Kɔso Fa Gyidie Nate

1. Sɛ somafoɛ Pɔɔlo to yenye nea yesi a, nzuati yeɛ né yenye agye kyɛbɔ osi bɔle ye bra nanwo ɔ?

ODWULI mmerɛ bie wɔ somafoɛ Pɔɔlo asetena nu ne, né ɔse kyɛ ɔngɔhyɛ bekohũ ye. Nakoso sɛ ɔto yenye nea yesi a, né yenye agye kyɛbɔ osi bɔle ye bra nanwo. Ɛhene ati, ɔhora hane kyɛ: “Koɛ paa ne, maho; amirika ne, matu mayie; gyidie ne, masɔ nu.” (2 Tim. 4:​6-8) Pɔɔlo fale ye mmerɛ mukoraati sone Yehowa, na né odé di kyɛ Yehowa nye agye bɔ wayɛ nanwo. Yɛ koso, yɛpena kyɛ yesi gyinayɛɛ ahoroɛ bɔ ɔkɔmaa Yehowa nye kɔgye yɛnwo ɔ. Yede, yɛkɔyɛ ye sɛ?

2. Sɛ bɛkã kyɛ ebie fa gyidie nate a, okyire sɛɛ?

² Pɔɔlo hane ɔne oliema Kristofoɛ nemɔ nwo dwirɛ kyɛ: “Gyidie yeɛ yɛfa yɛnate ɔ, nna bɔ anyeɛ nwu ye ɔ.” (2 Kor. 5:7) Yede, nzu yeɛ né ɔpena kyire ɔ? Edwirɛ ‘ɛnatelɛ’ bɔ ofite Bible nanu ne, ɔkora kyire kyɛbɔ ebie kuro kyɛ ɔbɔ ye bra ɔ. Sɛ ebie nate bɔ anyeɛ nwu ye nu a, ogyina bɔ yeso te, bɔ onwu ye, ɔne kyɛbɔ ɔte nga naso yeɛ osi gyinayɛɛ ɔ. Nakoso sona bɔ ɔfa gyidie nate ne de, ogyina bɔ Nyameɛ dwirɛ ne kã naso yeɛ osi ye gyinayɛɛ ɔ. Sɔ sona ne, ɔfa ye nneyɛɛ kyire kyɛ ole gyidie kyɛ sɛ ɔfa Nyameɛ afutue bɔ ye bra a, okoyira ye, na ɔkɔmaa okosi ye yé.—Edw. 119:66; Heb. 11:6.

3. Sɛ yɛfa gyidie yɛnate a, mvasoɛ beni yeɛ yekonya ye ɔ? (2 Korintofoɛ 4:18)

³ Sɛ odwu mmerɛ bie a, yɛkora yegyina bɔ yenwu ye, bɔ yɛte, ɔne kyɛbɔ yɛte nga naso yesi gyinayɛɛ. Nakoso, sɛ ɛhene ngome yeɛ yegyina so yesi nningyein bɔ yenwo hia nwo gyinayɛɛ a, yede ɔhaw kɔhora kɔto yɛ. Nzuati ɔ? Ofikyɛ sɔ nningyein nemɔ kɔhora kɔlakalaka yɛ. Sɛ wamma yesɔ po a, ebiaa ɔkɔmaa yekobu yɛnye yekogua Nyameɛ akwangyerɛ so. (Nwo. 11:9; Mat. 24:​37-39) Nakoso sɛ yɛfa gyidie yɛnate a, ɔkɔmaa yekosi gyinayɛɛ bɔ “ɔsɔ Awurade nye” ɔ. (Ɛfe. 5:10) Sɛ yɛfa Nyameɛ afutue yɛbɔ yɛ bra a, yɛsoanu kodwo yɛ, na yɛnye kɔgye paa. (Edw. 16:​8, 9; Yes. 48:​17, 18) Afei koso sɛ yɛfa gyidie yɛnate a, yekonya daa ngoa.—Kenga 2 Korintofoɛ 4:18.

4. Ɔkɔyɛ sɛɛ né ebie anwu ye kyɛ gyidie yeɛ ɔfa nate ɔ, na ɔtte bɔ anyeɛ nwu ye ɔ?

⁴ Yɛkɔyɛ sɛɛ né yanwu ye kyɛ yɛfa gyidie yɛnate, na ɔtte bɔ anyeɛ nwu ye ɔ? Bɔ ɔkɔmaa yekonwu ye yeɛ ole ɛhe: Nzu yeɛ yegyina so yesi gyinayɛɛ ɔ? Aso ɔte nningyein bɔ anyeɛ nwu ye ne, anaa afutue bɔ ɔwɔ Yehowa dwirɛ nu ne? Ɛmɔma yɛnea kyɛbɔ yɛkɔfa gyidie yɛkɔnate wɔ sɔ nningyein nza bɔ yenwo hia hemɔ anu: mmerɛ bɔ yɛpena adwuma, mmerɛ bɔ yɛpena ebie bɔ yekogya ye, ɔne mmerɛ bɔ asafo ne ama y’akwangyerɛ bie ne. Wɔ nu biala nu ne, yɛkɔnea nningyein bɔ odikyɛ yesusu yenwo, na wamaa yasi gyinayɛɛ pá ɔ.

MMERƐ BƆ YƐPENA ADWUMA

5. Sɛ yɛpena adwuma a, nzu yeɛ yɛtaa yesusu yenwo ɔ?

⁵ Yɛnu biala pena kyɛ ɔkora nea yenwo ne ye abusua. (Nwo. 7:12; 1 Tim. 5:8) Adwuma bie wɔ berɛ a, ɛyɛ a né akatuaa ne te kama. Sɛ ebie nya adwuma bɔ ɔte sɔ a, ɔboka ye maa ɔkora nea ye abusua, na onya esikaa kãa po to berɛ. Nakoso adwuma biemɔ wɔ berɛ a, waayɛ totɔ-biribi-di. Yeti bɔ sona ne kɔfa kɔnea yenwo ne ye abusua ngome yeɛ yesa kã ye ɔ. Ɔwɔ nu, ebiala pena adwuma a, ɔnea bɔ akatuaa ne te kama ɔ. Nakoso, ɔkɔba kyɛ ɛhene ngome yeɛ ebie gyina so pena adwuma a, yede okyire kyɛ nna gyidie yeɛ ɔfa nate ɔ.

6. Sɛ yɛkwaapena adwuma bie a, yɛkɔyɛ sɛ né yahyire kyɛ gyidie yeɛ yɛfa yɛnate ɔ? (Hebrifoɛ 13:5)

⁶ Sɛ gyidie yeɛ yɛfa yɛnate a, mmerɛ bɔ yakwaapena adwuma bie ne, yɛkɔnea kyɛbɔ ɔkɔhã soen bɔ yɛfa yɛma Yehowa ne. Yɛkɔhora yekobisa yɛnwo kyɛ: ‘Sɛ mekɔyɛ sɔ adwuma he a, ɔkɔmaa ngɔyɛ nningyein biemɔ bɔ Yehowa nguro anaa?’ (Any. 6:​16-19) ‘Ɔkɔmaa ngopia Yehowa soen ngɔto ahameɛ, anaa ɔkɔmaa ngoowura nu ngɔhyɛ bɔ mengonya mmerɛ mengɔma m’abusua hɔ?’ (Flp. 1:10) Sɛ yɛma sɔ dwirɛ nemɔ nwo mmuayɛɛ kyɛ yoo a, yede ɔkɔyɛ pá kyɛ yɛngɔyɛ, ɔmva yenwo kyɛ adwuma nwo ayɛ se ne. Ɔnate kyɛ gyidie yeɛ yɛfa yɛnate nati, yedé yedi kyɛ sɛ yesi ɛhe anwo gyinayɛɛ pá a, Yehowa kɔmaa yɛsa kɔhã bɔ yehia ɔ.—Mat. 6:33; kenga Hebrifoɛ 13:5.

7-8. Sɛɛ yeɛ aliemaa bie bɔ ɔwɔ South America fale gyidie natele ɔ? (Nea foto ne koso.)

⁷ Aliemaa bie wɔ South America bɔ bɛfrɛ ye Javier.a Ɛmɔma yɛnea kyɛbɔ ɔfale gyidie natele ɔ. Ɔhane kyɛ: “Né mahworɔ lɛtɛ mahɔ adwuma bie nu kyɛ mepena adwuma. Né sɔ adwuma ne di mu paa, na né ngonya akatuaa piri ngɔtra nekaa bɔ né nwɔ ne. Afei né ɛhene kɔmaa menwo kɔto me.” Nakoso, né Javier kuro paa kyɛ ɔkɔyɛ ateepakyelɛniɛ. Ɔtoale so hane kyɛ: “Bɛfrɛle me kyɛ mmra intaview. Mebaahɔ ne, mmɔle Yehowa mbaeɛ kyɛ ɔboka me, ofikyɛ né mese kyɛ ye yeɛ ɔse bɔ ɔte pá ma me ɔ. Né mayɛ m’adwene kyɛ ngohũ menwo ngɔyɛ adwuma ne. Nakoso, sɛ né ɔkɔmaa ngopia Yehowa soen ngɔto nekaa bie a, yede mengɔyɛ.”

⁸ Javier hane kyɛ: “Bɔ ɔyɛ intaview ne hahyirele me kyɛ, ngɔtaa ngɔyɛ overtime. Nakoso, mvili obuo nu nga ngyirele ye kyɛ, ɔnate me soen ti, mengɔhora sɔ yɛ.” Yeti Javier anyɛ sɔ adwuma ne. Ye dapɛen nyɔ si ne, ɔhyɛle ateepakyelɛ adwuma nabo. Sɔ afoɛ nanu ala ne, onyane adwuma bie bɔ né ongolle ye mmerɛ pee ɔ. Ɔtoale so kyɛ: “Yehowa tiele me mbaeɛ ne, na ɔmaa nyane adwuma bɔ né ɔkɔmaa ngɔyɛ ateepakyelɛ adwuma ne ɔ. Ɔyɛ me fɛ paa kyɛ manya adwuma bɔ ɔmaa menya mmerɛ mesõ Yehowa ne nniemamɔ ɔ.”

9. Nzu yeɛ esua fi Trésor dwirɛ nanu ɔ?

⁹ Sɛ adwuma bɔ yɛwɔ nu kesaalae ne maa ɔyɛ se kyɛ yɛkɔsõ Yehowa yé a, nzu yeɛ yɛkɔyɛ ɔ? Ɛmɔma yɛnea bɔ aliemaa bie bɔ bɛfrɛ ye Trésor bɔ ofi Congo ne yɛle ɔ. Ɔhane kyɛ: “Adwuma foforɛ bɔ nyane ye ne de, né ngyene yenwo nnaleɛ lle. Akatuaa bɔ né medé ne, né ɔte dáa deɛ ne mmɔhoɛ nza, na né mmenia bu me paa.” Nakoso, né Trésor taa yɛ overtime wɔ adwuma nu, yeti né ɔtoto adesua nu. Afei né bɛhyɛ ye kyɛ sɛ onwu kyɛ kalabule bie kɔso wɔ adwuma nanu a, ɔhã yenoa tonu. Né Trésor pena kyɛ ɔyakyi adwuma ne, nakoso né osuro kyɛ annea a, ne wannya foforɛ wanyɛ. Yede, nzu yeɛ ɔbokale ye ɔ? Ɔhane kyɛ: “Habakuku 3:​17-19 ne maa nwuni kyɛ, sɛ m’adwuma ne fi mesa po a, Yehowa kɔnea me, yeti nyakyili.” Ɔfale ye dwirɛ ne wale ayieleɛ kyɛ: “Adwuma nu mbanyi pee nala le adwene kyɛ, sɛ ebie nya adwuma bɔ akatuaa ne te piri a, ɔngɔfa nikyefee ngɔsesa ye, kyɛ ɔte ye abusua anaa ye soen. Ɔyɛ me fɛ paa kyɛ mane Yehowa soen nwo hiane me trale sɔ adwuma ne ɔ. Afoɛ kõ si ne, Yehowa bokale me maa nyane adwuma bɔ akatuaa ne te kama, na nza nyane mmerɛ pee nzone Yehowa. Ɔwɔ nu, sɛ yɛfa Yehowa soen yedimoa a, ebiaa yɛnwo kɔhyere yɛ kãa de, nakoso bɔ ɔte biala ɔkɔnea yɛ.” Sɛ yɛfa Yehowa afutue yɛbɔ yɛ bra, na yenya ye bɔhyɛ ahoroɛ nu gyidie a, okyire kyɛ gyidie yeɛ yɛfa yɛnate ɔ. Ɔba sɔ a, okoyira yɛ.

MMERƐ BƆ YƐPENA EBIE BƆ YEKOGYA YE NE

10. Sɛ ebie pena sona bɔ okogya ye a, annea a nzu yeɛ ɔkɔfa ye adwene kosie so ɔ?

¹⁰ Agyaa te akyɛdeɛ bɔ ofi Yehowa berɛ, yeti sɛ ebie pena kyɛ ogya a, ɔtte bɔne. Sɛ aliemaa brasua bie pena brienzua bɔ okogya ye a, ebiaa ɔkɔnea ye subaen, ye anwonyemene, dumaa bɔ ɔle ye, ye sikasɛm, asɛyɛdeɛ bɔ ole ye wɔ ye abusua nu, ɔne kyɛbɔ osi krɔkrɔ ye ne.b Sɔ nningyein nemɔ nwo hia. Nakoso sɛ ɛhene ngome yeɛ ɔfa ye adwene sie so a, okyire kyɛ bɔ anyeɛ nwu ye ne yeɛ ɔfa ye adwene kɔ so ɔ.

11. Sɛ yɛpena ebie bɔ yekogya ye a, yɛkɔyɛ sɛɛ né yahyire kyɛ gyidie yeɛ yɛfa yɛnate ɔ? (1 Korintofoɛ 7:39)

¹¹ Sɛ aliemaa brienzua anaa brasua bie pena ebie gya ye, na ɔfa Yehowa akwangyerɛ bɔ ɔfa agyaa nwo ne yɛ adwuma a, ɔmaa Yehowa nye gye paa. Ebie yeɛ ole kyɛ, sɛ bɛpena kyɛ bɛne ebie yɛ agyaa nhyehyɛɛ a, bɛnwondɛ kodwu kyɛ bɛkɔsõ agyaa kora. (1 Kor. 7:36) Yeti sona bɔ bɛpena kyɛ bɛgya ye ne, subaen bɔ Bible ne kã kyɛ sɛ ebie le ye a, okyire kyɛ ɔkɔyɛ brienzua anaa brasua pá ne, ɛhene yeɛ bɛnea ɔ. (Any. 31:​10-13, 26-28; Ɛfe. 5:33; 1 Tim. 5:8) Yesɔ nati sɛ ebie bɔ ɔnzo Yehowa yɛ nningyein biemɔ fakyire kyɛ okuro bɛ a, bɛfa Bible nu dwirɛ bɔ ɔkã kyɛ ‘gya wɔ Awurade nu ngome’ ne bɛyɛ adwuma. (Kenga 1 Korintofoɛ 7:39.) Bɛkɔso bɛyɛ sɔ, ofikyɛ bɛse kyɛ bɔ bɛfa nu biala ne, Yehowa kɔboka bɛ maa bekogyina yenoa.—Edw. 55:22.

12. Bɔ Rosa yɛle ne, nzu yeɛ esua fi nu ɔ?

¹² Rosa te ateepakyelɛniɛ wɔ Colombia. Ɛmɔma yɛnea bɔ ɔyɛle ɔ. Né ɔne abrandeɛ bie yeɛ bɛyɛ adwuma ɔ, na ɛhene maa abrandeɛ ne nye ɔɔgyele yenwo. Né Rosa koso nye gye abrandeɛ nanwo. Ɔhane kyɛ: “Né menwu ye kyɛ ɔte sona pá, ofikyɛ né ɔyɛ nningyein biemɔ fa boka mmenia. Afei né ye abrabɔ te kama. Né ɔgyegye meso, na nikyeebiala bɔ mepena ye wɔ brienzua nwo ne, né ole bie. Nakoso, né me haw ala yeɛ ole kyɛ, ɔtte Yehowa Danzeniɛ.” Ɔtoale ye dwirɛ naso kyɛ: “Né mawu mama ye, yeti né ɔyɛ se paa kyɛ ngɔhã kyɛ menguro ye ɔ. Né menwu ye kyɛ mayɛ angonam, yeti né mepena kyɛ megya. Nakoso né nnyane ebiala wɔ asafo nanu.” Rosa annea bɔ otua anyeɛ ne ngome, na mmom ɔfale ye adwene hɔle kyɛbɔ ne sɔ nikyee ne kɔsɛkye ɔne Yehowa afia naso. Yeti ɔne abrandeɛ ne pɛle b’adamvoa nanu, na ɔfale ye adwene siele nningyein bɔ ɔfa Yehowa soen nwo naso. Wangyɛ biala, bɛfrɛle ye maa ɔhɔle Ahennie Nanwo Nzɛmbahãnɛfoɛ Sukuu ne bie. Kesaalae ɔte ateepakyelɛniɛ titire. Rosa hane kyɛ: “Yehowa ayira me paa, na ɛhene amaa menye agye.” Sɛ wɔnye gye nikyeebie nwo paa nakoso Yehowa nguro a, ɛyɛ a ɔlla ase kyɛ ɛkɔfa gyidie kɔnate ɔ. Nakoso, sɛ ɛkora yɛ sɔ a ɔboka wɔ bɔbɔ.

MMERƐ BƆ ASAFO NE AMA Y’AKWANGYERƐ BIE NE

13. Sɛ asafo ne ma yɛ akwangyerɛ bie a, annea a nzu yeɛ yɛkɔyɛ ɔ?

¹³ Mmerɛ pee ne, asafo nu mbanyi, manzini soneafoɛ, Bɛtɛl, anaa Akwangyerɛ Kue ne ma y’akwangyerɛ bɔ ɔboka yɛ maa yɛsõ Yehowa yé ɔ. Nakoso sɛ bɛma yɛ akwangyerɛ bie na yɛnde yebo koso ɛ? Ebiaa yekonya adwene kyɛ sɛ yɛfa yɛyɛ adwuma a, ɔngɔboka yɛ. Afei sintɔ bɔ ɔwɔ sɔ aliemaamɔ nemɔ nwo ne, annea a ɛhene yeɛ yɛkɔfa y’adwene yɛkɔhɔ so ɔ.

14. Sɛ bɛma y’akwangyerɛ bie a, nzu yeɛ ɔkɔboka yɛ maa yɛkɔfa yɛkɔyɛ adwuma ɔ? (Hebrifoɛ 13:17)

¹⁴ Sɛ gyidie yeɛ yɛfa yɛnate a, yede yekole yɛkɔto nu kyɛ Yehowa yeɛ okyire ye ahyehyɛdeɛ ne atee ɔ, na ɔse bɔ yenu biala fa nu ɔ. Ɔba sɔ a, akwangyerɛ bɔ bɛfa bɛma yɛ ne, yekonya yenwo adwene pá, na yafa yayɛ adwuma ndɛ. (Kenga Hebrifoɛ 13:17.) Afei koso yekonwu ye kyɛ, sɛ yɛyɛ sotie a, ɔkɔmaa asomdwee kɔwa asafo nanu. (Ɛfe. 4:​2, 3) Aliemaamɔ bɔ bɛma yɛ akwangyerɛ ne, yɛse kyɛ bɔne wɔ bɛnwo, nakoso yedé yedi kyɛ sɛ yetie bɛ a, Yehowa koyira yɛ. (1 Sam. 15:22) Afei yele gyidie kyɛ, sɛ mvomsoɛ bie wɔ akwangyerɛ nanwo a, Yehowa koli yenwo dwumaa mmerɛ bɔ ɔsɛ nu.—Mika 7:7.

15-16. Mmerɛ bɔ né aliemaa bie nde akwangyerɛ bie bo ne, nzu yeɛ ɔbokale ye maa ɔfale gyidie natele ɔ? (Nea foto ne koso.)

¹⁵ Ɛmɔma yɛnea edwirɛ bie bɔ osili wɔ Peru, na ɔkɔmaa yekonwu ye kyɛ sɛ yɛfa gyidie yɛnate a, yenya so mvasoɛ. Spanish dwudwolɛ yeɛ mmeni pee nala kã ye wɔ maen nanu ɔ, nakoso ebiemɔ kã dwudwolɛ foforɛ. Ebie yeɛ ole Quechua. Aliemaamɔ bɔ bɛkã Quechua ne, né bafa afoɛ pee bapena mmenia bɔ bɛkã sɔ dwudwolɛ ne, bɔ bekoli bɛ adanzeɛ ɔ. Nakoso mmraa bɔ awaen ne hyɛle nati, atee bɔ né bɛfa so bɛpena sɔ mmenia nemɔ ne, bɛsesane ye. (Rom. 13:1) Ɔwale sɔ ne, aliemaa biemɔ nyane adwene kyɛ sɛ bɛyɛ ye sɔ a, bengonya mmenia bɔ bekoli bɛ adanzeɛ ɔ. Nakoso siɛ ye bɔ bɛfa bɛyɛle adwuma ne, Yehowa nate so bokale bɛ maa benyane mmeni pee bɔ bɛkã Quechua dwudwolɛ ne ɔ.

¹⁶ Né asafo nu panyi bie bɔ bɛfrɛ Kevin boka aliemaamɔ bɔ né bɛnde sɔ akwangyerɛ nabo naso. Ɔhane kyɛ: “Mmisale menwo kyɛ, ‘Bɛbɔ bɛkã Quechua dwudwolɛ ne, kesaalae yɛkɔyɛ sɛɛ né yanya bɛ?’” Yede nzu yeɛ Kevin yɛle ɔ? Ɔhane kyɛ: “Nzusuli Anyandera 3:5 nanwo, na Mose nwo dwirɛ ne koso wale me tianu. Yehowa hane kyɛ oli Yisraelfoɛ nemɔ nyunu ɔye bɛ fi Egypt. Nakoso nekaa bɔ ɔhane kyɛ bɛfa ne, sɛ annea a ɛkɔhã kyɛ ndeaseɛ nne nu, ofikyɛ ne Egyptfoɛ nemɔ sa kɔhora kɔhã bɛ. Nakoso mmerɛ bɔ Mose tiele ne, Yehowa yirale ye, na ɔyɛle anwanwadeɛ falɛle bɛ.” (Ɛks. 14:​1, 2, 9-11, 21, 22) Yesi ne, Kevin sesane ye adwene, na ɔfale akwangyerɛ ne yɛle adwuma. Nzu yeɛ ofili nu wale ɔ? Ɔhane kyɛ: “Yehowa yirale nhyehyɛɛ naso maa ɔyɛle me nwanwa. Dáa ne, né yɛkora yɛnate alaa, nakoso ɛkɔnea ne, sonahorɛ anaa mmenia nyɔ bie bɔ bɛkã Quechua dwudwolɛ ne yeɛ yenya bɛ ɔ. Nakoso kesaalae de, yɛkɔ nekaa bɔ yekonya mmeni pee bɔ bɛkã sɔ dwudwolɛ ne ɔ. Ɛhene ati yenya mmeni pee yedi bɛ adanzeɛ, yɛyɛ sakɔnea ne Bible adesua, na benu pee po ba asafo nhyiamu.” Amba, sɛ yɛfa gyidie yɛnate a, Yehowa koso yira yɛ.

17. Nzu yeɛ asua afi adesua he anu ɔ?

¹⁷ Kyɛbɔ yɛkɔfa gyidie yɛkɔnate, mmerɛ bɔ yesi nningyein titire nza biemɔ nwo gyinayɛɛ ne, yasusu yenwo wɔ adesua he anu. Nakoso, y’asetena mukoraati nu ne, odikyɛ yɛmaa bɔ Yehowa kuro nanwo hia yɛ. Ebie yeɛ ole mmerɛ bɔ yesi gyinayɛɛ yɛfa nningyein bɔ yɛkɔfa yɛkɔgye yɛnye, nekaa bɔ yɛkɔhɔ sukuu yekoodwu, ɔne kyɛbɔ yɛpena kyɛ yɛtete yɛ mmaamɔ nanwo ne. Ɛhene ati, nna bɔ anyeɛ nwu ne ngome yeɛ odikyɛ yegyina so yesi gyinayɛɛ ɔ, na mmom odikyɛ yesusu Yehowa afutue, kyɛbɔ ɔkɔhã yɛne ye abusuabɔ, ɔne ye bɔhyɛ bɔ yeɛ ole kyɛ ɔkɔnea yɛ ne koso nwo. Sɛ yɛyɛ sɔ a, ‘yɛkɔnate Yehowa yɛ Nyameɛ ne dumaa nu afebɔɔ.’—Mika 4:5.