Kodi Yahova Asapangiza Tani Kuti Asatifuna?

‘Onani ufuni ukulu udapangiza Baba kwa ife!’​—1 JWAU 3:1.

NYIMBO: 51, 13

MUNAKWANISA KUFOKOTOZA?

Thangwi yanji anango nkhabe kubvesesa kuti Yahova asaafuna?

Kodi Yahova asapangiza tani ufuni wace kwa ife kubulukira munjira inatsalakanira iye pifuno pyathu na kutipfundzisa undimomwene?

Tinakwanisa tani kuona ufuni wa Yahova angatipasa uphungu na kutisandika?

1. Kodi mpostolo Jwau akulumiza Akristu toera kudinganji, pontho thangwi yanji?

TISAFUNIKA kunyerezera mwacidikhodikho mafala a mpostolo Jwau anagumanika pa 1 Jwau 3:1. Pidalonga iye kuti, ‘onani ufuni ukulu udapangiza Baba kwa ife,’ Jwau akhakulumiza Akristu toera kunyerezera kukula kwa ufuni wa Mulungu kwa iwo na kudinga kuti Mulungu asapangiza tani ufuni unoyu. Kubvesesa mwadidi ufuni wa Yahova munjira ineyi, kunadzathimizira ufuni wathu kwa iye na kuwangisa uxamwali na iye.

2. Thangwi yanji anango nkhabe kubvesesa kuti Mulungu asaafuna?

² Mwakutsukwalisa, anango nkhabe kubvesesa kuti Yahova asaafuna. Kwa iwo, Mulungu asafunika kugopiwa na kubverwa. Thangwi ya pipfundziso pyapezi piri na iwo, panango asanyerezera kuti Mulungu nkhabe funa anthu, pontho nkhabe kwanisika kuti iye afuniwe na anthu. Kusiyapo anthu anewa, alipo anakhulupira kuti Mulungu asafuna anthu onsene mwakukhonda tsalakana pinacita iwo peno pinakhonda cita iwo. Mbwenye pakupfundza Bhibhlya, imwe mwadziwa kuti ufuni ndi n’khaliro ukulu kakamwe wa Yahova, ufuni unoyu wankulumiza toera kupereka Mwanace ninga ciomboli kwa ife. (Jwau 3:16; 1 Jwau 4:8) Ngakhale tenepo, mabvero anu thangwi ya ufuni wa Mulungu kwa imwe panango anakhuyiwa na makuziro peno makhaliro anu.

3. Ndi undimomwene upi wakufunika usatiphedza kubvesesa kuti Mulungu asatifuna?

³ Mphapo Yahova asapangiza tani ufuni wace kwa ife? Ntawiro wa mbvundzo unoyu usanyindira kubvesesa uxamwali wathu na Yahova. Mwandimomwene, Yahova ndi Nciti wa anthu onsene. (Lerini Masalmo 100:3-5.) Na thangwi ineyi, Bhibhlya isacemera Adhamu ‘mwana wa Mulungu,’ pontho Yezu apfundzisa atowereri ace toera acemere Mulungu ninga ‘Babathu wakudzulu.’ (Luka 3:38; Mat. 6:9) Nakuti ndiye adatipasa umaso, Yahova ndi Babathu; uxamwali wathu na iye ndi ninga wa baba na anace. Mwacigwagwa, Yahova asatifuna munjira inafunira baba waufuni anace.

4. (a) Yahova asiyana tani na ababa akusowa ungwiro? (b) Ninji pinafuna kudinga ife mu nsolo uno na unatowerera?

⁴ Ababa akusowa ungwiro, maseze awangisire kakamwe, iwo nkhabe kwanisa kutowezera mwakukwana ufuni unapangiza Yahova ninga baba. Mwandimomwene, anango asanentseka m’manyerezero thangwi akuzwa m’makhaliro akunentsa kakamwe panyumba. Pyenepi pisapha, pontho pisatsukwalisa. Mbwenye Yahova asiyana kakamwe na ababa anewa. (Sal. 27:10) Kudziwa kuti Yahova asatifuna kakamwe na asatitsalakana, pinaticitisa toera kukhala na uxamwali wakuwanga na iye. (Tgo. 4:8) Mu nsolo uno, tinadzadinga njira zinai zinapangiza Yahova ufuni wace kwa ife. Mu nsolo unatowerera, tinadzadinga njira zinai zakuti tinakwanisa kupangiza ufuni wathu kwa iye.

YAHOVA ASATITSALAKANA MWAUFUNI

5. Mpostolo Paulu alonganji kuna anthu a ku Atena thangwi ya Mulungu?

⁵ Pikhali mpostolo Paulu ku Atena, Gresya, aona kuti nzinda ukhadadzala na madzimunthu. Anthu akakhulupira kuti madzimunthu anewa ndiwo adaapasa umaso na pinthu pinango pikhafuna iwo. Pidaona iye pyenepi, Paulu alonga: ‘Mulungu adacita pantsi na pyonsene piri mwenemu . . .  asapasa anthu onsene umaso, muya na pyonsene . . . Mwa iye, tiri na umaso, tisafamba mbatikhala maso.’ (Mach. 17:24, 25, 28) Inde, thangwi ya ufuni, Yahova asapereka ‘pinthu pyonsene’ pyakufunika toera kutsalakana umaso wathu. Kodi mafala anewa asabvekanji kwa ife?

6. Tinakwanisa tani kubvesesa ufuni wa Mulungu munjira idacitira iye dziko yapantsi? (Onani cithundzithundzi cakutoma.)

⁶ Onani dziko yapantsi idacita Yahova, ‘mbaipasa ana a anthu.’ (Sal. 115:15, 16) Mpaka pano, asiyentista abvunga kobiri izinji kakamwe mu kuenda kuthambo toera kusaka maplaneta anango akulandana na dziko yapantsi. Maseze agumana madzana a maplaneta, iwo ali akutsukwala thangwi nee ibodzi mwa maplaneta anewa iri na makhaliro akutsalakana umaso ninga dziko yapantsi. Dziko yapantsi ndi yakusiyana kakamwe na pinthu pyonsene pidacita Mulungu. Nyerezerani basi, ife nkhabe dziwa kuti ndi maplaneta mangasi ali nkati na kunja kwa Via Láctea. Yahova nee acita dziko yapantsi basi ene ninga mbuto yakukhala, mbwenye ndi mbuto yadidi kakamwe, yakubalika na mudzi wakutsidzikizika kwa anthu! (Iza. 45:18) Pyenepi pisatipangiza kuti Yahova asatifuna kakamwe.​—Lerini Yobe 38:4, 7; Masalmo 8:3-5.

7. Njira idaticitira Mulungu isapangiza tani kuti mwandimomwene iye asatifuna?

⁷ Maseze, Yahova aticitira mudzi wadidi kakamwe, iye asadziwa kuti toera tikhale akutsandzaya tisafuna pizinji kupiringana pinthu pyakumanungo. Mwana asapibva kukhala wakutsidzikizika kakamwe angafuniwa na kutsalakanwa na anyakubalace. Yahova acita anthu mwakulandana na iye, mbaapasa luso yakubvesesa ufuni unapangiza iye kwa iwo na kupangizambo ufuni wawo kuna iye. (Gen. 1:27) Kusiyapo pyenepi, Yezu alonga: ‘Anyakutsandzaya ndi ale anadzindikira pifuno pyawo pyauzimu.’ (Mat. 5:3) Ninga Baba waufuni, Yahova ‘asatipasa pyonsene piri na ife,’ pya kumanungo na pyauzimu.​—1 Tim. 6:17; Sal. 145:16.

MWAUFUNI, YAHOVA ASATIPFUNDZISA UNDIMOMWENE

8. Thangwi yanji tinakwanisa kunyindira citsogolero ca ‘Mulungu wa undimomwene’?

⁸ Ababa asapangiza ufuni kuna anawo, pontho asafuna kuatsidzikiza toera akhonde kupeuswa peno kunyengezwa. Mbwenye anyakubala azinji asacimwana kupereka citsogolero cadidi kuna anawo thangwi anyakubala anewa asakhonda kubvera midida ya Bhibhlya. Kazinji kene pyenepi pisabweresa kukhonda bverana na kutsukwala. (Mis. 14:12) Munjira inango, Yahova ndi ‘Mulungu wa undimomwene.’ (Sal. 31:5) Iye asafuna anace, pontho asakomerwa kupereka ceza cace ca undimomwene toera kuatsogolera m’makhundu onsene a umaso wawo, makamaka mu pinthu pyauzimu. (Lerini Masalmo 43:3.) Tendeni tione undimomwene unapereka Yahova wakuti usapangiza kuti iye asatifuna?

9, 10. Kodi Yahova apangiza tani kuti asatifuna mu kupangiza undimomwene (a) unalonga pya iye? (b) unalonga pya ife?

⁹ Pakutoma, Yahova apangiza undimomwene unalonga pya iye. Iye apangiza dzina yace, yakuti isagumanika m’maulendo mazinji m’Bhibhlya kupiringana madzina anango onsene. Munjira ineyi, Yahova afendedza kwa ife toera tikwanise kundziwa. (Tgo. 4:8) Yahova asapangizambo makhaliro ace. Ngakhale kuti kudzulu na dziko yapantsi pisapangiza mphambvu yace na udziwisi wace, Yahova asapangizambo cilungamo cace na ufuni wace wakusowa madire kubulukira m’Bhibhlya. (Arom. 1:20) Iye ndi ninga baba wakuti ali na mphambvu, udziwisi, ulungami na ufuni, pyakuti mwakukhonda nentsa pisacitisa anace kukhala na uxamwali wakuwanga na iye.

¹⁰ Toera kutiphedza, Yahova asapangizambo undimomwene unalonga pya ife, makamaka pya khundu yathu mu cifuniro cace. Pyenepi pisaphedzera ntendere na ulinganiri wa gulu yace, kudzulu na pantsi. Kubulukira m’Bhibhlya, tisapfundza kuti anthu nee acitwa na ufulu wakutongereka, peno kukhonda tongwa na Mulungu. Kupwaza undimomwene unoyu wakufunika kusabweresa nyatwa. (Yer. 10:23) Pyenepi mphyakufunika toera tikhale mwadidi. Basi ene tingabvera utongi wa Mulungu, tinakwanisa kutsandzaya na ntendere mbatikhala akuphatana. Mphyakutsandzayisa kakamwe kuti Yahova mwaufuni asatipangiza undimomwene unoyu wakufunika!

11. Ndi pikiro ipi ya Yahova inapangiza kuti asatifuna pontho asadzudzumika na ife?

¹¹ Baba waufuni asadzudzumika na tsogolo ya anace, iye asafuna kakamwe kuti akhale na umaso wadidi na wakuphindulisa. Mwakutsukwalisa, anthu azinji nee asadziwa pya ntsogolo, iwo asabvunga umaso wawo mu kusaka pinthu pyakukhonda kubweresa maphindu a kwenda na kwenda. (Sal. 90:10) Ninga ana a Mulungu, tisapibva kuti tisafuniwa, thangwi Yahova asatipikira tsogolo yakutsandzayisa. Pyenepi pisaticitisa kukhala na umaso wakutsandzayisa.

YAHOVA ASALANGA MBASANDIKA ANACE

12. Kodi uphungu wa Yahova kwa Kaini na Baruki wapangiza tani ufuni wace na kudzudzumika kwace na iwo?

¹² Pidaona Yahova kuti Kaini akhali pangozwi yakucita cinthu cakuipa kakamwe, iye ancenjeza: ‘Thangwi yanji waipirwa kakamwe? Ungacita pyadidi nee unadzabverwa pontho ntsisi? . . . Kodi unakwanisa kuakunda madawo?’ (Gen. 4:6, 7) Na mafala anewa, Yahova apereka uphungu pa ndzidzi wakuthema na citsogolero cadidi. Mwakutsukwalisa, Kaini nee abvera cenjezo ineyi, mbaona nyatwa thangwi ya pyenepi. (Gen. 4:11-13) Baruki akhali mulembi wa Yeremiya, iye afewa manungo mbatsukwala, mbwenye Yahova ampasa uphungu toera kumphedza kuona undimomwene wa nyatwa yace. Mwakusiyana na Kaini, Baruki atawira uphungu wa Yahova, pyenepi pyampulumusa.​—Yer. 45:2-5.

13. Thangwi yanji Yahova asatawirisa kuti atumiki ace akukhulupirika athimbane na nyatwa?

¹³ Paulu alemba: ‘Yahova asalanga ale anafuniwa na iye, asakwapula ale anatambira iye toera akhale anace.’ (Aheb. 12:6) Kulanga kusaphataniza pizinji kusiyapo kutcinyusa. M’Bhibhlya muli na pitsandzo pizinji pya atumiki akukhulupirika adatamba nyatwa zizinji. Nyatwa zenezi zikhali ninga kulangwa mbapfundza kubulukira mwa izo. Nyerezerani Zuze, Mose na Dhavidhi. Mbiri za umaso wawo zafokotozwa kakamwe kupiringana za anthu anango analongwa m’Bhibhlya. Yahova akhali na iwo m’midzidzi yonsene ya nyatwa zawo mbaaphatisira mwakukwana. Kuleri mphangwa zenezi kunatiphedza toera kubvesesa citsalakano ca Yahova na ufuni unapangiza iye kwa atumiki ace.​—Lerini Misangani 3:11, 12.

14. Tinakwanisa tani kuona ufuni wa Yahova tingasandikwa na iye?

¹⁴ Kusandikwa na Yahova kusatiphedza toera kuona njira inango ya ufuni wace. Ale adacita pinthu pyakuipa angasandikwa na Yahova mbatcinyuka, ‘iye asaalekerera na ntima onsene.’ (Iza. 55:7) Kodi pyenepi pisabvekanji? Dhavidhi afokotoza kulekerera kwa Yahova na mafala awa: ‘Iye asalekerera madawo ako onsene, ndiye anawangisa mautenda ako onsene, iye asaombola umaso wako munthumbi, ndiye anakupasa ufuni wakukhulupirika na ntsisi zace. Asasiya kutali madawo athu sawasawa ninga kumabulukiro a dzuwa ndi kutali na kumadokero a dzuwa.’ (Sal. 103:3, 4, 12) Ndzidzi onsene tisafunika kubvera uphungu na kutawira mwakucimbiza kusandikwa na Yahova, mbatidziwa kuti pyenepi pisapangiza ufuni wace wakusowa madire kwa ife.​—Sal. 30:5.

YAHOVA ASATITSIDZIKIZA

15. Ninji pinapangiza kuti atumiki a Yahova ndi akufunika kakamwe kwa iye?

¹⁵ Mwandimomwene, baba waufuni ndi ule anatsidzikiza banjace ku pinthu pyakuipa peno pyakuphekesa. Yahova, Babathu wakudzulu asacitambo pyenepi. Thangwi ya Yahova, nyamasalmo alonga: ‘Iye asakoya umaso wa atumiki ace, mbaapulumusa m’manja mwa anyakuipa.’ (Sal. 97:10) Mwacitsandzo, maso anu ndi akufunika kakamwe kwa imwe! Yahova asaonambo atumiki ace munjira ibodzi ene. (Lerini Zakariya 2:8.) Mwakukhonda penula, atumiki a Mulungu ndi akufunika kakamwe kwa iye!

16, 17. Fokotozani kuti Yahova asatsidzikiza tani atumiki ace kutomera mu ntsiku zakale mpaka lero?

¹⁶ Njira ibodzi inaphatisira Yahova toera kutsidzikiza atumiki ace ndi aanju. (Sal. 91:11) Anju m’bodzi atsidzikiza Yerusalemu pikhafuna iye kufudzwa na Asirya, mbapha anyankhondo 185.000 pa masiku mabodzi. (2 Am. 19:35) Mu pyaka dzana yakutoma, aanju abulusa Akristu nkaidi, ninga mpostolo Pedhro na Paulu. (Mach. 5:18-20; 12:6-11) Mu ntsiku zino Yahova asatsidzikizambo atumiki ace. Mwacitsandzo, m’bale unango wa ku ofesi ikulu adatumwa toera kucedzera filiali ibodzi mu Afrika alonga kuti uviyaviya wa ndale na mauphemberi ukhadafudza dziko ineyi. Kumenyana, kuba, kupita mabonde mwakukakamiza na kuphana pyasiya dziko ineyi panyatwa, pontho azinji nee akhabvera utongi. Mbwenye nee m’bodzi wa abale na alongo athu aluza umaso, maseze azinji a iwo aluza pinthu pyawo pyonsene. Pidabvundzwa iwo kuti ali tani, onsene amwetulira mbatawira: “Pyonsene piri mwadidi, na ciphedzo ca Yahova!” Iwo aona kuti Mulungu asaafuna.

¹⁷ Midzidzi inango Yahova asatawirisa kuti anyamalwa abuluse umaso wa atumiki ace akukhulupirika, ninga Estevau. Mbwenye Mulungu asatsidzikiza atumiki ace mu kupereka ndzidzi onsene macenjezo analonga pya misampha ya Sathani. (Aef. 6:10-12) Kubulukira m’Mafalace na mabukhu akubuluswa m’Bhibhlya a gulu yace, tisaphedzwa toera kuona undimomwene unalonga pya ngozwi za pinthu pya mpfuma, ulukwali, ubalangazi wauphanga, kuphatisira mwakuipa Interneti na pinango. Mwandimomwene, ninga Baba waufuni, Yahova asatifuna, pontho asatitsidzikiza.

TIRI NA MWAI UKULU

18. Musapibva tani munganyerezera pya ufuni unapangiza Mulungu kwa imwe?

¹⁸ Pakumala kudinga njira zingasi mwa zizinji zinapangiza Yahova ufuni wace kwa ife, mwandimomwene, tiri na mabvero ninga a Mose. Mu kunyerezera ndzidzi uzinji udatumikira iye Yahova, Mose alonga: ‘Tilamuseni na macibese akudzala na udidi wanu, toera tiimbe na kusekera ntsiku zonsene za umaso wathu.’ (Sal. 90:14) Kubvesesa na kuona ufuni wa Yahova kwa ife ndi ubodzi mwa miyai na nkhombo ziri na ife lero. Ninga mpostolo Jwau, tisakulumizika toera kulonga: ‘Onani ufuni ukulu udapangiza Baba kwa ife!’​—1 Jwau 3:1.