Kodi Mulungu Asabvesera Maphembero Anu?

BHIBHLYA ISALONGANJI?

• Mulungu asakubveserani mungacita phembero. Bhibhlya isalonga kuti “Yahova ali dhuzi na onsene anancemera, Onsene anancemera mwakubverana na undimomwene. . . . Iye asabva nʼkhuwo wawo wakuphemba ciphedzo.”—Masalmo 145:18, 19.

• Mulungu asafuna kuti mucite phembero kuna iye. Bhibhlya isatikulumiza toera ticite phembero. Iyo isalonga: “Dziwisani Mulungu maphembo anu kubulukira mu kucita phembero, kudembetera na kupereka takhuta.” —Afilipi 4:6.

• Mwandimomwene Mulungu asakutsalakanani. Mulungu asadziwa mwadidi nyatwa zathu na pinatidzudzumisa, pontho iye asafuna kutiphedza. Bhibhlya isalonga: “Mu ndzidzi unapereka imwe kuna iye pinthu pyonsene pinakudzudzumisani, thangwi iye asakutsalakanani.”—1 Pedhru 5:7.