BHIBHLIYOTEKA MU INTERNETI ya Torre de Vigia
Ncenjezi
ya Torre de Vigia
Cisena
  • BHIBHLYA
  • MABUKHU
  • MISONKHANO
  • w22 Julho ya matsa. 26-30
  • Ndatawirisa Yahova Kutsogolera Umaso Wanga

Nkhabe kugumanika vidhyu pa khundu ino.

Munatilekerera, paoneka madodo pakupangiza vidhyu.

  • Ndatawirisa Yahova Kutsogolera Umaso Wanga
  • Ncenjezi Wakudziwisa Umambo Wa Yahova (Wa Pfundziro)—2022
  • Misolo Ming'ono
  • Mphangwa Zakulandana
  • BULUKA KU INGLATERA KUENDA KU AFRIKA
  • KUTUMIKIRA KU MALAWI MU NDZIDZI WAKUNENTSA
  • IFE TIKHAKHALA ZIMBABWE, MBWENYE TIKHATUMIKIRA KU MALAWI
  • KUBWERERA KU MALAWI
  • YAHOVA NDIYE ANAKULISA
  • NDIRI WAKUTSANDZAYA NA PISANKHULO PIDACITA INE
  • Nkhombo “M’midzidzi Yadidi Na M’midzidzi Ya Yakunentsa”
    Ncenjezi Wakudziwisa Umambo Wa Yahova (Wa Pfundziro)—2015
Ncenjezi Wakudziwisa Umambo Wa Yahova (Wa Pfundziro)—2022
w22 Julho ya matsa. 26-30

MBIRI YA UMASO

Ndatawirisa Yahova Kutsogolera Umaso Wanga

YAKULONGWA NA KEITH EATON

M’bale Keith Eaton pikhali iye m’phale.

PIKHALI ine m’phale, ndasankhula kucita basa yakudziko yakuti ndikhakomerwa nayo kakamwe. Mbwenye Yahova andipasa basa inango yakusiyana na ineyi, pontho pikhali ninga andipanga: ‘Ndinadzakupasa udziwisi mbandikupfundzisa njira inafunika iwe kufamba.’ (Masal. 32:8) Nakuti ndatawirisa Yahova kutsogolera umaso wanga, ine ndakwanisa kuphatisira umaso wanga m’basa yace mbandikhala na nkhombo zizinji kuphatanizambo kutumikira ku Afrika pyaka 52.

BULUKA KU INGLATERA KUENDA KU AFRIKA

Ndabalwa mu caka ca 1935 ku Darlaston, mbuto inacemerwa Black Country (Dziko Yakupswipa), ku Inglatera. Mbuto ineyi yapaswa dzina ineyi thangwi ya utci wakupswipa ukhabuluka m’mafabirika. Pikhali ine na pyaka pinai pyakubalwa, anyakubala anga atoma kupfundza Bhibhlya na Mboni za Yahova. Mu ndzidzi ukhali ine m’phale, ine ndakhala na cinyindiro cakuti Mboni za Yahova zisapfundzisa undimomwene mbandibatizwa mu caka ca 1952, pikhali ine na pyaka 16 pyakubalwa.

Mu ndzidzi unoyu, ine ndatoma kuphata basa pa empreza ikulu yakucita mafaramentu akuphata nawo basa na mafaramentu a makaru. Natenepa ine ndatoma kupfundziswa toera kuphata basa ninga mulembi wa pa empreza ineyi, pontho basa ineyi ikhandikomera kakamwe.

Ndikhafunika kunyerezera mwadidi toera kucita cisankhulo cadidi pidapangwa ine na muyang’aniri wa cisa toera kutsogolera Pfundziro ya Bukhu ya Mpingo pa mpingo wathu wa Willenhall. Mbwenye pikhali pyakunentsa kuna ine kucita cisankhulo thangwi mu ndzidzi unoyu ndikhasonkhana m’mipingo miwiri. Pakati pa sumana, ine ndikhasonkhana na mpingo ukhali cifupi na mbuto ikhaphata ine basa ku Bromsgrove, nsindzo wa makilometru 32 bulukira pa nyumba pakakhala ine. Mbwenye pakumala kwa sumana, ine ndikhaenda kunyumba kwa anyakubala anga mbandisonkhana mu mpingo wa Willenhall.

Nakuti ndikhafuna kuphedzera gulu ya Yahova, ine ndatawira basa idandipasa muyang’aniri wa cisa maseze pyenepi mbapidandicitisa kusiya basa ikhapfundza ine yakuti ndikhakomerwa nayo kakamwe. Ine nee ndisasandikika thangwi yakutawirisa Yahova kutsogolera umaso wanga, pontho pyenepi pyandicitisa kukhala na umaso wakutsandzaya kakamwe.

Mu ndzidzi ukhasonkhana ine mu Mpingo wa Bromsgrove, ndadziwana na mulongo wakubalika kakamwe, wakuti akhali na uxamwali wakuwanga na Yahova anacemerwa Anne. Ife tamanga banja mu caka ca 1957, mbatitumikira pabodzi ninga apainiya a ndzidzi onsene, apainiya akupambulika, ninga muyang’aniri wa cisa, pontho tatumikira pa Bheteli. Anne ndzidzi onsene asandiphedza toera kukhala na umaso wakutsandzaya.

Mu caka ca 1966, ife tatsandzaya kakamwe thangwi ya kukurusari xikola ya Jiliyadhi turma 42. Buluka penepo ife tapangwa toera kuenda katumikira ku Malawi, dziko yakuti anthu ace asadziwika ninga akukoma ntima na akutambira alendo. Mbwenye nee tikhadziwa kuti nee mbatidakhala ndzidzi uzinji n’dziko ineyi.

KUTUMIKIRA KU MALAWI MU NDZIDZI WAKUNENTSA

Karu ikhaphatisira ife mu ndzidzi ukhacedzera ife mipingo ku Malawi

Ife tafika ku Malawi pa ntsiku 1 ya Fevereiro ya caka ca 1967. Mwezi wakutoma ife tapfundza cilongero ca dziko ineyi, buluka penepo ndatoma kutumikira ninga muyang’aniri wa gawo. Ife tikhali na karu ikhacemerwa Jeep, pontho anthu akhanyerezera kuti mbidafamba m’mbuto zonsene ngakhale m’madzi. Mbwenye unoyu nee ukhali undimomwene, thangwi ife mbatidakwanisa kufamba na karu ineyi basi ene m’mbuto zakuti nee zikhali na madzi mazinji. Midzidzi inango ife tikakhala n’nyumba zakuphimbirwa na maudzu, zakuti zikhafunika kuikhwa lona padzulu m’midzidzi yakubvumba madzi. Tatoma basa yathu ya umisionaryo munjira yakunentsa kakamwe, mbwenye tikhakomerwa na basa ineyi.

Mwezi wa Abril, ine ndadzindikira kuti mwakukhonda dembuka mbatidatcingwa na mautongi. Thangwi ndabva mu radyo mafala akhalonga prezidhenti wa dziko ya Malawi akhacemerwa Dr. Hastings Banda. Iye akhalonga kuti Mboni za Yahova nee zisalipa misonkho, pontho zisadzudzumisa pinthu pya ndale. Unoyu nee ukhali undimomwene. Iye akhalonga pyenepi thangwi ife nee tikhacita khundu mu ndale za dziko, pontho tikhakhonda kugula kartau ya partido.

Mwezi wa Setembro, ife taleri tsamba ya mphangwa ikhalonga kuti prezidhenti alonga kuti abale akhacitisa uviyaviya mbuto zonsene. Pa nsonkhano unango wa ndale, iye adziwisa kuti utongi wace ukhafunika kucita pinthu mwakucimbiza toera kukhondesa basa ya Mboni za Yahova. Natenepa iwo akhondesa basa yathu kutomera pa ntsiku 20 ya Outubro ya caka ca 1967. Mwakukhonda dembuka, apolixa na ale anayang’anira anthu anabuluka m’madziko anango aenda kafunga Bheteli mbabulusa amisionaryo mu dziko ineyi.

Mu ndzidzi ukhathamangiswa ife ku Malawi mu caka ca 1967, pabodzi na amisionaryo anango akhacemerwa Jack na Linda Johansson

Pidamala ife ntsiku zitatu nkaidi, takwatwa mbatiendeswa ku dziko ya Maurícias, yakuti ikhatongwa na Bhritanya. Mbwenye mautongi a dziko ya Maurícias nee atitawirisa toera tikhale kweneko ninga amisionaryo. Natenepa tapangwa toera tiende katumikira ku Rhodesia (cincino dziko ineyi isacemerwa Zimbabwe). Pidafika ife kweneko, m’bodzi wa ale anayang’anira anthu anabuluka m’madziko anango atikhondesa kupita mu dziko ineyi mbalonga: “Imwe mwakhondeswa kukhala mu dziko ya Malawi. Pontho mwakondeswa kukhala ku dziko ya Maurícias, natenepa cincino musafuna kukhala kuno?” Anne atoma kulira. Pikhaoneka ninga ife tikhakhondiwa m’madziko onsene! Ndzidzi unoyu ine ndanyerezera kubwerera ku dziko kwathu ku Inglatera. Buluka penepo, iwo atipanga toera tiende kagone ku Bheteli, mbwenye m’mangwana mwace tiende ku ofesi yawo ikulu. Ife tikhadaneta kakamwe, mbwenye tapitiriza kusiya pinthu pyonsene m’manja mwa Yahova. M’mangwana mwace namaulo, mwakukhonda dikhira ife tatawiriswa toera kukhala mu dziko ya Zimbabwe ninga alendo. Ine nee ndinaduwala mabvero adakhala na ine ntsiku ineyi, pontho pyenepi pyatipasa cinyindiro cakuti Yahova akhatitsogolera.

IFE TIKHAKHALA ZIMBABWE, MBWENYE TIKHATUMIKIRA KU MALAWI

M’bale Keith na Anne ali kuphata basa pabodzi mu ofesi.

Ine na Anne ku Bheteli ya ku Zimbabwe, mu caka ca 1968

Ku Bheteli ya Zimbabwe, ine ndikhatumikira mu Departamentu ya Basa, pontho ndikhaphedzera abale a ku Malawi na a ku Mosambiki. Abale a ku Malawi akhatcingwa kakamwe. Basa yanga ikhaphataniza kuthumburuza matsamba akhatumizwa na ayang’aniri a cisa a ku Malawi. Ntsiku inango namaulo, pidamalisa ine kuthumburuza tsamba, ine ndalira pidaleri ine pya kutcingwa kwa abale na alongo.a Mbwenye ine ndawangiswambo kakamwe thangwi ya kukhulupirika kwawo na kupirira kwawo.—2 Akor. 6:4, 5.

Ife tikhacita pyonsene pikhakwanisa ife toera kupereka cakudya cauzimu kuna abale na alongo adasalikira ku Malawi na ale adathawira ku Mosambiki thangwi ya kutcingwa. Nsoka wa athumburuzi a Chichewa, cilongero cakuti cisalongwa na anthu azinji kakamwe mu dziko ya Malawi, afuluka mbaenda ku nyumba ya m’bale unango ku Zimbabwe. M’bale unoyu aamangira nyumba na ofesi. Natenepa iwo apitiriza kuphata basa yawo yakuthumburuza mabukhu.

Ife tacita masasanyiro toera pyaka pyonsene ayang’aniri a cisa a ku Malawi, agumanike pa nsonkhano wa gawo wa Chichewa ku Zimbabwe. Pa nsonkhano unoyu, iwo akhapaswa nkhani za nsonkhano wa gawo. Angabwerera ku Malawi, iwo akhawangisira toera kupasa abale nkhani zenezi. Caka cinango pidabwera iwo ku Zimbabwe, ife tacita masasanyiro akukhunganya Xikola ya Utumiki wa Umambo toera kuwangisa ayang’aniri a cisa anewa acipapo.

Ndiri kucita nkhani ya Chichewa ku Zimbabwe pa nsonkhano wa gawo wa Chichewa na Cixona

Mwezi wa Fevereiro wa caka ca 1975, ine ndaenda kaona abale na alongo ku Mosambiki adathawa ku Malawi. Abale anewa akhatowezera pitsogolero pipswa pya gulu ya Yahova, kuphatanizambo masasanyiro mapswa akukhala na nsoka wa akulu a mpingo. Akulu a mpingo apswa akhacita mabasa mazinji, kuphatanizambo kucita nkhani za pakweca, kutsogolera lemba ya ntsiku, kucitisa pfundziro ya Ncenjezi na kucita nkhani pa misonkhano ya cisa. Abale akhadakhunganya mbuto ikhakhala iwo ninga ali pa nsonkhano wa gawo, thangwi pakhali na departamentu ya unyai, departamentu yakugawira pyakudya na departamentu yacitsidzikizo. Abale anewa akukhulupirika acita pinthu pizinji na ciphedzo ca Yahova, pontho pyenepi pyandiwangisa kakamwe.

Kunkhomo kwa caka ca 1970, Bheteli ya Zambiya yatoma kuyang’anira basa ya Mboni za Yahova ku Malawi. Ngakhale tenepo, ine ndikhapitiriza kunyerezera abale na alongo anewa a ku Malawi na kucita phembero thangwi ya iwo, ninga pikhacitambo anango azinji. Nakuti ine ndikhatumikira ninga m’bodzi wa Komiti ya Filiali ya ku Zimbabwe, kazinji kene ndikhacita nsonkhano na aimiriri a ofesi ikulu ya Mboni za Yahova pabodzi na abale a ku Malawi, Afrika do Sul na Zambiya. Kazinji kene ife tikhabvundzika: “Tinacitanji pontho toera kuphedza abale a ku Malawi?”

Mukupita kwa ndzidzi, abale nee akhatcingwabve kakamwe. Abale akhadathawa n’dziko ya Malawi atoma kubwerera n’dziko mwawo, pontho ale adakhonda kuthawa nee akhatcingwabve ninga pakutoma. Madziko anango a cifupi na Malawi, akhadatoma kutawirisa Mboni za Yahova kumwaza mphangwa na kusonkhana. Dziko ya Mosambiki yacitambo pibodzi pyene mu caka ca 1991. Mbwenye ife tikhabvundzika: ‘Kodi Mboni za Yahova ku Malawi zinatawiriswambo lini?’

KUBWERERA KU MALAWI

Mukupita kwa ndzidzi, ndale za dziko ya Malawi zacinja, pontho mu caka ca 1993, utongi wa dziko ineyi wasiya kutcinga Mboni za Yahova. Mwakukhonda dembuka, ine ndikhacedza na misionaryo m’bodzi mbandibvundza: “Iwe unabwerera ku Malawi?” Mu ndzidzi unoyu ndikhali na pyaka 59 pyakubalwa, natenepa ndatawira: “Nkhabe, ine ndakalamba kakamwe!” Mbwenye pa ntsiku ibodzi ene, ife tatambira mphangwa za Mathubo Akutonga zikhalonga kuti tikhafunika kubwerera ku Malawi.

Ife tikhakomerwa kakamwe na basa ikhacita ife ku Zimbabwe, natenepa pikhali pyakunentsa toera kubwerera ku Malawi. Ife tikhadamala dzolowera ku Zimbabwe, pontho tikhali na axamwali adidi kakamwe. Mwaufuni, Mathubo Akutonga atipanga kuti tingafuna tinakwanisa kupitiriza kukhala ku Zimbabwe. Natenepa, ife mbatidakwanisa kusankhula dziko ikhafuna ife kutumikira. Mbwenye ine ndisakumbuka kuti ndanyerezera pya Abhrahamu na Sara akuti maseze akhadakalamba, asiya dziko yawo mbacita pidaapanga Yahova.—Gen. 12:1-5.

Ife tasankhula kutowezera citsogolero ca gulu ya Yahova mbatibwera ku Malawi pa ntsiku 1 ya Fevereiro ya caka ca 1995, pakumala pyaka 28 bulukira pa ntsiku yakutoma idafika ife mu dziko ineyi. Natenepa yakhazikiswa Komiti ya Filiali, pontho ine na abale anango awiri tikhacita khundu ya komiti ineyi. Mwakukhonda dembuka, ife tatoma kuphata basa toera kukhazikisa pontho mabasa a Mboni za Yahova.

YAHOVA NDIYE ANAKULISA

Mphyakutsandzayisa kakamwe kuona kuti Yahova ali kupasa nkhombo basa yathu ku Malawi. Thangwi mu caka ca 1993 tikhali na amwazi mphangwa 30.000, mbwenye mu caka ca 1998 tikhali na amwazi mphangwa akupiringana 42.000.b Mathubo Akutonga atawirisa kumangwa kwa Bheteli toera kutsalakana kuthimizirika kwa basa yakumwaza mphangwa mu dziko ineyi. Ife tagula mbuto ikulu ya maekitare 12 ku Lilongwe, pontho ine ndakhazikiswa toera kutumikira mu komiti yakuyang’anira basa yakumanga.

M’bale Guy Pierce m’bodzi wa Mathubo Akutonga acita nkhani mwezi wa Maio wa 2001 toera kutoma kuphatisira Bheteli. Abale na alongo akupiringana 2.000 agumanika pa nsonkhano unoyu, pontho azinji mwa iwo akhali na pyaka pyakupiringana 40 pyakubatizwa. Abale na alongo anewa akukhulupirika apirira pinentso mu pyaka pizinji mu ndzidzi ukhatcingwa basa yathu mu dziko ineyi. Iwo nee akhali na kobiri izinji, mbwenye akhali na cikhulupiro cakuwanga, pontho akhali na uxamwali wakuwanga na Yahova. Kusiyapo pyenepi, iwo atsandzaya kakamwe thangwi yakuona Bheteli yawo ipswa. M’mbuto zonsene zikhapita iwo na kuona Bheteli, akhaimba nyimbo za Umambo mwakubverana, pontho pyenepi pyacitisa kuti nsonkhano unoyu ukhale wakutsandzayisa kakamwe kuna ine kupiringana misonkhano inango idaona ine. Pyenepi pyapangiza kuti Yahova asapasa nkhombo ale anapirira mayesero mwakukhulupirika.

Pidamala kumangwa Bheteli, ine ndatsandzaya kakamwe thangwi yakupaswa basa yakucita nkhani za kuzimula Nyumba za Umambo. Mipingo ya ku Malawi yakhala na mwai wa kumangirwa Nyumba za Umambo thangwi ya programu yakumanga Nyumba za Umambo m’madziko akutcerenga. Nyumba zenezi mbazidzati kumangwa, abale na alongo akhasonkhana n’Nyumba za Umambo zakumangwa na miti ya eukaliptu. Iwo akhaphimbira nyumba zenezi na maudzu, pontho akhakhalira mabhanko a dongo. Mbwenye cincino abale asaphata basa mwakuwanga toera kuumba mabhuloko na kuapisa mbamanga Nyumba za Umambo zakubalika. Mbwenye abale na alongo asapitiriza kukomerwa na mabhanko, thangwi pasakhala anthu azinji.

Ndatsandzayambo kakamwe kuona Yahova mbakaphedza anthu toera kukhala Akristu akukola mwauzimu. Kusiyapo pyenepi, ine ndadzumatirwa kakamwe na abale a ku Afrika akuti akhaperekeka toera kucita mabasa akusiyana-siyana, pontho thangwi yakuperekeka kwawo apfundziswa pinthu pizinji na gulu ya Yahova. Natenepa, iwo apaswa mabasa mazinji toera kucita pa Bheteli na m’mipingo. Abale na alongo awangiswa kakamwe na ayang’aniri a cisa apswa a kweneko akuti azinji mwa iwo akhali akumanga banja. Maseze anthu azinji kuphatanizambo acibale awo akhaakakamiza toera abale ana, mbwenye mabanja anewa asankhula kukhonda bala ana mu dziko ino toera akwanise kucita pizinji m’basa ya Yahova.

NDIRI WAKUTSANDZAYA NA PISANKHULO PIDACITA INE

Ine na Anne ku Bheteli ya Grã-Bretanha

Pakumala kutumikira pyaka 52 mu Afrika, ine ndatoma kukhala na nyatwa za ungumi. Mathubo Akutonga atawira phembo idacita Komiti ya Filiali ya ku Malawi kuti ife tibwerere ku Grã-Bretanha. Ife tatsukwala kakamwe thangwi yakusiya basa ikhakomerwa na ife, mbwenye banja ya Bheteli ya ku Grã-Bretanha isatitsalakana mwadidi kakamwe mu ndzidzi uno wakuti takalamba.

Ine ndiri na cinyindiro cakuti ndacita cisankhulo cadidi kakamwe thangwi yakutawirisa Yahova kutsogolera umaso wanga. Ine mbandidanyindira udziwisi wanga, umaso wanga mbudakhala wakusiyana kakamwe na uli na ine cincino. Ndzidzi onsene Yahova akhadziwa pinthu pikhafuna ine toera ‘kulungamisa njira zanga.’ (Mis. 3:5, 6) Pikhali ine m’phale, ndikhakomerwa kakamwe na kupfundza mabasa akhacitwa pa empreza ikhaphata ine basa. Mbwenye gulu ya Yahova yandipasa basa yakutsandzayisa kakamwe. Kuna ine, kutumikira Yahova ndi kwakutsandzayisa kakamwe.

a Pinthu pidacitikira abale na alongo a ku Malawi, pisagumanika mu Anuário das Testemunhas de Jeová de 1999, tsa. 148-223.

b Cincino ku Malawi kuli na amwazi mphangwa akupiringana 100.000.

    Mabukhu Acisena (1982-2025)
    Bulukani
    Fungulani
    • Cisena
    • Tumizirani Anango
    • Sankhulani Pinafuna Imwe
    • Copyright © 2025 Watch Tower Bible and Tract Society of Pennsylvania
    • Pinafunika Imwe Kutowezera
    • Cibisobiso
    • Configurações de Privacidade
    • JW.ORG
    • Fungulani
    Tumizirani Anango