Bɔ Ɔkɔboka Wɔ Maa Ekosũa Nikyee Yé Ɔ

Bɔ Mmɔden Kye “Sunzum Nu Dwein” Ne Bie Gua Wɔ Tianu

“Sɛ odwu mmerɛ bie na me wora bɔ anaa m’abanu bu a, dwein ahoroɛ bɔ ɔwɔ JW Broadcasting^® so ne, Yehowa nate so hyɛ me ngunaen.”—Lorraine, ɔwɔ U.S.A.

Sɛ yɛne yeliemamɔ Kristofoɛ yia nu a, ɛyɛ a yɛkora yɛto dwein ahoroɛ. Bible ne frɛ dwein ahoroɛ bɔ ɔte sɔ ne kyɛ “sunzum nu dwein.” (Kol. 3:16) Sɛ ɛyere wɔnwo kye asafo dwein ahoroɛ ne bie gua wɔ tianu a, ɔkɔboka wɔ paa. Ofikyɛ sɛ edwirɛ bie si na sɛ ɔyɛ se kyɛ ekonya dwein nwomaa, fon anaa tablɛt bɔ dwein ne bie wɔ so po a, ɛkɔhora kɔto bɔ ahye agua wɔ tianu ne. Yede, sɛ ɛpena kyɛ ɛkye asafo dwein ahoroɛ ne bie gua wɔ tianu a, nningyein bɔ oliliso hemɔ kɔhora kɔboka wɔ.

• Kenga dwein nanu dwirɛ ne yé na wamaa ahora ate yebo. Sɛ ɛkora te edwirɛ bie bo yé a, ɛyɛ a ɔnyɛ se kyɛ ɛkɔkae ɔ. Asafo dwein ahoroɛ ne mukoraati bɔ ngwalaa deɛ bokaso ne, ɛkɔhora konya enu dwirɛ ne wɔ jw.org so. Sɛ ɛkɔ jw.org so a, ekonwu bɔ yɛkã yenwo dwirɛ ne wɔ nekaa bɔ bahworɔ kyɛ Akoraeɛ, na afei nea nekaa bɔ yenwa Edwein.

• Tworɔ dwein nanu dwirɛ ne gua krataa so. Sɛ ɛyɛ sɔ a, ɔkɔboka wɔ maa ɛkɔkae dwein ne ndɛ.—Deut. 17:18.

• To dwein ne serɛ ma ofité wɔ noa. Edwirɛ bɔ ɔwɔ dwein nanu ne, ɛyɛ a to ye mmerɛ pẽe.

• Afei, nea kyɛ ɛkɔkae enu dwirɛ ne anaa. Sɛ ɛpena kyɛ enwu kyɛ dwein nanu dwirɛ ne aha wɔ tianu a, bɔ mmɔden kyɛ ɛkɔto bɔ ɛngɔnea krataa biala so ɔ. Sɛ ɛyɛ ye sɔ yie a, sa nea krataa naso nea kyɛ ɛhora tole ye pɛpɛɛpɛ kyɛbɔ ɔwɔ krataa naso ne anaa.