Sɛɛ Yeɛ Yehowa Te Ɔ?

Sɛ esusu Yehowa Nyameɛpiri nwo a, nzu yeɛ ɔba w’adwene nu ɔ? Aso ɔte ebie bɔ yenwo yɛ nwanwa bɔ ɔte dédé, bɔ ɛngɔhora ngopingye ye llé anaa? Anaa esusu kyɛ ɔte ebie bɔ olé tumi pirikua tekyɛ agralaa, bɔ ɛngora nwui ye anaa? Sɛɛ paa yeɛ Yehowa te ɔ? Yehowa nate ye Dwirɛ, Bible naso da ye subaen ahoroɛ, bɔ okyire kyɛ ɔdwene wɔnwo ne bie ali kyire wɔ.

1. Nzuati yeɛ yɛngora yenwu Nyameɛpiri ɔ?

“Nyameɛpiri te Honhom.” (Yohane 4:​24) Yehowa llé anwoɔnaen tekyɛ yɛ. Ɔte honhom bɔ ɔwɔ anwuro, na ɔwɔ nekaa bɔ yɛngɔhora yengonwu ye ɔ.

2. Yehowa subaen ahoroɛ ne bie yeɛ olé beni?

Ɔwɔ nu, yennwu Yehowa, nakoso olé subaen ahoroɛ bie bɔ ɔkora maa ɔtwẽ pingye bɛbɔ bɛse ye ne ɔ. Bible ne kã kyɛ: “Yehowa dɔ atɛntenenee, na ɔngɔyakyi bɛbɔ bedi ye nahorɛ ne llé.” (Edwein 37:28) Onwu “anwumvoin, na olé ahundeterɛ,” ma sona, ye titire ne, mmenia bɔ benwu amaneɛ ne. (Yakobo 5:​11) ‘‘Yehowa pingye bɛbɔ bɛwora abɔ ne; na ode bɛbɔ bɛ honhom aboto ne.’’ (Edwein 34:18) Aso, ɛse kyɛ bɔ yɛyɛ ne kora kã Yehowa anaa? Sona bɔ osi ye hue kyɛ ɔkɔyɛ nningyein tɛɛ ne, ɔmaa ye wora bɔ. (Edwein 78:40, 41) Nakoso sona bɔ ɔyɛ nningyein páa ne de, ɔmaa yenye gye.​—Kenga Anyandera 27:11.

3. Sɛɛ yeɛ Yehowa kyire kyɛ ɔdɔ yɛ ɔ?

Yehowa su bɔ ɔda nzorɛ paa yeɛ olé ɔdɔ. Nahorɛ nu, “Nyameɛpiri te ɔdɔ.” (1 Yohane 4:8) Nná Bible nanu ngõme yeɛ yenwu Yehowa dɔ ɔ, na mmom nningyein bɔ wabɔ ne koso maa yenwu ye dɔ. (Kenga Asomafoɛ Ne Nnwumaa 14:17.) Kyɛ nneasoɛ ne, wɔde susu kyɛbɔ ɔbɔle yɛ nanwo nea. Wama yɛ tumi bɔ yɛkora yɛfa yenwu kala bɔ ɔyɛ nyemene, bɔ yɛfa yetie dwein bɔ ɔyɛ fɛ, ɔne bɔ yɛfa yɛte aleɛ bɔ ɔyɛ fɛ ngã ɔ. Ɔpena kyɛ yɛnye gye wɔ asetena nu.

SUA PẼE BOKASO

4. Honhom krongron​—Nyameɛpiri tumi bɔ ɔfa yɛ nningyein

Kyɛbɔ yɛfa yɛsa yɛyɛ adwuma ne, Yehowa koso fa ye honhom krongron yeɛ ɔyɛ nikye ɔ. Bible ne maa yenwu kyɛ, honhom krongron, ɔtte sona, na mmom ɔte tumi bɔ Nyameɛpiri fa yɛ adwuma ɔ. Kenga Luka 11:13 ɔne Asomafoɛ Ne Nnwumaa 2:​17, na susu nzɛmmisa hemɔ anwo:

• Nyameɛpiri “kohwie” ye honhom krongron kogua bɛbɔ bebisa ye naso. Aso esusu kyɛ honhom krongron te sona, anaa ɔte tumi bɔ Nyameɛpiri fa yɛ adwuma ɔ? Nzuati yeɛ ɛkã sɔ ɔ?

Yehowa fa ye honhom krongron ne yɛ nningyein pẽe maa ɔyɛ nwanwa. Kenga Edwein 33:6 ɔne 2 Petro 1:​20, 21, na susu nzɛmmisa he anwo:

• Atẽe benimɔ aso yeɛ Yehowa afa ye honhom krongron ne ali dwumaa ɔ?

5. Yehowa lé subaen ahoroɛ bɔ ɔyɛ nyemene

Né Mose te ebie bɔ ofi nahorɛlilɛ nu sõ Nyameɛpiri paa, nakoso né ɔpena kyɛ onwu ye Bɔfoɛ ne yé. Yeti Mose hã hyirɛle ye kyɛ: “Má nnwu w’atẽe, kyɛbɔ ɔkɔyɛ a ngonwu wɔ ɔ.” (Ɛzadɔs 33:13) Yehowa hãne Ye subaen bɔ olé ne bie nwo dwirɛ hyirɛle Mose fa mane ye mmuaeɛ. Kenga Ɛzadɔs 34:​4-6, na afei susu nzɛmmisa hemɔ nwo:

• Yehowa subaen ahoroɛ nanu beni yeɛ ɔmaa Mose nwuni ye ɔ?

• Yehowa subaen ahoroɛ nanu beni yeɛ ɔkã w’ahõne ɔ?

6. Yehowa dwene sona nwo

Hebrifoɛ bɔ né bɛte Yehowa mmenia ne, bɛyɛle ngoaa wɔ Egypt. Yeti, sɛɛ yeɛ Yehowa tele ngã mmerɛ bɔ né benwu amaneɛ ne ɔ? Bɔ TIE na di yesĩ, anaa kenga Ɛzadɔs 3:​1-​10. Ná susu nzɛmmisa bɔ olili so hemɔ anwo.

BƆ BƐBƆ BETIE: Yehowa Lili Yalɛ Wɔ Bɛ Amaneɛnwunɛ Nanwo (2:​45)

• Nzu yeɛ edwirɛ he maa enwui fa kyɛbɔ Yehowa te ngã, wɔ sona amaneɛnwunɛ nwo ɔ?​—Nea ngyekyemuɛ 7 ɔne 8.

• Aso esusu kyɛ Yehowa pena kyɛ ɔboka sona, na ɔkɔhora kɔyɛ sɔ anaa? Nzuati ɔ, anaa nzuati yeɛ enné nni ɔ?

7. Nningyein bɔ ɔwɔ amanzaen he anu ne maa yenwu Yehowa subaen ahoroɛ

Yehowa nate nningyein bɔ wabɔ naso da ye subaen ali. Bɔ VIDIO ne. Afei kenga Romanfoɛ 1:​20, ná susu nzɛmmisa bɔ oliso he anwo.

VIDIO: Abɔdeɛ Maa Yenwu Yehowa Dɔ​—Sona Nipadua Ne (1:​57)

• Yehowa subaen ahoroɛ beni yeɛ enwui wɔ nningyein bɔ wabɔ nanu ɔ?

YEMUABƆLƐ

Yɛngora yenwu Yehowa ofikyɛ ɔte honhom, na olé su ahoroɛ bɔ ɔyɛ nyemene, tekyɛ ɔdɔ.

Ndimu

• Nzuati yeɛ yɛngora yenwu Yehowa ɔ?

• Nzu yeɛ olé honhom krongron?

• Yehowa subaen ahoroɛ ne bie yeɛ olé sɛɛ?

NEA ƐHE KOSO

Sua pẽe fa Yehowa su titire nna bɔ ɔda nzorɛ nanwo, ná ɔboka wɔ maa enwu ye yé.

“Sɛɛ Yeɛ Nyameɛpiri Te Ɔ?” (The Watchtower No. 1 2019)

Susu adanzeɛ bɔ okyire kyɛ nná tebea biala yeɛ Yehowa fa yenwo dé nu nanwo nea.

“Aso Nyameɛpiri Wɔ Nekaa Biala Anaa?” (Edwirɛ bɔ ɔwɔ intanɛt so)

Nea bɔ yeti yeɛ Bible ne kã kyɛ, honhom krongron te Yehowa sa ɔ.

“Nzu Yeɛ Olé Honhom Krongron?” (Edwirɛ bɔ ɔwɔ intanɛt so)

Né ɔyɛ se ma Biãa bie bɔ yenye asĩ ne kyɛ, okolé koli kyɛ Nyameɛpiri dwene yenwo. Nea bɔ ɔmaa ɔsesãne y’adwene ɔ.

“Kesaalae Me Te Ngã Kyɛ, Ngɔhora Ngɔboka Afoforɛ” (The Watchtower, October 1, 2015)