Koɛ Ahoroɛ Bɔ Ɔkɔ So Ne, Kyinzu Yeɛ Yebo Kɔpɛ Ɔ?—Nzu Yeɛ Bible Ne Ka Fa Yenwo Ɔ?

April 13, 2024 ne, Iran maen ne to wurale Israel maen naso. Na bɔ António Guterres bɔ ɔte UN Secretary-General ne ha fale yenwo yeɛ ole kyɛ: “Odikyɛ yɛnea yé ná tebea ne anné asaa nu. Sɔ mmerɛ he yeɛ odikyɛ ebiala hyɛ yenwo so ɔ.”

Ngondii bɔ ɔkɔso wɔ wiase mukoraati ne, Middle East deɛ ne te nu komapɛ.

“Koɛ bɔ ɔkɔ so kesaalae wɔ wiase nanu ne, ofi Wiase Koɛ II ne si ne, yennwuni bie lle. Koɛ bɔ ɔkɔ so nati, mmenia kɔyɛ 2 billion yeɛ bɛnwo ahyere bɛ ɔ. Kyire kyɛ, ɛkyɛ mmenia bɔ bɛwɔ wiase nanu nna a, benu ko de, koɛ ne ahã bɛ.—United Nations Security Council, January 26, 2023.

Maen ahoroɛ bɔ koɛ kɔso wɔ berɛ ne bie yeɛ ole: Israel, Gaza, Syria, Azerbaijan, Ukraine, Sudan, Ethiopia, Niger, Myanmar, ɔne Haiti.a

Kyinzu yeɛ koɛ hemɔ kɔyakyi ɔ? Aso maen mbanyi nemɔ kɔhora kɔfa asomdwee kɔwa? Na nzu yeɛ Bible ne ka ɔ?

Koɛ ale wiase ne abɔ so

Koɛ bɔ ɔkɔso wɔ wiase mukoraati ne kyire kyɛ, ɔngɔhyɛ ngondii mukoraati bo kɔpɛ. Sɔ koɛ nemɔ maa yenwu mmerɛ deinn bɔ yɛwɔ nu ne. Bible ne ka kyɛ yɛte “ewiase ayieleɛ” mmerɛ nanu. —Mateo 24:3.

• ‘Ɛmɔkɔte koɛ mɔ ne koɛ mɔ nwo amaneɛbɔ. . . . Na maen kodwɔso kotia maen, na ahennie kodwɔso kotia ahennie.’—Mateo 24:6, 7.

Kenga edwirɛ he: “Nneɛma Bɛn Na Esisi a Ɛbɛkyerɛ Sɛ Yɛwɔ “Awiei Mmere” Anaa “Nna a Edi Akyiri” No Mu?” Na ekonwu kyɛ koɛ bɔ ɔkɔso ɛnnɛ ne, ɔboka Bible ngɔmhyɛ naso.

Koɛ bɔ ɔkɔfa koɛ mukoraati kɔwa ayieleɛ ɔ

Bible ne maa yenwu kyɛ, mmerɛ bie kɔwa bɔ koɛ mukoraati bo kɔpɛ. Nakoso, nna sona yeɛ ɔkɔyɛ ɛhe ɔ, na mmom Nyameɛ nate Amagedon koɛ naso yeɛ ɔkɔyɛ sɔ ɔ. Sɔ koɛ ne kɔhɔso wɔ “Tuminiɛ Nyameɛ ye kyẽa piri” nanu. (Nyekyire 16:14, 16) Amagedon koɛ ne si ne, Nyameɛ koli ɛbɔ bɔ wahyɛ mmenia naso, na ɔkɔmaa yekonya asomdwee bɔ olle ayieleɛ.—Edwein 37:10, 11, 29.

Sɛ ɛpenakyɛ enwu Nyameɛ koɛ nanwo dwirɛ pee a, kenga edwirɛ he “Dɛn Ne Armagedon Ko No?”