Y’ABRABƆ KYƐ KRISTOFOƐ
Nya Nyameɛpiri Adwene Wɔ Nningyein Nwo
Yɛpena kyɛ bɔ yɛkɔyɛ biala ne, ɔsɔ Yehowa nye. (An 27:11) Sɛ yɛkɔhora yɛkɔyɛ sɔ a, odikyɛ yɛmaa gyinaeɛ biala bɔ yekosi ne, ɔne Yehowa apɛdeɛ yia, mmerɛ po bɔ mmraa pɔtẽe biala nne berɛ bɔ ɔfa sɔ dwirɛ nanwo ne. Nzu yeɛ ɔkɔhora kɔboka yɛ maa yɛkɔyɛ sɔ ɔ?
Yɛ nhyehyɛeɛ fa kenga Bible ne daa. Mmerɛ biala bɔ yɛkɔkenga Bible ne, né waayɛ tekyɛ bɔ yɛne Yehowa bɔ ngɔmmɔ ne. Sɛ yesũa kyɛbɔ Yehowa ne ye mmenia lili, ɔne bɛbɔ bɛyɛle nningyein pá ne nningyein tɛ́ nanwo dwirɛ a, ɔkɔboka yɛ maa yekonya Yehowa adwene. Mmerɛ biala bɔ yɛpena kyɛ yesi gyinaeɛ ne, honhom krongron kɔhora kɔboka yɛ maa yɛkɔkae asũadeɛ ahoroɛ ɔne nnyinasoɛdwirɛ bɔ yanya yafi Nyameɛpiri Dwirɛ bɔ yasũa nanu ne.—Yoh 14:26.
Yɛ nhwehwɛmuɛ. Sɛ ɛbaasi gyinaeɛ bie a, bisa wɔnwo kyɛ, ‘Bible nu dwirɛ beni yeɛ ɔkɔhora kɔboka me maa ngonwu kyɛbɔ Yehowa te ngã wɔ me gyinaeɛsie nanwo ɔ?’ Bɔ Yehowa mbaeɛ ma ɔboka wɔ, na fa nnwinadeɛ bɔ yɛfa yɛyɛ nhwehwɛmuɛ bɔ ɔwɔ wɔ́ kuro dwudwolɛ nu ne di dwumaa. Sɛ ɛyɛ sɔ a, ɔkɔboka wɔ maa ekonya Bible nu nnyinasoɛdwirɛ bie bɔ ɔfa wɔ tebea nanwo ɔ.—Ed 25:4.
NEA VIDIO BƆ YEƐ OLE, ODIKYƐ YƐFA “ANIMIA YETU AMIRIKA NE”—DI ALEƐ BƆ ANWOSERƐ WƆ NU Ɔ23, NA YE NZƐMMISA BƆ OLILI SO HEMƆ NOA:
Nhyɛsoɛ beni yeɛ taluwa bɔ né ɔwɔ vidio nanu ne yiale ɔ?
Sɛɛ yeɛ ɛkɔhora kɔfa nnwinadeɛ bɔ yɛfa yɛyɛ nhwehwɛmuɛ ne koli dwumaa wɔ tebea bie bɔ ɔte sɔ nu ɔ?
Sɛ yɛdé mmerɛ yɛyɛ kokoanu adesua na yɛyɛ nhwehwɛmuɛ a, sɛɛ yeɛ ɔkɔhora kɔboka yɛ maa yekosi gyinaeɛ pá ɔ?—Heb 5:13, 14