Sɛ Yewu A, Tebea Beni Yeɛ Yekonu Ɔ?

Aso wɔ dɔfo bie awu le? Sɛ ɛkɔ tebea bɔ ɔyɛ yaa sɔ nu a, ebia ekobisa kyɛ: ‘Sɛ yewu a, tebea beni yeɛ yekonu ɔ? Aso anyelasoɛ wɔ berɛ kyɛ, yɛkonwu yɛ adɔfoɛ bɔ bawuwu ne biekũ anaa?’ Wɔ adesua he ɔne bɔ oli berɛ nanu ne, yɛkɔnea mmuaeɛ bɔ awerɛkyekye wɔ nu bɔ Bible ne fa ma ɔ.

1. Sɛ yewu a, tebea beni yeɛ yekonu ɔ?

Yesu fale ewue totole ebie bɔ walafe nwo. Sɛ ebie dafe a, bɔ ɔkɔ so ne mukoraati onnwui. Abusuabɔ beni yeɛ ɔla ewue ne ɛlalɛ afĩa ɔ? Sɛ ebie wu a, ɔnde yalɛ biala. Na olle atenga biala mma ye nnamvo ne ye mmusuafoɛ bɔ ɔdɔ bɛ ne kõ. Bible ne kã kyɛ: “Awufoɛ nze hwee”.​—Kenga Ɔsɛngafoɛ 9:5.

2. Mvasoɛ beni yeɛ yenya yefi nahorɛ dwirɛ bɔ ɔfa awufoɛ nwo bɔ yekonwui naso ɔ?

Mmeni pẽe suro ewue​—ɔne awufoɛ! Nakoso bɔ Bible ne kã fa awufoɛ nwo ne kɔhora kɔkyekye wɔ wora. Yesu hãne kyɛ: “Nahorɛ ne kɔmaa ekole wɔnwo.” (Yohane 8:​32) Nyamesomfoɛ biemɔ kã kyɛ, sona le ɔkra bie wɔ yenu bɔ ɔtena ase wɔ yewue sĩ ɔ, nakoso Bible ne ngyirekyire sɔ. Sɛ ebie wu a, onnwu amaneɛ biala. Afei, ɔnate kyɛ awufoɛ nze hwee nati, bɛngɔhora bɛngɔyɛ yɛ bɔne biala. Yeti yenwo nhia kyɛ yɛyɛ nikyee biala yɛfa yɛsõ awufoɛ, anaakyɛ yɛbɔ mbaeɛ yɛma bɛ.

Ebiemɔ kã kyɛ bɛkɔhora ne awufoɛ kodwudwo. Nakoso ɔngɔhora ngɔyɛ yé. Bɔ yasua ye kesaalae ne amaa yanwu kyɛ awufoɛ “nze hwee.” Bɛbɔ b’adwene yɛ bɛ kyɛ bɛkora bɛne b’adɔfoɛ bɔ bawuwu ne di ngitahoɛ ne, bɛne adaemoni bɔ bɛyɛ bɛnwo kyɛ sona bɔ wawu ne yeɛ bedi ngitahoɛ ɔ. Yeti sɛ yenwu nahorɛ dwirɛ bɔ ɔfa awufoɛ nwo a, ɔbɔ yɛnwo waen fi adaemoni nwo. Yehowa bɔ yɛ kɔkɔ wɔ awufoɛ bɔ yɛkɔbɔ mmɔden kyɛ yɛne bɛ koli ngitahoɛ nanwo, ofikyɛ, ɔse kyɛ sɛ yɛne adaemoni di ngitahoɛ a, bɛkɔha yɛ.​—Kenga Deuteronomi 18:​10-​12.

3. Sua nahorɛ dwirɛ bɔ ɔfa tebea bɔ awufoɛ wɔ nu ɔ

Wɔ ewiase mukoraati ne, ɔsono mmeni pẽe nala gyidie wɔ tebea bɔ ebie wu a, ɔkɔ nu nwo. Nakoso nná sɔ gyidie ne mukoraati yeɛ ɔte nahorɛ ɔ.

• Gyidie ahoroɛ bɔ ɔfa tebea bɔ awufoɛ wɔ nu beni yeɛ ɔwɔ nekaa bɔ ɛte ne ɔ?

VIDIO: Tebea Beni Yeɛ Awufoɛ Wɔ Nu Ɔ?​—Ye Bue Bie (1:19)

Kenga Ɔsɛngafoɛ 3:​20, na susu nzɛmmisa hemɔ anwo:

• Sɛ ɛnea ngyekyɛmuɛ he a, sɛ ebie wu a, tebea beni yeɛ ɔkɔ nu ɔ?

• Aso ɔkra bie wɔ yenu bɔ ɔtena ase wɔ yɛ wue sĩ anaa?

Bible ne maa yenwu Yesu damvo Lazarus wue nwo dwirɛ. Mmerɛ bɔ ɛkenga Yohane 11:​11-​14 ne, hyɛ bɔ Yesu hãfale tebea bɔ na Lazarus wɔ nu ne nzorɛ. Na susu nzɛmmisa hemɔ anwo

• Nzu yeɛ Yesu fa totole ewue nwo ɔ?

• Nzu yeɛ sɔ ndotohoɛ ne maa yenwu yɛfa tebea bɔ awufoɛ wɔ nu nanwo ɔ?

• Sɛɛ yeɛ ɛte ngã wɔ bɔ Bible ne kã fa tebea bɔ awufoɛ wɔ nu nanwo ɔ?

4. Yenya mvasoɛ yefi nahorɛ dwirɛ bɔ ɔfa awufoɛ nwo naso

Sɛ yenwu nahorɛ dwirɛ bɔ ɔfa ewue nwo a, ɔye awufoɛ nwo suroen biala fi yɛ so. Kenga Ɔsɛngafoɛ 9:​10, na susu nzɛmmisa he anwo:

• Aso awufoɛ kɔhora kɔha yɛ?

Bible nu nahorɛ dwirɛ ne koso bɔ yɛnwo waen fi gyidie bɔ ɔfa awufoɛ bɔ yekohyire obuo yɛkɔma bɛ, anaa yɛkɔsõ bɛ nanwo. Kenga Aizaya 8:​19 ɔne Nyekyire 4:​11, na susu nzɛmmisa he anwo:

• Ɛnea a, sɛɛ yeɛ Yehowa te ngã wɔ ebie bɔ ɔpena mmokalɛ fi awufoɛ berɛ, anaa ɔsõ ebie bɔ wawu ne ɔ?

5. Nahorɛ dwirɛ bɔ ɔfa ewue nwo ne kyekye yɛ wora

Bahyirehyire mmeni pẽe kyɛ sɛ bewu a, bekonwu amaneɛ ɔnate bɔne bɔ bɛyɛle nati. Nakoso ɔte awerɛkyekye ma yɛ kyɛ yekonwu kyɛ ebie wu a, ​—onnwu amaneɛ biala, ɔmva yenwo kyɛ ɔyɛle bɔne bie ne. Kenga Romanfoɛ 6:​7, na susu nzɛmmisa he anwo:

• Bible ne maa yenwu kyɛ sɛ ebie wu a, na walé yenwo wafi bɔne nwo, yeti esusu kyɛ bɔne bie bɔ ebie ayɛ apɛnu ne kɔhora kɔmaa okonwu amaneɛ wɔ ye wue sĩ anaa?

Mmerɛ bɔ yegu so yenwu Yehowa yé ne, ɔkɔmaa yekonwu kyɛ ɔngɔmma awufoɛ ngonwu amaneɛ llé. Kenga Deuteronomi 32:4 ɔne 1 Yohane 4:​8, na susu nzɛmmisa hemɔ anwo:

• Aso Nyameɛpiri bɔ ole subaen ahoroɛ bɔ ɔyɛ nyemene, bɔ y’asua yenwo nikyee wɔ ngyekyemuɛ he anu ne kɔyɛ awufoɛ ayayadeɛ anaa?

• Aso nahorɛ dwirɛ bɔ ɔfa awufoɛ nwo bɔ anwui ne, wakyekye wɔ wora anaa? Nzuati ɔ?

YEMUABƆLƐ

Sɛ ebie wu a, ne ye ngõa awa ayieleɛ. Awufoɛ nnwu amaneɛ, na bɛngɔhora ngɔha ateasefoɛ.

Ndimu

• Sɛ yewu a, tebea beni yeɛ yekonu ɔ?

• Mvasoɛ beni yeɛ yenya yefi nahorɛ dwirɛ bɔ ɔfa awufoɛ nwo naso ɔ?

• Sɛɛ yeɛ nahorɛ dwirɛ bɔ ɔfa awufoɛ nwo ne kyekye yɛwora ɔ?

NEA ƐHE KOSO

Nea bɔ edwirɛ “ɔkra” kyire paa wɔ Bible nanu ɔ.

“Nzu Yeɛ Ole Ɔkra Ne?” (Edwirɛ bɔ ɔwɔ intanɛt so)

Nea kyɛ Nyameɛpiri yɛ abɔneɛfoɛ ayayadeɛ wɔ hell anaa.

Aso Hell Te Nekaa Pɔtee Bɔ Bɛyɛ Sona Ayayadeɛ Anaa? 3:​07

Aso odikyɛ yesuro awufoɛ?

Awufoɛ Honhom​—Aso Bɛkɔhora Bɛkɔboka Wɔ, Anaa Bekopira Wɔ? Bɛwɔ Berɛ Amba? (brohyeɔ)

Nea kyɛbɔ nahorɛ dwirɛ bɔ ɔfa tebea bɔ awufoɛ wɔnu nwo dwirɛ, bɔ bĩaa bie suane ne kyekyele ye wora ɔ.

“Mmuaeɛ Bɔ Enu Laberɛ Bɔ Nyane Ye Wɔ Bible Nanu Ne Maa Menye Gyele” (The Watchtower, February 1, 2015)