Mbani Mambo wa Umambo wa Mulungu?

• Wakusankhulwa na Mulungu. ‘Ndakhazikisa mambo wanga, ine ndinadzampasa madzindza ninga unthaka wace, pontho ndinadzampasa dziko yonsene toera ikhale yace.’​—Masalmo 2:6, 8.

• Wa dzindza ya Mambo Dhavidhi. ‘Tabalirwa mwana, mwana wamamuna tampaswa. Utongi wace na ntendere wace nee pinadzamala. Anapita pa mbuto ya Dhavidhi mbakhala mambo ninga iye kwenda na kwenda.’​—Izaiya 9:6, 7.

• Wakubalwa ku Bhetelehemu. ‘Iwe, Bhetelehemu, mwa iwe munadzabuluka ule anadzatonga, mbumba zonsene za pa dziko yapantsi zinadzakupasa mbiri.’​—Mikeya 5:2, 4.

• Wakukhondwa na anthu mbaphiwa. ‘Iye apwazwa, mbatimuona ninga munthu wakusowa basa, akhalaswa thangwi ya madawo athu, akhamenywa thangwi ya pyakuipa pikhacita ife.’​—Izaiya 53:3, 5.

• Wakulamuswa muli akufa mbapaswa mbiri. ‘Imwe nee munadzandisiya Munthumbi. Imwe nee munadzatawirisa kuti ntumiki wanu wakukhulupirika aone djenje, ule ali kunkono wanu wamadyo asakhala wakutsandzaya kwenda na kwenda.’​—Masalmo 16:10, 11.

Yezu Kristu ndi ntongi wakuthema

Mu mbiri yonsene ya anthu, basi ene munthu wakuthema toera kukhala Ntongi wadidi ndi Yezu Kristu. Mwandimomwene, anju m’bodzi apanga Mariya, mai wace Yezu: “Mulungu anadzampasa mpando wa umambo wa babace, Dhavidhi, . . . pontho Umambo wace nkhabe kudzamala.”​—Luka 1:31-33.

Yezu cipo akhala ntongi pa dziko yapantsi. Natenepa iye anadzatonga anthu kubulukira kudzulu ninga Mambo wa Umambo wa Mulungu. Thangwi yanji Yezu ndi Ntongi wakuthema? Onani pinthu pidacita Yezu mu ndzidzi ukhali iye pa dziko yapantsi.

• Yezu akhatsalakana anthu. Yezu aphedza amuna, akazi, aphale na atsikana na anyakugwesera mwakukhonda tsalakana makhaliro awo. (Mateu 9:36; Marko 10:16) Pidalonga nyamatanya kuti: “Imwe mungafuna, munakwanisa kundiwangisa,” Yezu akulumizwa na ntsisi mbamuwangisa.​—Marko 1:40-42.

• Mwaudziwisi Yezu atipfundzisa kuti tinatsandzayisa tani Mulungu. Iye alonga: “Imwe nee munakwanisa kukhala atumiki a Mulungu na a Mpfuma.” Iye alongambo kuti tisafunika kutsalakana anango ninga munafunira ife kuti anango atitsalakane. Kusiyapo pyenepi, iye apangiza kuti Mulungu nee asatsalakana basi ene pinacita ife, mbwenye asatsalakanambo manyerezero athu na mabvero athu. Natenepa toera kutsandzayisa Mulungu tisafunika kutonga mabvero athu. (Mateu 5:28; 6:24; 7:12) Yezu agomezera kuti toera tikhale akutsandzaya tisafunika kudziwa kuti Mulungu asafuna kuti ticitenji buluka penepo mbatipicita.​—Luka 11:28.

• Yezu apfundzisa kuti pisabvekanji kufuna anango. Mafala a Yezu na pikhacita iye pyakhuya kakamwe mitima ya anyakubveserace. “Mwinji wa anthu wadzumatirwa na njira yace yakupfundzisa, thangwi pikhapfundzisa iye pikhabuluka kuna Mulungu” (Mateu 7:28, 29) Iye aapanga: ‘Funani anyamalwa anu.’ Iye acita phembero ngakhale kuna ale akuti akhaphedzera kuphiwa kwace. Iye alonga: “Baba, alekerereni pyawo, thangwi iwo nkhabe kudziwa pinacita iwo”​—Mateu 5:44; Luka 23:34.

Yezu athema kukhala Ntongi wa anthu. iye asaphedza pontho ndi wakukoma ntima. Mphapo iye anatoma lini kutonga?