Fa Botaeɛ Biemɔ Sie Wɔnye So Wɔ Ngaeɛlilɛ Mmerɛ Nanu

Afoɛ biala, Yehowa mmenia nea atẽe kyɛ bekoyia nu bɛkɔyɛ Ngaeɛlilɛ ne. Mmerɛ bɔ waha dapɛen kãa maa yayɛ Ngaeɛlilɛ ne, ɔne mmerɛ bɔ yayie ne, yenya yenwo atẽe sorongõ bɔ yɛkɔfa yɛkɔye Yehowa ayɛ, na yala ye ase wɔ agyedeɛ bɔ wafa wama yɛ nanwo. (Ɛfe 1:3, 7) Kyɛ nneasoɛ ne, yɛyere yɛnwo yɛto asaa yɛfrɛ mmenia maa bɛba Ngaeɛlilɛ ne bie. Ebiemɔ toto bɛ nningyein yé kyɛbɔ ɔkɔyɛ a, bɛkɔhora bɛkɔyɛ atẽepakyelɛ bokafoɛ wɔ March anaa April nu, na bɛkora bɛfa nnɔnhwere 30 anaa 50 yeɛ bɛyɛ sɔ ɔ. Aso wɔnye gye yenwo kyɛ ɛkɔyɛ pẽe wɔ asɛnga adwuma nanu wɔ Ngaeɛlilɛ mmerɛ he anu anaa? Nzu yeɛ ɔkɔhora kɔboka wɔ maa ɛkɔyɛ sɔ ɔ?

Sɛ yedimoa yɛyɛ yenwo nhyehyɛeɛ yɛto berɛ a, ɔboka paa. (An 21:5) Ɔnate kyɛ Ngaeɛlilɛ ne apingyé paa nati, odikyɛ yɛhyɛ yebo yɛyɛ yenwo nhyehyɛeɛ kesaalae. Dwenedwene kyɛbɔ ɛkɔhora kɔtrɛ wɔ sõen adwuma nu wɔ Ngaeɛliliɛ mmerɛ nanu, ɔne kyɛbɔ ɛkɔhora kodwu sɔ botaeɛ nanwo ɔ. Afei, srɛ Yehowa kyɛ oyira wɔ mmɔdenmɔ naso.—1Yo 5:14, 15.

Aso ɛkɔhora kosusu atẽe ahoroɛ biemɔ bɔ ɛkɔfaso kɔtrɛ wɔ sõen adwuma nu, wɔ Ngaeɛlilɛ mmerɛ nanu nanwo anaa?