Sua Nningyein Foforɛ Boka Bɔ Ɛse Naso

Sɛ yɛbaasua nikyee a, yɛkɔhora yekobisa yɛnwo kyɛ, ‘Bɔ mebaasua ye, nzu yɛ menea atee kyɛ ngonya ngofi nu ɔ?’ Nakoso, odikyɛ yɛnea yé na yannya adwene kyɛ bɔ yɛse ye dada ne ngome yeɛ yekotira nu ɔ. Mmom sɛ yesua nikyee a, ɔte pá kyɛ yɛkɔbrɛ yɛnwo ase, na yesua nningyein foforɛ yɛboka bɔ yɛse ye dada naso. Yede, yɛkɔyɛ sɛɛ né yahora yayɛ sɔ?

Bɔ mbaeɛ fa pena nworɛ. Srɛ Yehowa kyɛ ɔboka wɔ ma ɛte bɔ ésua ye sɔ mmerɛ nabo. (Yak. 1:5) Nnenya adwene kyɛ ndeaseɛ bɔ ele ye dada ne, ɛhene ala te pá.—Any. 3:​5, 6.

Tumi bɔ ɔwɔ Bible nanu ne, ma ɔsesã wɔ. “Nyameɛ dwirɛ ne te ase.” (Heb. 4:12) Sɛ yɛkenga Bible ne a, Nyameɛ “dwirɛ” bɔ tumi wɔ nu ne, ɔkɔhora kɔboka yɛ wɔ atee pee so. Nakoso sɛ ɛhe kɔhora kɔyɛ yé a, sana yenya ndeaseɛ foforɛ bie wɔ bɔ yasua nanwo a, yedé yɛtonu.

Ma wɔnye sɔ bɔ Yehowa fa kyirekyire yɛ ne mukoraati. Bible nanu dwirɛ bɔ Yehowa fa kyirekyire yɛ ne, ɔte kyɛ bɔ wafa ‘aleɛ paa wato poen’ wama yɛ ne. (Yes. 25:6) Yeti, nnenya adwene kyɛ Bible ne nekaa bie wɔ berɛ a, ɛkenga a ɔnyɛ wɔ fɛ yeti ɛngɔkenga. Sɛ ɛyɛ ɛhe mukoraati a, ɔkɔmaa wɔngye kɔgye Nyameɛ dwirɛ nanwo, na ekonya bɔ ɔfa kyirekyire wɔ naso mvasoɛ paa!