Kyɛbɔ Amanyɔnzɛm Atete Mmenia Nu Ne—Nzu Yeɛ Bible Ne Kã Fa Yenwo Ɔ?

Sɛ ɛkɔ ewiase nekaa biala a, ekonwu kyɛ mmeni pẽe yeɛ amanyɔnzɛm atete benu ɔ. Wɔ afoɛ 2022 nu ne, Pew Research Center fale amaneɛbɔ bie tole dwaa kyɛ, “Mmabunu bɔ bɛwɔ maen ahoroɛ 19 nu ne, sɛ bɛye mmenia 100 biala besie berɛ a, benu 65 kã kyɛ, mmenia bɔ bɛwɔ maen nanu ne, ɔnate kyɛ ɔsonõ amanyɔkue bɔ ebiala wɔ nu nati, wamaa benu atete, na daa besu bɛnwo aporowaa.”

Sɛ ɛnea nekaa bɔ ɛte ne a, enwui kyɛ amanyɔnzɛm atete mmenia nu anaa? Sɛ sɔ a, nzuati ɔ? Na ɔkɔyɛ sɛɛ né wafi berɛ? Yɛnea bɔ Bible ne kã ɔ.

Nzu yeɛ wamaa mmenia nu atete sɔ ne?

Bible ne ahã ato berɛ kyɛ, “ayieleɛ mmerɛ” nanu ne, mmenia kɔla subaen biemɔ ali bɔ ɔngɔmaa asomdwee ngɔwa, na ɔngɔmaa mmenia koso ngɔyɛ kõ.

• ‘Ayieleɛ mmerɛ nanu ne, mmerɛ bɔ enu yɛ se kɔwa. Ofikyɛ mmenia kɔyɛ pɛsɛmangomenya, . . . bɛngɔhora ne bɛngɔyɛ apam.’—2 Timoteo 3:1-3.

Mmenia bɔ mmɔden kyɛ bɛkɔboka awaen ahoroɛ ne, kyɛbɔ ɔkɔyɛ a asomdwee kɔwa ɔ, nakoso ɔnyɛ yé. Na mmenia bɔ bɛmva bɛnwo benwura amanyɔnzɛm nu pó ne, bɛpena kyɛ bɛmaa asomdwee ba, nakoso bayɛ alaa ɔnyɛ yé. Bɔ ɔmaa ɔte sɔ yeɛ ole kyɛ, Bible ne alimoa ahã to berɛ dadaada kyɛ, sona ngɔhora ngɔfa asomdwee ngɔwa.

• “Sona fa ye tumi sisi obiɛngõ maa ɔkakyi ye so amaneɛ.”—Nworɛ Dwirɛhanɛniɛ 8:9.

Nakoso, Bible ne maa yenwu kyɛ—nningyein bɔ osisi bɔ ɔmaa mmenia nwu amaneɛ ɛnnɛ ne, Nyameɛ aye ebie kyɛ ɔɔye sɔ haw ne mukoraati ofi berɛ.

Kanifoɛ bɔ ɔfata na ɔdwene sona nwo ɔ

Kanifoɛ bɔ Bible ne kã yenwo dwirɛ kyɛ, ɔkɔye sɔ haw namukoraati kofi berɛ ne, ye yeɛ ole: Yesu Kristo. Yesu le tumi paa, na okuro koso kyɛ ɔkɔfa asomdwee ne kõyɛlɛ kɔberɛ mmenia mukoraati.

• “Ye aberɛ so, ma tenenee obu so, ná asomdwee pẽe ɔbra.”—Edwein 72:7.

• “Ná maen maen amukoraa bɛsõ ye.”—Edwein 72:11.

Yesu te kanifoɛ pá, ofikyɛ ɔdwene sona nwo, na yenye gye yenwo paa kyɛ ɔkɔboka mmenia, ye titire ne, mmenia bɔ besisi bɛ, na bɛbɔ bɛ apoo ne.

• “Ofikyɛ bɛbɔ bɛyɛ anwumvo, ahiafoɛ, ɔne bɛbɔ bellé bokafoɛ ne, besu bɛfrɛ ye a, ɔkɔpepɛ kole bɛ. Okonwu ahiafoɛ ne bɛbɔ bɛyɛ anwumvo ne anwumvoin, na okole ahiafoɛ kra ngõa. Okole bɛ ngõa kofi nhyɛsoɛ ne nzɛmmɔnefoɛ sa nu.”—Edwein 72:12-14.

Nyameɛ Ahennie bɔ ɔwɔ anwuro bɔ Yesu koli so hene ne, bɔ mmɔden kyɛ ekosũa yenwo nikye. Sɛ ɛtá Nyameɛ tumidie sĩ a, nhyiraa beni yeɛ ekonya ye ɔ?

• Nea vidio bɔ yeɛ ole, Nzu Yeɛ Ole Nyameɛpiri Ahennie?

• Kenga edwirɛ he koso, “Onyankopɔn Ahennie—Aban a Kɛtɛasehyɛ ne Porɔeɛ Biara Nnim.”