Sɛ Bebua Wɔ Anaa Ebie Foforɛ Ndɛengyea a, Nzu Yeɛ Ɛkɔyɛ Ɔ?

1-2. Ndɛengyea bɔ ɔkɔ so ne, sɛɛ yeɛ mmeni pee nala yɛ bɛ nikyee wɔ yenwo ɔ, na nzu yeɛ yekosusu yenwo ɔ?

EWIASE bɔ yɛte nu he de, ndɛengyea ngome yeɛ ɔkɔ so ɔ. Ebiemɔ wɔ berɛ a, abusua bɔ befi nu, b’amammerɛ, ɔne ehiaa bɔ bedi nati, mmenia mva bɛ hwee, na bɛne bɛ di ye yeayea. Ebiemɔ koso, awaen ne ndwene bɛnwo, na asikafoɛ bɔ bɛyɛ b’adwuma ne koso asisie alaa yeɛ besisi bɛ ɔ, na ɛhene amaa benwu amaneɛ. Sɔ ndɛengyea bɔ ɔkɔ so ne, ebie kora kã yɛ anaa mmenia bɔ bepingye yɛ ne.

² Ebiala nne berɛ bɔ okuro kyɛ bebua ye ndɛengyea ɔ. Yeti ɔnyɛ nwanwa kyɛ sɛ mmeni pee nwu ndɛengyea bɔ ɔkɔ so ɛnnɛ ne a, ɔyɛ b’ahi ná ɔmaa bɛfa yaa ɔ. Ɛhene ati, ebiemɔ bɔ mmɔden kyɛ bɛbɔbɔ bɛkɔye sɔ ndɛengyea ne bekofi berɛ. Yesɔ nati bɛkora bɛyɛ ɔyɛkyerɛ betia awaen ne, na sɛ amanyɔkue bie hyɛ bɔ kyɛ ɔkɔye ndɛengyea kofi berɛ a, ne baata ye si. Nakoso yɛ bɔ yɛte Kristofoɛ ne de, yaanwu ye kyɛ ‘yɛbokka ewiase naso,’ na Nyameɛ Ahennie ne ngome yeɛ ɔkɔhora kotu ndɛengyea bo ɔ. (Yoh. 17:16) Ɛhe mukoraati si ne, sɛ yenwu ye kyɛ bebua ebie ndɛengyea a, ɛyɛ ne ɔyɛ yɛ yea, na ɔkora maa yɛfɛ yaa po. Yeti ebiaa yekobisa yɛnwo kyɛ: ‘Nzu yeɛ nyɛ ɔ? Ndɛengyea bɔ ɔkɔ so ne, nzu yeɛ ngɔhora ngɔyɛ ngɔfa yenwo ɔ?’ Kora bɔ yekosusu sɔ nzɛmmisa hemɔ nwo ne, ɛmɔma yelimoa yɛnea adwene bɔ Yehowa ne Yesu le ye wɔ ndɛengyea nwo ɔ.

YEHOWA NE YESU MUKORAATI NYE NGYE NDƐENGYEA NWO

3. Nzuati yeɛ yɛnye ngye ndɛengyea nwo ɔ? (Yesaya 5:7)

³ Bible ne maa yenwu bɔ yeti yeɛ yɛnye ngye ndɛengyea bɔ ɔkɔ so nanwo ne. Ɔmaa yenwu ye kyɛ Yehowa bɔle yɛ wɔ ye subaen so, na bɔ yenye gye yenwo yeɛ ole “teneneeyɛlɛ ne ndɛenbualɛ turoloo.” (Edw. 33:5; Gye. 1:26) Obualle ndɛengyea lle, yeti onguro kyɛ ebiala yɛ sɔ. (Deut. 32:​3, 4; Mika 6:8; Sak. 7:9) Wɔ diyifoɛ Yesaya aberɛ so ne, ɔnate ateetee bɔ ne Yisraelfoɛ nanu biemɔ fa beliemamɔ fa nu nati, Yehowa tele “awuyebɔlɛ” bɔ ne ɔkɔ so ne. (Kenga Yesaya 5:7.) Yesɔ nati, bɛbɔ bebuli ye Mmraa so na bɛhɔle so bɛteeteele beliemamɔ ne, ɔhwene bɛ so.—Yes. 5:​5, 13.

4. Sɛ bebua ebie ndɛengyea a, Yesu nwu ye sɛ? (Nea foto ne koso.)

⁴ Kyɛbɔ Yehowa kuro ndɛen turoloo na yenye ngye ndɛengyea nwo ne, sɔ ala yeɛ Yesu koso te ɔ. Mmerɛ bɔ ne ɔyɛ ye asɛnga adwuma ne, ɛlɛho bie, onwuni biaa bie bɔ ne yesa kõ awu ɔ. Biaa ne nwo yɛle ye anwumvo, yeti ɔsale ye anwonyerɛ. Nakoso nyamesom mbanyi bɔ ne bɛ tianu yɛ se ne de, ɛhe maa bɛfɛle yaa paa. Bɛ de, Homeda nwo mmraa bɔ ne bɛnwa Yesu abu so ne yeɛ ne yenwo hia bɛ ɔ, na mmom nna biaa bɔ ne yenwo atɔ ye ne. Yede, Yesu nwuni bɔ bɛyɛle ne sɛ? Ɔnate ‘b’atianuserɛ nati, ye wora bɔle paa.’—Mak. 3:​1-6.

5. Sɛ yenwu ye kyɛ ndɛengyea kɔ so a, yɛkɔhora yɛkɔfɛ yaa, nakoso nzu yeɛ odikyɛ yɛkae ye ɔ?

⁵ Kyɛbɔ yanwu ye ne, Yehowa ne Yesu mukoraati nye ngye ndɛengyea nwo, na ɔmaa bɛfɛ yaa po. Yeti yɛ koso sɛ yenwu ye kyɛ ndɛengyea kɔ so na yɛfɛ yaa a, ɔte ye atee so. (Ɛfe. 4:26) Nakoso odikyɛ yɛkae kyɛ, sɛ yɛfɛ yaa sɛɛ po a, yɛngɔhora yɛngɔye ndɛengyea ngofi berɛ. Bɔ ɔte yeɛ ole kyɛ, sɛ yɛtaa yɛfɛ yaa a, ɔkɔhora kɔbɔ y’anwonyerɛ anaa ɔkɔfa ɔhaw foforɛ kɔbrɛ yɛ. (Edw. 37:​1, 8; Yak. 1:20) Yede sɛ yenwu kyɛ ndɛengyea kɔ so a, nzu yeɛ odikyɛ yɛyɛ ɔ? Yɛkɔhora yekosua nikyeebie yekofi bɔ Yesu yɛle nanu.

BƆ YESU YƐLE YE WƆ NDƐENGYEA NWO Ɔ

6. Mmerɛ bɔ ne Yesu wɔ aseɛ so ne, ndɛengyea beni yeɛ ne ɔkɔ so ɔ? (Nea foto ne koso.)

⁶ Mmerɛ bɔ ne Yesu wɔ aseɛ he aso ne, onwuni kyɛ ne ndɛengyea pee kɔ so. Onwuni kyɛbɔ ne nyamesom mbanyi nemɔ si hyɛ mmenia naso ɔ. (Mat. 23:​2-4) Afei koso, onwuni kyɛbɔ ne Roman atumvoɛ ne si teetee Yudafoɛ nemɔ ɔ. Ɛhene ati, ne Yudafoɛ nanu pee pena kyɛ benya fanwodie befi Romanfoɛ nemɔ sa nu. Yeti benu biemɔ po tele kue bie bɔ ne bɛfa bɛkõ betia Roman awaen ne ɔ. Nakoso Yesu anda sɔ kue he anu biala si. Na mmerɛ po bɔ onwuni kyɛ bɛpena kyɛ bɛkye ye bɛfa ye besie hene ne, ɔhwene yenwo.—Yoh. 6:15.

7-8. Mmerɛ bɔ ne Yesu wɔ aseɛ he aso ne, nzuati yeɛ wanyɛ ye adwene kyɛ ɔkɔye ndɛengyea kofi berɛ ɔ? (Yohane 18:36)

⁷ Mmerɛ bɔ ne Yesu wɔ aseɛ he aso ne, wanyɛ ye adwene kyɛ ɔfa yenwo wura amanyɔnzɛm nu fa ye ndɛengyea fi berɛ. Nzuati ɔ? Ofikyɛ ne ɔse kyɛ sona lle yenwo atee anaa tumi bɔ ɔkɔfa koli obiɛngo so ɔ. (Edw. 146:3; Yer. 10:23) Afei koso, nikyee deinn bɔ waafa ndɛengyea wawa ne, sona lle tumi bɔ ɔkɔfa kɔye kofi berɛ ɔ. Yeɛ ole kyɛ, Satan Abɔnzam bɔ odi ewiase he aso ne, ye tianu yɛ se paa, yeti ye tumi bɔ ole ne yeɛ ɔfa piepia mmenia maa bebua ndɛengyea sɔ ne. (Yoh. 8:44; Ɛfe. 2:2) Asa koso, ɔnate sintɔ bɔ ɔwɔ yɛnwo nati, mmenia bɔ bele adwene pá po ne, nna mmerɛ mukoraati yeɛ bɛkora bɛyɛ nikyee pa ɔ.—Nwo. 7:20.

⁸ Né Yesu se kyɛ Nyameɛ Ahennie ne ngome yeɛ ɔkɔhora kɔye bɔ wafa ndɛengyea wawa ne kofi berɛ ɔ. Ɛhene ati, ɔfale ye mmerɛ ne ye anwoserɛ mukoraati “hane Nyameɛ Ahennie nanwo nzɛmba hyirele” mmenia. (Luka 8:1) Ɔmaa “bɛ bɔ tenenee nwo hɔen ne nzuhɔen ku bɛ” ne nwuni kyɛ ɔngɔhyɛ ndɛengyea ne asisie kofi berɛ. (Mat. 5:6; Luka 18:​7, 8) Nakoso nna sona yeɛ ɔkɔyɛ ɛhe ɔ, na mmom Nyameɛ nate ye ahennie naso yeɛ ɔkɔyɛ ɔ. Sɔ ahennie ne koso, “offi wiase wa.”—Kenga Yohane 18:36.

SUESUA YESU MMERƐ BƆ ƐBƆ MMƆDEN KYƐ EKOGYINA NDƐENGYEA NOA NE

9. Nzu yeɛ ɔmaa ede di kyɛ Nyameɛ Ahennie ne ngome yeɛ ɔkɔhora kɔye ndɛengyea mukoraati kofi berɛ ɔ?

⁹ Ndɛengyea bɔ ɔkɔ so ɛnnɛ ne, ɔtra bɔ ɔhɔle so wɔ Yesu aberɛ so ne koraa. Satan ne mmenia bɔ besuesua ye ne, bɛ yeɛ bamaa ndɛengyea abu so wɔ “ayieleɛ mmerɛ” he anu sɔ ne. (2 Tim. 3:​1-5, 13; Nye. 12:12) Tekyɛ Yesu ne, yɛ koso yɛse kyɛ Nyameɛ Ahennie ne ngome yeɛ ɔkɔhora kɔye bɔ waafa ndɛengyea wawa ne kofi berɛ ɔ. Ɔnate kyɛ yɛta sɔ Ahennie ne si nati, sɛ mmenia yɛ ɔyɛkyerɛ bɛfa bɛko betia ndɛengyea a, yɛmva yɛnwo yenwura nu bie. Ɛmɔma yɛnea aliemaa brasua bie bɔ bɛfrɛ ye Stacya dwirɛ ne. Kora bɔ yeɛ ɔba asafo nanu ne, ɔfale yenwo ɔɔbɔle kue bie bɔ ne bɛtaa bɛyɛ ɔyɛkyerɛ kyɛ bɛfa betu ndɛengyea bo ɔ. Nakoso odwuli nekaabie ne, ne ye tianu ndengyɛ ye wɔ bɔ ne ɔyɛ nanwo. Ɔhane kyɛ: “Odwu mmerɛ bie a, ne mebisa menwo kyɛ, aso bɔ meyɛ ne kɔhora kɔye ndɛengyea kofi berɛ ɛne? Nakoso kesaalae bɔ maasua Nyameɛ Ahennie nanwo nikyee ne, maanwu ye paa kyɛ ye ngome yeɛ ɔkɔhora kotu ndɛengyea bo ɔ. Mede nnne tumi bɔ ngɔfa ngɔye amaneɛ bɔ mmenia nwu ye ne ngofi berɛ ɔ. Nakoso mese kyɛ Yehowa kɔye ye mukoraati kofi berɛ.”—Edw. 72:​1, 4.

10. Sɛ ebie fa yenwo wura kue bie nu kyɛ ɔfa tu ndɛengyea bo a, nzuati yeɛ yɛkɔhora yɛkɔhã kyɛ wamva edwirɛ bɔ ɔwɔ Mateo 5:​43-48 ne wanyɛ adwuma ɔ? (Nea foto ne koso.)

¹⁰ Mmeni pee afa bɛnwo abɔ kue ahoroɛ, kyɛbɔ ɔkɔyɛ a bɛkɔsesã awaen bie na banya fanwodie ɔ. Nakoso nna sɔ koraa yeɛ Yesu hane kyɛ yɛyɛ ɔ. (Ɛfe. 4:31) Aliemaa bie bɔ bɛfrɛ ye Jeffrey hane kyɛ: “Bɔ manwu ye yeɛ ole kyɛ, sɛ kue bie yɛ ɔyɛkyerɛ na bɛnwa bɛngɔyɛ basabasa biala po a, bɛnye kɔwa bɛnwo so ne, ne wale asaa nu maa mmeni pee apura, na ebiemɔ koso bɛfa yenwo bewia amamvoɛ nningyein.” Ebieku koso, Yesu ahyirehyire yɛ kyɛ odikyɛ yekuro mmenia mukoraati dwirɛ bɔ yɛ pɔfoɛmɔ po boka so ɔ. (Kenga Mateo 5:​43-48.) Kyɛ Kristofoɛ ne, yɛpena kyɛ yesuesua Yesu, yeti yɛbɔ mmɔden kyɛ yɛkɔfa bɔ wahyirehyire yɛ ne yɛkɔyɛ adwuma.

11. Nzuati yeɛ sɛ odwu mmerɛ bie a, ɔkɔhora kɔyɛ se kɔma yɛ kyɛ yekosuesua Yesu ɔ?

¹¹ Yɛse kyɛ Nyameɛ Ahennie ne kɔye ndɛengyea mukoraati kofi berɛ, nakoso sɛ bɛfa bie bedi yɛ a, ɔkɔhora kɔyɛ se kɔma yɛ paa kyɛ yekosuesua Yesu ɔ. Ɛmɔma yɛnea bɔ ɔtole Janiya ɔ. Ɔnate nekaa bɔ ofi nati, ne ebiemɔ mva ye nyɛ hwee. Ɔhane kyɛ: “Ɛhe maa me wora bɔle. Yeti mvɛle yaa paa na nyane a, ahaa bahwe sɔ mmenia nemɔ so. Ɔwale sɔ ne, nyɛle m’adwene kyɛ ngɔfa menwo ngɔɔbɔ kue bie bɔ bɛyɛ ɔyɛkyerɛ bɛfa bedwɔso betia bɛbɔ bɛyɛ sona nu nyeyemuɛ ɔ. Nyane adwene kyɛ sɛ meyɛ sɔ a, ɔkɔmaa m’ahone kɔtɔ me kunu.” Siɛ ye, oonwuni kyɛ odikyɛ ɔsesã sɔ adwene bɔ wanya ye ne. Ɔtoale ye dwirɛ naso kyɛ: “Kyɛ ahãa ngɔfa menwo ngɔto Yehowa so ne, mmenia mmom yeɛ mvale menwo ndole bɛ so ɔ, na bɔ bɛkã ne yeɛ ne medé medi ɔ. Nwuni ye sɔ ne, ndwene menwo mvili sɔ kue nanwo, na mene bɛ ammɔ kõ.” Ɔwɔ nu, sɛ mmenia sisi yɛ anaa sɛ yenwu ye kyɛ besisi ebiemɔ a, ɔkɔhora kɔyɛ yɛ yea maa yɛkɔfɛ yaa. Nakoso odikyɛ yɛnea yé na yanyɛ nikyeebiala bɔ okohyire kyɛ yɛta ewiase ne si ɔ.—Yoh. 15:19.

12. Nzuati yeɛ odikyɛ yɛnea yé wɔ bɔ yetie, bɔ yɛkenga, ɔne bɔ yɛnea nanwo ɔ?

¹² Sɛ ɔnate ndɛengyea bie bɔ ɔkɔ so nati wamaa yafɛ yaa a, nzu yeɛ ɔkɔboka yɛ maa yɛkɔhyɛ yɛnwo so ɔ? Nikyee kõ bɔ ɔkɔboka yɛ paa yeɛ ole kyɛ yɛkɔnea yé wɔ bɔ yetie, bɔ yɛkenga, ɔne bɔ yɛnea nanwo. Ofikyɛ nningyein bɔ mmenia fagua sohyia midia so ne, nu pee nala wɔ berɛ a, ɔhyɛ mmenia ngunaen maa bedwɔso betia awaen ne. Mmerɛ pee ne, edwirɛ ahoroɛ bɔ ofite news nu ne, ebie wɔ berɛ a, ɛyɛ a ne ɔtte nahorɛ. Sɛ ɔkɔba kyɛ bɔ bɛkã ne te nahorɛ po a, yɛngɔhora yɛngɔyɛ ɔhaw bɔ ɔkɔ so nanwo hwee. Sɛ yɛsɛkye yɛ mmerɛ pee yɛfa yetie edwirɛ bɔ ɔte sɔ a, bɔ ɔkɔwa yeɛ ole kyɛ yɛ wora kɔbɔ, anaa y’abanu kobu. (Any. 24:10) Bɔ ɔyɛ suro paa po yeɛ ole kyɛ, ɔkɔmaa yɛkɔye y’adwene yekofi Nyameɛ Ahennie ne bɔ ye ngome yeɛ ɔkɔye ndɛengyea kofi berɛ naso.

13. Sɛ yɛkenga Bible ne daabiala a, sɛɛ yeɛ ɔkɔboka yɛ mmerɛ bɔ yekonwu kyɛ besisi mmenia ne?

¹³ Sɛ yɛyɛ nhyehyɛɛ yɛfa yɛkenga Bible ne, na yɛdwenedwene yenwo a, ɔkɔboka yɛ maa yekogyina ndɛengyea bɔ ɔkɔso ne noa. Aliemaa brasua bie bɔ bɛfrɛ ye Alia sɔa, mmerɛ bɔ onwuni kyɛbɔ besisi mmenia wɔ nekaa bɔ ɔwɔ ne, ɔyɛle ye yea paa. Ofikyɛ ne wayɛ kyɛ sɔ mmenia nemɔ lle kamafoɛ biala ne. Ɔhane kyɛ: “Odwu mmerɛ bie a, ne mekora metena ase mebisa menwo kyɛ, ‘Aso bɔ ɔkɔso ye, Yehowa kɔye kofi berɛ ɛne?’ Sɔ mmerɛ nanu ala yeɛ ngengale Yob 34:​22-29 ne ɔ. Ɛberɛ maa nwuni kyɛ Yehowa nye tua bɔ ɔkɔso ne mukoraati. Ye ngome yeɛ ɔte bɔ ɔkɔso nabo paa ɔ, yeti ye ngome yeɛ ɔkɔhora koli yenwo dwumaa yé kɔtra ebiala ɔ.” Mmerɛ bɔ yɛnwondɛ kyɛ Nyameɛ Ahennie ne kɔye ndɛengyea kofi berɛ ne, nzu yeɛ ɔkɔboka yɛ maa yekogyina yenoa ɔ?

BƆ YƐKƆHORA YƐKƆYƐ YƐKƆFA NDƐENGYEA NWO ƐNNƐ Ɔ

14. Ndɛengyea bɔ ɔkɔso wɔ ewiase he anu ne, yɛkɔyɛ sɛɛ ne yahora yagyina yenoa? (Kolosefoɛ 3:​10, 11)

¹⁴ Ɔwɔ nu, bɛbɔ besisi mmenia ne, yɛngɔhora yɛngɔhyɛ bɛ maa bɛngɔsesã bɛ subaen, nakoso yɛne bɛ kɔhora kɔtena asomdwee nu. Kyɛbɔ yalimoa yanwu ye ne, odikyɛ yɛda ɔdɔ ali yekyire mmenia yɛfa yesuesua Yesu. Sɔ ɔdɔ ne kɔmaa yɛne mmenia mukoraati koli ye yé, na bɛbɔ besisi yɛ ne po boka so. (Mat. 7:12; Rom. 12:17) Sɛ Yehowa nwu ye kyɛ yɛyere yɛnwo yɛyɛ sɔ a, ɔmaa yenye gye.—Kenga Kolosefoɛ 3:​10, 11.

15. Sɛ yɛkã Bible nu dwirɛ yekyire mmenia a, nzu yeɛ ofi nu ba ɔ?

¹⁵ Ndɛengyea bɔ ɔkɔso ne, nikyee kõ bɔ yenwo hia paa bɔ yɛyɛ yɛfa yenwo yeɛ ole kyɛ yɛkɔhã Bible nu dwirɛ yekohyire mmenia. Nzuati yeɛ yɛkã sɔ ɔ? Sɛ ebie bɔ odi atuturasɛm nya ‘Yehowa nwo nimdeɛ’ a, ɔmaa ɔbayɛ sona bɔ okuro asomdwee na ɔdwene mmenia nwo ɔ. (Yes. 11:​6, 7, 9) Ɛmɔma yɛnea aliemaa bie bɔ bɛfrɛ ye Jemal. Koraka osua Bible ne, ne wafa yenwo wabɔ kue bie, na bɔ ne bɛyɛ yeɛ ole kyɛ bedwɔso betia awaen ne ɔnate asisie bɔ ne ɔkɔso wɔ bɛ maen nanu nati. Ɔhane kyɛ: “Ɛngɔhora ngɔhyɛ ebie kyɛ ɔsesã ye subaen. Me sɔa, nna ebie yeɛ ɔmaa nzesane ɔ, na mmom nahorɛ bɔ nzua mvili Bible nanu ne, yeɛ ɔmaa nzesane ɔ.” Bɔ Jemal suane nati, ɔmaa ɔyakyili ngondii honɛ. Ɛhe maa yenwu ye kyɛ, sɛ yɛkã Bible nu dwirɛ yekyire mmenia a, ɔboka bɛ maa bɛsesã bɛ subaen, na ɔmaa bɛbɔ besisi mmenia naso te.

16. Bɔ Nyameɛ Ahennie ne baayɛ ne, nzuati yeɛ ekuro kyɛ ɛkɔhã yenwo dwirɛ kohyire mmenia ɔ?

¹⁶ Kyɛbɔ Yesu yɛle ne, yɛ koso yekuro paa kyɛ yɛkɔmaa mmenia konwu kyɛ Nyameɛ Ahennie ne ngome yeɛ ɔkɔye ndɛengyea kofi berɛ koraa ɔ. Bɛbɔ mmenia ne bɛ ali ye yeayea ne, sɔ anyelasoɛ ne kɔhora kɔkyekye bɛ wora. (Yer. 29:11) Stacy bɔ yalimoa yahã yenwo dwirɛ ne hane kyɛ: “Ɔnate bɔ masua nati, sɛ mmenia sisi me, anaa menwu ye kyɛ bebua ebiemɔ ndɛengyea a, memma ɔnha me pee. Yehowa nate Bible naso kyekye yɛ wora.” Sɔ awerɛkyekyerɛ dwirɛ bɔ yeɛ ole kyɛ, ɔngɔhyɛ ndɛengyea kofi berɛ koraa ne, sɛ yɛkɔhora yɛkɔhã bie yekohyire mmenia a, sana yɛboa yɛnwo. Gyidie bɔ ele ye wɔ Bible nu dwirɛ bɔ yasusu yenwo wɔ adesua he anu ne, sɛ ɛmaa nu yɛ se a, ɔkɔboka wɔ paa. Na sɛ ɔkɔba kyɛ bɛkã ndɛengyea nwo dwirɛ wɔ sukuu anaa adwuma nu a, ɛkɔhora kɔfa atee bie aso kohyirehyire nu maa ɔkɔhã b’ahone.b

17. Ndɛengyea bɔ ɔkɔso ɛnnɛ ne, sɛɛ yeɛ Yehowa boka yɛ maa yɛkora yegyina yenoa ɔ?

¹⁷ Kesaalae bɔ Satan té ‘di wiase he aso ne’ de, ɔyɛ sɛɛ alaa a, ndɛengyea kɔhɔ so. Ɔwɔ nu, yɛnwondɛ kyɛ ‘bɛkɔye ye bekofi berɛ,’ nakoso ɛhene ngyire kyɛ yelle bokafoɛ biala anaa y’anyelasoɛ ayie. (Yoh. 12:31) Yehowa nate Bible naso amaa yanwu bɔ yeti yeɛ ndɛengyea kɔ so ɔ. Nakoso nna ɛhene angome, na mmom wasa wamaa yanwu kyɛ amaneɛ bɔ sɔ ndɛengyea ne maa yenwu ye ne, ɔyɛ ye yea paa. (Edw. 34:​17-19) Sɛ ebie ne yɛ di ye yeayea a, ɔnate Ɔwa naso amaa yanwu bɔ odikyɛ yɛyɛ ɔ. Afei koso, wamaa yanwu kyɛ ɔngɔhyɛ ɔnate ye Ahennie naso kɔye ndɛengyea kofi berɛ koraa. (2 Pet. 3:13) Mmerɛ bɔ yɛnwondɛ kyɛ “pɛpɛɛpɛyɛlɛ ne tenenee” koli aseɛ he aso ne, ɛmɔma yɛhɔso yɛyere yɛnwo yɛhã Ahennie nanwo nzɛmba ne.—Yes. 9:7.