ADESŨA 15
DWEIN 30 M’agya, Me Nyankopɔn, ne M’adamfo
‘Ɔte Pá Ma Yɛ Kyɛ Yekopingye Nyameɛ Ɔ’
“Me de, ɔte paa ma me kyɛ ngopingye Nyameɛ ɔ.”—EDW. 73:28.
BƆ ADESŨA NE KƆHÃ YENWO DWIRƐ Ɔ
Yekonwu kyɛbɔ yekopingye Yehowa, ɔne mvasoɛ bɔ ɔwɔ so kyɛ yɛkɔyɛ sɔ ɔ.
1-2. (a) Sɛ yɛne ebie kɔhora kɔfa adamvoa a, nzu yeɛ odikyɛ yɛyɛ ɔ? (b) Nzu yeɛ yekosusu yenwo wɔ adesua he anu ɔ?
ASO ele wɔ damvo bie bɔ mvrama mva ɛne ye b’afia anaa? Yede nzu yeɛ ɔmaa ɛmɔfale bɛnwo adamvoa ɔ? Ebiaa ɛne ye babɔ bahyɛ paa, yeti ɛse ɔhaw bɔ wafa nu, ɔne nningyein bɔ okuro ne bɔ onguro ɔ. Esa nwuni ye subaen biemɔ bɔ ɔyɛ nyemene bɔ né ekuro kyɛ esuesua ɔ. Ɛhe mukoraati maa eehurole ye dwirɛ paa.
2 Sɛ ɛkɔhora kɔfa ebie adamvoa paa a, ɔmma mbaen, na mmom sana enya sona nanwo alagye. Sɔ ala yeɛ sɛ yɛne Yehowa kɔhora kɔfa adamvoa a ɔte ɔ. Adesua he kɔmaa yekonwu kyɛbɔ yekopingye Yehowa, ɔne mvasoɛ bɔ ɔwɔ so kyɛ yɛkɔyɛ sɔ ɔ. Ɛmɔma yelimoa yɛnea bɔ yeti yeɛ ɔte pá kyɛ yekopingye Yehowa bɔ ɔte yɛ damvo bɔ onni yɛnwo angorɛ koraa ne ɔ.
3. Mvasoɛ bɔ ɔwɔ so kyɛ yekopingye Yehowa ne, nzuati yeɛ odikyɛ yɛdwenedwene yenwo ɔ?
3 Bɔ yeti yeɛ ɔte pá kyɛ yekopingye Yehowa ne, yenwo hia kyɛ yɛdwenedwene yenwo. (Edw. 63:6-8) Wɔde yɛnea sɔ dwirɛ he. Sɛ yedi aleɛ bɔ anwoserɛ wɔ nu, yenya mmerɛ yɛfa yɛda, yɛtengyɛ y’aporɛ nu, ná yɛno nzue pee a, yɛse kyɛ ɔboka yɛ nipadua ne paa. Nakoso yɛkã ye, ebiemɔ wɔ berɛ a, bɛmva sɔ nningyein nemɔ bɛnyɛ húu. Yeti bɔ ɔkɔboka yɛ maa yɛkɔhɔso yɛkɔyɛ sɔ nningyein nemɔ yeɛ ole kyɛ yekosusu mvasoɛ bɔ ɔwɔ so kyɛ yɛkɔyɛ sɔ nanwo. Sɔ yeɛ yɛne Yehowa adamvoa ne koso te ɔ. Sɛ yɛdwenedwene mvasoɛ bɔ ɔwɔ so kyɛ yɛkɔfa ye adamvoa nanwo a, ɛhene yeɛ ɔkɔmaa yɛkɔyere yɛnwo kyɛ yekopingye ye ɔ.—Edw. 119:27-30.
4. Nzu yeɛ edweintolɛniɛ ne hane ye wɔ Edwein 73:28 ne ɔ?
4 Kenga Edwein 73:28. Bɔ ɔhworɔle Edwein 73 ne, né ɔte Lewiniɛ bɔ ɔto dwein wɔ Yehowa asɔre awuro berɛ ɔ. Ɔkɔyɛ kyɛ ne wafa nahorɛlilɛ wasõ Yehowa afoɛ pee. Nakoso, né onwu ye kyɛ ɔte pá kyɛ ɔkɔhɔso ‘kopingye Nyameɛ,’ na ɔhyɛle mmenia ngunaen kyɛ bɛ koso bɛyɛ sɔ. Yede, mvasoɛ beni yeɛ ɔwɔ so kyɛ yekopingye Yehowa ɔ?
SƐ ‘YEPINGYE NYAMEƐ’ A, ƆMAA YƐNYE GYE
5. (a) Sɛ yepingye Yehowa a, nzuati yeɛ ɔmaa yɛnye gye ɔ? (b) Kyɛbɔ Anyandera 2:6-16 maa yenwu ye ne, nworɛ bɔ Yehowa fama yɛ ne, sɛɛ yeɛ ɔboka wɔ, na osa bɔ wɔnwo waen ɔ?
5 Sɛ yɛkɔso yepingye Yehowa a, ɔmaa yɛnye gye paa. (Edw. 65:4) Bɔ ɔmaa yɛkã sɔ yeɛ ole kyɛ, sɛ yɛfa afutue bɔ ɔwɔ Bible nanu ne yɛbɔ yɛ bra a, ɔmaa yenwu nworɛ. Ɛhene boka yɛ maa yɛtwe yɛnwo yefi nningyein biemɔ bɔ ɔkɔhora kɔfa ɔhaw kɔbrɛ yɛ, anaa ɔkɔmaa yɛkɔɔyɛ bɔne pirikua nanwo. (Kenga Anyandera 2:6-16.) Ɛhene ati yeɛ Bible ne nwa, ‘Sona bɔ wapena nworɛ si atee wanwu ye ne, yeɛ sona bɔ onya ndeaseɛ ne, anigye te ye deɛ’ ne.—Any. 3:13.
6. Nzu yeɛ ɔmaa edweintolɛniɛ ne wora bɔle ɔ?
6 Sɛ ebie te Yehowa damvo po a, odwu mmerɛ bie a, ye aba nu kora bu. Sɔ pɛpɛɛpɛ yeɛ ɔtole bɔ ɔhworɔle Edwein 73 ne ɔ. Yenye borole bɛbɔ bɛnzo Nyameɛ ne. Né onwu ye kyɛ sɔ mmenia nemɔ moma bɛnwo so, na betianu yɛ se, nakoso né banya bɛnwo, bɛte apɔ, na edwirɛ koso ndo bɛ. (Edw. 73:3-7, 12) Edwirɛ ne hale ye alaa maa odwuli nekaa bie ne, né onwu ye kyɛ mvasoɛ nne so kyɛ ɔsõ Yehowa ɔ. Ɛhe maa ye wora bɔle paa, yeti ɔhane kyɛ: “Nahorɛ nu, m’ahone bɔ mate nu sannwuu ne, ɔne me sa bɔ manwunzi mafa mahyire kyɛ medi be ne, mafɛ magua mbaen.”—Edw. 73:13.
7. Sɛ yɛ wora bɔ a, nzu yeɛ odikyɛ yɛyɛ ɔ? (Nea foto bɔ ɔwɔ Ɛwɛnelɛ Waen ne nyunu ne.)
7 Ɔwɔ nu, né edweintolɛniɛ ne wora abɔ de, nakoso wamaa ɛhene ammu ye aba nu, na mmom ɔhɔle “Nyameɛ nekaa krongron berɛ,” na Yehowa koso bokale ye maa ɔsesane ye adwene. (Edw. 73:17-19) Sɛ yɛ wora bɔ a, Yehowa bɔ ɔte yɛ damvo bɔ okuro yɛ dwirɛ ne, onwu ye. Yeti sɛ yɛbɔ ye mbaeɛ, yesua ye Dwirɛ ne, ná yetie afutue bɔ ɔnate aliemaamɔ so fa ma yɛ ne a, ɔkɔmaa yekonya anwoserɛ bɔ yɛkɔfa yɛkɔsõ ye ɔ. Sɛ yɛ wora bɔ paa, na yennwu bɔ yɛyɛ po a, Yehowa kɔkyekye yɛ wora.—Edw. 94:19.a
Lewiniɛ bɔ ɔhworɔle Edwein 73 ne, yeɛ waagyina “Nyameɛ nekaa krongron berɛ” ne (Nea ngyekyɛmuɛ 7)
SƐ ‘YEPINGYE NYAMEƐ’ A, ƆMAA YENWU BƆ YETI YEƐ YƐTE ASE Ɔ, NA YENYA ANYELASOƐ
8. Sɛ yepingye Nyameɛ a, osa boka yɛ sɛ?
8 Sɛ yepingye Nyameɛ a, osa boka yɛ wɔ sɔ atee nyɔ he aso: Bɔ olimoa, ɔmaa yenwu bɔ yeti yeɛ yɛte ase ɔ. Yeɛ bɔ ɔtɔ so nyɔ, ɔmaa yenya anyelasoɛ bɔ odi mu. (Yer. 29:11) Ɛmɔma yesusu sɔ dwirɛ nyɔ he anwo kãa.
9. Sɛ yepingye Yehowa a, sɛɛ yeɛ ɔmaa yɛnye gye ɔ?
9 Sɛ yepingye Yehowa a, ɔmaa yenwu bɔ yeti yeɛ yɛte ase ɔ. Mmeni pee nne nni kyɛ Nyameɛ wɔ berɛ. Yesɔ nati bɛnze bɔ yeti yeɛ yɛwɔ ewiase ɔ, na bɛnwa okodwu mmerɛ bie ne, mmenia boso komini kofi aseɛ he aso. Nakoso, yɛde ɔnate kyɛ yasua Bible nati, yɛse kyɛ Nyameɛ “wɔ berɛ, na oyira bɛ bɔ bɛ nye aboro bɛpena ye boso” ne. (Heb. 11:6) Yehowa bɔ ɔte yɛ Baba ne, ɔbɔle yɛ kyɛ yɛɛsõ ye. Yeti sɛ yɛyɛ sɔ a, ɛnnɛ po yɛnye kɔgye.—Deut. 10:12, 13.
10. Kyɛbɔ Edwein 37:29 kã ne, bɛbɔ bɛfa bɛnwo bɛto Yehowa so ne, nzu yeɛ wahyɛ bɔ kyɛ ɔkɔyɛ kɔma bɛ ɔ?
10 Mmeni pee bɔ bɛwɔ ewiase he anu ne, bɔ bɛse ala yeɛ ole kyɛ bɛkɔyɛ adwuma, bekogya bɛkɔwo mmaa, na bapena esikaa bɔ sɛ bɛbɔ nworowaa bekoli ɔ. Nyameɛ de, yenwo dwirɛ mma betianu po na bafa bɛnwo bato ye so. Nakoso bɛbɔ bɛsõ Yehowa ne de, bafa bɛnye bato ye so. (Edw. 25:3-5; 1 Tim. 6:17) Yele yɛ Nyameɛ bɔ ɔte yɛ damvo nanu gyidie, na yɛse kyɛ okoli ye bɔhyɛ biala so. Ebie yeɛ ole kyɛ, yɛnea atee kyɛ yɛkɔsõ ye daa wɔ Paradise.—Kenga Edwein 37:29.
11. Sɛ yepingye Nyameɛ a ɔte nga sɛ, na yɛ koso sɛɛ yeɛ ɔboka yɛ ɔ?
11 Sɛ yepingye Nyameɛ a, ɔboka yɛ wɔ atee foforɛ so. Ebie yeɛ ole kyɛ, sɛ yɛyɛ bɔne na yenu yɛnwo a, Yehowa nwa ɔkɔfa kɔhyɛ yɛ. (Yes. 1:18) Ɛhene ati, bɔne biemɔ bɔ yɛyɛle ye mmerɛ bie ne, ɔnzɛkyɛ yɛfa yenwo dwirɛ yɛha yɛnwo. (Edw. 32:1-5) Afei koso sɛ yɛmaa Yehowa nye gye a, yɛkoso yɛnye gye. (Any. 23:15) Nahorɛ nu, sɛ yepingye Yehowa a, yenya nhyiraa pee. Yede ɛkɔyɛ sɛɛ né ahɔso apingye Nyameɛ?
BƆ ƆKƆMAA YƐKƆHƆSO ‘YEKOPINGYE NYAMEƐ’ Ɔ
12. Nzu yeɛ alimoa ayɛ bɔ wamaa apingye Nyameɛ ɔ?
12 Sɛ ɛte Kristoniɛ bɔ abɔ asu a, yede alimoa ayɛ nningyein biemɔ bɔ wamaa apingye Yehowa ɔ. Ebie yeɛ ole kyɛ asua nahorɛ dwirɛ pee bɔ ɔfa Yehowa ne Yesu Kristo nwo. Ahwe wɔnwo afi wɔ bɔne nwo, anya Nyameɛ nu gyidie, na ɛyere wɔnwo kyɛ ɛkɔyɛ bɔ okuro ɔ. Nakoso, sɛ yɛkɔhɔso yekopingye Nyameɛ a, ɔnzɛkyɛ yɛyakyi sɔ nningyein hemɔ yɛlɛ.—Kol. 2:6.
13. Nningyein nza benimɔ yeɛ ɔkɔboka yɛ maa yɛkɔhɔso yekopingye Yehowa ɔ?
13 Nzu yeɛ ɔkɔboka yɛ maa yɛkɔhɔso yekopingye Yehowa ɔ? (1) Odikyɛ yɛkenga Bible ne, na yɛdwenedwene yenwo. Nakoso ɔnzɛkyɛ yɛkenga ye kyɛ yɛfa yɛpena Nyameɛ nwo nimdeɛ mbaen. Na mmom, bɔ Nyameɛ pena fi yɛ berɛ ne, odikyɛ yɛte yebo, na yɛfa yɛbɔ yɛ bra. (Ɛfe. 5:15-17) (2) Odikyɛ yɛdwenedwene bɔ Yehowa ayɛ afa ahyire kyɛ okuro yɛ dwirɛ nanwo. Yɛyɛ sɔ a, ɔkɔmaa yɛ gyidie kɔyɛ se. (3) Odikyɛ yekyi nningyein bɔ Yehowa nguro ne, ná yɛtwe yɛnwo yefi bɛbɔ bɛyɛ sɔ nningyein nemɔ nwo.—Edw. 1:1; 101:3.
14. Kyɛbɔ 1 Korintofoɛ 10:31 ne kã ne, nningyein benimɔ yeɛ sɛ yɛyɛ ye kyẽa biala a, ɔmaa Yehowa nye gye ɔ? (Nea foto ne koso.)
14 Kenga 1 Korintofoɛ 10:31. Nningyein bɔ yɛse kyɛ ɔkɔmaa Yehowa nye kɔgye ne, yenwo hia paa kyɛ yɛkɔyere yɛnwo yɛkɔyɛ. Ɛhe kyire kyɛ sɛ yɛkɔ adesua ne asɛnga ngome a, ne yeyielle. Na mmom odikyɛ kyẽa biala, yɛyɛ bɔ ɔsɔ Yehowa nye ɔ. Ebie yeɛ ole kyɛ, sɛ yedi nahorɛ wɔ nikyeebiala nu, na yɛyɛ mmenia pá a, ɔmaa Yehowa nye gye. (2 Kor. 8:21; 9:7) Afei koso, Yehowa pena kyɛ yekyire kyɛ yɛnye sɔ ngoa bɔ wafa wama yɛ ne. Ɛhene ati yɛnea yé wɔ yɛ adidie ne yɛ nzãa nonɛ nwo. Yesa koso yɛyɛ nningyein foforɛ biemɔ bɔ ɔkɔmaa yekonya anwoserɛ ɔ. Sɛ Yehowa nwu ye kyɛ yɛyere yɛnwo kyɛ yekoli nahorɛ wɔ nningyein mmaammaa biemɔ po nu a, ɔmaa yenye gye yɛnwo paa.—Luka 16:10.
Nningyein bɔ yɛyɛ a, ɔkɔmaa Yehowa nye kɔgye yɛnwo ne, ebie yeɛ ole kyɛ, yɛkɔmaa yɛnye kɔla berɛ mmerɛ bɔ yɛkã kar, yɛkɔtengyɛ y’aporɛ nu, yekodidi yé, ná yayɛ mmenia pá (Nea ngyekyɛmuɛ 14)
15. Sɛɛ yeɛ Yehowa pena kyɛ yɛne mmenia tena ɔ?
15 Bɛbɔ bɛsõ Yehowa, ɔne bɛbɔ bɛnzo ye ne mukoraati, okuro bɛ dwirɛ. (Mat. 5:45) Yeti sɔ ala yeɛ ɔpena kyɛ yɛ koso yɛyɛ ɔ. Yehowa mbena kyɛ, ‘yɛkã ebiala nwo dwirɛ tɛɛ, yɛyɛ mmenia bɔ bekuro ngondii.’ Na mmom ɔpena kyɛ ‘yédwo yɛ nwo ase yɛma mmenia mukoraa.’ (Tito 3:2) Ɔnate ɛhene ati, bɛbɔ bɛnzo Yehowa ne, ɔnzɛkyɛ yenya adwene kyɛ yɛte pá yɛtra bɛ. (2 Tim. 2:23-25) Sɛ yɛmaa mmenia nwu ye kyɛ yekuro bɛ dwirɛ wɔ nikyeebiala bɔ yɛyɛ nu a, ɔkɔmaa yekopingye Yehowa paa.
SƐ EDI MVOMSOƐ PO A, KƆSO ‘PINGYE NYAMEƐ’
16. Odwuli mmerɛ bie ne, adwene beni yeɛ bɔ ɔhworɔle Edwein 73 ne nyane ɔ?
16 Yede sɛ odwu mmerɛ bie na enya adwene kyɛ ɔnate mvomsoɛ biemɔ bɔ ali nati, wɔnwo nhia Yehowa kõ koso ɛ? Kyɛbɔ yalimoa yanwu ye ne, ɛhene bie yeɛ ɔtole bɔ ɔhworɔle Edwein 73 ne. Ɔhane kyɛ: “Me de, ahaa mesoti; ɔhale sɔaa maa mvini ase.” (Edw. 73:2) Ɔtoale so kyɛ, “me kra lili aworabɔlɛ,” na “né nde kyɛ sona kwaseaa bɔ ɔnze hwee ɔ,” “nyɛle kyɛ kaka bie” wɔ Yehowa nye so. (Edw. 73:21, 22) Aso onyane adwene kyɛ mvomsoɛ bɔ wali nati, Yehowa agyi ye ato koraa, bɔ yenwo nhia ye kõ anaa?
17. (a) Mmerɛ bɔ ne edweintolɛniɛ ne aba nu abu po ne, nzu yeɛ ɔyɛle ɔ? (b) Nzu yeɛ yɛkɔhora yekosua yekofi ye dwirɛ nanu ɔ? (Nea foto ne koso.)
17 Edweintolɛniɛ ne nyane adwene kyɛ yenwo nhia Yehowa, nakoso ebiaa wangyɛ ɔsesane sɔ adwene ne. Mmerɛ bɔ né ye abanu abu paa ne po, onwuni kyɛ ɔte pá kyɛ ɔkɔhɔso kopingye Nyameɛ. Yeti ɔhane kyɛ: “Nakoso me de, ngɔtena wɔ nwo daa; etira me sa famaa ne anu. Ɛfa wɔ foɛtulɛ ekyire me atee, na ye si ye, ekole me kɔhɔ animnyam nu.” (Edw. 73:23, 24) Yɛkoso sɛ yɛ wora bɔ, anaa y’abanu bu a, odikyɛ yɛsrɛ Yehowa kyɛ ɔma yɛ anwoserɛ. (Edw. 73:26; 94:18) Sɛ yedi mvomsoɛ pirikua bie po a, odikyɛ yɛkã yenwo dwirɛ yekyire Yehowa, na yenya gyidie kyɛ ɔkɔfa yɛ ‘bɔne kɔhyɛ’ yɛ. (Edw. 86:5) Yeti sɛ y’abanu bu a, sɔ mmerɛ ne paa yeɛ odikyɛ yɛyere yɛnwo yepingye Nyameɛ ɔ.—Edw. 103:13, 14.
Sɛ y’aba nu bu a, bɔ ɔkɔboka yɛ yeɛ ole kyɛ yɛkɔyere yɛnwo wɔ Yehowa soen nu, na ɛhene kɔmaa yekopingye ye (Nea ngyekyɛmuɛ 17)
‘PINGYE NYAMEƐ’ DAA!
18. Nzuati yeɛ yɛkɔhora yekopingye Yehowa daa ɔ?
18 Yɛkɔhora yekopingye Yehowa ná yasua yenwo nikyee daa. Bible ne maa yenwu kyɛ, atee bɔ Yehowa fa so yɛ ye nningyein, ye nworɛ, ɔne ye nimdeɛ de, ‘yɛngɔhora yɛngɔte yebo yengoyie.’—Rom. 11:33.
19. Sɛɛ yeɛ Edwein nwomaa nanu dwirɛ hyɛ yɛ ngunaen ɔ?
19 Edwein 79:13 kã kyɛ: “Yɛte wɔ maen, mmoaen bɔ yɛdidi wɔ sa nu ne, yɛkɔla wɔ ase afebɔɔ; ofi aworɛ ndoatoasoɛ kɔka aworɛ ndoatoasoɛ, yɛkɔhɔ so yɛkɔye wɔ ayɛ.” Ɛkɔhora konya gyidie kyɛ sɛ ɛkɔso pingye Yehowa a, okoyira wɔ afebɔɔ, na ɛkɔfa akokoduro kɔhã kyɛ: “Nyameɛ yeɛ ɔte m’ahone anwoserɛ ne me kyɛfa afebɔɔ ɔ.”—Edw. 73:26.
DWEIN 32 Gyina Yehowa Afã!
a Bɛbɔ adwenedwene kora hyɛ bɛso maa bedi ɛyealɛ ne aworabolɛ bɛkyɛ paa ne, ebiaa ɔkɔyɛ pá kyɛ bekoonwu dɔktaniɛ maa ɔkɔnea bɛ. Sɛ ɛpena ɛhe anwo dwirɛ pee a, kenga Ɔwɛn-Aban No. 1 2023 deɛ ne.