Sõen Nwo Dwirɛ Páa Beni Yeɛ Ɔwɔ Berɛ Ɔ?

1. Yeti soen mukoraati te páa?

Mmeni páa wɔ soen biala nu. Anigye dwirɛ yeɛ ole kyɛ Nyameɛpiri nwu sɔ mmenia bɔ bɛte sɔ ne, na odwene bɛ nwo. Nakoso, aworabɔlɛ dwirɛ yeɛ ole kyɛ, mmenia nate nyamesom dumaa so bedi bɔne pẽe. (2 Korintofoɛ 4:3, 4; 11:13-15) Kyɛbɔ amaneɛbɔ kyire ne, soen ahoroɛ bie po fa bɛnwo bewurowura amaenmɔe dwirɛ nu, bɛtɔle mmusua bo, bɛkɔ kõɛ, bɛyɛ ngwalaa ayayadeɛ, na bɛfa bienzua ne brasua nnaa nwo dwirɛ bɛteetee bɛ. Ɛhe maa mmenia bɔ bele ahone páa, na bele Nyameɛpiri nu gyidie ne wora bɔ paa!​—Kenga Mateo 24:3-5, 11, 12.

Mmerɛ bɔ naholɛ soen hyɛ Nyameɛpiri animnyam ne, ngondombo soen de bɛmaa ye wora bɔ. Bekyirekyire edwirɛ bɔ ɔnne Bible nu, te kyɛ ngodombo dwirɛ bɔ bɛka bɛfa Nyameɛpiri, ɔne tebea bɔ awufoɛ wɔ nu nanwo ne. Nakoso Yehowa pena kyɛ mmenia nwu yenwo naholɛ dwirɛ.​—Kenga Hezekiel 18:4; 1 Timoteo 2:3-5.

2. Soen nwo dwirɛ páa beni yeɛ ɔwɔ berɛ ɔ?

Anigye dwirɛ yeɛ ole kyɛ, soen ahoroɛ bɔ bɛfa bɛnoa bɛkã kyɛ bɛdɔ Nyameɛpiri, nakoso, Satan wiase ne mmom yeɛ bɛdɔ ye ne, ngɔhora ngɔlakalaka ye. (Yakobo 4:4) Nyameɛpiri Dwirɛ frɛ ngondombo soen mukoraati “Babilon Prikua Ne.” Babilon te tete kuro bie, na ɛberɛ yeɛ ngondombo soen hyɛle ye bo wɔ Noa aberɛ so nzueyilɛ ne sĩ ɔ. Ɔngɔhyɛ Nyameɛpiri kɔsɛkye soen bɔ bɛlakalaka sona na bɛfa nhyɛsoɛ bɛba bɛso ne mbofire nu.​—Kenga Nyekyire 17:1, 2, 5, 16, 17; 18:8.

Edwirɛ páa pẽe bie koso wɔ berɛ. Yehowa wora filli mmenia bɔ bele ahone páa bɔ bɛwɔ ngondombo soen ahoroɛ nu wɔ ewiase mukoraati nu ne. Okyirekyire sɔ mmenia ne naholɛ dwirɛ ne, kyɛbɔ ɔkɔyɛ a ɔkɔhã bɛ kɔbɔ nu ɔ.​—Kenga Mika 4:2, 5.

3. Nzu yeɛ odikyɛ bɛbɔ bele ahone páa ne bɛyɛ ɔ?

Yehowa dwene mmenia bɔ bɛdɔ naholɛ ná bɛnye gye nikyee páa nwo nanwo páa. Ɔhyɛ bɛ ngunaen kyɛ bɛyakyi ngondombo soen sĩlilɛ. Bɛbɔ bɛdɔ Nyameɛpiri ne bɔ mmɔden kyɛ bɛkɔyɛ nzakraeɛ, kyɛbɔ ɔkɔyɛ a bɛkɔsɔ ye nye ɔ.​—Kenga Nyekyire 18:4.

Wɔ Asomafoɛ ne aberɛ so ne, mmerɛ bɔ bɛbɔ bɛle ahone páa ne tele edwirɛ páa bɔ Asomafoɛ ne kã ne, bɛfale anigye bele bɛtole nu. Yehowa nwo dwirɛ bɔ besuane ne sesane b’abrabɔ, na benyane anigye wɔ b’asetena nu, benwuni b’asetena atirimbɔ, na beenyane anyelasoɛ koso. Bɔ bɛyɛle ne te nneasoɛ ma yɛ bɔ yɛwɔ berɛ ɛnnɛ ne, ofikyɛ bɛfale Yehowa belilimoa bɛfa behyirɛle kyɛ bayɛ asoɛ bama edwirɛ páa ne.​—Kenga 1 Tɛsalonikafoɛ 1:8, 9; 2:13.

Yehowa de bɛbɔ befi ngondombo soen nu bɛba ye abusua bɔ bɛsõ ye ne mukoraati ne to nu. Yehowa fa anigye to asaa frɛ wɔ, sɛ ede asaatolɛ naso a, ɛkɔɔyɛ ye damvo, ekonya abusua foforɛ bɔ enufoɛ dodɔ bɛnwo ná bɛsõ Yehowa ɔ, ná ekonya daa ngõa koso.​—Kenga Marko 10:29, 30; 2 Korintofoɛ 6:17, 18.

4. Nzu yeɛ Nyameɛpiri kɔyɛ na maen mukoraati anya anigye ɔ?

Atemmuo bɔ ɔba ngondombo soen so ne te edwirɛ páa paa. Ɔkɔmaa mmenia bɔ bɛwɔ wiase mukoraati ne kole bɛnwo kofi nhyɛsoɛ bo. Sɛ ɔba sɔ a, ngondombo soen ngɔlakalaka adasa, na mbakyembakyemuɛ ngɔwa mmenia nu kõ. Bɛbɔ bɛte ngõa nu sɔ mmerɛ ne mukoraati kɔbɔ nu kɔfa anigye kɔsõ naholɛ Nyameɛpiri ne.​—Kenga Nyekyire 18:20, 21; 21:3, 4.