenda na kwenda pantsi pa utongi wa Yahova.

7, 8. (a) Thangwi yanji tisafunika kukulisa nzimu wakubvera? (b) Ndi macinjo api adakhuya Akristu anango? (c) Ndi cinyindiro cipi ciri na ife thangwi ya umaso mu dziko ipswa?

⁷ Kukhunganyika toera kukhala maso mu dziko ipswa kusaphataniza pizinji kupiringana kubvera pitsogolero pinapereka Yahova lero. Tisafunikambo kukulisa nzimu wakukomerwa na piri na ife na wakubvera. Tingabvera ale anatitsogolera lero, mwacitsandzo, kukomerwa na basa ipswa inapaswa ife, tikukulisa makhaliro anafunika ife kupangiza mu dziko ipswa. (Lerini Ahebere 13:17.) Mu Dziko Yakupikirwa, dzindza ibodzi na ibodzi ya Aisraele yapaswa mbuto toera kukhala. (Num. 26:52-56; Yos. 14:1, 2) Mwandimomwene, lero nee tisadziwa kuti m’bodzi na m’bodzi wa ife anadzakhala pa mbuto ipi mu dziko ipswa. Mbwenye mwakukhonda tsalakana mbuto inafuna ife kukhala mu dziko ipswa, kubvera kunadzatiphedza toera kukomerwa na kutsandzaya kakamwe mu ndzidzi unacita ife cifuno ca Yahova.

⁸ Ndi mwai ukulu kakamwe kukhala pantsi pa utongi wa Umambo. Natenepa, tisafunika kucita pyonsene toera kubvera gulu ya Yahova na kucita mabasa Acikristu anapaswa ife. Ndimomwene kuti mukupita kwa ndzidzi makhaliro athu anakwanisa kucinja. Mwacitsandzo, abale anango ku Beteli ya Estados Unidos aphembwa toera kucita ntundu unango wa basa ya ndzidzi onsene, lero iwo ali akutsandzaya kakamwe na nkhombo zizinji zinatambira iwo. Thangwi yakugwesera peno mathangwi anango, ayang’aniri a cisa anango aphembwa toera kutumikira ninga apainiya akupambulika. Tingakulisa nzimu wakukomerwa na piri na ife, kuphemba ciphedzo ca Mulungu na kucita pyonsene pinakwanisa ife, tinadzakhala akutsandzaya mbatitambira nkhombo zizinji, ngakhale m’midzidzi ino yakunentsa ya ntsiku zakumalisa. (Lerini Misangani 10:22.) Mphapo ninji pinadikhira ife ntsogolo? Panango tisanyerezera pya mbuto inafuna ife kukhala mu dziko ipswa, mbwenye panango tinadzaphembwa toera kuenda kakhala ku mbuto inango yakusiyana na ikhanyerezera ife. Mwakukhonda tsalakana mbuto inafuna ife kutumikira na basa inafuna ife kucita, tiri na cinyindiro cakuti tinadzakomerwa kakamwe na kupereka takhuta thangwi yakukhala mu dziko ipswa.​—Neh. 8:10.

9, 10. (a) Ndi makhundu api anafunika ife kupangiza kupirira mu dziko ipswa? (b) Kodi tinapangiza tani kuti ndife akupirira?

⁹ Mu dziko ipswa, panango tinadzafunika kupangiza nzimu wakupirira. Mwacitsandzo, panango tinabva kuti anango akusekera kakamwe thangwi yakulamuswa kwa acibale na axamwali awo. Mbwenye kwa ife, panango tinadzafunika kudikhira toera anyakufunika athu alamuswembo muli akufa. Pyenepi pingacitika kuna ife, kodi tinadzatsandzaya pabodzi na anango mbatidikhira mwakupirira? (Arom. 12:15) Kupfundza kudikhira mwakupirira kukwanirisika kwa mapikiro a Yahova lero kunadzatiphedza toera kukhala akupirira ntsogolo.​—Koel. 7:8.

¹⁰ Tinakwanisambo kukhunganyika toera kukhala maso mu dziko ipswa tingadikhira mwakupirira mafokotozero a mabvekero mapswa a undimomwene wa Bhibhlya. Kodi tisapfundza mphangwa zenezi na kukhala akupirira tingakhonda kuzibvesesa mwadidi? Khala tisacita pyenepi, nee tinadzanentseka mu dziko ipswa mu ndzidzi unadikhira ife kuti Yahova apangize cifuniro cace kwa anthu.​—Mis. 4:18; Jwau 16:12.

11. Kodi Yahova akutipfundzisanji lero thangwi ya uxamwali wathu, kodi pyenepi pinadzatiphedza tani mu dziko ipswa?

¹¹ Nkhaliro unango wakuti unatiphedza toera kukhunganyika kuti tikhale maso mu dziko ipswa ndi nzimu wakulekerera. Mu Pyaka Cikwi pya Utongi wa Kristu, pinadzakwata ndzidzi toera anthu akulungama na akukhonda kulungama akhale aungwiro. (Mach. 24:15) Kodi tinadzacita pinthu mwaufuni na kulekererana unango na ndzace? Tingapfundza kulekerera anango na ntima onsene lero na kuwangisa uxamwali wathu na iwo, pinadzakhala pyakukhonda nentsa kakamwe kucita pyenepi mu dziko ipswa.​—Lerini Akolose 3:12-14.

12. Thangwi yanji tisafunika kukhunganyika lero toera kukhala maso mu dziko ipswa?

¹² Umaso mu dziko ipswa nee usabveka kuti ndzidzi onsene tinadzagumana pinthu pinafuna ife pa ndzidzi unapifuna ife. Mbuto mwace, umaso unoyu unadzaphataniza kupereka takhuta na kukomerwa na pyonsene pinafuna kukhala na ife thangwi yakubvera utongi ukulu waufuni wa Yahova. Mwandimomwene tinadzafunika kupangiza makhaliro anatipfundzisa Yahova lero. Tingapfundza lero kukhala maso ninga munafuna ife kucita mu dziko ipswa, tikukulisa makhaliro akuti tinadzafunika kuapangiza kwenda na kwenda. Munjira ineyi, tikuwangisa cikhulupiro cathu ku ‘pinthu pinadikhira ife’ mu dziko ipswa. (Aheb. 2:5; 11:1) Kusiyapo pyenepi, tikupangiza kuti tisafuna kakamwe makhaliro aulungami akuti anadzagumanika mu dziko ipswa. Inde, tikukhunganyika toera kukhala maso kwenda na kwenda mu dziko ipswa ya Mulungu.

IKHANI MANYEREZERO ANU KU PIFUNO PYAUZIMU LERO

13. Kodi ndi mabasa api anafuna kudzakhala pa mbuto yakutoma mu dziko ipswa?

¹³ Dingani njira inango yakuti tinakwanisa kukhunganyika toera kukhala na umaso wandimomwene ntsogolo. Maseze tisapikirwa kuti mu dziko ipswa tinadzakhala na pyakudya pizinji na pinthu pinango pyakufunika, ife tinadzakhala akutsandzaya kakamwe tingakwanirisa pyakufuna pyathu pyauzimu. (Mat. 5:3) Mabasa auzimu anadzakhala pa mbuto yakutoma, pontho tinadzakhala akutsandzaya kakamwe mu kutumikira Yahova. (Sal. 37:4) Tingaikha pinthu pyauzimu pa mbuto yakutoma lero, tinapangiza kuti tikukhunganyika toera kukhala maso kwenda na kwenda ntsogolo.​—Lerini Mateo 6:19-21.

14. Ndi pifuno pipi pyauzimu pyakuti pinaphedza aphale na atsikana toera kuikha manyerezero awo ku umaso wakukhonda mala?

¹⁴ Tinathimizira tani kutsandzaya kwathu m’mabasa Acikristu? Njira ibodzi ndi kukhazikisa pifuno pyauzimu. Khala ndimwe mphale peno ntsikana, pontho musafuna kakamwe kutumikira Yahova mu umaso wanu, ndiye tani kudinga mphangwa zinabuluswa m’mabukhu athu zinalonga pya njira zakusiyana-siyana za basa ya ndzidzi onsene? Buluka penepo munakwanisa kusankhula ntundu ubodzi wa basa ineyi ninga cifuno canu.a Munakwanisa kucedza na anango akuti amala ndzidzi uzinji m’basa ya ndzidzi onsene. Mungasankhula kucita basa ya utumiki mu umaso wanu, munadzapfundza pizinji pyakuti pinakuphedzani toera kutumikira Yahova mu dziko ipswa, maluso anafuna imwe kukulisa lero m’mabasa Acikristu anadzakhala akufunika kakamwe mu dziko ipswa.

15. Ndi pifuno pipi pyauzimu pyakuti amwazi mphangwa a Umambo anakwanisa kupikhazikisa?

¹⁵ Ninga amwazi mphangwa a Umambo, ndi pifuno pipi pyauzimu pyakuti tinakwanisa kupikhazikisa? Tinakwanisa kukhazikisa cifuno ca kuthimizira maluso athu m’makhundu anango a utumiki. Peno kuwangisira toera kuthimizira kubvesesa kwathu midida ya Bhibhlya na kuona kuti tinaiphatisira tani mu umaso wathu. Ndiye tani kukulisa maluso athu akuleri mwadidi na kucita nkhani, peno kutawira pa misonkhano ya mpingo? Mwakukhonda penula, munakwanisa kunyerezera makhundu anango. Mbwenye undimomwene ndi wakuti: Kukhazikisa pifuno pyauzimu kunadzathimizira kutsandzaya kwanu m’mabasa Acikristu, pyenepi pinadzakuphedzani toera kukhunganyika kuti mukhale maso mu dziko ipswa.

NKHOMBO ZATHU ZATOMA KALE!

16. Thangwi yanji kutumikira Yahova ndi njira yadidi kakamwe ya umaso?

¹⁶ Kodi tingaphatisira ndzidzi wathu toera kukhunganyika kuti tikhale maso mu dziko ipswa ya Mulungu, pisabveka kuti tikuluza umaso wadidi kakamwe lero? Nkhabe. Kutumikira Yahova ndi njira ibodzi basi ya umaso wakutsandzayisa kakamwe. Ife nee tisatumikira Yahova thangwi yakukakamizwa na anango peno basi ene toera kupulumuka pa nyatwa ikulu. Ife tacitwa toera kuntumikira, pyenepi pisabweresa kutsandzaya kakamwe. Kutsogolerwa na Yahova na kufuniwa na iye ndi pinthu pyakufunika kakamwe kupiringana umaso wakukhonda khala na uxamwali na iye. (Lerini Masalmo 63:1-3.) Mwandimomwene, nee tisafunika kudikhira dziko ipswa toera kutsandzaya na nkhombo zauzimu zinaoneka thangwi yakutumikira Yahova na ntima onsene​—izo zisagumanika pakati pathu lero! Inde, anango a ife atoma kale kutsandzaya na nkhombo zenezi, natenepa tisadziwa kubulukira mu pyakugumana napyo pyathu kuti nkhabepo njira inango ya umaso inabweresa kutsandzaya kakamwe kupiringana ineyi.​—Sal. 1:1-3; Iza. 58:13, 14.

17. Kodi pifuno pyathu na ubalangazi pinadzakhala pa mbuto ipi mu dziko ipswa?

¹⁷ Mu Paradizu tinadzakhala akutsandzaya mu kuphatisira khundu ya ndzidzi wathu toera kutsalakana pifuno pyathu na ubalangazi. Mwandimomwene, Yahova aticita na cifuno cakukhala akutsandzaya, natenepa, iye apikira kuti ‘anadzakwanirisa pifuno pya pinthu pyonsene pya umaso.’ (Sal. 145:16; Koel. 2:24) Ife tisafuna ubalangazi na ndzidzi wakupuma, mbwenye kutsandzaya kunakhala na ife mu pinthu pyenepi kusathimizirika tingaikha uxamwali wathu na Yahova pa mbuto yakutoma. Ndi pyenepi pinafuna kudzacitikambo mu dziko ipswa. Natenepa, mphyandzeru kupfundza kuikha pifuno pyathu pa mbuto yace, kupitiriza kuikha Umambo pa mbuto yakutoma, mbatisaka nkhombo zauzimu zinatambira ife lero ninga atumiki a Yahova.​—Mateo 6:33.

18. Kodi tinapangiza tani kuti tikukhunganyika toera kukhala maso kwenda na kwenda mu Paradizu?

¹⁸ Mu Paradizu, ife tinadzakhala akutsandzaya kwakuti cipo takhala nako. Tinakwanisa kupangiza cifuno cikulu kakamwe cakukhala na umaso wandimomwene tingakhunganyika lero. Tendeni tikulise makhaliro anafuna Mulungu na kukhala akutsandzaya kakamwe mukucita khundu mwaphinga m’basa idapaswa ife yakumwaza mphangwa za Umambo. Tisafunikambo kukhala akutsandzaya mu kuikha ulambiri wa Yahova pa mbuto yakutoma. Natenepa, tendeni tipangize cikhulupiro cakukwana ku mapikiro a Yahova lero, mbatidikhira kukhala maso mu dziko ipswa.

[Cidzindikiro capantsi]