Ɛse Nikyeebie?
Atẽe bɔ né bɛfa so bɛyɛ briks, ɔne briks bɔ bɛyɛle ye wɔ tete Babilɔn ne, sɛɛ yeɛ ɔmaa yenwu kyɛ Bible nanu dwirɛ te nahorɛ ɔ?
MMENIA bɔ betutu aseɛ nwo ne, banwu briks pẽe bɔ batõ wɔ tete Babilɔn kuro nanu ɔ. Bedé bedi kyɛ ɛhẽne yeɛ bɛfa bɛkyekyele kuro ne ɔ. Robert Koldewey boka bɛbɔ betutu aseɛ nwo naso, na ɔhãne kyɛ, bɛtõne sɔ briks ne wɔ fõonoo ahoroɛ nu wɔ “Babilɔn kuro ne sĩ, ofikyɛ ɛberɛ yeɛ né bekonya nnɛterɛ, ɔne eyein . . . pẽe ɔ.”
Afei koso, bɛbɔ betutu aseɛ nwo ne asa anwu kyɛ, awaen mbanyi bɔ né bɛwɔ tete Babilɔn ne, né bɛfa sɔ fõonoo hemɔ bedi nzɛmmɔne paa. Ebie yeɛ ole kyɛ Paul-Alain Beaulieu, bɔ okyire nikyee wɔ University of Toronto ne hãne kyɛ: “Babilɔnfoɛ tworɔtohɔ ahoroɛ . . . maa yenwu kyɛ, sɛ né ebie bu ɔhene ne mmraa so anaa ɔyɛ nikyee bie bɔ okyire kyɛ ommu Babilɔn nyameɛ nemɔ a, né begyi sɔ sona ne bɛto sɔ fõonoo nanu bɛyera ye.” Ebiekũ koso, Babilɔnfoɛ tworɔtohɔ bie kã mmenia biemɔ bɔ Ɔhene Nebukadenesa hyɛle kyɛ bɛyera bɛ nanwo dwirɛ. Ɔhãne kyɛ: “Ɛmɔgyi bɛ begua fõonoo nanu, . . . maa bɛyera, . . . ná bɛ nwosina ɔfo hɔ anwuro kodwu kyɛ bekowu ɔ.”
Sɔ dwirɛ ne maa yɛkae edwirɛ bɔ ɔwɔ Daniel yeti 3 ne. Wɔ sɔ tworɔtohɔ nanu ne, Ɔhene Nebukadenesa fale esikaa kɔkorɛ yɛle bosoen, na ɔfa siele Dura aseɛ so wɔ Babilɔn kuro ne sĩ. Nebukadenesa hãne kyɛ ebiala ɔkoto sɔ bosoen bɔ wayɛ ne. Nakoso Yudafoɛ mmrandeɛ nzã biemɔ de, bannyɛ bɔ ɔhene ne hãne ne. Sɔ mmrandeɛ nemɔ yeɛ bele Sadrake, Mesake ɔne Abedinego. Ɛhẽne maa Nebukadenesa fɛle yaa paa, na ɔhãne kyɛ “behua fõonoo see ne anu paa ma nu ɔyɛ hye pɛen nzoo ɔtra kyɛbɔ ɔyɛ a ye hyerɛ te ne,” na “bɛfa bɛ beegua see bɔ ogye wuronyiwuronyi wɔ fõonoo nanu ne” maa bɛyera dwɛɛ. Yehowa somane abɔfo bie bɔ ole tumi paa maa ɔɔbɔle bɛnwo waen, yeti benyane ngõa.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Briks bie bɔ batõ bɔ bahworɔ Nebukadenesa dumaa bagua so ɔ
Afei koso, briks bɔ benwuni ye wɔ tete Babilɔn ne kyire kyɛ Bible nanu dwirɛ te nahorɛ. Bɔ yeti yeɛ ɔte sɔ yeɛ ole kyɛ, né bahworɔ edwirɛ biemɔ bagua sɔ briks nemɔ nwo, bɔ né Babilɔn hene Nebukadenesa fa tu yenwo ɔ. Enu kõ kã kyɛ: “Me Nebukadenesa bɔ nde Babilɔn hene ne, . . . Nde ɔhene bɔ nné tumi paa ɔ, na sɔ ahemvie kandinga bɔ masi ne, . . . Me bosofoɛ kɔtena nu koli bia daa.” Sɛ yɛkenga Daniel 4:30 a, yenwu edwirɛ bie bɔ ɔte sɔ ala bɔ Nebukadenesa hãne ɔ. Ɔhãne kyɛ: “Babilɔn yeɛ wayɛ piri sɔa e! Aso nna me tumi piri yeɛ mafa makyekye kuro ye maa wayɛ m’ahenguro, bɔ mefa meye m’ahennie animnyam ali ɔ?”