1925​—Nningyein Bɔ Ɔhɔle So Wɔ Ahyehyɛdeɛ Nanu Afoɛ Ɛyaa Ɛhe Ɔ

BƆ NE BƐNYE LA SO NE, WAMMA NU

Né Bible Asuafoɛ nanu pee nea atee kyɛ aseɛ ne kɔyɛ Paradise wɔ 1925 nu. Nzuati ɔ? Aliemaa Albert Schroeder bɔ siɛ ye ɔɔbokale Akwangyerɛ Kue naso ne hyirele nu kyɛ: “Ne y’adwene yɛ yɛ kyɛ sɔ afoɛ ne, Kristofoɛ bɔ bapopa bɛ bɔ baha wɔ aseɛ he aso ne, bɛkɔhɔ anwuro bekooli hene. Na mmrienzua biemɔ bɔ ne bedi nahorɛ bɛma Yehowa tekyɛ Abraham ne Dawide mɔ ne, bekotingye bɛ maa bekoli nningyein nyunu wɔ aseɛ he aso.” Nakoso mmerɛ bɔ bɛneane alaa bɔ wamma nu sɔ ne, benu pee nala abanu buli.—Any. 13:12.

Ɔmva yenwo kyɛ ne Bible Asuafoɛ ne abanu abu ne, benu pee hɔleso yɛle asɛnga adwuma ne, ofikyɛ benwuni kyɛ bɔ yenwo hia paa yeɛ ole kyɛ bekoli Yehowa nwo adanzeɛ ɔ. Yede, ɛmɔma yɛnea kyɛbɔ bɛnate radio so belili mmeni pee adanzeɛ ɔ.

YƐNATE RADIO SO YƐHANE NZƐMBA NE

Wɔ afoɛ 1924 nu ne, mmenia bɔ ne betie WBBR radio stehyɛn ne, ne bɛsone paa. Yeti wɔ 1925 nu ne, Bible Asuafoɛ nemɔ sa sili radio stehyɛn foforɛ bie bɔ ne ɔkɔ dede paa ɔ. Besili ye wɔ nekaabie bɔ opingye Chicago, Illinois, na dumaa bɔ bɛfa bɛtole so yeɛ ole WORD. Ne Ralph Leffler boka bɛbɔ besili sɔ radio stehyɛn naso. Ɔhane kyɛ: “Sɛ ɛyerɛ ba a, bɛbɔ bɛwɔ dede paa ne po, ne bɛkora betie radio stehyɛn ne bie nɔsoa.” Dwumadie bɔ belimoa bɛyɛle ye wɔ radio stehyɛn naso ne, abusua bie tiele bie. Ne bɛte kuro bie bɔ bɛfrɛ ye Pilot Station bɔ ɔwɔ Alaska ne. Efi nekaa bɔ ne radio stahyɛn ne wɔ ne ɛkɔ dɔ a, ɔte kɔbo kwanzii 3,000 (kilomita 5,000). Mmerɛ bɔ betiele dwumadie ne beyiele ne, bɛhworɔle krataa bɛɛlale bɛbɔ bɛyɛ adwuma wɔ radio stahyɛn berɛ ne ase kyɛ bamaa bate Bible nu dwirɛ bɔ ɔhyɛ ngunaen sɔ ɔ.

Ɛwɛnelɛ Waen bɔ ɔwale December 1, 1925 ne hane bɔ yeti yeɛ ne mmenia bɔ bɛwɔ dede ne, bɛkora betie dwumadie wɔ sɔ radio stehyɛn naso ɔ. Ɔhane kyɛ: “Radio stehyɛn bɔ ne ɔkora kɔ dede paa wɔ United States ne, ne WORD radio stehyɛn ne koso boka so. Bɛbɔ ne bɛte mboano wɔ United States afiteleɛ ne atɔleɛ, ɔne Cuba ne Alaska sorɔ dɔ mukoraati, ne bɛkora bɛkye sɔ radio stehyɛn ne. Bɛbɔ ne bɛttele nahorɛ nanwo dwirɛ lle ne po, mmerɛ bɔ betiele radio stehyɛn naso dwumadie ne, benu pee nye gyele yenwo kyɛ bekosua pee bɛkɔboka so.”

Sɔ mmerɛ nanu ala, Bible asuafoɛ bɔ ne bɛwɔ Canada ne koso, ne bɛbɔ mmɔden kyɛ bɛkɔfa radio so bɛkɔhã nzɛmba ne. Yeti wɔ 1924 nu ne, besili radio stehyɛn bɔ ne bɛfrɛ ye CHUC wɔ Saskatoon bɔ ɔwɔ Saskatchewan. Radio stehyɛn bɔ olimoa wale Canada bɔ ne bɛkã Bible nu dwirɛ wɔ so ne, ne ɔboka so. Nakoso ne nekaa bɔ bɛwɔ ne te kãa, yeti wɔ 1925 nu ne, bɛyɛle kyɛ bɛkɔye bɛkɔhɔ nekaa foforɛ. Yeti asafo ne tɔle sua daa bie wɔ kuro naso berɛ ala, na besiesiele nu kama bɛyele radio stehyɛn ne bɛhɔle berɛ.

Mmeni pee bɔ ne bɛtete namue ahoroɛ bɔ ɔwɔ Saskatchewan nu ne, ne bɛttele ahennie nanwo nzɛmba ne bie lle. Nakoso ɔnate sɔ radio stehyɛn nati, benyane yenwo atee bɛtele nzɛmba ne bie. Maame bie sɔa, mmerɛ bɔ otiele radio naso program ne bie ne, ɔhworɔle krataa ɔɔmane asafo ne kyɛ bɛbrɛ ye bɛ nwomaa ne bie. Aliemaa George Naish hane kyɛ: “Sɛ ɛnea kyɛbɔ ne wasi wahworɔ ye krataa ne a, ne ɛkora nwu ye paa kyɛ yenye aboro kyɛ okosua Bible ne. Yeti yɛfale Studies in the Scriptures nwomaa namu yɛɛmane ye.” Wangyɛ biala, sɔ maame ne hyɛle yebo kyɛ ɔkã Ahennie nanwo nzɛmba ne bie wɔ nguro biemɔ bɔ wate yenwo po so.

BƐMAA BƐTELE EDWIRƐ BIE ABO

Edwirɛ bie wale March 1, 1925 Ɛwɛnelɛ Waen nanu bɔ ne yenwo hia paa. Ne ye dwirɛti yeɛ ole “Bawo Maen Bie.” Nzuati yeɛ ne sɔ dwirɛ nanwo hia paa ɔ? Ne Bible asuafoɛ nemɔ se kyɛ Satan yeɛ odi sunzumɔne nemɔ so ɔ. Na ngondombo soen, amanyɔnzɛm, ɔne dwaalilɛ nhyehyɛɛ bɔ ɔwɔ berɛ ne, ye yeɛ okyire b’atee ɔ. Nakoso “akoaa nahorɛniɛ ne nworɛniɛ” ne nate sɔ Ɛwɛnelɛ Waen naso maa aliemaamɔ nwuni kyɛ, Yehowa koso le ye ahyehyɛdeɛ. Sɔ ahyehyɛdeɛ ne de ɔne Satan deɛ ne belle hwee bɛnyɛ, na Satan deɛ ne dwɔso tia ye. (Mat. 24:45) Akoaa nahorɛniɛ ne sa hane kyɛ, ɔnate ‘koɛ bɔ osili anwuro’ wɔ 1914 nu nati, bɛfoane Satan ne ye sunzumɔne nemɔ befili anwuro bɛwale aseɛ he aso.—Nye. 12:​7-9.

Né ɔyɛ se ma Bible asuafoɛ nanu biemɔ kyɛ bekole sɔ dwirɛ he bɛkɔto nu ɔ. Yeti Ɛwɛnelɛ Waen ne hane kyɛ: “Sɛ ɔyɛ se ma ebie kyɛ okole sɔ dwirɛ he kɔto nu a, ɔnzɛkyɛ ɔmaa ɔha ye, na mmom onya aboterɛ na ɔhɔso fa nahorɛlilɛ sõ Awurade ná ɔfa yenwo ɔto ye so.”

Kyɛbɔ ne aliemaamɔ nwu edwirɛ bɔ ne ɔwɔ sɔ Ɛwɛnelɛ Waen nanu ne, Tom Eyre bɔ ne ɔte ateepakyelɛniɛ (daa ne, ne bɛfrɛ ye colporteur) ne hane yenwo dwirɛ kyɛ: “Ngyirekyiremuɛ bɔ ne ɔfa Nyekyire yeti 12 nanwo ne, aliemaamɔ nye gyele yenwo paa. Mmerɛ bɔ yɛtele yebo kyɛ Nyameɛ Ahennie ne di tumi wɔ anwuro ne, opusuli yɛ maa yɛyerele yɛnwo yɛyɛle asɛnga adwuma ne, ofikyɛ ne yɛpena kyɛ mmeni pee te yenwo dwirɛ. Afei koso sɔ dwirɛ ne maa yenwuni kyɛ, nningyein pee wɔ berɛ bɔ Yehowa kobukye so kohyire ye mmenia kyẽabie ɔ.”

ODIKYƐ YEDI YEHOWA NWO ADANZEƐ

Ɛnnɛ edwirɛ bɔ ɔwɔ Yesaya 43:10 ne, Yehowa Adanzefoɛ te yebo paa. Ɛberɛ kã kyɛ: “AWURADE nwa nyoo, ‘Ɛmɔte m’adanzefoɛ, ɔne me somvoɛ bɔ maneanea nu maye ye ɔ.’” Koraka 1925 afoɛ ne ba ne, né bɛndaa bɛmmɔ sɔ tworɔnzɛm naso pee wɔ yɛ nwomaa ahoroɛ nu. Nakoso wɔ 1925 nu ne, nningyein hyɛle yebo sesane. Ofikyɛ Ɛwɛnelɛ Waen ngokongoko 11 yeɛ ohyirehyirele Yesaya 43:10 ne 12 nanu ɔ.

Wɔ August bosome ne ayieleɛ wɔ 1925 nu ne, Bible Asuafoɛ nemɔ yɛle nhyiamu bie wɔ Indianapolis bɔ ɔwɔ Indiana. Ne Aliemaa Joseph F. Rutherford ahworɔ edwirɛ bie agua nhyiamu program ne si bɔ ne ɔfa yɛ bɛbɔ bawa nhyiamu ne akwaaba ɔ. Ne yenwa: “Bɔ yeti yeɛ yawa sɔ nhyiamu he yeɛ ole kyɛ, Awurade nate so ɔbaama yenya . . . anwoserɛ na sɛ yesa yɛkɔ a, yahora yali yenwo adanzeɛ.” Ɛlɛmɔtwɛ bɔ bɛfa bɛyɛle nhyiamu ne mukoraati ne, bɛhyɛle bɛbɔ bɛwale ne ngunaen kyɛ, yenwo atee biala bɔ bekonya ye ne, bɛfa beli Yehowa nwo adanzeɛ.

Fue, August 29 ne, Aliemaa Rutherford mane tɔɔk bie, na né ye dwirɛti yeɛ ole, “Ɛmɔyere Bɛnwo Beli Adanzeɛ.” Wɔ ye tɔɔk nanu ne, ɔhane kyɛ yenwo hia paa kyɛ yɛkɔyɛ asɛnga adwuma ne. Ohyirele nu kyɛ: “Yehowa hahyirele ye mmenia kyɛ . . . : ‘Ɛmɔte m’adanzefoɛ . . . Na me ole Nyameɛ.’ Ɛhene si ne, Yehowa sa hahyirele bɛ kyɛ: ‘Ɛ́mɔfa frangaa bɛ́pena berɛ bɛ́ma maen maen mɔ.’ Mmeni foforɛ biala nne aseɛ he aso bɔ bɛkɔhora bekoli Awurade nwo adanzeɛ ɔ, sana ye mmenia bɔ ɔfa ye sunzum krongron ne kyire b’atee ne.”—Yes. 43:​12, 13a; 62:10.

Mmerɛ bɔ Aliemaa Rutherford mane ye tɔɔk ne yiele ne, ɔkengale krataa bie bɔ ye dwirɛti yeɛ ole, “Edwirɛ Bɔ Ɔma Anyelasoɛ.” Ne nu dwirɛ yeɛ ole kyɛ, “Nyameɛ Ahennie ne ngome yeɛ kyẽabie ɔkɔmaa sona koli yé, okonya asomdwee, anwoserɛ, daa ngoa, fanwodie, ɔne anigye bɔ odi mu ɔ.” Ɔkenga yiele ne, bɛbɔ ne bɛwɔ berɛ ne mukoraati le tole nu. Siɛ ye, behyirele sɔ dwirɛ nabo bɛhɔle dwudwolɛ pee nu, na bɛyɛle ye trakt bɛkyekyɛle kɔyɛ miliɔn 40.

Ɔbaadwu sɔ mmerɛ ne mukoraati, ne Bible Asuafoɛ nemɔ falle dumaa Yehowa Adanzefoɛ ne bɛtolle bɛnwo so. Nakoso ngakangaka, beenwuni kyɛ yenwo hia paa kyɛ bekoli Yehowa nwo adanzeɛ.

BƐBƆ BƐNYE GYE NZƐMBA NANWO NE, YESA YƐHƆLE BƐ BERƐ

Ne Bible Asuafoɛ nemɔ asone wɔ ewiase mukoraati. Yeti asafo ne hyɛle bɛ ngunaen kyɛ bɛbɔ bɛhane nzɛmba ne behyirele bɛ bɔ bɛnye gyele yenwo ne, besa bɛhɔ bɛ berɛ bieku. Bɛkyekyɛle Edwirɛ Bɔ Ɔma Anyelasoɛ trakt ne si ne, Bulletina ne hane kyɛ: “Mmenia bɔ ɛmɔfale Edwirɛ Bɔ Ɔma Anyelasoɛ trakt ne bie bɛmane bɛ ne, ɛmɔsa bɛhɔ bɛ berɛ.”

Bible Suaniɛ bie bɔ ɔwɔ Plano bɔ ɔwɔ Texas ne nyane suahu bie, na Bulletin bɔ ɔwale January 1925 ne hane yenwo dwirɛ. Ɔhane kyɛ: “Bɔ ɔyɛ nwanwa yeɛ ole kyɛ, nekaa bɔ yalimoa yahã nzɛmba ne, sɛ yesa yɛkɔ berɛ a, ɛyɛ a mmenia tie yɛ tra nekaa bɔ bekye yeɛ yɛkwaahã nzɛmba ne wɔ berɛ ne. Kuro kaamba bie bɔ ɔwɔ yɛ faen sɔa, afoɛ buru ɛhe, yahɔ berɛ pɛen nnu mumua. . . Ɛlɛsa ye ala, me maame ne Aliemaa brasua Hendrix sa hɔle berɛ, na nwomaa bɔ bɛhyɛle ne de, ne ɔtte ba.”

Ateepakyelɛniɛ bie bɔ ne ɔwɔ Panama koso hworɔle kyɛ: “Mmenia bɔ mmerɛ bie ngɔle b’awuro maa bɛfoane me ne, sɛ mesa mekɔ bɛ berɛ ye pɛen nyɔ anaa ye pɛen nza so a, afei de ɛyɛ a betie me. Yeti afoɛ he, mva nziele menye so kyɛ bɛbɔ malimoa mahã nzɛmba ne mahyire bɛ ne, bɛ paa yeɛ ngɔfa menye ngosie bɛ so ɔ, na kyɛbɔ benu biemɔ si tiele me ne, ɔmaa menye gyele paa.”

BƆ NE ƆLA YƐ NYUNU Ɔ

Afoɛ 1925 hɔle ye ayieleɛ ne, Aliemaa Rutherford hworɔle krataa ɔɔmane ateepakyelɛfoɛ mukoraati. Ɔhane bɔ ɔhɔleso wɔ afoɛ nanu, ɔne bɔ ne bɛnea ye atee wɔ afoɛ bɔ ɔba nanu nwo dwirɛ. Ɔhane kyɛ: “Afoɛ bɔ ɔpɛle nu ne, ɛmɔnate asɛnga adwuma naso bɛkyekyele bɛbɔ bɛ wora abɔ ne wora, na ɛhene maa ɛmɔnye gyele paa. . . . Afoɛ bɔ ɔba ne koso, ɛmɔkonya yenwo atee bekoli Nyameɛ ne ye ahennie nanwo adanzeɛ, na ɛhene kɔmaa ebiala konwu kyɛ ɛmɔte ye asomvoɛ amba. . . . Yeti ɛmɔma yɛ mukoraati yɛhɔso yɛye yɛ Nyameɛ ne yɛ Hene ne ayɛ.”

Afoɛ 1925 hɔle ye ayieleɛ ne, aliemaamɔ yɛle b’adwene kyɛ Bɛtɛl sua bɔ ɔwɔ Brooklyn ne, bekosi bie bɛkɔboka so. Yeti wɔ afoɛ 1926 nu ne, bɛhyɛle yebo kyɛ besi sua ne. Ne ɔte adwuma kandinga paa, na ne asafo ne yɛlle bie sɔ lle.