Azya na Oriente Médio—Mphangwa izi zabuluswa mu Anuário das Testemunhas de Jeová de 2014
Kuphedza Mamuna Wakukhonda Kuona, Wakukhonda Kubva Na Bewewe
Tsamba 59 ndima 1 mpaka tsamba 62 ndima 1
Mu caka 1999, mpingo unango wa cilongero ca manja wa mu nzinda wa Kobe ku Japau, wabva pya mamuna unango wakukhonda kubva anacemerwa Hirofumi. M’bale unango ayesera kuenda kazinji kene kaonana na mamuna unoyu, mbwenye mai wa Hirofumi akhakhondesa. Ntsiku inango m’bale aenda pontho kadembetera mai unoyu, mbwenye pa ulendo unoyu Hirofumi abuluswa nyumba toera aonane na m’bale. Tsisi ya Hirofumi na ndebvu zace pikhadakula kakamwe na tsisi yace nee ikhasapulwa. Makhaliro ace akhapasa ntsisi thangwi akhaoneka ninga munthu wakuti akhakhala nthando kwa pyaka pizinji. Kusiyapo nkandzo wakukhonda kuona iye akhalimbo wakukhonda kubva. M’bale atutumuka kakamwe mudamuona iye, pontho aphata manjace mbayesera kulonga naye mukuphatisira manja. Mbwenye Hirofumi nee acita cinthu. Mu ndzidzi unoyu pakhadapita pyaka 10 Hirofumi mbali wakukhonda kuona. Pyenepi pyacitika mukhali iye na pyaka 31, mbwenye mu pyaka 10 Hirofumi akhafungirwa nyumba yakuti nee akhalonga na munthu.
Pakupita ntsiku ziwiri, m’bale aenda pontho kaonana na Hirofumi. Mai wa Hirofumi adzumatirwa kakamwe, thangwi akhanyerezera kuti m’bale nee mbadabwererabve thangwi yakuona makhaliro a mwanace. M’bale adembetera pontho mai wa Hirofumi toera aonane na Hirofumi, natenepa antawirisa. M’bale aenda kunyumba kwa Hirofumi kwa nthanda yamumphu, mbwenye Hirofumi nee akhapangiza cifuno kwakuti kwacitisa mai wace kupanga m’bale kuti aleke thabuka kubwerera pontho. Mbwenye m’bale nee abwerera nduli. Iye akhakwata mabholo na kucita pinthu pinango pyakupangiza citsalakano kwa iye. Pakupita nthanda zinango ziwiri, Hirofumi nee akhapangiza cifuno mpaka m’bale kunyerezera pyakukhonda kuendako pontho.
M’bale atonga kuenda ulendo wakumalisa. Mbwenye mbadzati kuenda atoma kuphembera kwa Yahova toera adziwe khala asafunika kupitiriza kuenda kunyumba ya Hirofumi. Mudafika m’bale unoyu kunyumba ya Hirofumi aphata pontho manjace mbampanga mu cilongero ca manja kuti Mulungu alipo, dzinace ndi Yahova, wakuti asaona nyatwa zace pontho asatsalakana mabvero ace kupiringana munthu onsene. Ampanga pontho kuti Yahova asanfuna na asafuna kumalisa nyatwa zace. Ndi thangwi yace m’bale afika panyumba pace. Pakutoma Hirofumi nee acita cinthu, mbwenye pidampanga iye pyenepi, Hirofumi aphata mwamphambvu djanja ya m’bale uku misozi ikubuluka m’maso mwace. M’bale akhuiwa kakamwe na pyenepi mbatomambo kulira. Natenepa atoma kupfundza naye Bhibhlya.
Pakupfundza naye Bhibhlya kwa pyaka 11, Hirofumi adzasiya kuenda ku mpingo wa cilongero ca manja wakuti ukhali kutali na kunakhala iye, mbatoma kusonkhana na abale a mpingo wapaduzi. Pakutoma, nee m’bodzi wa m’mpingo unoyu akhadziwa cilongero ca manja, mbwenye pakupita nthanda 18, abale na alongo akukwana 22 apfundza cilongero ca manja toera akwanise kuphedza Hirofumi. Mu nthanda ya Thongwe ya caka 2012, Hirofumi acita nkhani yace yakutoma pa Xikola Ya Utumiki Wa Mulungu, unango mbakathumburuza. Mu nthanda ya Malandalupya ya caka zibodzi cene, iye akhala m’mwazi mphangwa wakukhonda batizwa.
Azya na Oriente Médio
“Ndikhaisaka Mu Pyaka 30!”
Tsamba 67 ndima 2
Agnes, misionaryo wa ku Indoneziya, akhamwazira mphangwa kazinji kene nkazi unango wakuti akhali na mimba. Nkazi unoyu akhagulisa masamba mu nsika wa cisa ceneci, pontho akhakomerwa kakamwe na kuleri marevista athu mbacedza pya Bhibhlya angakhala nee ali na mabasa mazinji. Ntsiku inango, mudaenda Agnes kacedza na nkazi unoyu, nee angumana. Mamunace apanga Agnes kuti nkazace abala na Agnes atonga kuenda kamuona. Iye akwata Bukhu Yanga Ya Mbiri Za Bibilya toera kampasa ninga muoni. Nkazi unoyu akomerwa kakamwe mudaona iye kuti Agnes abwera kudzaona mwanace. Mbwenye akomerwa pontho mudapaswa iye muoni na Agnes. Mudafungula iye muoni adzumatirwa kakamwe thangwi yakuona Bukhu Yanga Ya Mbiri Za Bibilya mbalonga: “Mwaigumana kupi bukhu iyi? Ndikhaisaka mu pyaka 30! Ndaenda mbuto zonsene zinaguliswa mabukhu mbwenye nee ndaigumana. Anthu akhalonga kuti nee asadziwa, pontho cipo aiona. Pa mabukhu onsene adagumana ine, nee pakhali na bukhu yadidi ninga iyi.” Mukhali iye mwana, nkazi unoyu akhakomerwa kakamwe kuleri bukhu Mbiri Za Bibilya yakuti ikhali ya tiu wace. Cincino akuileri pontho pabodzi na mwanace wankulu wakuti asakomerwambo nayo. Natenepa, iye na mwanace atoma kupfundza Bhibhlya.