Pantsi pa utongi wa Mulungu, pyonsene pidacita iye pikhali pyakubverana na pya ntendere
Thangwi Yanji Tisafuna Umambo wa Mulungu
Kutomera mu ndzidzi udacitwa anthu, Nciti wathu wakuti dzina yace ndi Yahova, ndiye basi Ntongi. Iye asatonga mwaufuni. Iye acita mudzi wakubalika wakuti ndi munda wa Edheni toera anthu akhalemo. Pontho iye aapasa pyakudya pizinji. Kusiyapo pyenepi, iye apasa anthu basa yadidi kakamwe toera kucita. (Genesi 1:28, 29; 2:8, 15) Mbidakhala kuti iwo atawirisa kuti utongi waufuni wa Mulungu, uatsogolere mbadatsandzaya mu ntendere.
Adhamu na Eva akhonda Mulungu ninga Ntongi wawo
Bhibhlya isalonga kuti anju wakukhonda kubvera, wakuti adzacemerwa Sathani Dyabo, apokanya kuthema kwa Mulungu ninga ntongi. Iye alonga kuti anthu anakwanisa kukhala akutsandzaya angakhonda kutsogolerwa peno kutongwa na Mulungu. Mwakutsukwalisa, anyakubalathu akutoma, Adhamu na Eva, atowezera citsandzo ca Sathani, mbakhonda kubvera Mulungu.—Genesi 3:1-6; Apokalipse 12:9.
Nakuti Adhamu na Eva akhonda kubvera Mulungu ninga Ntongi wawo, iwo aluza mudzi wawo wa Paraizu, pontho aluza cidikhiro cakukhala na ungumi wadidi kwenda na kwenda. (Genesi 3:17-19) Cisankhulo cawo cakhuyambo anawo. Bhibhlya isalonga kuti thangwi yakudawa kwa Adhamu, ‘madawo apita pantsi pano thangwi ya munthu m’bodzi basi, mbakupitambo kufa thangwi ya madawo.’(Aroma 5:12) Madawo abweresambo nyatwa inango kuna anthu: ‘Munthu asaponderera munthu ndzace mpaka kunfudza. (Koelete 8:9) M’mafala anango, anthu pidatoma iwo kutongeka okhene abweresa nyatwa zizinji.
KUTOMA KWA UTONGI WA ANTHU
Nimirodhi apandukira utongi wa Yahova
Munthu adatoma kutonga analongwa m’Bhibhlya ndi Nimirodhi. Iye apandukira utongi wa Yahova. Kutomera mu ntsiku za Nimirodhi, anthu asaphatisira utongi wawo munjira yakuipa. Mu pyaka 3.000 nduli, Mambo Salomoni alemba: ‘Penepo ulipo n’khuwo wa anyakubvuyiwa, nee munthu wakuabalangaza; anyakuponderera ali na mphambvu.’—Koelete 4:1.
Lero tikuthimbana na makhaliro mabodzi ene. Mu caka 2009, bukhu ya Nações Unidas yalonga: “Pisaoneka pakweca kuti nyatwa zizinji ziri pa dziko zisaoneka thangwi ya atongi akuipa.”
NDZIDZI TOERA UMAMBO WA MULUNGU UCITE PINTHU!
Anthu asafuna atongi adidi akuti anatonga munjira yadidi. Pyenepi ndi pidapikira Nciti wathu!
Ngakhale mautongi adidi asacimwana kumalisa nyatwa za anthu
Mulungu akhazikisa Umambo peno utongi wakuti unadzafudza mautongi onsene a anthu, ‘iwo unadzakhala kwenda na kwenda.’ (Danyele 2:44) Unoyu ndi Umambo unaphemba anthu azinji. (Mateu 6:9, 10) Mu utongi unoyu Mulungu nee anadzatonga ekhene. Mbwenye Iye asankhula munthu toera kukhala Ntongi. Mbani adasankhulwa?