ADESŨA 5
DWEIN 108 Onyankopɔn Dɔ
Bɔ Yehowa Ayɛ Ama Yɛ Ne, Mvasoɛ Bɔ Yenya Yefi So Ɔ
“Kristo Yesu wale wiase oolele bɔnefoɛ ngoa.”—1 TIM. 1:15.
BƆ ADESŨA NE KƆHÃ YENWO DWIRƐ Ɔ
Yesu ngoa bɔ ɔfa bɔle afɔleɛ mane yɛ ne, yɛkɔnea mvasoɛ bɔ yenya yefi so, ɔne kyɛbɔ yekohyire kyɛ yɛnye sɔ bɔ Yehowa ayɛ ama yɛ ne ɔ.
1. Nzu yeɛ yɛyɛ a, ɔkɔmaa Yehowa nye kɔgye ɔ?
FA YE kyɛ afa nikyeebie bɔ ɔyɛ nyemene, na ɔsombo paa ahyɛ ebie bɔ ekuro ye dwirɛ ɔ. Sɛ sona ne nye angye akyɛdeɛ nanwo, na ogyi to nekaa bie a, ɔkɔyɛ wɔ yea paa! Nakoso sɛ ɔfa wɔ akyɛdeɛ ne di dwumaa fa kyire kyɛ yenye asɔ bɔ ayɛ ama ye ne a, ɔkɔmaa wɔnye kɔgye. Nzu yeɛ yɛkɔhora yekosua yekofi mvandoho he anu ɔ? Yehowa maa Ɔwa ne oowu mane yɛ. Sɔ akyɛdeɛ bɔ ɔsombo bɔ Yehowa afa ama yɛ ne, ɔmaa yenwu ye kyɛ okuro yɛ dwirɛ paa. Yeti sɛ yɛyɛ nikyeebie yɛfa yekyire kyɛ yɛnye sɔ a, nea kyɛbɔ ɔkɔmaa yenye kɔgye ɔ!—Yoh. 3:16; Rom. 5:7, 8.
2. Nzu yeɛ yekosusu yenwo wɔ adesua he anu ɔ?
2 Mmerɛ kɔso ne, sɛ yannea yé a, yengohyire anisɔ yɛngɔma Yesu wue ne kõ. Sɛ ɔba sɔ a, ɔkɔyɛ kyɛbɔ akyɛdeɛ bɔ Nyameɛ afa ama yɛ ne, yagyi yato nekaabie anaa yafa yafea ne. Bɔ ɔkɔyɛ né yanyɛ sɔ ne, odikyɛ daa biala yekyire anisɔ yɛma bɔ Nyameɛ ne Kristo ayɛ ama yɛ ne. Adesua he kɔhora kɔboka yɛ maa yɛkɔyɛ sɔ. Yɛkɔnea mvasoɛ bɔ yenya yefi Yesu wue naso ɛnnɛ, ɔne mvasoɛ bɔ yekonya yekofi so kyẽabie ɔ. Afei sɛ odwu mmerɛ bɔ yɛfa yɛkae Yesu wue ne a, yɛkɔnea bɔ yɛkɔyɛ yekohyire kyɛ yɛnye sɔ bɔ Yehowa ayɛ ama yɛ ne ɔ.
MVASOƐ BƆ YENYA YEFI YESU WUE NASO ƐNNƐ Ɔ
3. Mvasoɛ beni yeɛ yenya yefi Yesu wue naso ɛnnɛ ɔ?
3 Yenya Kristo wue naso mvasoɛ ɛnnɛ. Ebie yeɛ ole kyɛ, ɔnate ye wue nati, Yehowa fa yɛ bɔne kyɛ yɛ. Ɔtte nhyɛ kyɛ Yehowa kɔfa yɛ bɔne kɔhyɛ yɛ ɔ, na mmom ye bɔbɔ yeɛ okuro kyɛ ɔyɛ sɔ ɔ. Edweintolɛniɛ ne hyirele kyɛ yenye sɔ kyɛbɔ Yehowa fa yɛ bɔne kyɛ yɛ ne. Ɔhane kyɛ: “Ao AWURADE, ɛte paa, na ɛfa bɔne kyɛ.”—Edw. 86:5; 103:3, 10-13.
4. Nwamɔ ti yeɛ Yehowa maa Yesu oowuli ɔ? (Luka 5:32; 1 Timoteo 1:15)
4 Ebiaa ebiemɔ konya adwene kyɛ, bɛmvata kyɛ Yehowa kɔfa bɛ bɔne kɔhyɛ bɛ ɔ. Nahorɛ nu, yɛnu biala nne berɛ bɔ ɔfata ɔ. Né somafoɛ Pɔɔlo se ɛhe. Yeti ɔhane kyɛ: “Memvata kyɛ bɛfrɛ me somafoɛ.” Nakoso, osa hane kyɛ: “Nyameɛ adom ti yeɛ nde kyɛ bɔ nde ye.” (1 Kor. 15:9, 10) Sɛ yɛyɛ bɔne, na yɛsakyera y’adwene a, Yehowa fa kyɛ yɛ. Okuro yɛ dwirɛ nati yeɛ ɔyɛ sɔ ɔ, na mmom nna kyɛ ebiaa yɛfata yenwo atee bɔ ɔte sɔ nati ɔ. Sɛ ele adwene kyɛ ɛmvata kyɛ Yehowa fa wɔ bɔne kyɛ wɔ a, kae kyɛ nna teneneefoɛ ti yeɛ Yehowa maa Yesu oowuli ɔ, na mmom owu mane abɔnefoɛ bɔ bɛkɔsakyera b’adwene ne.—Kenga Luka 5:32; 1 Timoteo 1:15.
5. Bɔ yayɛ yama Yehowa nati yeɛ wamaa ye koso, onwu yɛ anwumvoin anaa? Kyirekyire nu.
5 Ɔnzɛkyɛ yenu biala nya adwene kyɛ ɔnate kyɛ wafa afoɛ pee wasõ Yehowa nati, yeɛ wamaa ye koso onwu ye anwumvoin ɔfa ye bɔne kyɛ ye ɔ. Ɔwɔ nu, Yehowa wora mvi afoɛ pee bɔ yafa yali nahorɛ yama ye ne. (Heb. 6:10) Nakoso, nna pá bie bɔ yayɛ yama ye nati, yeɛ ɔmaa Ɔwa ne oowu mane yɛ ɔ, na mmom ɔte akyɛdeɛ bɔ wafa wama yɛ ɔ. Yeti sɛ yenya adwene kyɛ nningyein pá bɔ yayɛ yama Yehowa ne yeɛ ogyina so fa yɛ bɔne kyɛ yɛ a, yede né yɛpena yekyire kyɛ, mvasoɛ biala nne Yesu wue naso.—Fatoto Galatiafoɛ 2:21 nanwo.
6. Nzuati yeɛ Pɔɔlo yerele yenwo wɔ Yehowa soen nu ɔ?
6 Né Pɔɔlo nwu yenwo kyɛ Nyameɛ ngɔhora ngonwu ye anwumvoin llé. Yede, nzuati yeɛ ɔyerele yenwo wɔ Yehowa soen nu sɔ ne? Né yenye sɔ bɔ Yehowa ayɛ ama ye ne, na ɔtte kyɛ ebiaa né ɔyɛ sɔ maa Yehowa fa ye bɔne kyɛ ye. (Ɛfe. 3:7) Tekyɛ Pɔɔlo ne, yɛ koso nna kyɛ yɛpena kyɛ Yehowa nwu yɛ anwumvoin nati, yeɛ ɔmaa yɛyere yɛnwo yɛsõ ye ɔ. Na mmom yɛyɛ sɔ yɛfa yekyire kyɛ yɛnye sɔ bɔ wayɛ wama yɛ ne.
7. Mvasoɛ foforɛ beni yeɛ yenya yefi Yesu wue naso ɛnnɛ ɔ? (Romanfoɛ 5:1; Yakobo 2:23)
7 Mvasoɛ foforɛ bɔ yenya yefi Yesu wue naso ɛnnɛ yeɛ ole kyɛ, ɔmaa yɛnu biala kora pingye Yehowa, na ɔne ye fa adamvoa.a Kyɛbɔ yenwuni ye wɔ adesua kõ nanu ne, bɛwole yɛ ne, né yɛne Nyameɛ llé abusuabɔ biala. Nakoso ɔnate Yesu wue nati, ‘asomdwee awa yɛne Nyameɛ afia,’ na ɛhene maa yɛkora yepingye ye.—Kenga Romanfoɛ 5:1; Yakobo 2:23.
8. Yenwo atee bɔ Yehowa afa ama yɛ kyɛ yɛbɔ ye mbaeɛ ne, nzuati yeɛ odikyɛ yɛmaa yɛnye sɔ ɔ?
8 Yehowa bɔ yɛne ye afa adamvoa ne, mvasoɛ kõ bɔ yenya ye yeɛ ole kyɛ, yɛkora yɛbɔ ye mbaeɛ. Bɛbɔ bɛsõ Yehowa ne, nna mmerɛ bɔ bayia nu bɛsõ ye ne ngome yeɛ otie bɛ mbaeɛ ɔ. Na mmom, otie benu biala mbaeɛ kyɛ angorangora. Sɛ yɛbɔ mbaeɛ a, ɔmaa y’ahone tɔ yɛ kunu, na yɛnwo yɛ yɛ fɔnwoo. Nakoso nna ɛhene ngome, na mmom ɔmaa yɛne Yehowa adamvoa nanu koso yɛ se. (Edw. 65:2; Yak. 4:8; 1 Yoh. 5:14) Mmerɛ bɔ né Yesu wɔ aseɛ he aso ne, né ɔmva mbaeɛ nni angorɛ koraa, ofikyɛ né ɔse kyɛ Yehowa tie mbaeɛ. Afei koso, né ɛhene maa opingye ye Baba paa. (Luka 5:16) Nea kyɛbɔ ɔyɛ yɛ fɛ kyɛ, ɔnate Yesu wue nati yɛne Yehowa kora fa adamvoa, ná yɛkora po yɛbɔ ye mbaeɛ ɔ!
MVASOƐ BƆ YEKONYA YEKOFI YESU WUE NASO KYẼABIE Ɔ
9. Bɛbɔ bedi nahorɛ bɛma Yehowa ne, mvasoɛ beni yeɛ bekonya bekofi Yesu wue naso kyẽabie ɔ?
9 Bɛbɔ bedi nahorɛ bɛma Yehowa ne, mvasoɛ beni yeɛ bekonya bekofi Yesu wue naso kyẽabie ɔ? Yehowa kɔma bɛ daa ngoa. Mmeni pee le adwene kyɛ, ɛhe ngɔhora ngɔyɛ yé llé, ofikyɛ nna ɛnnɛ yeɛ mmenia hyɛle yebo kyɛ bewu ɔ. Nakoso Yehowa bɔle sona ne, né ɔpena kyɛ bɛtena ase daa. Sɛ Adam anyɛ bɔne a, ahaa adwene bɔ yeɛ ole kyɛ sona ngɔhora ngɔtena ase daa ne, ɔngɔwa ebiala tianu po. Ɔnzɛkyɛ ɔyɛ yɛ nwanwa kyɛ sona kɔhora kɔtena ase daa, ofikyɛ ɔtte sɔ a, ahaa Yehowa ngɔma Ɔwa bɔ okuro ye dwirɛ ne ngɔwa ngowu.—Rom. 8:32.
10. Bɛbɔ bapopa bɛ ne, ɔne mmoaen foforɛ ne, nzu yeɛ bɛnea ye atee ɔ?
10 Ɔwɔ nu, daa ngoa ne de, kyẽabie yeɛ yɛsa kɔhã ye ɔ, nakoso Yehowa pena kyɛ yɛdwenedwene yenwo ɛnnɛ. Bɛbɔ bapopa bɛ ne, bɛ́fa anigye bɛnea atee kyɛ bɛkɔhɔ anwuro, ná bɛne Kristo ali aseɛ he aso hene. (Nye. 20:6) Mmoaen foforɛ nemɔ koso, bɛnea atee kyɛ bɛkɔtena paradise aseɛ so, mmerɛ bɔ ɛyealɛ ne aworabɔlɛ afi berɛ ne. (Nye. 21:3, 4) Aso ɛboka mmoaen foforɛ naso, na ɛnea atee kyɛ ɛkɔtena ase daa wɔ aseɛ he aso anaa? Ɛhe tte akatuaa bɔ ɔba ase ɔ, ofikyɛ sona de, bɛbɔle ye kyɛ ɔtena ase daa wɔ aseɛ so. Nahorɛ nu, yɛnye kɔgye paa sɔ mmerɛ ne.
11-12. Nhyiraa bɔ yekonya ye wɔ Paradise ne, nu beni yeɛ yɛkɔhora yɛkɔdwenedwene yenwo ɔ? (Nea foto ne koso.)
11 Wɔde nea kyɛbɔ Paradise asetena kɔyɛ fɛ ɔ. Sɔ mmerɛ ne, anwonyerɛ ne ewue de, ɛngɔdwene yenwo kõ. (Yes. 25:8; 33:24) Nningyein pá bɔ ɔla w’ahone so ne, Yehowa kɔyɛ ye mukoraati kɔma wɔ. Aso ekohuro kyɛ ekosua ngaka nwo nikye, kyɛbɔ bɛhyehyɛ dwein, ɔne kyɛbɔ bɛdrɔdrɔ nningyein anaa? Sɛ yedwu paradise a, yekohia bɛbɔ bɛdrɔ plaen, besi sua, ɔne akuafoɛ. Yekosa yekohia bɛbɔ bɛkɔtõ aleɛ, bɛbɔ bɛkɔyɛ ngaen ahoroɛ nwo adwuma, ɔne bɛbɔ bekoluolua mmakaa mmaa ne flawɛs bɔ ɔkɔmaa aseɛ naso kɔyɛ nyemene ɔ. (Yes. 35:1; 65:21) Ɔnate kyɛ ɛkɔtena ase daa nati, ekonya mmerɛ kɔfa kɔyɛ nningyein foforɛ pee mbaen.
12 Yɛnye kɔgye paa koso, mmerɛ bɔ yɛyɛ bɛbɔ batingye bɛ ne akwaaba ne! (Aso. 24:15) Afei koso, ekosua Yehowa nwo nikyee pee nate nningyein bɔ wabɔ naso, na ɛhene kɔmaa wɔnye kɔgye. (Edw. 104:24; Yes. 11:9) Bɔ ɔtra yemukoraati ne, okodwu sɔ mmerɛ ne, né bɔne biala nne wɔnwo, yeti ɛkɔhora kɔfa anigye kɔsõ Yehowa daa! Aso ɛkɔfa ‘fɛɛ bɔ ekoli ye wɔ bɔne nu mmerɛ kãa bie’ ne, ɛkɔsesã sɔ nhyiraa bɔ ekonya kyẽabie ne anaa? (Heb. 11:25) Ɔnzɛkyɛ ɛyɛ sɔ llé! Nhyiraa bɔ yekonya sɔ mmerɛ ne, nikyeefee nne ewiase he anu bɔ yɛkɔhora yɛkɔfa yɛkɔtoto yenwo ɔ. Bɛnwa atee tendenn biala kofité ɛpoen noa. Yeti Paradise bɔ yɛnea ye atee ne, ɔyɛ sɛɛ alaa a, ɔkɔwa nu maa yɛkɔtena nu bie. Ɔnate kyɛ Yehowa kuro yɛ dwirɛ, ná ɔmaa Ɔwa ne oowu mane yɛ nati, yeɛ wamaa ɛhe mukoraati ahora ayɛ yé ɔ.
Nningyein bɔ ɔkɔhɔso wɔ Paradise ne, beni yeɛ ɛnea ye atee paa ɔ? (Nea ngyekyɛmuɛ 11-12)
KYIRE KYƐ WƆNYE SƆ BƆ YEHOWA AYƐ AMA WƆ NE
13. Nzu yeɛ yɛkɔyɛ yɛkɔfa yɛkɔla Yehowa ase wɔ bɔ wayɛ wama yɛ nanwo ɔ? (2 Korintofoɛ 6:1)
13 Nzu yeɛ yɛkɔyɛ yɛkɔfa yɛkɔla Yehowa ase, wɔ Ɔwa ne bɔ ɔmaa oowu mane yɛ nanwo ɔ? Yeɛ ole kyɛ yɛkɔfa ye soen yekolimoa wɔ y’asetena nu. (Mat. 6:33) Kae kyɛ, Yesu oowuli, “amaa bɛ bɔ bɛte ase ne bandena bamma bɛ nwo ko, na mmom batena bama bɔ bɛ ti owuli ná otingyele ne.” (2 Kor. 5:15) Yehowa ayɛ bie ama yɛ paa, yeti ɔnzɛkyɛ yɛmaa ye fɛɛ yɛ mbaen.—Kenga 2 Korintofoɛ 6:1.
14. Yɛkɔyɛ sɛɛ né yahyire kyɛ yele Yehowa nu gyidie, na ye akwangyerɛ yeɛ yɛfa yɛyɛ adwuma ɔ?
14 Sɛ yenya Yehowa nu gyidie, na yɛfa ye akwangyerɛ yɛyɛ adwuma a, ɛhene koso kyire kyɛ yɛnye sɔ bɔ wayɛ wama yɛ ne. Ebie yeɛ ole kyɛ, sɛ yési gyinayɛɛ yɛfa nekaa bɔ yɛkɔhɔ sukuu yekoodwu, ɔne adwuma bɔ yɛkɔyɛ nanwo a, odikyɛ yɛmaa bɔ Yehowa kuro nanwo hia yɛ. (1 Kor. 10:31; 2 Kor. 5:7) Sɛ yɛfa yɛnwo yɛto Yehowa so a, bɔ ofi nu ba yeɛ ole kyɛ, ɔmaa yɛne ye afia yɛ kama, na yɛ gyidie koso yɛ se. Afei ɔmaa anyelasoɛ bɔ yele ye kyɛ yɛkɔtena ase daa nanu yɛ se.—Rom. 5:3-5; Yak. 2:21, 22.
15. Yɛkɔyɛ sɛɛ né yahyire kyɛ yɛnye sɔ bɔ Yehowa ayɛ ama yɛ ne, mmerɛ bɔ yɛkae Yesu wue ne?
15 Atee foforɛ koso yeɛ ole kyɛ, yɛkɔhora yɛkɔfa Yesu wue bɔ yɛkɔkae afoɛ he naso yekohyire kyɛ yɛnye sɔ ye ngoa bɔ Yehowa maa ɔfa bɔle afɔleɛ mane yɛ ne. Nhyehyɛɛ bɔ yɛ́yɛ, na wamaa yɛbɔbɔ yahora yahɔ bie ne la ahameɛ a, yɛkɔhora yɛkɔto yɛsa yɛkɔfrɛ mmenia maa bɛ koso bɛkɔwa bie. (1 Tim. 2:4) Bɛbɔ ɛto wɔsa frɛ bɛ ne, ɛyɛ a ma benwu bɔ ɔkɔhɔso wɔ dwumadie nabo. Ɛkɔhora koso kɔye vidio bɔ yeɛ ole Nzuati Yeɛ Yesu Wule Ɔ? ɔne Kae Yesu Wue Ne bɔ ɔwɔ jw.org so ne kohyire bɛ. Odikyɛ asafo nu mbanyi nemɔ to bɛsa frɛ bɛbɔ bayakyi adesua ne asɛngahɔlɛ ne. Sɛ Yehowa mmoaen bɔ bamini nanu bie sa ba mmoaen kure nanu a, wɔde nea anigye bɔ ɔkɔwa anwuro ne aseɛ so ɔ! (Luka 15:4-7) Wɔ dwumadie nabo ne, nna aliemaamɔ ngome yeɛ odikyɛ yesoma bɛ ɔ, na mmom bɛbɔ bɛte foforɛ ɔne bɛbɔ bɛwale bie ahyɛ ne koso, odikyɛ yɛkyea bɛ, na wamaa bɛnye ahã!—Rom. 12:13.
16. Sɛ odwu mmerɛ bɔ yɛ́fa yɛkae Yesu wue ne a, nzuati yeɛ odikyɛ yɛfa mmerɛ pee yɛyɛ asɛnga adwuma ne ɔ?
16 Sɛ odwu mmerɛ bɔ yɛ́fa yɛkae Yesu wue ne a, aso ɛkɔhora kɔfa mmerɛ pee kɔyɛ asɛnga adwuma ne anaa? Sɛ yɛyɛ sɔ a, okyire kyɛ yɛnye sɔ bɔ Nyameɛ ne Kristo ayɛ ama yɛ ne. Yehowa kɔboka yɛ paa mmerɛ bɔ yɛyere yɛnwo yɛyɛ asɛnga adwuma ne, na gyidie bɔ yele ye wɔ yenu ne koso kɔyɛ se. (1 Kor. 3:9) Afei koso, Bible kengalɛ nwo nhyehyɛɛ bɔ ɔfa Yesu wue nanwo bɔ bɛfa bɛba Daa Asɛm, ɔne Kristofoɛ abrabɔ nanu ne, bɔ mmɔden kyɛ ekoli ye si. Tworɔnzɛm ahoroɛ bɔ ɔwɔ sɔ Bible kengalɛ nanu ne, ɛkɔhora po kɔyɛ yenwo nhwehwɛmuɛ kɔhɔ siɛ.
17. Nzu yeɛ ɔmaa Yehowa nye gye ɔ? (Kenga edwirɛ bɔ ɔwɔ alaka nanu bɔ yenwa: “Kyɛbɔ Ekohyire Kyɛ Wɔnye Sɔ Bɔ Yehowa Ayɛ Ama Wɔ Ne.”)
17 Ebiaa wɔde ɛngɔhora ngɔyɛ nnignyein bɔ yahã yenwo dwirɛ wɔ adesua he anu ne mukoraati. Nakoso kae kyɛ Yehowa de, ɔmva bɔ ɛkora yɛ ne ndoto ebiemɔ deɛ nwo. Bɔ ohia ye yeɛ ole kyɛ ekofi w’ahone mukoraati nu kɔsõ ye ɔ. Sɛ ɛda ye ali kyɛ wɔnye sɔ ye akyɛdeɛ bɔ ɔsombo, bɔ yeɛ ole Yesu ngoa bɔ ɔfa bɔle afɔleɛ ne a, ɔmaa yenye gye.—1 Sam. 16:7; Mak. 12:41-44.
18. Nzuati yeɛ yɛnye sɔ bɔ Yehowa ne Yesu ayɛ ama yɛ ne ɔ?
18 Sɛ nna Yesu wue ne a, ahaa yɛngɔhora yengonya bɔne fakyɛ, yɛne Yehowa ngɔhora ngɔfa adamvoa, na yengonya anyelasoɛ kyɛ yɛkɔtena ase daa kyẽabie. Yeti ɛmɔma yɛla ye ali kyẽa biala kyɛ, bɔ Yehowa ayɛ bɔ ɔnate so maa yɛsa kɔhã sɔ nhyiraa he mukoraati ne, yɛnye sɔ paa. (1 Yoh. 4:19) Afei Yesu bɔ ɔnate kyɛ okuro yɛ dwirɛ paa nati, owu mane yɛ ne koso, ɛmɔma yehyire kyɛ yɛnye sɔ bɔ wayɛ wama yɛ ne!—Yoh. 15:13.
DWEIN 154 Nokware Dɔ
a Mmenia bɔ bɛsõne Yehowa koraka yeɛ Yesu baawu ne, Yehowa fale bɛ bɔne hyɛle bɛ. Bɔ ɔmaa Yehowa hora yɛle sɔ yeɛ ole kyɛ, né odé di paa kyɛ Ɔwa ne koli nahorɛ koodwu ewue nu. Yeti Yehowa nye so de, né ɔte kyɛbɔ Yesu abɔ afɔleɛ ne dada kora po yeɛ ɔbaawu ɔ.—Rom. 3:25.