Ɛkɔyɛ Sɛɛ Né Amaa W’abusũa Nye Agye?

Yehowa kuro kyɛ mmusũa nye gye. (Edw 127:3-5; Nwd 9:9; 11:9) Nakoso, ɔnate kyɛ asetena nu ayɛ se, na abusũa nanufoɛ kora di mvomsoɛ nati, ɔtɔ mmerɛ bie a, yengonya anigye bɔ yɛpena kyɛ yenyae ne. Yede, sɛ anigye kɔhora kɔwa abusũa nu a, nzu yeɛ odikyɛ abusũa nanuniɛ biala yɛ ɔ?

Odikyɛ brienzua fa anidie ma ɔye, na onya mmerɛ ma ye. (1Pe 3:7) Ɔnzɛkyɛ ɔnea atẽe kyɛ ɔye kɔyɛ nikyee biala pɛpɛɛpɛ, na mmom, nikyee biala bɔ ɔyɛ fa boka ɔne abusũa ne, odikyɛ okyire yenwo anisɔ. (Kol 3:15) Afei koso, ɔmaa ɔye nwu kyɛ ɔdɔ ye, na ɔkamvo ye.—Any 31:28, 31.

Brasua koso, odikyɛ ɔboka ohũ. (Any 31:12) Afei odikyɛ ɔbrɛ yenwo ase ma ye, ná ɔne ye bɛyɛ kõ. (Kol 3:18) Ɔnzɛkyɛ otutu edwirɛ bumbum kyire ye, na mmom odikyɛ ɔmaa ye noa dwudwolɛ yɛ fɛ, ná ɔkã edwirɛ pá fa yenwo.—Any 31:26.

Odikyɛ awofoɛ nya mmerɛ ma bɛ mmaamɔ. (Deu 6:6, 7) Afei koso, odikyɛ bɛmaa benwu kyɛ bɛdɔ bɛ. (Mat 3:17) Sɛ bɛyɛ nikyee bɔ ɔttemayé koso a, odikyɛ befi ɔdɔ nu bɛtwẽ bɛso na betu bɛfo.—Ɛfe 6:4.

Ngwalaa koso, odikyɛ betie b’awofoɛ, na bedi bɛ ni. (Any 23:22) Odikyɛ ngwalaa ne b’awofoɛ bɔ ngɔmmɔ, na bɛkã ɔhaw bɔ beyia ne bekyire bɛ. Afei koso, odikyɛ bɛfa obuo bɛma bɛ. Na sɛ betu bɛfo anaa bɛtwẽ bɛso a, odikyɛ bedé bɛto nu.—Any 19:20.

NEA VIDIO BƆ YEƐ OLE, MÁ WƆNYE GYE WƆ W’ABUSUA NU, NA YE NZƐMMISA HE NOA:

Wɔ vidio nanu ne, nzu yeɛ benu biala yɛle maa anigye wale abusũa nanu ɔ?