MBIRI YA UMASO

Nkhombo Za Yahova Zaphindulisa Umaso Wanga

Yalongwa Na Melita Jaracz

NDABALWA mu caka 1927 mu nzinda ung’ono wa Wakaw, Saskatchewan, Kanada. Mama na baba abala ana anomwe, anai acimuna na atatu acikazi, natenepa ndapfundza mwakucimbiza kukhala pakati pa anthu azinji.

Banja yathu yakhuyiwa na kugwa kwa mpfuma kudaoneka kutomera mu pyaka 1930 kudadziwika na dzina ya Grande Depressão. Nee tikhali anyakupfuma, mbwenye nee tikhali na njala. Tikhali na nkhuku zingasi na ng’ombe, natenepa cipo tikhasowa mazai, nkaka, nata, queijo na manteiga. Mwandimomwene, tonsene panyumba tikhali na basa toera kucita.

Ndisatsandzaya kakamwe ndingakumbuka midzidzi ineyi, ninga kununkhira kwa masau nkwartu yathu. Pikhaenda baba ku nzinda kagulisa pinthu pikhalima ife na pinango, ndzidzi onsene akhabwera na bokosi ya masau akumala kwene kutcodwa. Tikhakomerwa kakamwe kudya masau akutapira ntsiku zonsene!

BANJA YATHU YAPFUNDZA UNDIMOMWENE

Ndikhali na pyaka pitanthatu pyakubalwa pidabva anyakubala anga undimomwene. Mwana wawo wakutoma, Johnny alowa ntsiku zingasi pidamala iye kubalwa. Anyakubala anga adzudzumika kakamwe mbabvundza pai pastor wapacisa: “Johnny ali kupi?” Pastor alonga kuti mwana nee akhali nkristu, natenepa iye nee akhali kudzulu. M’mbuto mwace, iye ali mu Limbo. Pastor alongambo kuti anyakubala anga angamulipa, iye mbadacita phembero toera Johnny abuluke mu Limbo mbaenda kudzulu. Kodi imwe mbamudapibva tani? Baba na Mama aipirwa kakamwe mbakhonda kulonga pontho na pastor unoyu. Mbwenye iwo akhapitiriza kufuna kudziwa pidacitika kuna Johnny.

Ntsiku inango Mama agumana bukhu ya nsolo wakuti Onde Estão os Mortos? yakubuluswa na Mboni za Yahova, mbaileri yonsene. Pidafika Baba panyumba, mama mwakukomerwa alonga: “Ndisadziwako kuna Johnny! Cincino iye akugona, mbwenye ntsiku yace anadzalamuka.” Pa masiku anewa, Baba aileri yonsene. Baba na Mama abalangazwa mu kudziwa pinalonga Bhibhlya kuti anthu adafa akugona, pontho anadzalamuswa ntsogolo.​—Koel. 9:5, 10; Mach. 24:15.

Pyenepi pyacinja umaso wathu, pyatibalangaza na kutitsandzayisa. Iwo atoma kupfundza Bhibhlya na Mboni za Yahova, mbatoma kugumanika pa misonkhano pa mpingo ung’ono ku Wakaw, wakuti anthu azinji akhali na makhaliro a ku Ukraniya. Mwakukhonda dembuka, Baba na Mama atoma kumwaza mphangwa.

Mudapita ndzidzi wakucepa, tafuluka mbatienda kakhala ku Colúmbia Britânica, kweneku mpingo watitambira mwadidi. Ndisakumbuka kutsandzaya kukhali na banja yathu pakukhunganyika pfundziro ya Ncenjezi inacitwa pa misonkhano ya n’Dimingu. Tonsene tikhakulisa ufuni wakuwanga kwa Yahova na ku undimomwene wa Bhibhlya. Ndikhaona kuti umaso wathu ukhali wakuphindulisa kakamwe, pontho Yahova akhatipasa nkhombo.

Nakuti tikhali anang’ono, pikhanentsa kwa ife kulonga na anthu pya cikhulupiro cathu. Mbwenye cidatiphedza kakamwe ndi cakuti ine na ng’ono wanga Eva tikakhunganyika maperekero a umboni a pa nthanda mbatiapangiza pa Nsonkhano wa Basa. Pyenepi pyatiphedza kakamwe toera kulonga na anango pya Bhibhlya, maseze tikhali na manyadzo. Ndisapereka takhuta kakamwe na cipfundziso ceneci!

Cinthu cidatikhuya kakamwe mu uwana wathu ndi kutambira atumiki a basa ya ndzidzi onsene panyumba pathu. Mwacitsandzo, tikhakomerwa kakamwe pa ndzidzi wakuti muyang’niri wa cisa, Jack Nathan akhacedzera mpingo wathu mbafikira panyumba pathu.a Tikhadzumatirwa kakamwe na pyakugumana napyo pizinji pikhalonga iye, pontho kutisimba kwace na ntima onsene kwatikulumiza toera kutumikira Yahova mwakukhulupirika.

Ndikhanyerezera: “Ndingakula, ndisafuna ndikhale ninga M’bale Nathan.” Ndadzindikira n’dembulembu kuti citsandzo cace cikhandikhunganya toera kucita basa ya ndzidzi onsene. Pikhali ine na pyaka 15 pyakubalwa, ndatonga kutumikira Yahova. Ine na Eva tabatizwa mu caka 1942.

MAYESERO A CIKHULUPIRO

Nkati mwa Nkhondo Yaciwiri Ya Dziko Yonsene, anthu akhalemedza kakamwe madziko awo. Abale anga awiri acikazi na m’bodzi wacimuna abuluswa kuxikola na Mai Scott mpfundzisi wakuti akhaipirwa kakamwe na pikhulupiro pyathu. Thangwi yanji? Thangwi akhonda kulambira bandera. Buluka penepo, iye aphemba mpfundzisi wanga toera andibulusembo. Mbwenye mpfundzisi wanga alonga: “Ife tiri mu dziko yaufulu, pontho tiri na udidi wakukhonda kucita khundu ya maserimonya a dziko.” Maseze Mai Scott akakamiza kakamwe mpfundzisi wanga, iye alonga mwacinyindiro: “Ceneci ndi cisankhulo canga.”

Mai Scott atawira: “Nkhabe, ceneci nee ndi cisankhulo cako. Ungakhonda kum’bulusa ndinakusumira.” Mpfundzisi wanga apanga anyakubala anga kuti mbadakhonda kundibulusa, iye mbadaluza basa, maseze akhaona kuti pyenepi mphyakuipa kakamwe. Ngakhale tenepo, tagumana mabukhu a kuxikola toera kupfundza kunyumba. Mwakukhonda dembuka, tafuluka mbatienda kakhala ku cisa cinango ca nsindzo wa makilometru 32, kweneku tatawiriswa kupfundza pa xikola inango.

Mabukhu athu akhondeswa mu ndzidzi wa nkhondo. Natenepa, takwanisa kukulisa maluso athu mu utumiki wa nyumba na nyumba mu kuphatisira Bhibhlya basi. Pyenepi pyatiphedza toera kukula mwauzimu na kuona ciphedzo ca Yahova.

KUPITA M’BASA YA NDZIDZI ONSENE

Pidamalisa ife xikola, ine na Eva tatoma kutumikira ninga apainiya. Toera kuphedzeka, pakutoma ndaphata basa mu loja inango. Mukupita kwa ndzidzi, ndatonga kutsalakana ntsisi, basa yakuti ndikhakomerwa nayo pikhali ine kunyumba. Natenepa, ndacita kursu ya nthanda zitanthatu mbanditoma kuphata basa kawiri pa sumana mu salão yakutsalakana tsisi. Pontho ndikhapfundzisa anthu pya kutsalakana tsisi kawiri pa nthanda. Natenepa, ndakwanisa kutsalakana umaso wanga m’basa ya ndzidzi onsene.

Mu caka 1955, ndikhafuna kugumanika pa nsonkhano wa cisa wa nsolo wakuti: “Reino Triunfante,” ku Nova York, E.U.A., na ku Nuremberg, Alemanya. Mbwenye mbandidzati kuenda ku Nova York, ndaonana na M’bale Nathan Knorr wa ku ofesi ikulu ya dziko yonsene. Iye na nkazace akhali pa nsonkhano wa gawo ku Vancouver, Kanada. Nkati mwa kucedzera kwawo, ndaphembwa toera kutsalakana tsisi ya nkazi M’bale Knorr. M’bale Knorr akomerwa kakamwe mbafuna kundidziwa. Pikhacedza ife, ndalonga kuti ndisafuna kuenda ku Nova York, mbandidzati kuenda ku Alemanya. Iye andiphemba toera kuphata basa mu ntsiku zipfemba ku Beteli ya ku Brooklyn.

Ulendo unoyu wacinja umaso wanga. Ku Nova York ndaonana na m’bale waciphale akhacemerwa Theodore (Ted) Jaracz. Pidapita ntsiku zingasi pakumala kudziwana na iye, ndadzumatirwa pidandibvundza iye kuti: “Ndimwe mpainiya?” Ine ndatawira: “Nkhabe.” Xamwali wanga LaVonne pidabva iye ntawiro wanga alonga: “Inde, iye ndi mpainiya!” Mwakufuna kudziwa, Ted abvundza LaVonne: “Mphapo, mbani anadziwa mwadidi, ndimwe peno iye?” Ndafokotoza kuti ndikhali mpainiya, mbwenye ndikunyerezera kutoma pontho ndingabwerera ku misonkhano ya gawo.

MAMUNA WAUZIMU ADAMANGA NA INE BANJA

Ted abalwa mu caka 1925 ku Kentucky, E.U.A., mbabatizwa pikhali iye na pyaka 15 pyakubalwa. Maseze nee m’bodzi wa banja yawo atawira undimomwene, iye adzakhala mpainiya pidapita pyaka piwiri pakumala kubatizwa. Natenepa, iye atoma basa yace ya ndzidzi onsene idacita iye mu pyaka cifupi na 67.

Mu nthanda ya Maluwa ya caka 1946, Ted agumanika pa kalasi yacinomwe ya Escola Bíblica de Gileade da Torre de Vigia pikhali iye na 20 pyakubalwa. Buluka penepo, iye atumikira ninga muyang’aniri wa cisa ku Cleveland, Ohio. Pakupita pyaka pinai, iye asankhulwa toera kutumikira ninga muimiriri wa filiali ya ku Australya.

Ted akhali pa nsonkhano wa gawo ku Nuremberg, Alemanya, kweneku tamala ndzidzi ungasi pabodzi mbatitoma kufunana. Ndakomerwa kudziwa kuti pifuno pyace pikhali kutumikira Yahova na ntima onsene. Iye akhawangisira kakamwe na akhapasa ntengo basa yace yakutumikira Mulungu, pontho akhali wadidi na wauxamwali. Buluka penepo ndadzindikira kuti akhaikha pifuno pya anango pa mbuto yakutoma. Pidamala nsonkhano unoyu, Ted abwerera ku Australya, ine ndabwerera ku Vancouver, mbwenye tapitiriza kucedza mukuphatisira matsamba.

Pidamala iye pyaka pixanu ku Australya, Ted abwerera ku Estados Unidos, buluka penepo aenda katumikira ninga mpainiya ku Vancouver. Ndikhakomerwa kakamwe kuona kuti anthu a pabanja yathu akhanfuna kakamwe. M’bale wanga wankulu, Michael, akhanditsidzikiza kakamwe, iye akhadzudzumika kakamwe munthu angapangiza cifuno kuna ine. Mbwenye mwakukhonda dembuka akomerwa na Ted. Iye alonga: “Melita, iye ndi mphale wadidi. Mphyadidi kumphata na manja mawiri toera ukhonde kumuluza.”

Ted adzakhala munthu wakufunika kakamwe kwa ine. Ife tamanga banja pa ntsiku 10 ya nthanda ya Maindza ya caka 1956. Tatumikira pabodzi ninga apainiya ku Vancouver na ku California buluka penepo Ted asankhulwa toera kutumikira ninga muyang’aniri wa cisa ku Missouri na ku Arkansas. Mu pyaka 18, tacita maulendo m’mbuto zizinji za ku Estados Unidos mbaticedzera mipingo, pontho tikhacinja nyumba masumana onsene. Takhala na pyakugumana napyo pyakutsandzayisa kakamwe mu utumiki, na axamwali adidi kakamwe pakati pa abale na alongo. Pyenepi pyatiphedza toera kukhonda nyerezera nkandzo wakucita ulendo ndzidzi onsene.

Cinthu cikhakomerwa na ine kuna Ted ndi cakuti iye akhaona uxamwali wace na Yahova kukhala wakufunika kakamwe. Pontho iye akhapasa ntengo kakamwe basa yace yakutumikira Munthu wakufunika kakamwe Wakudzulu na Pantsi. Tikhakomerwa kakamwe kupfundza na kuleri Bhibhlya pabodzi! Camasiku mbatidzati kugona, tikhagodama cifupi na talimba, iye mbaticitira phembero. Buluka penepo, m’bodzi na m’bodzi akhacita phembero yace. Ndzidzi onsene ndikhadziwa kuti Ted angadzudzumika na cinthu, iye akhabuluka patalimba, mbagodama pontho toera kucita phembero yakulapha mwaciwerewere. Natenepa, kucita kwace phembero thangwi ya pinthu pikulu peno ping’ono kukhandikhuya kakamwe.

Pyaka pingasi pidamala ife kumanga banja, Ted andipanga kuti mbadatoma kudya pidzindikiro pa Cikumbuso. Iye alonga: “Ndaphembera kakamwe thangwi ya pyenepi toera ndikhale na cinyindiro cakukwana cakuti ndikucita pinafuna Yahova.” Mwandimomwene, iye akhadadzodzwa na nzimu wa Mulungu toera kutumikira kudzulu, pyenepi nee pyandidzumatisira, pontho ndaona ninga mwai kuphedzera m’bodzi wa abale a Kristu.​—Mat. 25:35-40.

MWAI UPSWA WA BASA YAKUCENA

Mwakukhonda dikhira, mu caka 1974, Ted acemerwa toera kutumikira ninga m’bodzi wa Mathubo Akutonga a Mboni za Yahova. Mukupita kwa ndzidzi tacemerwa toera kuenda katumikira ku Beteli ya Brooklyn. Pikhatumikira Ted ninga m’bodzi wa Mathubo Akutonga, ine ndikhacita basa yakucenesa peno kuphata basa mu salão yakutsalakana tsisi.

Mabasa a Ted akhaphataniza kucedzera mafiliali mazinji. Iye akhadzudzumika kakamwe na basa yakumwaza mphangwa m’madziko akuti basa yathu ikhakhondeswa. Ntsiku inango, nkati mwa maferya athu ku Suécia, Ted alonga: “Melita basa yakumwaza mphangwa yakhondeswa ku Poloniya, ndisafuna kakamwe kuphedza abale kweneku.” Natenepa, tasasanyisa maphaso mbatienda ku Poloniya. Ted aonana na abale anango akhaonera basa kweneku, iwo aenda kacedza kutali kakamwe toera makani awo akhonde kubviwa na anango. Iwo acedza kakamwe mu ntsiku zinai, mbwenye ndikhakomerwa maningi kuona kuti Ted akhatsandzaya kakamwe mu kuphedza abale na alongo.

Buluka penepo, mu nthanda ya Bingu ya caka 1977 taenda pontho ku Poloniya. Frederick Franz, Daniel Sydlik na Ted akhali abale akutoma a Mathubo Akutonga adacedzera dziko ineyi. Basa yathu ikhapitiriza kukhondeswa, mbwenye abale anewa atatu a Mathubo Akutonga akwanisa kucedza na ayang’aniri a cisa, apainiya na abale akuti akhali na pyaka pizinji mu gulu m’mizinda yakusiyana-siyana.

Mu caka cidatowerera, Milton Henschel na Ted pidaenda iwo kacedzera Poloniya, agumanyikana na atongi akuti nee akhaipirwa na basa yathu. Mu caka 1982, utongi wa ku Poloniya watawirisa abale athu kucita misonkhano ya cisa ya ntsiku ibodzi. Mu caka 1983, yacitwa misonkhano mikulu, mizinji yacitwa m’mbuto zakulugariwi. Maseze basa yathu ikhapitiriza kukhondeswa, mu caka 1985 tatawiriswa toera kucita misonkhano ya gawo minai m’mbuto zikulu zinamyerwa mpira. Mu caka 1989, mu ndzidzi ukhacitwa masasanyiro a misonkhano mikulu kakamwe, utongi wa Poloniya wadziwisa pakweca ufulu wa Mboni za Yahova. Pyenepi pyatsandzayisa kakamwe Ted.

KUTHIMBANA NA NYATWA YA UNGUMI

Mu caka 2007 tikhaenda ku Afrika Wakubangwe toera kugumanika pa kuperekwa kwa filiali kuna Yahova, mbwenye talimira ku Inglatera. Kweneku Ted aphatwa na utenda wa pressão alta, dotoro ampanga kuti nee akhafunika kupitiriza kucita ulendo. Pidacita iye mbwenye, tabwerera ku Estados Unidos. Mbwenye pidapita masumana akucepa, utenda wadzatekera mbucitisa khundu yace ya madyo kukhonda kuphata basa.

Ted nee acita mbwenye mwakucimbiza, pakutoma iye nee akhakwanisa kuenda mu ofesi yace. Tisapereka takhuta thangwi iye akhakwanisa kulonga mwadidi. Mwakukhonda tsalakana mipingizo ineyi, iye ayesera kupitiriza kucita pinthu pikhacita iye, na nkwartu mwathu iye akhakwanisa kucita khundu pa misonkhano ya Mathubo Akutonga ya pa sumana.

Ted apereka takhuta kakamwe thangwi ya kukondzwa kudacitwa iye pa Beteli. Mwapang’ono-pang’ono makhundu mazinji a manungo ace atoma pontho kuphata basa. Iye akhakwanisa kucita mabasa ace anango Acikristu, pontho ndzidzi onsene akhali munthu wakutsandzaya.

Pidapita pyaka pitatu, utenda wace wadzatekera kakamwe mbasoweka n’Citatu, ntsiku 9 ya Khoni ya caka 2010. Maseze ndikhadziwa kuti Ted mbadamalisa umaso wace pa dziko yapantsi, ine nkhabe kwanisa kufokotoza kubva kupha kudakhala na ine; kusoweka kwace kusapitiriza kundikhuya. Ngakhale tenepo, ntsiku zonsene ndisapereka takhuta kuna Yahova na pyonsene pidacita ine toera kuphedza Ted. Tatumikira pabodzi m’basa ya ndzidzi onsene mu pyaka 53. Ndisapereka takhuta kuna Yahova thangwi yakundiphedza kudacita Ted toera ndikhale na uxamwali wakuwanga na Baba wanga wakudzulu. Lero, ndiri na cinyindiro cakuti iye ali wakukomerwa kakamwe na basa yace ipswa.

KUTHIMBANA NA PINENTSO PINANGO MU UMASO

Pakumala pyaka pizinji m’basa yakutsandzayisa pabodzi na mamunanga, pisanentsa kudzolowera pinentso pipswa pinathimbana na ine. Ine na Ted tikhakomerwa kakamwe kudziwa anthu akhabwera kaona Beteli na pa Nyumba yathu ya Umambo. Lero nakuti mamunanga wakufunika nee ali na ine, pontho ine nee ndiri na mphambvu ninga kale, nee ndisakwanisa kuonana kakamwe na anthu. Mbwenye ndisapitiriza kufuna kakamwe kukhala pabodzi na abale na alongo pa Beteli na ku mpingo. Basa ya ntsiku na ntsiku pa Beteli ndi yakunentsa pang’ono, mbwenye ndisakomerwa kakamwe na kutumikira Mulungu pano. Ufuni wanga m’basa yakumwaza mphangwa usapitiriza kukhala wakuwanga kakamwe ninga kale. Maseze ndisaneta mwakucimbiza, pontho nkhabe kwanisa kukhala dzololo mu ndzidzi uzinji, mphyakutsandzayisa kakamwe kumwaza mphangwa m’miseu na kucitisa mapfundziro a Bhibhlya.

Ndingaona pinthu pizinji pyakuipa pinacitika mu dziko, ndisakomerwa kakamwe thangwi ya kutumikira Yahova na mamuna wadidi kakamwe! Mwandimomwene, nkhombo za Yahova zaphindulisa umaso wanga.​—Mis. 10:22.

[Cidzindikiro capantsi]