ADESUA 09
Twẽ Pingye Nyameɛpiri Nate Mbaebɔ So
Aso ɛyɛ a, ɛte ngã kyɛ ehia akwangyerɛ wɔ asetena nu anaa? Elé nzɛmmisa titire biemɔ bɔ ɛpena yenwo mmuaeɛ hɔ? Ehia awerɛkyekyerɛ anaa awerɛhyemuɛ anaa? Ɛpena kyɛ epingye Yehowa anaa? Mbaeɛ kɔhora koli tebea hemɔ mukoraati nwo dwumaa. Nakoso, atẽe páa beni, yeɛ odikyɛ ɛfa so bɔ mbaeɛ ɔ? Aso Nyameɛpiri tie mbaeɛ biala anaa? Nzu yeɛ ɛkɔhora kɔyɛ maa okotie wɔ mbaeɛ ɔ? Má yɛnea.
1. Nwa yeɛ odikyɛ yɛbɔ ye mbaeɛ ɔ, na nzu yeɛ yɛkɔhora yɛkɔbɔ yenwo mbaeɛ ɔ?
Yesu hyirehyirɛle yɛ kyɛ, yɛbɔ mbaeɛ yehyire y’anwuro Baba ne. Yesu bɔbɔ bɔle Yehowa mbaeɛ. Ɔhãne kyɛ: “Yeti sɛ ɛmɔbɔ mbaeɛ a, ɛmɔbɔ ye swa: ‘Yɛ Baba bɔ ɛwɔ anwuro . . .’” (Mateo 6:9) Sɛ yɛbɔ Yehowa mbaeɛ a, ɔmaa yɛne ye afĩa abusuabɔ nanu yɛ se.
Yɛkɔhora yɛkɔbɔ nikyee biala nwo mbaeɛ. Nahorɛ nu, sɛ Nyameɛpiri kotie yɛ mbaeɛ a, odikyɛ ɔne ye apɛdeɛ yia. “Sɛ yebisa nikyee biala kyɛbɔ [Nyameɛpiri] apɛdeɛ te a, otie yɛ.” (1 Yohane 5:14) Yesu mane yɛ nneasoɛ ahoroɛ wɔ nningyein bɔ yɛkɔhora yɛkɔbɔ yenwo mbaeɛ ɔ. (Kenga Mateo 6:9-13.) Yɛ haw bɔ yɛkɔbɔ yenwo mbaeɛ la ahãmeɛ a, ɔnzɛkyɛ yɛmaa yɛwora fi kyɛ yɛkɔla Nyameɛpiri ase wɔ bɔ wayɛ wama yɛ nanwo, na yabɔ bie yama afoforɛ.
2. Sɛɛ yeɛ odikyɛ yɛbɔ mbaeɛ ɔ?
Bible ne hyɛ yɛ ngunaen kyɛ “[Yɛhã] y’ahõne nu dwirɛ yehyire [Nyameɛpiri].” (Edwein 62:8) Ɛhẽne ati, odikyɛ yefi y’ahõne nu yɛbɔ mbaeɛ. Sɛ yɛbɔ mbaeɛ a, yɛkɔhora yɛkɔma yɛkomvi so, anaa yɛkɔhã ye ase, nakoso odikyɛ yɛyɛ ye obuo atẽe so. Yɛkɔhora yɛkɔbɔ mbaeɛ wɔ mmerɛ ne nekaa biala.
3. Sɛɛ yeɛ Nyameɛpiri ma yɛ mbaeɛ nwo mmuaeɛ ɔ?
Ɔnate atẽe pẽe so yeɛ ɔyɛ sɔ ɔ. Yehowa afa ye dwirɛ Bible ne ama yɛ, na enu yeɛ yɛtaa yenya yɛ nzɛmmisa nemɔ nwo mmuaeɛ ɔ. Sɛ yɛkenga Nyameɛpiri dwirɛ ne a, [ɔkɔhora kɔmaa] “bɔ ollé nimdeɛ ne konwu nworɛ.” (Edwein 19:7; kenga Yakobo 1:5.) Sɛ yeyia ɔhaw a, ɔkɔhora kɔma yɛ asomdwee. Ɔkora kã ye asomvoɛ ahõne maa bɛboka yɛ mmerɛ bɔ yɛnwo ahyere yɛ paa ne.
SUA PẼE BOKASO
Nea kyɛbɔ ɛkɔhora kofi w’ahõne nu kɔbɔ mbaeɛ maa ɔkɔsɔ Nyameɛpiri nye ɔ, ná pena kyɛbɔ mbaeɛ kɔhora kɔboka wɔ nanwo dwirɛ.
4. Nyameɛpiri lé mbaeɛ nwo akwangyerɛ
Nzu yeɛ ɔkɔmaa Nyameɛpiri kotie yɛ mbaeɛ anaa ongontie ɔ? Bɔ VIDIO ne.
Yehowa pena kyɛ yɛbɔ ye mbaeɛ. Kenga Edwein 65:2, afei susu nzɛmmisa hemɔ nwo:
Aso esusu kyɛ “mbaebɔ Tiefoɛ” ne penakyɛ wɔ bɔbɔ ɛbɔ ye mbaeɛ anaa? Nzuati ɔ, anaa nzuati yeɛ enné nni ɔ?
Sɛ yɛ pena kyɛ Yehowa tie yɛ mbaeɛ a, odikyɛ yɛfa ye dwirɛ yɛbɔ yɛ bra. Kenga Mika 3:4 ɔne 1 Petro 3:12, ná afei susu nzɛmmisa he anwo:
Yɛkɔyɛ sɛɛ ná yanwui kyɛ Yehowa kotie yɛ mbaeɛ?
Sɛ kõɛ bie si a, ebiala bɔmbaeɛ kyɛ okoli ngunim. Ɛnea a, Nyameɛpiri kotie mbaeɛ bɔ ɔte sɔ ne anaa?
5. Odikyɛ yefi y’ahõne nu yɛbɔ mbaeɛ
Bahyire ebiemɔ kyɛ, sɛ bɛbɔ mbaeɛ a, betĩ edwirɛ kõ bie nu mmerɛ pẽe. Nakoso, ɛnea a, sɔ yeɛ Nyameɛpiri pena kyɛ yɛbɔ ye mbaeɛ anaa? Kenga Mateo 6:7, ná susu nzɛmmisa he anwo:
Sɛ ɛbɔ mbaeɛ a, ɛkɔyɛ sɛɛ na ayakyi kyɛ “ekotĩ edwirɛ kõ anu mmerɛ pẽe” ɔ?
Kyẽa biala, susu nikyee pɔtẽe bɔ Yehowa ayɛ ama wɔ wɔ́ w’asetena nu nanwo, ná da ye ase. Sɛ daa biala ɛyɛ sɔ a, dapɛen kõmaapɛ nu ne, ɛkɔhora kɔbɔ nningyein ahoroɛ nzoo bie nwo mbaeɛ bɔ engotĩ enu biala nu ɔ.
Baba bɔ olé ɔdɔ biala kuro kyɛ, ɔwa kofi ye ahõne nu ne ye kodwudwo. Sɔ ala yeɛ Yehowa pena kyɛ yefi y’ahõne nu yɛbɔ ye mbaeɛ ɔ
6. Mbaeɛ te akyɛdeɛ bɔ ofi Nyameɛpiri berɛ ɔ
Sɛɛ yeɛ mbaeɛ kɔhora kɔma yɛ anwoserɛ wɔ mmerɛ páa ne mmerɛ tɛɛ nu ɔ? Bɔ VIDIO ne.
Bible ne hyɛ yɛ bɔ kyɛ, mbaeɛ kɔhora kɔmaa yekonya asomdwee. Kenga Filipifoɛ 4:6, 7, ná afei susu nzɛmmisa hemɔ anwo:
Ɔwɔ nu, mbaeɛ ndu yɛ haw mukoraati bo de, nakoso sɛɛ yeɛ ɔboka yɛ ɔ?
Nningyein beni yeɛ ɛpena kyɛ ɛbɔ yenwo mbaeɛ ɔ?
Ɛse?
Edwirɛ “amen” kyire kyɛ “ɔyɛ berɛ” anaa “ɔbra nu.” Bible mmerɛ nu mukoraati ne, “amen” yeɛ bɛfa bɛpɛ mbaeɛ bo ɔ. —1 Beresosɛm 16:36.
7. Nya mmerɛ fa bɔ mbaeɛ
Ɔtɔ mmerɛ bie a, alagyé ti, né yɛ wora afi kyɛ yɛkɔbɔ mbaeɛ. Sɛɛ yeɛ né mbaebɔ nwo hia Yesu ɔ? Kenga Mateo 14:23, ɔne Marko 1:35, ná susu nzɛmmisa hemɔ anwo:
Nzu yeɛ Yesu yɛle fa nyane mmerɛ bɔle mbaeɛ ɔ?
Mmerɛ beni yeɛ ɛkɔhora kɔbɔ mbaeɛ ɔ?
EBIEMƆ KÃ KYƐ: “Sɛ ɛbɔ mbaeɛ a, né ɛsɛkye wɔ mmerɛ mbaen, ofikyɛ ebiala ndie.”
Esusu yenwo sɛ́?
YEMUABƆLƐ
Mbaeɛ bɔ ofi ahõne nu ne, ɔmaa yɛtwẽ yepingye Nyameɛpiri, yenya asomdwee, ɔne anwoserɛ bɔ yɛfa yɛyɛ bɔ ɔsɔ Yehowa nye ɔ.
Ndimu
Nwa yeɛ odikyɛ yɛbɔ ye mbaeɛ ɔ?
Sɛɛ yeɛ odikyɛ yɛbɔ mbaeɛ ɔ?
Mvasoɛ beni yeɛ ɔwɔ mbaebɔ so ɔ?
NEA ƐHE KOSO
Pena edwirɛ bɔ mmenia taa bisa fa mbaeɛ nwo mmuaeɛ.
“Nningyein Nzoo Bɔ Odikyɛ Enwui Fa Mbaeɛ Nwo Ɔ” (The Watchtower, October 1, 2010)
Sua nikyee titire bɔ yeti odikyɛ ɛbɔ mbaeɛ, ɔne kyɛbɔ ɛkɔmaa wɔ mbaeɛ kotu mbɔn nanwo nikye.
“Nzuati Yeɛ Odikyɛ Mebɔ Mbaeɛ Ɔ?” (Edwirɛ bɔ ɔwɔ intanɛt so)
Wɔde susu bɔ Bible ne kã fa bɔ odikyɛ yɛbɔ ye mbaeɛ nanwo nea.
“Odikyɛ Mebɔ Mbaeɛ Mekyire Anwoteefoɛ Anaa?” (Edwirɛ bɔ ɔwɔ intanɛt so)
Wɔ dwein nwo vidio he anu ne, nea kyɛ aso, mmerɛ ɔne nekaa nwo hia kora né yabɔ mbaeɛ anaa.