ADESUA 51
Ɛkɔyɛ Sɛɛ Na Wɔ Noanu Dwudwolɛ Asɔ Yehowa Nye?
Mmerɛ bɔ Yehowa bɔle yɛ ne, ɔmane yɛ akyɛdeɛ bie bɔ ɔyɛ nwanwa ɔ—sɔ akyɛdeɛ ne yeɛ ole dwudwolɛ. Aso kyɛbɔ yɛfa sɔ akyɛdeɛ ne yedi dwumaa nanwo hia ye anaa? Yóo, yenwo hia ye paa! (Kenga Yakobo 1:26.) Yede, yɛkɔyɛ sɛɛ na yafa yɛnoa nu dwudwolɛ yali dwumaa wɔ atẽe bɔ ɔsɔ Yehowa nye so ɔ?
1. Sɛɛ yeɛ yɛkɔfa akyɛdeɛ bɔ yeɛ ole dwudwolɛ ne yekoli dwumaa ɔ?
Bible ne kã kyire yɛ kyɛ “yɛhyehyɛ yɛnwo ngunaen na yɛbokaboka yɛnwo.” (1 Tɛsalonikafoɛ 5:11) Aso ɛse ebiemɔ bɔ behia ngunaenhyɛ ɔ? Nzu yeɛ ɛkɔhora kɔyɛ kɔfa kɔboka bɛ ɔ? Ma benwu kyɛ edwene bɛnwo. Ebia ɛkɔhora kɔhã bɔ wɔnye gye yenwo wɔ bɛnwo kohyire bɛ. Aso ɛse twerɔnzɛm bie bɔ ɔkɔhora kɔhyɛ ebie bɔ ɛse ye ngunaen anaa? Twerɔnzɛm pẽe wɔ berɛ bɔ ɛkɔhora kɔfa koli dwumaa kɔboka bɛ ɔ. Kae kyɛ, kyɛbɔ ɛkɔhã edwirɛ bie ne kɔhora kɔhyɛ afoforɛ ngunaen paa. Yeti bɔ mmɔden kyɛ mmerɛ biala, ɛne afoforɛ kodwudwo wɔ ayemye ne abotare atẽe so.—Anyandera 15:1.
2. Dwudwolɛ beni yeɛ odikyɛ yɛpo ɔ
Bible ne kã kyɛ: “Nnɛmɔmaa edwirɛ bɔ waporɔ fite fi ɛmɔnoa nu.” (Kenga Ɛfesofoɛ 4:29.) Ɛhe kyire kyɛ, ɔnzɛkyɛ yɛkã dwudwolɛ fĩɛ, anaa yɛkã dwudwolɛ bɔ ɔkɔhora kɔha afoforɛ yekyire bɛ. Afei koso, ɔnzɛkyɛ yedi afoforɛ nwo nzɛkure anaa yɛsɛkye bɛ dumaa.—Kenga Anyandera 16:28.
3. Nzu yeɛ ɔkɔboka yɛ maa yɛkɔhã edwirɛ bɔ ɔhyɛ ngunaen ɔ?
Mmerɛ pẽe ne, edwirɛ bɔ yɛkã ne maa afoforɛ nwu bɔ ɔwɔ y’ahõne anaa y’adwene nu ɔ. (Luka 6:45) Yeti odikyɛ yɛbɔ mmɔden yɛfa y’adwene yesie nningyein pá so—nningyein bɔ ɔtengyɛ, bɔ yenwo te, bɔ okyire ɔdɔ, ɔne bɔ animnyam wɔ nu so. (Filipifoɛ 4:8) Sɛ yɛkɔhora yɛkɔfa y’adwene yekosie ɛhemɔ so a, odikyɛ yɛye yɛ namvoa ɔne nningyein bɔ yɛfa yɛ gyegye yɛnye ne nyanza nu. (Anyandera 13:20) Afei koso ɔte pá kyɛ, kora bɔ yɛkɔhã edwirɛ bie ne, yekolimoa yɛkɔdwene yenwo. Susu kyɛbɔ wɔ noa nu dwudwolɛ kɔhora kɔhã afoforɛ nanwo. Bible ne kã kyɛ: “Edwirɛ bɔ bɛkã ye bumbum ne tekyɛ bɔ ɛfa dadeɛ wowɔ ebie ɔ, na bɛbɔ bɛse nworɛ dwudwolɛ sa anwonyerɛ.”—Anyandera 12:18.
SUA PẼE BOKASO
Sua atẽe bɔ ɛkɔfa so kodwudwo maa ɔkɔsɔ Yehowa nye, na wahyɛ afoforɛ ngunaen ɔ.
4. Nea wɔ noanu dwudwolɛ yé
Ɔtɔ mmerɛ bie a, yenu biala kora kã edwirɛ bie maa yesĩ ne, yenu yɛnwo. (Yakobo 3:2) Kenga Galatiafoɛ 5:22, 23, na susu nzɛmmisa hemɔ anwo
Subaen pá hemɔ anu beni, yeɛ ɛkɔhora kɔbɔ yenwo mbaeɛ na wamaa ahora anea wɔ dwodwolɛ yé ɔ? Sɛɛ yeɛ sɔ subaen pá hemɔ kɔhora kɔboka wɔ ɔ?
Kenga 1 Korintofoɛ 15:33, na susu nzɛmmisa he anwo:
Ngɛndɛensoɛ beni, yeɛ wɔ nnamvo ne nningyein bɔ ɛfa gyegye wɔnye ne kɔhora konya wɔ wɔ́ dwudwolɛ so ɔ?
Nzu yeɛ ɔkɔhora kɔhã kyɛbɔ esi dwudwo ne ɔ?
Kenga Ɔsɛngafoɛ 3:1, 7, na susu nzɛmmisa he anwo:
Mmerɛ beni yeɛ nyanza wɔ nu kyɛ ɛkɔmua wɔ noa, anaakyɛ ɛkɔnwodɛ mmerɛ pá kora na adwudwo ɔ?
5. Kã afoforɛ nwo dwirɛ pá
Wɔ vidio nanu ne, nzuati yeɛ na aliemaa ne pena kyɛ ɔyakyi edwirɛ bɔ ne ɔkekã fa afoforɛ nwo ne ɔ?
Nzu yeɛ ɔyɛle fa sesãne ye subaen ɔ?
Kenga Ɔsɛngafoɛ 7:16, na susu nzɛmmisa he anwo:
Sɛ ɔyɛ yɛ kyɛ yɛhã ebie nwo dwirɛ bɔ ɔttemayé a, nzu yeɛ odikyɛ yɛkae ɔ?
Kenga Ɔsɛngafoɛ 7:21, 22, na susu nzɛmmisa he anwo:
Sɛ ebie kã wɔnwo dwirɛ bɔ ɔttemayé a, sɛɛ yeɛ sɔ ngyekyɛmuɛ he kɔhora kɔboka wɔ na amvɛ yaa ɔ?
6. Sɛ ɛne w’abusuafoɛ dwudwo a, da ayemye ali
Yehowa pena kyɛ yɛne y’abusuafoɛ dwudwo wɔ ayemye so. Bɔ VIDIO ne, na susu nzɛmmisa hemɔ nwo.
Nzu yeɛ ɔkɔhora kɔboka wɔ maa ɛne w’abusua kodwudwo wɔ ayemye so ɔ?
Kenga Ɛfesofoɛ 4:31, 32, na susu nzɛmmisa he anwo:
Dwudwolɛ beni yeɛ sɛ yɛkã a, ɔkɔhora kɔfa anigye kɔwa abusua nu ɔ?
Yehowa lale kyɛbɔ né osi te ngã wɔ Ɔwa Yesu nwo nali. Kenga Mateo 17:5, na susu nzɛmmisa he anwo:
Ɛkɔyɛ sɛɛ na asuesua Yehowa, wɔ atẽe bɔ ɛfa so ne w’abusuafoɛ dwudwo nanwo ɔ?
Pena yenwo atẽe bɔ ɛkɔfa so kɔkamvo afoforɛ ɔ
EBIEMƆ KÃ KYƐ: “Mede mahã m’adwene. Sɛ ɔkɔ ha ebie a, ɔmva menu.”
Aso ɛne bɛbɔ bɛkã sɔ ne y’adwene anaa? Nzuati ɔ, anaa nzuati yeɛ ɛne bɛ nyɛ adwene ɔ?
YEMUABƆLƐ
Edwirɛ bɔ yɛkã kɔhora kɔboka afoforɛ anaa okopira bɛ. Yeti odikyɛ yɛdwene edwirɛ bɔ yɛkã, mmerɛ bɔ yɛkɔhã, ɔne kyɛbɔ yɛkɔhã ye nanwo paa.
Ndimu
Atẽe beni aso yeɛ ɛkɔhora kɔfa wɔ dwudwolɛ kɔboka afoforɛ ɔ?
Dwudwolɛ beni yeɛ ɛpena kyɛ ɛyakyi ye hãnɛ ɔ?
Nzu yeɛ ɔkɔhora kɔboka yɛ, na yala ayemye ali wɔ yɛ dwudwolɛ nu na wahyɛ afoforɛ ngunaen ɔ?
NEA ƐHE KOSO
Nzu yeɛ ɔkɔhora kɔboka yɛ maa yɛkɔhã edwirɛ bɔ ɔyɛ fɛ yekohyire afoforɛ ɔ?
Nea bɔ ɔkɔhora kɔboka wɔ maa ɛkɔyakyi dwudwolɛ fĩɛ hãnɛ ɔ.
“Aso Ɔte Bɔne Kyɛ Ngɔdome Ebie Anaa?” (Edwirɛ bɔ ɔwɔ intanɛt so)
Nea bɔ ɛkɔyɛ na anni afoforɛ nwo nzekure ɔ.
Nea kyɛbɔ Yehowa bokale bĩaa bie maa ɔyakyili dwudwolɛ fĩɛ hãnɛ ɔ.
“Nhyɛle Yebo Nzusule Kyɛbɔ Ne M’abrabɔ Si Kɔ Nanwo Anyeborolɛ So” (The Watchtower, August 1, 2013)