Dé Tonu Kyɛ Yehowa Kuro Wɔ Dwirɛ

1. Nzu yeɛ ɔmaa eyirale wɔnwo so mane Yehowa ɔ? (Nea foto ne koso.)

ƐKAE mmerɛ bɔ eyirale wɔnwo so mane Yehowa ne? Ɛhyɛle ye bɔ kyɛ bɔ okuro ne yeɛ ɛkɔfa kolimoa wɔ w’asetena nu ɔ, na ɛkɔhɔso kɔfa w’ahone mukoraati, wɔ kra mukoraati, w’adwene mukoraati, ɔne w’anwoserɛ mukoraati kohuro ye dwirɛ. Bɔ ɔmaa esili sɔ gyinayɛɛ ne yeɛ ole kyɛ esuane yenwo nikye na enyane ɔdɔ mane ye. (Mak. 12:30) Ofi sɔ mmerɛ ne, ɔdɔ bɔ ele ma ye ne, wahɔso wayɛ piri paa. Yede, sɛ ebie bisa wɔ kyɛ, “Aso edé di kyɛ ɛdɔ Yehowa?” a, ahaa nzu yeɛ ɛkɔhã ɔ? Ahaa ɛngɔma yenoa ngɔpe po, na ahã kyɛ, “Mekuro ye dwirɛ metra ebiala!”

2-3. Nzu yeɛ Yehowa pena kyɛ yedé yedi ɔ, na nzu yeɛ yekosusu yenwo wɔ adesua he anu ɔ? (Yeremia 31:3)

² Yede fa ye kyɛ babisa wɔ kyɛ “Aso edé di kyɛ Yehowa kuro wɔ dwirɛ?” Ɛhene koso ahaa ɛkɔye yenoa sɛɛ? Sɛ enne nni kyɛ Yehowa kuro wɔ dwirɛ a, ebiaa ɔkɔyɛ se kyɛ ɛkɔhã kyɛ yóo. Bɔ aliemaa brasua bie fale nu wɔ ye ngwalaa nu nati, wamaa wanya adwene kyɛ ebiala nguro ye dwirɛ. Ɔhane kyɛ: “Mese ye paa kyɛ medɔ Yehowa. Nakoso, ɔtaa yɛ se ma me kyɛ ngole ngoli kyɛ Yehowa koso kuro me dwirɛ ɔ. Yede ɛkɔyɛ sɛɛ ne anwu ye kyɛ Yehowa kuro wɔ dwirɛ?

³ Yehowa pena kyɛ edé di kyɛ okuro wɔ dwirɛ. (Kenga Yeremia 31:3.) Nahorɛ dwirɛ yeɛ ole kyɛ, ye yeɛ wahwe wɔ wawa yenwo ɔ. Mmerɛ bɔ eyirale wɔnwo so mane ye na ɛbɔle asu ne, ɔmaa ɔlale ɔdɔ bɔ yebo mbɛ le ali hyirele wɔ, na ɛhe te nikyeebie bɔ ɔsombo ɔ. Ɛhene kyire kyɛ okuro wɔ dwirɛ paa na ɔngɔyakyi wɔ nu lle. Sɔ ɔdɔ bɔ ole ma bɛbɔ bɛsõ ye ne, ɔmaa obu benu biala kyɛ bɛte ‘ye bɔbɔ ye deɛ.’ Yeti wɔ koso wɔnwo hia ye paa. (Mal. 3:17) Né somafoɛ Pɔɔlo dédi kyɛ Yehowa kuro ye dwirɛ, na wɔ koso Yehowa pena kyɛ enwu ye sɔ. Ɔnate sɔ gyidie bɔ ne Pɔɔlo le ye nati ɔhworɔle kyɛ: “Mese ye pefee kyɛ ewue anaa ngoa, anaa abɔfo mɔ, anaa ewienu atumifoɛ, anaa nningyein bɔ ɔwɔ berɛ kekesaala ye, anaa nningyein bɔ ɔbaawa, anaa tumi, anaa anwuro, anaa kumaa kuronn, anaa abɔdeɛ nu nikyee biala ngɔhora ngɔtete yɛ ngofi Nyameɛ ɔdɔ bɔ ɔwɔ yɛ Awurade Kristo Yesu nu ne anwo le.” (Rom. 8:​38, 39) Adesua he anu ne, yɛkɔnea bɔ yeti yeɛ odikyɛ yenya gyidie kyɛ Yehowa kuro yɛ dwirɛ. Afei yekosa yɛkɔnea bɔ ɔkɔboka yɛ maa yekonya sɔ gyidie ne ɔ.

BƆ YETI YEƐ ODIKYƐ YEDÉ YƐTONU KYƐ YEHOWA KURO YƐ DWIRƐ Ɔ

4. Satan nnakannaka ne, nu kõ yeɛ ole beni, na yɛkɔyɛ sɛɛ ne yaho yatia?

⁴ Sɛ yedé yɛtonu kyɛ Yehowa kuro yɛ dwirɛ a, ɔkɔmaa yɛkɔho yekotia Satan “nnakannaka” nanu kõ. (Ɛfe. 6:11) Satan yɛ bɔ ɔkɔhora biala kyɛ ɔkɔmaa yɛkɔyakyi Yehowa soen. Nningyein bɔ ɔfa lakalaka yɛ ne, nu kõ yeɛ ole kyɛ Yehowa nguro yɛ dwirɛ. Kae kyɛ Satan de, adwene pá biala nne yetianu. Yeti onya nwu ye kyɛ y’abanu abu alaa pɛ, ne wato wawura yɛso. Ebie yeɛ ole kyɛ, sɛ onwu ye kyɛ edwirɛ bie bɔ ɔtole yɛ mmerɛ bie, ɔhaw bɔ yɛfa nu kesaalae, anaa bɔ ɔkɔto yɛ kyẽabie nanwo adwenedwene ahyɛ yɛ so a, yede ne wato wali koraa. (Any. 24:10) Satan tekyɛ gyata bɔ ɔto wura ngaka bɔ bayɛ mmerɛ so ɔ. Ɛhene ati yeɛ mmerɛ bɔ y’abanu abu ne, yeɛ ɔto wura yɛ so ne. Nakoso gyidie bɔ yele ye kyɛ Yehowa kuro yɛ dwirɛ ne, sɛ yɛmaa nu yɛ se a, ɔkɔmaa ‘yekosi abɔnzam atee,’ na wanlakalaka yɛ.—1 Pet. 5:​8, 9; Yak. 4:7.

5. Nzuati yeɛ yenwo hia paa kyɛ yekonwu kyɛ Yehowa kuro yɛ dwirɛ, na yɛnwo hia ye ɔ?

⁵ Sɛ yedé yɛtonu kyɛ Yehowa kuro yɛ dwirɛ a, ɔmaa yɛtwe yepingye ye. Nzuati yeɛ yɛkã sɔ ɔ? Kyɛbɔ Yehowa bɔle yɛ nati, ɔmaa yɛkora yɛda ɔdɔ ali yekyire mmenia, na bɛkoso bɛda ɔdɔ ali bekyire yɛ. Yeti sɛ ebie kuro yɛ dwirɛ a, yɛ koso yekuro ye dwirɛ. Ɛhene ati sɛ yenwu ye kyɛ Yehowa kuro yɛ dwirɛ na yɛnwo hia ye a, ɔkɔmaa yɛ koso yekonya ɔdɔ yɛkɔma ye. (1 Yoh. 4:19) Mmerɛ bɔ ɔdɔ bɔ yele yɛma ye ne yɛ piri ne, ɔkɔmaa ye koso okonya ɔdɔ pirikua kɔma yɛ. Bible ne kã kyɛ: “Ɛmɔhwe bepingye Nyameɛ, na ye koso ɔkɔhwe kopingye ɛmɔ.” (Yak. 4:8) Yede gyidie bɔ yele ye kyɛ Yehowa kuro yɛ dwirɛ ne, yɛkɔyɛ sɛɛ ne yamaa nu ayɛ se?

BƆ ƆKƆBOKA YƐ MAA YEKOLE YEKOLI KYƐ YEHOWA KURO YƐ DWIRƐ Ɔ

6. Sɛ enne nni kyɛ Yehowa kuro wɔ dwirɛ a, nzu yeɛ odikyɛ ɛyɛ ɔ?

⁶ Kɔso bɔ mbaeɛ na srɛ Yehowa kyɛ ɔboka wɔ ma enwu bɔ yeti yeɛ okuro wɔ dwirɛ ɔ. (Luka 18:1; Rom. 12:12) Sɛ ɔkɔyɛ yé a, daabiala srɛ Yehowa mmerɛ pee kyɛ ɔboka wɔ ma enwu subaen pá bɔ ɔwɔ wɔnwo ne. Odwu mmerɛ bie a, ebiaa ɔkɔyɛ se kyɛ ekole kɔto nu kyɛ Yehowa kuro wɔ dwirɛ ɔ. Sɛ ɔba sɔ a, kae kyɛ Yehowa te piri tra w’ahone. (1 Yoh. 3:​19, 20) Yehowa se wɔ paa, na subaen pá biemɔ bɔ ɔwɔ wɔnwo bɔ ɛnze ne po, yede, ɔse ye mukoraa. (1 Sam. 16:7; 2 Abe. 6:30) Yeti ‘kã’ w’ahone nu dwirɛ mukoraati kyire ye, na srɛ ye kyɛ ɔboka wɔ ma enwu ye kyɛ okuro wɔ dwirɛ. (Edw. 62:8) Mmerɛ bɔ abɔ mbaeɛ ne ayie ne, yɛ sɔ nningyein bɔ olili so hemɔ.

7-8. Sɛɛ yeɛ Edwein nwomaa ne maa yenwu ye kyɛ Yehowa kuro yɛ dwirɛ ɔ?

⁷ Dé bɔ Yehowa ahã ne di. Kyɛbɔ Yehowa si te ne, ɔmaa bɛbɔ bɛhworɔle Bible ne hane yenwo dwirɛ. Edweintolɛniɛ Dawide sɔa, atee bɔ ɔfale so hane kyɛbɔ Yehowa si dwene yɛnwo nanwo dwirɛ ne, ɔyɛ nyemene po mbaen. Ɔhane kyɛ: “AWURADE pingye bɛ bɔ bɛ wora abɔ ɔ, na ɔpepɛ de bɛ bɔ bɛ kra aboto ɔ.” (Edw. 34:18) Sɛ wɔ wora bɔ paa a, ebiaa ekonya adwene kyɛ elle bokafoɛ biala. Nakoso, Yehowa ahyɛ bɔ kyɛ okopingye wɔ paa sɔ mmerɛ ne, ofikyɛ onwu ye kyɛ ehia ye mmokalɛ. Dawide sa hane ye wɔ edwein foforɛ bie nu kyɛ: “Fa wɔ towaa ne sɔ me nye moen.” (Edw. 56:8) Sɛ énwu amaneɛ a, Yehowa nwu ye, na ɛyɛ a ne ɔyɛ ye yea paa kyɛ ahɔ ɔhaw bɔ ɔte sɔ nu ɔ. Sɛ kwanduniɛ bie nate ɛserɛ so a, ye nzue bɔ ogua towaa nu ne, ɛyɛ a onni yenwo angorɛ koraa. Sɔ ala yeɛ wɔ koso sɛ yɛkɔhã a, Yehowa sɔ wɔnye moen ne fa sie nekaabie, ofikyɛ yenwo hia ye. Edwein 139:3 koso kã kyɛ: ‘Yehowa nye ta bɔ meyɛ amukoraa.’ Bɔ ɛyɛ biala ne, Yehowa nwu ye. Nakoso nningyein pá bɔ ɛyɛ ne, ɛhene yeɛ ɔfa ye adwene sie so ɔ. (Heb. 6:10) Nzuati ɔ? Ofikyɛ mmɔden biala bɔ ɛbɔ kyɛ ɛkɔyɛ bɔ okuro ne, ɔyɛ ye nyemene.a

⁸ Sɔ dwirɛ bɔ ɔhyɛ ngunaen bɔ ɔwɔ Tworɔnzɛm nanu ne, ɔtekyɛ bɔ Yehowa nate so ɔkã kyire wɔ kyɛ: “Mepena kyɛ enwu ye kyɛ mekuro wɔ dwirɛ paa, na medwene wɔnwo.” Nakoso, kyɛbɔ yalimoa yanwu ye ne, Satan pena kyɛ enya adwene kyɛ Yehowa nguro wɔ dwirɛ. Yeti sɛ odwu mmerɛ bie na w’adwene nu yɛ wɔ naa wɔ sɔ dwirɛ nanwo a, bisa wɔnwo kyɛ: ‘Nwa yeɛ odikyɛ medé ye medi ɔ, “ngondombo baba” ne, anaa ‘nahorɛ Nyameɛ’ ne?’—Yoh. 8:44; Edw. 31:5.

9. Bɛbɔ bɛdɔ Yehowa ne, ɛbɔ beni yeɛ wahyɛ bɛ ɔ? (Ɛksadɔso 20:​5, 6)

⁹ Susu kyɛbɔ Yehowa si kuro wɔ dwirɛ nanwo. Wɔde nea edwirɛ bie bɔ Yehowa hahyirele Mose ne Yisraelfoɛ nemɔ ɔ. (Kenga Ɛksadɔso 20:​5, 6.) Yehowa hyɛle bɔ kyɛ ɔkɔhɔso kɔla ɔdɔ bɔ yebo mbɛ le ali kohyire bɛbɔ bekuro ye dwirɛ ne. Sɔ dwirɛ ne kyire kyɛ yɛ Nyameɛ bɔ ɔte nahorɛniɛ ne, sɛ ebie kuro yɛ dwirɛ a, ye koso okuro sɔ sona ne dwirɛ. (Neh. 1:5) Yeti sɛ odwu mmerɛ bie na ɛpena kyɛ enwu ye kyɛ Yehowa kuro wɔ dwirɛ a, bisa wɔnwo kyɛ: ‘Aso medɔ Yehowa?’ Afei dwene ɛhe anwo nea: Sɛ ɛdɔ Yehowa na ɛyere wɔnwo kyɛ ɛkɔyɛ bɔ okuro a, yede nwu ye kyɛ ye koso okuro wɔ dwirɛ paa. (Dan. 9:4; 1 Kor. 8:3) Sɛ yɛkɔhã a, sɛ ɛse ye paa kyɛ ɛdɔ Yehowa a, yede nzuati yeɛ enne nni kyɛ okuro wɔ dwirɛ ɔ? Nya gyidie paa yenye wɔ wɔ so, na ɔngɔyakyi wɔ nu lle.

10-11. Nzu yeɛ Yehowa kuro kyɛ enwu ye fa Yesu wue nanwo ɔ? (Galatiafoɛ 2:20)

¹⁰ Dwenedwene Yesu wue nanwo. Yesu wue ne te akyɛdeɛ pirikua paa bɔ Yehowa afa ama mmenia mukoraati ɔ. (Yoh. 3:16) Nakoso, aso Yesu wue ne te akyɛdeɛ bɔ Nyameɛ bɔbɔ deinn afa ama wɔ hɔ? Yóo. Somafoɛ Pɔɔlo sɔa, koraka ɔbaayɛ Kristoniɛ ne, ne wayɛ bɔne mbirimbiri pee. Sɛ ɛhene la ahameɛ a, ne ole mmerɛyɛlɛ bɔ odikyɛ ɔyere yenwo di so ɔ. (Rom. 7:​24, 25; 1 Tim. 1:​12-14) Ɛhe mukoraati nu ne, ne odé di kyɛ ye bɔbɔ deinn ti, yeɛ Nyameɛ maa Ɔwa ne wuli ɔ. (Kenga Galatiafoɛ 2:20.) Kae kyɛ Nyameɛ yeɛ ɔmaa Pɔɔlo hworɔle sɔ dwirɛ ne ɔ, na mmom nna ye bɔbɔ yeɛ ɔbɔle yetianu hworɔle ɔ. Edwirɛ biala bɔ ɔwɔ Bible nanu ne koso, Nyameɛ yeɛ ɔmaa bɛhworɔ bɛmane yɛ. (Rom. 15:4) Pɔɔlo dwirɛ ne maa yenwu ye kyɛ Yehowa pena kyɛ edé di kyɛ wɔ ti yeɛ ɔmaa Ɔwa ne wuli ɔ, na ɔte akyɛdeɛ bɔ wafa wama wɔ ɔ. Sɛ esusu Yesu wue nanwo wɔ sɔ atee naso a, ɔkɔmaa ekole koli paa kyɛ amba, sãa Yehowa kuro wɔ dwirɛ paa.

¹¹ Odikyɛ yɛda Yehowa ase paa kyɛ ɔsomane Ɔwa ne maa oowu mane yɛ ɔ. Nikyee foforɛ bie koso wɔ berɛ bɔ yeti yeɛ Yesu wale aseɛ he aso ɔ. Ɛhene yeɛ ole kyɛ ɔkɔmaa mmenia konwu nahorɛ bɔ ɔfa Nyameɛ nwo ɔ. (Yoh. 18:37) Sɔ nahorɛ dwirɛ ne, ebie yeɛ ole adwene bɔ Yehowa le ye wɔ ye mmaamɔ nwo ne.

KYƐBƆ YESU BOKA YƐ MAA YENWU KYƐ YEHOWA KURO YƐ DWIRƐ Ɔ

12. Bɔ Yesu hafale Yehowa nwo ne, nzuati yeɛ yɛkɔhora yekole yekoli ɔ?

¹² Mmerɛ bɔ Yesu wale aseɛ he aso ne, ɔmaa yenwuni kyɛbɔ Yehowa si te ɔ. (Luka 10:22) Yɛkɔhora yekole bɔ Yesu hafale Yehowa nwo ne yekoli, ofikyɛ ɔne Yehowa tenane anwuro dɔ afoɛ pee mbaen kora yeɛ ɔba aseɛ so ɔ. (Kol. 1:15) Mmerɛ bɔ ne ɔwɔ anwuro dɔ ne, onwuni kyɛbɔ Yehowa si yele ye dɔ ali hyirele ye asomvoɛ mukoraati bɔ bekuro ye dwirɛ ne. Yede, sɛɛ yeɛ Yesu boka yɛ maa yenwu kyɛbɔ Yehowa si kuro yɛ dwirɛ ɔ?

13. Nzu yeɛ Yesu pena kyɛ yenwu ye yɛfa Yehowa nwo ɔ?

¹³ Yesu pena kyɛ yenwu kyɛbɔ Yehowa si te nga wɔ yɛnwo ɔ. Yesu frɛle Yehowa kyɛ “Baba” kɔbo 160 wɔ Nzɛmba nna nanu. Mmerɛ bɔ ne ɔne ye asuafoɛ nemɔ dwudwo ne koso, ɔfale edwirɛ “ɛmɔ Baba,” ɔne “ɛmɔ Baba bɔ ɔwɔ nyameɛso” lili dwumaa. (Mat. 5:16; 6:26) Koraka Yesu ba aseɛ so ne, né bɛbɔ bɛsõ Yehowa ne fa nzammranoa biemɔ tekyɛ ‘Tuminiɛ,’ ‘Anwuro Anwuroniɛ,’ ɔne ‘Ɔbɔadeɛ,’ yeɛ bɛfa bɛfrɛ ye ɔ. Nakoso Yesu de, ne ɔtaa frɛ Yehowa kyɛ yɛ ‘Baba.’ Ɛhene kyire kyɛ bɛbɔ bɛsõ Yehowa ne, ɔpena kyɛ benwu ye kyɛ bɛkɔhora bekopingye ye. Yeti kyɛbɔ baba bie kuro yemmamɔ dwirɛ ne, ne Yesu pena kyɛ yenwu ye kyɛ Yehowa kuro yɛ dwirɛ paa. Yesu fale edwirɛ “Baba” lili dwumaa wɔ atee nyɔ bie aso, ɛmɔma yɛnea.

14. Ndotohoɛ beni yeɛ Yesu yɛle fahyirele kyɛ yenu biala nwo hia Yehowa, bɔ ɔte yɛ Baba ne ɔ? (Mateo 10:​29-31) (Nea foto ne koso.)

¹⁴ Ɛmɔma yelimoa yɛnea edwirɛ bie bɔ Yesu hane ye wɔ Mateo 10:​29-31 ne. (Kenga.) Sɔ akatipire nnomaa mmaammaa ne, bɛngɔhora bengonya ɔdɔ bɛngɔma Nyameɛ, na wayɛ kyɛ bɛsõ ye po. Nakoso, sɛ benu kõ po tɔ ase a, Yehowa nwu ye, na obu yenwo ngondaa. Sɛ sɔ nnomaa hemɔ po Yehowa nye wɔ bɛnwo a, yede mmenia bɔ befi b’ahone nu bɛsõ ye ne, yeɛ ɔngohuro bɛ dwirɛ anaa? Yesu sa hane kyɛ, yɛ ti so nwiaa po, Yehowa se yenoa. Sɛ yɛnwo dwirɛ sɔa po Yehowa se a, yede okyire kyɛ yɛnwo hia ye paa. Yesu dwirɛ he maa yenwu ye kyɛ amba, yenu biala sombo ma Yehowa, na yɛla ye ahone so.

15. Edwirɛ bɔ Yesu hane ye wɔ Yohane 6:44 ne, nzu yeɛ ɔmaa enwu ye fa wɔ Baba bɔ ɔwɔ anwuro nanwo ɔ?

¹⁵ Ɛmɔma yɛnea atee foforɛ bɔ Yesu fale edwirɛ “Baba” lili dwumaa ɔ. (Kenga Yohane 6:44.) Wɔ Baba bɔ ɔwɔ anwuro ne, ye bɔbɔ deinn yeɛ ɔhwene wɔ ngakangaka wale nahorɛ nanu ɔ. Nzuati yeɛ ɔhwene wɔ ɔ? Ofikyɛ onwuni ye wɔ w’ahone nu kyɛ wɔnye gye nahorɛ nanwo. (Aso. 13:48) Mmerɛ bɔ Yesu hane edwirɛ bɔ ɔwɔ Yohane 6:44 ne, ɔkɔyɛ kyɛ ne ɔtwe adwene sie edwirɛ bɔ ɔwɔ Yeremia 31:3 naso. Ɛberɛ nwa: ‘Ɔdɔ bɔ yebo mbɛ le yeɛ mafa mahwe wɔ mapingye me menwo ɔ.’ (Fatoto Hosea 11:4 nanwo.) Wɔde susu bɔ sɔ dwirɛ ne kyire nanwo nea: Subaen pá biemɔ bɔ ɔwɔ yɛnwo bɔ ebiaa yɛbɔbɔ po yɛnze ne, yɛ Baba bɔ ɔwɔ anwuro ne de ɔse.

16. (a) Edwirɛ beni yeɛ ɔkɔyɛ kyɛ Yesu kã kyire yɛ ɔ, na nzuati yeɛ odikyɛ yedé ye yedi ɔ? (b) Ɛkɔyɛ sɛɛ ne ale ali kyɛ Yehowa te Baba bɔ engonya ye so bie lle ɔ? (Nea alaka nanu dwirɛ bɔ yeɛ ole, “Baba Bɔ Yengonya Ye So Bie Lle Ɔ.”)

¹⁶ Yesu frɛle Yehowa kyɛ yɛ Baba, na atee bie aso ne, ɔpena kyɛ ɔkã kyɛ: “Nna me ngome yeɛ Yehowa te me Baba ɔ, na mmom wɔ koso wɔ Baba ɛne. Me pena kyɛ enwu ye kyɛ Yehowa kuro wɔ dwirɛ paa, na ɔdwene wɔnwo.” Yeti sɛ odwu mmerɛ bie na w’adwene yɛ wɔ kyɛ Yehowa nguro wɔ dwirɛ a, bisa wɔnwo kyɛ, ‘Aso Yesu bɔ ɔkã nahorɛ, na ɔse Yehowa paa tra ebiala ne, ɔnzɛkyɛ medé bɔ ɔ́kã ne medi anaa?’—1 Pet. 2:22.

KƆSO NYA GYIDIE KYƐ YEHOWA KURO WƆ DWIRƐ

17. Gyidie bɔ yele ye kyɛ Yehowa kuro yɛ dwirɛ ne, nzuati yeɛ odikyɛ yɛkɔso yɛma nu yɛse ɔ?

¹⁷ Gyidie bɔ yele ye kyɛ Yehowa kuro yɛ dwirɛ ne, odikyɛ yɛkɔso yɛmaa nu yɛse. Kyɛbɔ yalimoa yanwu ye ne, yɛ pɔfoɛ Abɔnzam yɛ bɔ ɔkɔhora biala kyɛ ɔkɔlaka yɛ maa yɛkɔyakyi Yehowa soen. Ɔnate kyɛ ɔpena kyɛ yɛ gyidie kɔ ase nati, daa ɔbɔ yenwo mmɔden kyɛ ɔkɔmaa yekonya adwene kyɛ Yehowa nguro yɛ dwirɛ. Nakoso, onnikyɛ yɛmaa Abɔnzam di yɛso ngunim llé!—Yob 27:5.

18. Gyidie bɔ ele ye kyɛ Yehowa kuro wɔ dwirɛ ne, ɛkɔyɛ sɛɛ ne amaa nu ayɛ se?

¹⁸ Sɛ gyidie bɔ ele ye kyɛ Yehowa kuro wɔ dwirɛ nanu kɔyɛ se a, sana ɛkɔso bɔ mbaeɛ kyɛ ɔboka wɔ maa enwu subaen pá bɔ ɔwɔ wɔnwo ne. Bible nu dwirɛ ahoroɛ bɔ ɔmaa yenwu kyɛ Yehowa kuro yɛ dwirɛ ne, ɛyɛ a dwenedwene yenwo. Kae kyɛ Yehowa de, ɔtte asisie. Yeti sɛ ebie kuro ye dwirɛ a, ye koso okuro sona ne dwirɛ. Afei koso, nnɛmaa wɔ wora fi ye le kyɛ, wɔ ti yeɛ Yehowa maa Ɔwa ne oowuli ɔ. Yesu dwirɛ bɔ yeɛ ole kyɛ Yehowa te wɔ Baba bɔ ɔwɔ anwuro ne koso, dé tonu kyɛ ɔte nahorɛ. Sɛ ɔba ye sɔ, na ebie bisa wɔ kyɛ: “Aso edé di kyɛ Yehowa kuro wɔ dwirɛ?” a, ɛkɔhora kɔhã kyɛ: “Yóo, okuro me dwirɛ! Na me koso meyɛ bɔ ngɔhora biala kyɛ ngɔmaa okonwu kyɛ mekuro ye dwirɛ!”