ADESUA 52
Bɔ Yeti Yeɛ Odikyɛ Yɛmaa Yɛ Ndadeɛ, Ɔne Kyɛbɔ Yɛte Nanwo Hia Yɛ Ɔ
Yemukoraati yɛ pena kyɛ yesiesie yɛnwo maa yɛnwo yɛ nyemene. Sɛ yɛfa Bible nu nnyinasoɛdwirɛ yɛyɛ adwuma a, nná bɔ yekuro ngome yeɛ yɛkɔyɛ ɔ, na mmom bɔ ɔkɔsɔ Yehowa nye ɔ. Ɛmɔma yesusu Bible nu nnyinasoɛdwirɛ biemɔ nwo yɛnea.
1. Bible nu nnyinasoɛdwirɛ benimɔ yeɛ odikyɛ ɔboka yɛ maa yɛnea yɛ ndaadeɛ wuralɛ, ɔne y’anwosiesie yé ɔ?
Odikyɛ yɛmaa ‘yɛ anwosiesie fata, na yɛfa adwene bɔ enu te, ɔne anwobrɛaseɛ adwene yesiesie yenwo,’ na odikyɛ yɛbɔ mmɔden kyɛ yɛkɔmaa y’anwosiesie ne “Nyameɛpiri sõen koyia.” (1 Timoteo 2:9, 10) Susu Bible nu nnyinasoɛdwirɛ nna hemɔ nwo nea: (1) Odikyɛ y’anwosiesie yɛ bɔ “ɔfata” ɔ. Kyɛbɔ anwui wɔ asafo nhyiamu bo ne, ɔsono bɔ Yehowa asomvoɛ biala kuro ɔ, nakoso yɛ ndaadeɛ wuralɛ ɔne kyɛbɔ yesiesie yɛ ti nwãa ne, okyire kyɛ yebu Nyameɛpiri bɔ yɛsõ ye ne. (2) “Anwobrɛaseɛ nu” bɔ yɛfi yesiesie yɛnwo ne kyire kyɛ, yɛngowura ndaadeɛ bɔ ɔkɔtwetwẽ nnaa nwo akɔnnɔ anaa mmenia adwene kɔwa yɛnwo so ɔ. (3) Sɛ yaanyɛ y’adwene kyɛ anwosiesie ne ataadeɛ foforɛ biala bɔ ɔkɔwa so ne yɛkɔtɔ bie yekowura a, ne yɛda “adwene bɔ enu te” ali. (4) Odikyɛ yɛmaa yanwosiesie ne “Nyameɛpiri sõen yia” na yɛmaa afoforɛ nwui kyɛ, yɛsõ nahorɛ Nyameɛpiri ne.—1 Korintofoɛ 10:31.
2. Sɛɛ yeɛ y’anwosiesie kɔhora kɔhã yeliemamɔ gyidifoɛ ɔ?
Yelé yenwo atẽe kyɛ yɛye ndaadeɛ bɔ yekowura ɔ, nakoso odikyɛ yɛnea yé kyɛ yɛngɔma y’anwosiesie ngɔha afoforɛ. Odikyɛ yɛbɔ yɛnwo mmɔden kyɛ, yɛngɔyɛ nikyeebiala maa ɔngɔha afoforɛ na mmom “yɛkɔyɛ bɔ [yɛ] biengo kuro na ɔkɔhyɛ ye ngunaen ɔ.”—Kenga Romanfoɛ 15:1, 2.
3. Sɛɛ yeɛ y’anwosiesie kɔhora kɔhwẽ afoforɛ maa bɛkɔwa nahorɛ sõen nu ɔ?
Yɛbɔ yɛnwo mmɔden kyɛ tebea biala nu ne yekosiesie yɛnwo yé, sɛ yɛkɔ asafo nhyiamu anaakyɛ yɛnate asɛnga nu a, yɛnea kyɛ y’anwosiesie te kama. Yɛ mbena kyɛ yɛkɔye mmenia adwene kofi edwirɛ bɔ yenwo hia bɔ yɛkã yekyire bɛ naso. Na mmom, y’anwosiesie kɔhora kɔhwẽ mmenia kɔwa nahorɛ nanu, na wamaa “animnyam ahã yɛ Agyengwa ngyerɛkyerɛ” ne.—Tito 2:10.
SUA PẼE BOKASO
Kyɛ Kristofoɛ ne, nea kyɛbɔ odikyɛ yɛmaa y’anwosiesie ne yɛ ndaadeɛ wuralɛ yɛ kama ɔ.
Y’anwosiesie kɔhora kohyire kyɛ yebu bɛbɔ bele tumi anaakyɛ yemmu bɛ. Ɔwɔ nu kyɛ Yehowa nea bɔ ɔwɔ yɛ ahõne nu de, nakoso yɛkɔhora yɛkɔfa y’anwosiesie so yekohyire kyɛ yebu ye
4. Anwosiesie bɔ ɔte pá ne kyire kyɛ, yelé obuo ma Yehowa
Nzuati yeɛ y’anwosiesie bɔ yɛkɔmaa ɔkɔyɛ kama nanwo hia yɛ paa ɔ? Kenga Edwein 47:2, na susu nzɛmmisa hemɔ anwo:
Sɛ yɛmaa ɔtena y’adwene nu kyɛ yɛte Yehowa anamusifoɛ a, sɛɛ yeɛ ɛhene kɔhã kyɛbɔ yesiesie yɛnwo ne ɔ?
Ɛnea a, ndeaseɛ wɔnu kyɛ yekosiesie yɛnwo yé, mmerɛ bɔ yɛkɔ asafo nhyiamu anaa yɛkɔ asɛnga ne anaa? Nzuati ɔ, anaa nzuati yeɛ ndeaseɛ nni nu ɔ?
5. Kyɛbɔ yekosi gyinaeɛ pá wɔ y’anwosiesie ne yɛ ndaadeɛ wuralɛ nwo ɔ
Ɔmva yenwo kyɛ yɛ ndaadeɛ nyɔboɛ yɛse anaakyɛ ye nyɔboɛ nyɛ se ne, odikyɛ yɛmaa yenye te, na ɔfata tebea bɔ yɛwɔ nu ne. Kenga 1 Korintofoɛ 10:24 ɔne 1 Timoteo 2:9, 10. Na nea nikyehorɛ tibɔ yɛnwura ndaadeɛ bɔ . . .
yenye nde na ɔte basaa.
ɔkyekye yɛ na ɔkenyaen nnaa nwo akɔnnɔ ɔ.
Ɔwɔ nu kyɛ Kristofoɛ nné Mose Mmraa ne bo de, nakoso ɔmaa yenwu Yehowa adwene wɔ ndaadeɛ wuralɛ nwo. Kenga Deuteronomi 22:5, na susu nzɛmmisa he anwo:
Nzuati yeɛ ɔnzɛkyɛ brienzua wura ataadeɛ bɔ ɔkɔmaa okosoma brasua, na brasua koso wura ataadeɛ bɔ ɔkɔmaa okosoma brienzua ɔ?
Kenga 1 Korintofoɛ 10:32, 33 ɔne 1 Yohane 2:15, 16, na susu nzɛmmisa hemɔ nwo:
Nzuati yeɛ odikyɛ yɛnea yé, na y’anwosiesie ando afoforɛ anaa bɛbɔ bɛwɔ asafo nanu ne hintidua ɔ?
Ndaadeɛ wuralɛ ne anwosiesie beni yeɛ ɔwɔ nekaa bɔ ɛte ne ɔ?
Esusu kyɛ sɔ anwosiesie nanu bie wɔ berɛ a, ɔttemaye mma Kristoniɛ anaa? Nzuati ɔ, anaa nzuati ɛkã sɔ ɔ?
Yɛkɔhora yekosiesie yɛnwo wɔ atẽe pẽe so maa ɔkɔsɔ Yehowa nye
EBIEMƆ KÃ KYƐ: “Me lé yenwo atẽe kyɛ mewura ataadeɛ biala bɔ mekuro ɔ.”
Edé tonu sɔ? Nzuati ɔ, anaa nzuati enné ndo nu ɔ?
YEMUABƆLƐ
Sɛ yɛnea yɛ ndaadeɛ wuralɛ ɔne y’anwosiesie yé a, yekyire kyɛ yebu Yehowa ne afoforɛ.
Ndimu
Nzuati yeɛ yɛ ndaadeɛ wuralɛ ne y’anwosiesie nwo hia Yehowa ɔ?
Nnyinasoɛdwirɛ beni yeɛ ɔkɔhora kɔboka yɛ, mmerɛ bɔ yesi y’anwosiesie nwo gyinaeɛ ne?
Sɛɛ yeɛ y’anwosiesie kɔhora kɔhã kyɛbɔ afoforɛ bu nahorɛ sõen ɔ?
NEA ƐHE KOSO
Nea adwene bɔ w’anwosiesie kɔhora kɔmaa afoforɛ konya kɔfa wɔnwo ɔ.
Nea nzunzuasoɛ bɔ ɔwɔ tatoo so kora, na afa wɔnwo awura nu.
“Nzu Yeɛ Bible Ne Kã Fa Tatoo Nwo Ɔ?” (Edwirɛ bɔ ɔwɔ intanɛt so)
Sɛ esi gyinaeɛ ahoroɛ a, nea nnyinasoɛdwirɛ foforɛ bɔ ɔkɔhora kɔboka wɔ ɔ.
“Aso Wɔ Ndaadeɛ Wuralɛ Hyɛ Nyameɛpiri Animnyam?” (The Watchtower, September 2016)
Maame bie bɔ ne ɔpena kyɛ ɔsɔ Nyameɛpiri nye ne, sɛɛ yeɛ osuane kyɛ okohyire obuo kɔma afoforɛ gyinaeɛsi fa anwosiesie nwo ɔ?
“Né Ndaadeɛ Wuralɛ Ne Anwosiesie Te Nikyee Bɔ Ɔha Me Paa Ɔ” (Awake!, December 22, 2003)