Ananu Ali akukhunganyika?
1. Thangwi yanji ndi kwakufunika kwa ana akuti aciri kupfundza akhale akukhunganyika?
1 Pa ndzidzi unabwerera ananu kuxikola pakumala maferya apakati pacaka, mwakukhonda penula ananu anadzathimbana na mikakamizo, pontho na pinentso pipswa. Iwo anadzakhalambo na miyai ipswa yakupereka “umboni wa udidi” peno wa undimomwene. (Jwau 18:37) Iwo ali akukhunganyika?
2. Toera akhale akukhunganyika, ananu asafunika kudziwanji?
2 Ananu asabvesesa mwadidi kuti kusabvekanji kucita khundu m’maserimonya a dziko na mafiriyadu a anthu akukhonda kukhulupira? Asadziwa thangwi yanji ndi kwakuipa kucita khundu? Ali akukhunganyika ku mikakamizo yakuenda ku pipfundziso pyapadzulu, mikakamizo yakubanyirana, yakumwa pyakuledzeresa peno mitombwe yakuledzeresa? Ananu anadzalonga kwene basi kuti mabasa anewa nkhabe kubverana na relijiau yawo, peno anadzafokotoza pikhulupiro pyawo?—1 Ped. 3:15.
3. Anyakubala anaphatisira tani Kulambira kwa Banja namaulo toera kukhunganya anawo?
3 Phatisirani Kulambira Kwa Banja Namaulo: Mwandimomwene munadzafuna kucedza na ananu thangwi ya pinentso pinathimbana na iwo kuxikola. Mungawangisira toera kulonga pinentso pinadzathimbana na ananu kuxikola mbadzati kutoma mapfundziro a kuxikola pinadzapasa cinyindiro ananu. Thangwi yanji nkhabe kuphatisira ntsiku ibodzi peno zizinji za Kulambira kwa Banja namaulo toera kucita pyenepi? Munakwanisa kubvundzisa ananu kuti ndi pinthu pipi pinaapswipisa ntima anganyerezera kuenda kuxikola. Munakwanisa kudinga pontho pinthu pidadinga imwe mu pyaka pidamala thangwi cincino ananu akula, pontho anakwanisa kubvesesa mwadidi. (Sal. 119:95) Munakwanisa kuphataniza makhundu akuyesera akuti imwe munasangizira kukhala mpfundzisi peno nyakupfundza. Pfundzisani ananu kuti anatawira tani mukuphatisira Bhibhlya na mabukhu anango ninga Raciocínios na Os Jovens Perguntam. Mama m’bodzi akhaphatisira makhundu akuyesera toera kukhunganya anace kuti afendedzere apfundzisi awo apswa pakutoma kwa caka cibodzi na cibodzi ca mapfundziro toera kuadziwisa kuti iwo ndi Mboni za Yahova.—Onani A Sentinela ya 15 de Dezembro de 2010, matsamba 3-5.
4. Anyakubala andzeru anadzacitanji?
4 Pinentso pyakuti aphale na atsikana Acikristu anadzathimbana napyo mu ntsiku zino zakumalisa ndi ‘pyakugopswa’ kakamwe. (2 Tim. 3:1) Anyakubala andzeru anadzayesera kukhunganya anawo mbadzati kuthimbana na nyatwa zenezi. (Mis. 22:3) Mbadzati kuenda kuxikola pakumala maferya apakati pacaka, citani pyonsene pinakwanisa imwe toera kuphedza ananu kukhala akukhunganyika.