ADESUA 53
Ye Anigyedeɛ Bɔ Ɔsɔ Yehowa Nye
Yehowa te “anigye Nyameɛpiri.” (1 Timoteo 1:11) Na ɔpena kyɛ yɛnye gye na yenya asetena nu anigye daa. Sɛ yɛye mmerɛ bie yesie berɛ yɛfa yedé yɛ nwomeɛ yefi yɛ adwuma nwo a, ye nye gye. Wɔ adesua he anu ne, yɛkɔnea kyɛbɔ yɛkɔhora yɛkɔfa yɛ mmerɛ bɔ yɛfa yedé yɛ nwomeɛ ne yekoli dwumaa yé, na wamaa yɛnye agye—kyɛbɔ ɔkɔyɛ a, ɔkɔsɔ Yehowa nye koso.
1. Sɛ yɛye anigyedeɛ bie a, nzu yeɛ odikyɛ yesusu yenwo ɔ?
Sɛ edé wɔ nwomeɛ a, nzu yeɛ ekuro kyɛ ɛyɛ ɔ? Ebiemɔ kuro kyɛ bɛfa bɛ mmerɛ bɔ bɛkɔfa bekole bɛ nwomeɛ wɔ awuro ne—bɛfa bɛkenga nwomaa, betie dwein, bɛnea t.v, anaa bɛkɔhɔ intanɛt so. Afoforɛ koso ne bɛ nnamvomɔ bonu fa nningyein biemɔ tekyɛ—nzuenu bialɛ, ludu bɔlɛ, ɔwale, anaa games ahoroɛ bedi angorɛ. Ɔmva yenwo ne bɔ yɛnye gye nwo ne, odikyɛ yɛnea yé kyɛ, yɛ gyinaeɛ bɔ ɔfa anigyedeɛ nwo ne “sɔ Awurade nye.” (Ɛfesofoɛ 5:10) Odikyɛ yɛte yebo kyɛ anigyedeɛ pẽe wɔ berɛ a, nningyein bɔ ɔwɔ nu ne, Yehowa nye ngye yenwo koraa, ebie tekyɛ ngodinn, adwamanzɛm, anaa ahonhomnzɛmlilɛ. (Kenga Edwein 11:5.) Sɛ yɛkɔhora yɛkɔye anigyedeɛ bɔ ɔfata a, nzu yeɛ ɔkɔhora kɔboka yɛ ɔ?
Sɛ yɛfa nnamvoa bɔ bɛdɔ Yehowa a, bɛkɔhora bɛkɔboka yɛ maa yɛkɔye anigyedeɛ bɔ ɔte pá ɔ. Kyɛbɔ yelimoa yesuane ye wɔ adesua bɔ ɔpɛle nu ne, “bɔ ɔne nyanzafoɛ nate ne konwu nworɛ.” Afei koso, sɛ yɛne mmenia bɔ belle ɔdɔ biala bɛma Nyameɛpiri mmraa yɛbɔ a, “okoyie yɛ bɔne.”—Anyandera 13:20.
2. Nzuati yeɛ yenwo hia kyɛ, yɛte mmerɛ dodoɔ bɔ yɛfa yɛgyegye yɛnye naso ɔ?
Sɛ anigyedeɛ bɔ yɛkɔye ne ngɔsɛkye yɛne Yehowa afĩa po a, odikyɛ yɛnea yé na yaanzɛkye mmerɛ pẽe wɔ yenwo. Ɔba sɔ a, yengonya mmerɛ pẽe yɛngɔma dwumadié ahoroɛ bɔ yenwo hia nanwo. Bible ne hyɛ yɛ ngunaen kyɛ “odikyɛ yɛfa [yɛ] mmerɛ yedi dwumaa yé.”—Kenga Ɛfesofoɛ 5:15, 16.
SUA PẼE BOKASO
Nea kyɛbɔ odikyɛ esisi gyinaeɛ pá bɔ ɔfa anigyedeɛ nwo ɔ.
3. Po anigyedeɛ bɔ ɔmvata ɔ
Nzuati yeɛ odikyɛ yɛnea yé wɔ nningyein bɔ yɛfa yɛgyegye yɛnye nanwo ɔ? Bɔ VIDIO ne, na susu nzɛmmisa bɔ olili so he anwo.
Sɛɛ yeɛ angorɛ bɔ né bedi ye wɔ tete mmerɛ nu ne te kyɛ, ɛnnɛ deɛ bɔ bɛfa bɛgyegye bɛnye nala ɔ?
Wɔ vidio nanu ne, nzu yeɛ Danny sua fale nningyein bɔ bɛfa bɛgyegye bɛnye nanwo ɔ?
Kenga Romanfoɛ 12:9, na susu nzɛmmisa he anwo:
Sɛɛ yeɛ odikyɛ ɛmaa sɔ ngyekyɛmuɛ he kã nningyein bɔ ɛfa gyegye wɔnye ne ɔ?
Nningyein bɔ Yehowa kyi ne bie yeɛ ole beni? Kenga Anyandera 6:16, 17 ɔne Galatiafoɛ 5:19-21. Sɛ ɛkenga twerɔnzɛm nanu biala yie a, susu nzɛmmisa he anwo:
Nningyein bɔ wahã yenwo dwirɛ wɔ sɔ ngyekyɛmuɛ he anu ne, enu beni yeɛ ebie wɔ anigyedeɛ bɔ ɔwɔ berɛ ɛnnɛ nanu ɔ?
Kyɛbɔ ɛkɔye nningyein bɔ ɛfa gyegye wɔnye ne nyanza nu ɔ
Bisa wɔnwo kyɛ:
Nzu yeɛ ɔwɔ nu ɔ? Aso nningyein bɔ Yehowa nye gye yenwo wɔ nu anaa?
Me sɛkye mmerɛ wɔ yenwo? Aso ɔkɔpepɛ nningyein bɔ yenwo hia paa ne gya nu anaa?
Nwamɔ yeɛ bɛwɔ nu ɔ? Aso ɔkɔmaa ngopingyé mmenia bɔ bɛnnɔ Yehowa, anaakyɛ ɔkɔmaa mene bɛ kɔbɔ?
Yenwo hia kyɛ yɛtwẽ yɛnwo yefi asane nwo ndɛ. Ɛhene ati yeɛ odikyɛ yɛtwẽ yɛnwo yefi anigyedeɛ biala bɔ yenwui kyɛ ɔngɔboka yɛ nwo ne
4. Fa wɔ mmerɛ di dwumaa yé
Bɔ VIDIO ne, na susu nzɛmmisa he anwo.
Ɔwɔ nu kyɛ na aliemaa bɔ ɔwɔ vidio nanu ne nnea nningyein tɛɛ de, nakoso sɛɛ yeɛ mmerɛ dodoɔ bɔ ne ɔfa nea ne hãne ye ɔ?
Kenga Filipifoɛ 1:10, na susu nzɛmmisa he anwo:
Sɛɛ yeɛ sɔ ngyekyɛmuɛ he kɔboka yɛ maa, yekonwu mmerɛ dodoɔ bɔ odikyɛ yɛfa yɛgye yɛnye ɔ?
5. Ye anigyedeɛ bɔ ɔfata ɔ
Ɔwɔ nu kyɛ anigyedeɛ pẽe wɔ berɛ a Yehowa nye ngye yenwo de, nakoso pẽe wɔ berɛ bɔ yenye gye yenwo ɔ. Kenga Ɔsɛngafoɛ 8:15 ɔne Filipifoɛ 4:8, na susu nzɛmmisa he anwo:
Anigyedeɛ bɔ ɔfata beni yeɛ ɛfa gyegye wɔ nye ɔ?
Ɛkɔhora konya anigye wɔ anigyedeɛ bɔ ɔfata bɔ ɛkɔfa kɔgyegye wɔnye nanu
EBIEMƆ KÃ KYƐ: “Sɛ mefa nningyein bɔ basabasayɛle, adwamanzɛm, anaa ahonhomnzɛmlilɛ wɔ nu me gyegye me nye, na maanyɛ bie a, bɔne biala nne nu.”
Nzu yeɛ ɛkɔhã ɔ?
YEMUABƆLƐ
Yehowa pena kyɛ yɛfa nningyein bɔ ɔfata yɛgyegye yɛnye.
Ndimu
Anigyedeɛ beni yeɛ odikyɛ Kristofoɛ po ɔ?
Nzuati yeɛ odikyɛ yɛnea yé wɔ mmerɛ dodoɔ bɔ yɛfa yɛgye yɛnye nanwo ɔ?
Nzuati yeɛ ɛpena kyɛ ɛfa nningyein bɔ ɔhyɛ Yehowa animnyam gyegye wɔ nye ɔ?
NEA ƐHE KOSO
Nea bɔ odikyɛ osi bɔ ɛkɔfa kɔgyegye wɔnye nwo gyinaeɛ kɔma wɔ ɔ.
“Aso Yehowa Adanzefoɛ Bra Vidio, Nwomaa, Ɔne Dwein Ahoroɛ Anaa?” (Edwirɛ bɔ ɔwɔ intanɛt so)
Nea kyɛbɔ ɛkɔhora kosi anigyedeɛ ɔne mmerɛ dodoɔ bɔ ɛfa dé wɔnwomeɛ nanwo gyinaeɛ pá ɔ.
“Aso Bɔ Ɛfa Gye Wɔnye Ne Fata Anaa?” (The Watchtower, October 15, 2011)
Wɔ edwirɛ “Ngoranile Sona Nu Nyiyimuɛ So” nu ne, nea bɔ ɔmaa bĩaa bie yɛle nzakraeɛ wɔ nningyein bɔ ɔfa gyegye yenye nanu ɔ.
Nea kyɛbɔ maame bie hora sili gyinaeɛ pá wɔ anigyedeɛ bɔ ahonhomnzɛmlilɛ wɔ nu nwo ɔ.