“Phatisirani kabukhu ‘Mafala Akutoma a Bhibhlya’—Toera Kutomesa Makani.”
1. Ndi feramentu ipi ipswa idatambira ife toera kuiphatisira mu utumiki?
1 Kabukhu “Mafala Akutoma a Bhibhlya“ kali na mphangwa zakuti zisagumanika kukhundu yakutoma ya Tradução do Novo Mundo yakusasanyirwa papswa. Tinaphatisira tani feramentu ineyi ipswa munakhunganyika ife maperekero aumboni mu utumiki? Nakuti khundu ineyi iri na malemba mazinji toera kudinga ntsonga zakusiyana-siyana za Bhibhlya, ninga pinacitwa na bukhu Raciocínios, inakhala yakuphedza kakamwe toera kutomesa makani.
2. Tinaphatisira tani “Mafala Akutoma a Bhibhlya” mu utumiki?
2 Munakwanisa kuphatisira mbvundzo 8 mbamulonga: “Tikucedza mwacigwagwa na anyakuendekana athu thangwi anthu azinji asabvundzika, ‘Kodi ndi Mulungu anacitisa nyatwa zinatamba anthu?’ [Mu pisa pinango, pisakhala pyakuphedza kakamwe kupangiza mbvundzo mwanaciro nyumba.] Ndi api maonero anu? [Dikhirani ntawiro.] Bhibhlya isapereka ntawiro wakutsandzayisa wa mbvundzo unoyu.” Lerini na fokotozani lemba ibodzi peno mangasi anagumanika pa mbvundzo unoyu m’Bhibhlya. Mwanaciro nyumba angapangiza cifuno, munakwanisa kumpangiza mibvundzo 20 inagumanika mwenemu na kumphemba kuti asankhule ubodzi toera kuudinga pa ulendo unango. Peno munakwanisa kumpasa ibodzi mwa mabukhu athu a pfundziro yakuti iri na mphangwa zizinji za mbvundzo unoyu.
3. Tinaphatisira tani “Mafala Akutoma a Bhibhlya” toera kutomesa makani mu pisa pyakuti anthu ali na uphemberi wakukhonda khala Wacikristu?
3 Mbvundzo 4 na 13 mpaka 17 inaphedza kakamwe munamwaza ife mphangwa mu pisa pyakuti anthu ali na uphemberi wakukhonda khala Wacikristu. Mwacitsandzo, munakwanisa kuphatisira mphangwa za mbvundzo 17 mbamulonga: “Tikucedza mwacigwagwa na mabanja. Kodi musatawira kuti mabanja asathimbana na nyatwa zizinji lero? [Dikhirani ntawiro.] Anyakumanga mabanja azinji asaona mafala awa kukhala akuphedza kakamwe: ‘Nkazi asafunika kulemedza kakamwe mamunace.’ [Nkhabe funika kulonga kuti mafala anewa asagumanika pa Aefesi 5:33. Khala mukulonga na nkazi, tcululani mafala anagumanika pa Aefesi 5:28.] Kodi musanyerezera kuti kuphatisira uphungu unoyu kunaphedza m’banja?”
4. Kodi munacitanji pakumala kucedza na munthu wakuti ali mu uphemberi wakukhonda khala Wacikristu?
4 Pakumala kucedza, citani masasanyiro toera mudzapitirize na makani pa ulendo unango. Panango munadzacedza thangwi ya lemba ibodzi mwa malemba anagumanika pa mbvundzo udadinga imwe. Pa ndzidzi wakuthema, dziwisani mwanaciro nyumba kuti mafala adidi akhalonga imwe ndi a m’Bhibhlya. Mwakubverana na pikhacedza imwe m’maulendo a nduli pontho kuti munthu unoyu asaona tani Bhibhlya, mpaseni bukhu yakuti anakomerwa nayo.—Onani n’thimiziro wa Utumiki Wathu wa Umambo wa Maindza wa 2013.