Nzu Yeɛ Ole Edwirɛ Páa Ne?

1. Nzu yeɛ ole edwirɛ páa bɔ ofi Nyameɛpiri berɛ ne?

Nyameɛpiri pena kyɛ mmenia nye gye wɔ aseɛ so. Ɔdɔ bɔ ole ma sona nati yeɛ ɔbɔle aseɛ ɔne nikyee biala bɔ ɔwɔ so ɔ. Ɔngɔhyɛ okopusu yenwo maa mmenia bɔ bɛwɔ aseɛ so mukoraati konya asetena páa kyẽabie. Ɔkɔye bɔ wafa amaneɛnwunɛ wawa adasa so ne kofi berɛ.​—Kenga Yeremia 29:11.

Awaen biala nne berɛ bɔ wahora waye nzɛmmɔnelilɛ, anwonyerɛ, anaa ewue wafi berɛ ɔ. Nakoso edwirɛ páa bie wɔ berɛ. Ɔngɔhyɛ, Nyameɛpiri Ahennie kɔwa koosi sona anwaen mukoraati gya nu. Na bɛbɔ bɛkɔtena sɔ Ahennie nanu bie ne konya asomdwee ne anwoserɛ.​—Kenga Yesaia 25:8; 33:24; Daniel 2:44.

2. Nzuati yeɛ odikyɛ yɛyɛ ndɛ yetie edwirɛ páa ne ɔ?

Sɛ Nyameɛpiri ye abɔnefoɛ fi berɛ ngome a, yeɛ amaneɛnwunɛ bo kɔpɛ ɔ. (Zefania 2:3) Mmerɛ beni yeɛ ɛhe kɔwa ɔ? Nyameɛpiri Dwirɛ hyɛle nningyein bɔ ɔha sona ɛnnɛ ne nwo ngɔm tole berɛ. Nningyein tɛɛ bɔ ɔkɔ so kesalae ne maa yenwui kyɛ mmerɛ bɔ Nyameɛpiri kɔfa kɔpusu yenwo ne apingye.​—Kenga 2 Timoteo 3:1-5.

3. Nzu yeɛ odikyɛ yɛyɛ ɔ?

Odikyɛ yesua Nyameɛpiri nwo nikye yefi ye Dwirɛ Bible nanu. Ɔte kyɛ krataa bɔ baba bie bɔ ole ɔdɔ ahwerɔ aberɛ yɛ ɔ. Ɔmaa yenwu bɔ yɛkɔyɛ na yanya anigye ɛnnɛ ɔne bɔ yɛkɔyɛ na yahora yanya daa ngõa wɔ aseɛ so kyẽabie ɔ. Ɔwɔ nu kyɛ nná mmenia mukoraati yeɛ bɛnye kɔgye yenwo kyɛ bekonwu kyɛ ebie boka wɔ maa ɛte Bible nabo de, nakoso nnɛmaa ebiala bu waba nu maa  asetena páa bɔ ekonyae kyẽabie ne bɔ wɔ.​—Kenga Anyandera 29:25; Nyekyire 14:6, 7.