Siesie Wɔnwo Kesaalae Ma Anwonyerɛ Bɔ Ɔkɔhora Kɔbɔ Wɔ Mbofire Nu Ne

Nzuati yeɛ odikyɛ esiesie wɔnwo ɔ? Mbofire nu anwonyerɛ kora bɔ ebie maa bɛfa ye bɛkɔto hɔspitel, mmerɛ bɔ anwonyerɛ ne mmɔ ye kɔkɔ po ɔ. Yeti, kora bɔ anwonyerɛ bie bɔ enu yɛ se kɔbɔ wɔ mbofire nu ne, siesie wɔnwo yé kyɛbɔ ɔkɔyɛ a, ɛkɔhora konya anwonyerɛsalɛ bɔ ɔte pá, mmerɛ bɔ ahɔ tebea bɔ ɔte sɔ nu ne. Sɛ ɛyɛ sɔ a, okyire kyɛ ele obuo ma ngõa, ɔne Yehowa mmraa bɔ ɔfa mogya nwo ne.—Aso 15:28, 29.

Nzu yeɛ ɛkɔhora kɔyɛ kɔfa kosiesie wɔnwo ɔ?

• Bɔ mbaeɛ na to wɔ boase hyehyɛ mogya nwo krataa (DPA) ne yé.a Adawurubɔfoɛ bɔ babɔ asu ne sa kɔhora kɔhã DPA krataa ne, ɔne Identity Card (ic) bɔ ɔte ngwalaa deɛ ne bie kofi aliemaa bɔ ɔnea nwomaa so ne berɛ

• Sɛ ɛnwonzɛ a, bisa w’asafo nu mbanyi ma bɛma wɔ Information for Expectant Mothers (S-401) krataa ne bie. Sɔ krataa ne kɔboka wɔ maa ekonwu bɔ odikyɛ ɛyɛ, mmerɛ bɔ eyia ɔhaw bie wɔ wɔ́ nwonzɛlɛ nanu, ɔne w’aworɛ sĩ ne

• Sɛ bɛkɔyɛ wɔ oprehyɛn bie bɔ mogya nwo dwirɛ kodwɔso wɔ nu, anaakyɛ bekole wɔ bɛkɔto hɔspetel berɛ a, ma wɔ asafo nu mbanyi nemɔ so te ye ndɛ, ná bɔ dɔktafoɛ nemɔ amaneɛ kyɛ, ɛpena kyɛ Yehowa Adanzefoɛ asafo nanu panyi bie basra wɔ

Sɛɛ yeɛ mbanyi nemɔ kɔhora kɔboka wɔ ɔ? Bɛkɔhora bɛkɔboka wɔ maa ɛkɔhyehyɛ wɔ DPA krataa ne. Nakoso kae kyɛ, nná asafo nanu mbanyi nemɔ yeɛ bekosisi gyinaeɛ bɔ ɔfa w’anwonyerɛsalɛ nanwo, anaakyɛ edwirɛ bɔ odikyɛ angorangora si yenwo gyinaeɛ kɔma wɔ ɔ. (Rom 14:12; Gal 6:5) Sɛ ɛbɔ w’asafo nanu mbanyi ne amaneɛ kyɛ eyia anwonyerɛsalɛ bɔ mogya nwo dwirɛ kɔhora kodwɔso wɔ nu a, bɛkɔbɔ Hospital Liaison Committee (HLC) ne amaneɛ kɔma wɔ ndɛ nala.

Atee beni aso yeɛ HLC kɔhora kɔboka ɔ? Batete aliemaamɔ bɔ bɛwɔ HLC ne kyɛ, bɛboka ma dɔktafoɛ ne nɛsefoɛ bɛte yɛgyidie bɔ ɔfa mogya bɔ bɛfa bɛdi dwumaa nabo. Bɛkɔhora bɛkɔboka wɔ dɔkta ne maa okonwu atẽe bɔ ɔkɔfaso kɔsa wɔ anwonyerɛ, bɔ ɔngɔfa mogya ngɔboka so ɔ. Sɛ yenwo bahia a, bɛkɔhora bɛkɔboka wɔ maa ekonya dɔktaniɛ bɔ ɔkɔte wɔ gyidie nabo ɔ.

NEA VIDIO BƆ YEƐ OLE, KYƐBƆ EKOSI ANWONYERƐSALƐ BƆ ƆFA MOGYA NWO NANWO GYINAEƐ Ɔ, NA YE NZƐMMISA BƆ OLISO NE NOA:

• Nzu yeɛ asũa fi vidio nanu bɔ ɔkɔboka wɔ maa, ekosiesie wɔnwo kɔma anwonyerɛ bɔ ɔkora ba mbofire nu bɔ mogya nwo dwirɛ kɔhora kɔdwɔso wɔ nu ɔ?

  Your answer