“Ɛ́mɔyɔ Bɔ Edwirɛ Ne Kã Ne”

1-2. Bɛbɔ bɛsõ Nyameɛ ne, nzu yeɛ ɔmaa bɛnye gye ɔ? (Yakobo 1:​22-25)

YEHOWA ne Ɔwa bɔ okuro ye dwirɛ ne, bɛpena kyɛ yɛnye gye. Bɔ ɔhworɔle Edwein 119:2 ne hane kyɛ: “Bɛ bɔ bedi ye noa dwirɛ so, ná bɛfa b’ahone amukoraa bedi ye si ne, benya saleɛ.” Yeɛ Yesu wora hane kyɛ: ‘Bɛ bɔ bɛte Nyameɛ dwirɛ ne ná bedi so ne mmom yeɛ bɛnya saleɛ ɔ!’—Luka 11:28.

² Yehowa asomvoɛ de, yɛnye gye paa. Nzuati ɔ? Nningyein pee yeɛ ɔmaa yɛnye gye ɔ. Nakoso ko bɔ yenwo hia paa yeɛ ole kyɛ, yɛkenga Nyameɛ Dwirɛ ne, na yɛyere yɛnwo kyɛ yɛkɔfa bɔ yasua ne yɛkɔbɔ yɛ bra.—Kenga Yakobo 1:​22-25.

3. Nyameɛ Dwirɛ ne bɔ yɛkenga ne, sɛ yɛfa yɛbɔ yɛ bra a, mvasoɛ beni yeɛ yenya yefi so ɔ?

³ Sɛ ‘yɛyɛ bɔ edwirɛ ne kã ne’ a, mvasoɛ pee yeɛ yekonya yekofi so ɔ. Ebie yeɛ ole kyɛ, yɛse kyɛ sɛ yɛyɛ sɔ a, ɔmaa yɛsɔ Yehowa nye, na ɛhene maa yɛnye gye. (Nwo. 12:13) Afei koso, sɛ yɛyere yɛnwo yɛfa Nyameɛ Dwirɛ ne yɛbɔ yɛ bra a, ɔkɔmaa yɛne y’abusuafoɛ ne aliemaamɔ afia kɔyɛ kama. Ebieku koso, ɔhaw bɔ bɛbɔ bɛmva Yehowa mmraa bɛnyɛ hwee ne fa nu ne, ebie ndo yɛ. Ebia yedwudwo ye, edi yenwo adanzeɛ sɔ. Ɛhene ati, yɛne Ɔhene Dawide yɛ adwene. Mmerɛ bɔ ɔhane Yehowa mmraa ne ye ahyɛdeɛ nwo dwirɛ yiele ne, ɔhane kyɛ: “Sona di so a, onya akatuaa piri.”—Edw. 19:​7-11.

4. Nzuati yeɛ ɛyɛ a ɔyɛ se kyɛ yɛkɔfa Nyameɛ Dwirɛ ne yɛkɔbɔ yɛ bra ɔ?

⁴ Sɛ yɛkɔhora yɛkɔfa Nyameɛ Dwirɛ ne yɛkɔbɔ yɛ bra a, sana yɛkenga ye daa, na yɛdwenedwene yenwo. Ɛhene yeɛ ɔkɔmaa yekonwu bɔ Yehowa pena kyɛ yɛyɛ ɔ. Nakoso bɔ ɔte yeɛ ole kyɛ, ɔnate kyɛ nningyein pee gua yɛ so nati, ɛyɛ a ɔyɛ se kyɛ yɛkɔyɛ sɔ ɔ. Yeti odikyɛ yɛhyɛ da yɛpena mmerɛ bɔ yɛkɔfa yɛkɔyɛ sɔ ɔ. Yede, ɛmɔma yɛnea nningyein biemɔ bɔ ɔkɔboka yɛ maa yɛkɔkenga Bible ne daa, ná yadwenedwene yenwo ɔ. Afei yekosa yɛkɔnea kyɛbɔ yɛkɔfa yɛkɔbɔ yɛ bra ɔ.

YE MMERƐ SIE BERƐ BƆ ƐKƆFA KƆKENGA BIBLE NE Ɔ

5. Nningyein bɔ ɔmaa yelle alagye ne, ebie yeɛ ole beni?

⁵ Yɛ bɔ yɛso Yehowa nanu pee wɔ berɛ a, yɛfa mmerɛ pee yɛyɛ nningyein biemɔ bɔ yenwo hia bɔ Bible ne hyɛ yɛ ngunaen kyɛ yɛyɛ ɔ. Ɛhene ati, yelle alagye koraa. Ebie yeɛ ole kyɛ yɛ nu pee yɛ adwuma kyɛbɔ ɔkɔyɛ a, yɛkɔhora yɛkɔnea yɛnwo ne yɛ abusua ɔ. (1 Tim. 5:8) Aliemaa biemɔ koso wɔ berɛ a, bɛ́nea b’abusuafoɛ bɔ bɛnde apɔ anaa bayɛ mbanyi ɔ. Afei koso, odikyɛ yɛmu yɛyɛ nningyein biemɔ na yandaa yamvokyɛ, na ɛhene koso de mmerɛ. Ebieku koso, yele dwumadie ahoroɛ wɔ asafo nanu bɔ odikyɛ yɛyɛ ɔ. Ye titire paa yeɛ ole asɛnga adwuma bɔ odikyɛ yɛyere yɛnwo yɛyɛ ne. Adwuma pee bɔ ogua wɔ so ne mukoraati si ne, ɛkɔyɛ sɛɛ né anya mmerɛ afa akenga Bible ne daa, adwenedwene yenwo, na afa abɔ wɔ bra ɔ?

6. Ɛkɔyɛ sɛɛ né amaa Bible kengalɛ nwo ahia wɔ paa? (Nea foto ne koso.)

⁶ Yɛ Kristofoɛ de, Bible kengalɛ boka “nningyein bɔ ɔte paa” ma yɛ naso, yeti odikyɛ yɛmaa yenwo hia yɛ. (Flp. 1:10) Edwein bɔ olimoa ne ka kyɛ, sona bɔ “ye nye gye AWURADE mmeraa ne anwo, na ye mmeraa ne yeɛ ɔdwene ye nwo eyia ne kɔngɔen” ne, ole anigye. (Edw. 1:​1, 2) Ɛhe maa yenwu ye kyɛ, odikyɛ yɛye mmerɛ yesie berɛ yɛfa yɛkenga Bible ne. Mmerɛ beni yeɛ ɔte pá paa kyɛ yɛkɔkenga Bible ne ɔ? Ɛhene de ogyi yɛnu biala so. Nakoso mmerɛ biala bɔ yɛkɔye ne, odikyɛ ɔyɛ mmerɛ bɔ yɛkɔhora yɛkɔfa yɛkenga ye daa ɔ. Aliemaa bie bɔ bɛfrɛ ye Victor hane kyɛ: “Menye gye yenwo kyɛ ngɔkenga Bible ne ngyerɛmɔ tutuutu. Ɔwɔ nu kyɛ meda a mendwɔso ndɛ, nakoso sɔ mmerɛ ne de nikyefee ndwedwe m’adwene, yeti mekora mefa m’adwene mesie bɔ mekenga naso.” Ɛnea a, ɛhe kɔhora kɔboka wɔ anaa? Bisa wɔnwo kyɛ: ‘Mmerɛ beni yeɛ menwu ye kyɛ ɔte pá kyɛ ngɔfa ngɔkenga Bible ne ɔ?’

DWENEDWENE BƆ AKENGA NANWO

7-8. Sɛ yɛkenga Bible ne a, nzu yeɛ ebia ɔkɔmaa ɔkɔyɛ se kyɛ yekonya so mvasoɛ ɔ? Ma yenwo mvandoho.

⁷ Odwu mmerɛ bie a, yɛkora yɛkenga edwirɛ pee, nakoso ɛkɔnea ne, né yɛngae nu ko po. Sɔ dwirɛ ne bie ato wɔ le? Ebiala nne berɛ bɔ ebie tolle ye ɔ. Bɔ ɔyɛ aworabɔ ne, sɛ yannea yé a, sɔ yeɛ yɛ Bible kengalɛ kɔyɛ ɔ. Ebia yafa yasie yɛnye so kyɛ yɛkɔkenga Bible ne ti ahoroɛ biemɔ kyẽa biala. Sɛ yɛyɛ ye sɔ a, ɔte pá, ofikyɛ odikyɛ yɛfa nikyeebie yesie yɛnye so, ná yɛyere yɛnwo kyɛ yekodwu yenwo. (1 Kor. 9:26) Nakoso nna Bible ne bɔ yɛkɔkenga ne ngome yeɛ ole dwirɛ ne. Sɛ yekonya so mvasoɛ paa a, sana yɛyɛ nningyein biemɔ yɛboka so.

⁸ Ɛmɔma yɛnea sɔ mvandoho he. Sɛ nzue tɔ a, ɔmaa nningyein bɔ yalua ne yɛ kama. Nakoso sɛ nzue tɔ serɛserɛ paa wɔ mmerɛ kaa bie nu a, ɔngora nwurowura aseɛ nabo. Ɔba ye sɔ a, bɔ yalua ne ngɔyɛ yé, yeti mvasoɛ biala ngɔwa nzue bɔ ɔtɔle naso. Nakoso sɛ nzue ne tɔ mmaamaa a, ɔkora wurowura aseɛ nabo, yeti ɔmaa nningyein bɔ yalua ne yɛ kama. Sɔ ala yeɛ sɛ yɛkenga Bible ne, na yɛpere yɛnwo a ɔte ɔ. Yɛngɔhora yɛngɔdwenedwene yenwo, yeti yɛngɔkae po, ná yafa yayɛ adwuma.—Yak. 1:24.

9. Sɛ yahyɛ ye nzorɛ kyɛ yɛkenga Bible ne a yɛfa yetu amirika a, nzu yeɛ odikyɛ yɛyɛ ɔ?

⁹ Aso ahyɛ ye nzorɛ kyɛ sɛ odwu mmerɛ bie na ɛkenga Bible ne a, ɛfa tu amirika hɔ ɔ? Sɛ sɔ a, yede ɛyɛ a to wɔ boase. Bɔ mmɔden kyɛ bɔ ɛkɔkenga ne, ɛkɔdwenedene yenwo. Ɔnzɛkyɛ ɛmaa ɛhe yɛ se ma wɔ. Sɛ ekuro a, mmerɛ bɔ ɛfa sua nikyee ne, fa bie boka so, na wamaa ahora adwenedwene bɔ akenga nanwo. Ɛkɔhora koso kɔkenga ngyekyɛmuɛ kãa bie, na afa mmerɛ bɔ waha ne adwenedwene yenwo. Victor bɔ yalimoa yaha yenwo dwirɛ ne hane kyɛ: “Sɛ mekenga Bible ne a, meyɛ ye tikaape, ebia makenga alaa yeɛ ole yeti kõ bie. Afei koso mekenga ye ngyerɛmɔ tutuutu. Ɛhene boka me maa mekora medwenedwene bɔ makenga nanwo kyẽa nanu mukoraati.” Yeti bɔ yɛkã yekodwu ala yeɛ ole kyɛ, Bible ne ngyekyɛmuɛ dodoɔ bɔ ɛkɔkenga ne de, ogyi wɔ so. Nakoso bɔ yenwo hia paa yeɛ ole kyɛ ɛkɔto wɔ boase kɔkenga, kyɛbɔ ɔkɔyɛ a, ekonya so mvasoɛ ɔ.—Edw. 119:97. Kenga edwirɛ bɔ ɔwɔ alaka nanu bɔ yenwa: “Edwirɛ Biemɔ Bɔ Ɛkɔhora Kobisa Wɔnwo Ɔ.”

10. Kyɛbɔ ɛkɔhora kɔfa bɔ esua ne kɔyɛ adwuma ne, ma yenwo nhwɛsoɛ. (1 Tɛsalonikafoɛ 5:​17, 18)

¹⁰ Ɔmva yenwo ne mmerɛ pɔtee bɔ ɛfa kenga Bible ne, ɔne mmerɛ dodoɔ bɔ ɛfa yɛ sɔ ne, odikyɛ ɛnea atee ahoroɛ bɔ ɛkɔhora kɔfa so kɔfa bɔ ɛkenga ne kɔyɛ adwuma ɔ. Mmerɛ bɔ akenga Bible nu dwirɛ bie ayie ne, bisa wɔnwo kyɛ, ‘Ngɔyɛ sɛɛ né mahora mafa bɔ makenga ne mabɔ me bra ɛnnɛ, ɔne kyẽabie?’ Ma yɛnea ɛhe anwo nhwɛsoɛ kãa. Fa ye kyɛ akenga 1 Tɛsalonikafoɛ 5:​17, 18. (Kenga.) Mmerɛ bɔ akenga ayie ne, ɛkɔhora kogyina kãa, na asusu kyɛbɔ ɛbɔ mbaeɛ, ɔne mmerɛ dodoɔ bɔ ɛfa yɛ sɔ nanwo. Afei koso, ɛkɔhora kosusu nningyein bɔ Yehowa ayɛ ama wɔ nanwo. Ɛhene si ne, ɛkɔhora kɔla Yehowa ase wɔ nningyein nza biemɔ bɔ wayɛ wama wɔ nanwo. Sɔ mmerɛ kãa bɔ ɛkɔfa kɔdwenedwene bɔ akenga nanwo ne, ɔkɔboka wɔ maa ɛkɔhora kɔfa Nyameɛ Dwirɛ ne kɔbɔ wɔ bra. Sɛ ɛkora yɛ ɛhe, mmerɛ biala bɔ ɛkɔkenga Bible ne bue bie a, wɔde nea kyɛbɔ okosi kɔboka wɔ ɔ! Ɔkɔmaa ɛkɔɔyɛ ebie bɔ ɔfa Nyameɛ Dwirɛ ne bɔ ye bra ɔ. Nakoso sɛ ɛkenga Bible ne, na enwu ye kyɛ nzakrayɛɛ bɔ odikyɛ ɛyɛ ne sone a, nzu yeɛ ɛkɔhora kɔyɛ ɔ?

FA BƆ ƐKƆHORA KODWU YENWO NE SIE WƆNYE SO

11. Nzuati yeɛ odwu mmerɛ bie a, w’aba nu kɔhora kobu ɔ? Ma yenwo nhwɛsoɛ.

¹¹ Sɛ ɛkenga Bible ne, ná enwu ye kyɛ nzakrayɛɛ pee wɔ berɛ bɔ odikyɛ ɛyɛ ye wɔ w’asetena nu a, ɔkɔhora kɔmaa w’aba nu kobu. Wɔde ma yɛnea sɔ dwirɛ he: Yɛfa ye kyɛ mmerɛ bɔ ɛkenga Bible ɛnnɛ ne, enwuni kyɛ ɔnzɛkyɛ ɛyɛ nyeyemuɛ. (Yak. 2:​1-8) Yeti ɛyɛle w’adwene kyɛ ɛkɔyɛ nzakrayɛɛ, na ɛne mmenia mukoraati ali ye yé. Sɛ sɔ yeɛ ɔte a, yede ayɛ nikye! Afei aleɛhyene bɔ esa kengale Bible ne koso, enwuni kyɛ yenwo hia kyɛ ɛnea wɔ noa dwudwolɛ yé. (Yak. 3:​1-12) Ofikyɛ odwu mmerɛ bie a, ɛyɛ a wɔnoa dwudwolɛ nyɛ fɛ. Yeti ɛyɛle kyɛ ɛkɔyere wɔnwo kɔyɛ nzakrayɛɛ kyɛbɔ ɔkɔyɛ a, wɔnoa dwudwolɛ kɔhyɛ mmenia ngunaen ɔ. Ye ɛlɛsa so ne, mmerɛ bɔ né ɛkenga Bible ne, enwuni kyɛ ɔnzɛkyɛ ɛfa ewiase ne adamvoa. (Yak. 4:​4-12) Yeti ɛhyɛle ye nzorɛ kyɛ odikyɛ ɛnea yé wɔ nningyein bɔ ɛfa gye wɔnye nanwo. Odwuli ye ɛlɛnna so ne, w’aba nu buli, ofikyɛ né nzakrayɛɛ bɔ odikyɛ ɛyɛ ne sone!

12. Sɛ ɛkenga Bible ne na enwu ye kyɛ odikyɛ ɛyɛ nzakrayɛɛ a, nzuati yeɛ ɔnzɛkyɛ ɛmaa w’aba nu bu ɔ? (Nea yebo berɛ dwirɛ ne koso.)

¹² Sɛ enwu ye kyɛ odikyɛ ɛyɛ nzakrayɛɛ biemɔ a, nnɛmaa w’aba nu bu. Ɛhene te adanzeɛ bɔ okyire kyɛ ɛle adwene pá, na ɛbrɛ wɔnwo ase. Ebie bɔ ole sɔ subaen ne, sɛ ɔkenga Bible ne a, ɔpena atee ahoroɛ bɔ ɔkɔfa so kɔfa bɔ ɔkenga ne kɔbɔ ye bra ɔ.a Kae kyɛ, sɛ ɛkɔhora kowura “sona sue foforɛ” ne a, ɔtte ɛlɛhomapɛ dwirɛ, na mmom ɔte ngakãngakã. (Kol. 3:10) Yede nzu yeɛ ɔkɔboka wɔ maa ɛkɔhɔso kɔfa Nyameɛ Dwirɛ ne kɔbɔ wɔ bra ɔ?

13. Bɔ asua ne, ɛkɔyɛ sɛɛ na ahora afa yemukoraati ayɛ adwuma? (Nea foto ne koso.)

¹³ Bɔ asua ne, nnenya adwene kyɛ ɛkɔhora kɔfa ye mukoraati kɔyɛ adwuma ɛlɛhomapɛ, mmom fa w’adwene sie bɔ ɛkɔhora kodwu yenwo ndɛ naso. (Any. 11:2) Bɛnwa sɛ ɛbɔ agyee wɔsa bum a, ɛye ye ngokongoko. Yeti ɛkɔhora kɔsɔ ɛhe kɔnea: Nningyein ahoroɛ bɔ odikyɛ ɛyɛ nzakrayɛɛ wɔ nu ne, tworɔ yemukoraati to berɛ, na fa ye ngokongoko yɛ yenwo adwuma. Yede, beni yeɛ ɛkɔfa kɔhyɛ yebo ɔ?

14. Nzu yeɛ ɛkɔhora kolimoa kɔfa kosie wɔnye so ɔ?

¹⁴ Nzakrayɛɛ bɔ enwu ye kyɛ ɔnyɛ se kyɛ ɛkɔyɛ ne, ɛkɔhora kolimoa kɔfa ɛhene kosie wɔnye so. Sɛ ekuro koso a, subaen bɔ enwu ye kyɛ yenwo hia paa kyɛ enya ye ne, ɛkɔhora kɔyɛ ɛhene anwo adwuma. Sɛ enya nwu bɔ odikyɛ edwu yenwo ne a, ɛkɔhora kɔfa nwomaa bie tekyɛ Watch Tower Publications Index, anaa Nhoma a Yehowa Adansefo De Yɛ Nhwehwɛmu ne kɔyɛ yenwo nhwehwɛmuɛ. Afei koso, bɔ afa asie wɔnye so ne, bɔ yenwo mbaeɛ, na srɛ Yehowa kyɛ ‘ɔma ehuro kyɛ ɛkɔyɛ, ná ɛyɛ nnwumaa kyɛbɔ ɔsɔ ye nye ɔ.’ (Flp. 2:13) Ɛhene si ne, bɔ mmɔden kyɛ ɛkɔfa bɔ asua ne kɔbɔ wɔ bra. Sɛ ɛkora dwu bɔ afa asie wɔnye so nanwo a, ɔkɔhyɛ wɔ ngunaen maa ɛkɔyere wɔnwo kyɛ ekodwu bɔ waha nanwo. Ɔnate kyɛ ahora adwu yenwo nati, subaen foforɛ bɔ odikyɛ Kristofoɛ nya ye ne, ɔngɔyɛ se kyɛ ɛkɔyere wɔnwo konya bie ɔ.

MA NYAMEƐ DWIRƐ NE ‘YƐ ADWUMA WƆ WƆ́ NU’

15. Yɛbɔ yɛsõ Yehowa ne, nzu yeɛ ɔmaa yɛda nzorɛ wɔ mmenia bɔ baha bɔ bɛkenga Bible nanwo ɔ? (1 Tɛsalonikafoɛ 2:13)

¹⁵ Ebiemɔ fa tu bɛnwo kyɛ bakenga Bible ne mmerɛ pee mbaen, yeti bɛse nu paa. Nakoso sɔ mmenia nemɔ, aso bede Bible nanu dwirɛ ne bedi, na bɛfa nu afutue ne bɛbɔ bɛ bra anaa? Bɔ ɔyɛ aworabɔ yeɛ ole kyɛ, mmerɛ pee ne, bɛnyɛ sɔ, nakoso yɛbɔ yɛsõ Yehowa de, nna sɔ yeɛ yɛte ɔ. Tekyɛ Kristofoɛ bɔ bɛtenane ase wɔ asomafoɛ nemɔ aberɛ so ne, yedé Bible ne yɛto nu kyɛ “ɔte Nyameɛ dwirɛ amba.” Ɛhene ati, yɛyere yɛnwo kyɛ yɛkɔfa nu dwirɛ ne yɛkɔbɔ yɛ bra.—Kenga 1 Tɛsalonikafoɛ 2:13.

16. Nzu yeɛ ɔkɔboka yɛ maa yɛkɔyɛ bɔ Edwirɛ ne kã ne ɔ?

¹⁶ Ɔlla ase kyɛ yekonya mmerɛ yɛkɔkenga Nyameɛ Dwirɛ ne, na yafa yabɔ yɛ bra ɔ. Afei koso, sɛ yannea yé a, yɛkɔkenga ye ndɛndɛ bɔ yɛngɔto yɛboase yɛngɔdwenedwene yenwo ɔ. Asa koso, sɛ yenwu ye kyɛ nzakrayɛɛ pee wɔ berɛ bɔ odikyɛ yɛyɛ a, ɔkɔhora kobu y’aba nu. Kyɛbɔ wɔ haw ne te biala ne, yenoa ayire wɔ berɛ. Yeɛ ole kyɛ, Yehowa kɔboka wɔ maa ɛkɔhora koli so. Ɛmɔma yɛyere yɛnwo kyɛ yɛkɔbrɛ yɛnwo ase maa Yehowa kɔboka yɛ, kyɛbɔ ɔkɔyɛ a, yɛngɔyɛ tiefoɛ aworafirefoɛ, na mmom yɛkɔyɛ bɔ edwirɛ ne kã ne ɔ. Aporowaa biala nne yenwo kyɛ sɛ yɛkenga Nyameɛ Dwirɛ ne, na yɛfa yɛbɔ yɛ bra a, ɔkɔmaa yɛnye kɔgye paa!—Yak. 1:25.