Fa Anwotɔsoɛ Nea Ewiase Nhyehyɛeɛ He Ayieleɛ N’atẽe

Ɔngɔhyɛ koraa aboterɛ bɔ Yehowa le ma ewiase he ne kɔwa ayieleɛ. Bɛkɔsɛkye ngondombo sõen, maen maen bɔ bahã bɛnwo babonu kodwɔso kotia Nyameɛpiri mmenia, na Yehowa kɔsɛkye abɔnefoɛ nemɔ wɔ Armagedon. Kristofoɛ fa anigye nea nningyein hemɔ bɔ ɔbasisi n’atẽ.

Nahorɛ nu, yɛnze bɔ ɔkɔhɔso wɔ anwohiahia pirikua nanu ne mukoraati. Kyɛ nneasoɛ ne, yɛnze mmerɛ deinn bɔ ɔkɔhyɛ yebo ɔ. Yeɛ yɛnze bɔ ewiase atũmvoɛ nemɔ kogyina so bɛkɔfa bekodwɔso bekotia nyamesom ɔ. Na mmerɛ dodoɔ bɔ okoli mmerɛ bɔ maen maen ne adwɔso atia Nyameɛpiri mmenia, ɔne nningyein bɔ okosisi sɔ mmerɛ ne koso yɛnze. Na afei, yɛnze atẽe deinn bɔ Yehowa kɔfa so kɔsɛkye abɔnefoɛ wɔ Armagedon ɔ.

Nakoso, tworɔnzɛm ne maa yenya edwirɛ bɔ ɔkɔboka yɛ maa yekonya anwotɔsoɛ ne akokoduro bɔ yɛkɔfa yekogyina bɔ okosisi kyẽabie ne noa ɔ. Kyɛ nneasoɛ ne, yɛse kyɛ yɛte ngyẽa bɔ ɔpɛ yebo wɔ “ayieleɛ mmerɛ” nanu. (2Ti 3:1) Na yɛse kyɛ sɛ bɛto bewura nyamesom so a, “bɛkɔpɛ ngyẽa naso” kyɛbɔ ɔkɔyɛ a, bɛngɔsɛkye nahorɛ sõen ɔ. (Mat 24:22) Afei, yɛse kyɛ Yehowa kole ye mmenia ngõa. (2Pe 2:9) Na yesa yɛse kyɛ, Bɔ Yehowa aye ye kyɛ ɔsɛkye abɔnefoɛ na ole mmeni lɔen pirikua ne ngõa wɔ Armagedon ne, ɔte teneneeniɛ bɔ ole tumi ɔ.—Nye 19:11, 15, 16.

Nningyein bɔ okosisi kyẽabie nanwo suroen kɔmaa mmeni pẽe “kɔpɛ kofĩ.” Nakoso, sɛ yɛkenga atẽe bɔ Yehowa faleso lɛle ye mmenia tete ne, ɔne kyɛbɔ okole ye mmenia kyẽabie nanwo nikye, na yɛdwenedwene yenwo a, ɔkɔmaa yɛkɔfa anwotɔsoɛ “yekodwɔso yekogyina, yɛkɔma yɛ ti so,” ofikyɛ yɛse kyɛ yɛ ngõalelɛ apingyé.—Luk 21:26, 28.